Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Harajaon ni Debata Mamarenta!

 PASAL 18

Biaya na Dipangke tu Ulaon ni Organisasi

Biaya na Dipangke tu Ulaon ni Organisasi

NA DIULAS DI PASAL ON

Boasa jala songon dia do naposo ni Debata mangurupi ulaon ni Harajaon di parhepengon

1, 2. (a) Songon dia do alus ni donganta si Russell tingki disungkun sahalak rohaniwan songon dia ulaon ni Parsiajar Bibel dibiayai? (b) Aha do na laho taparsiajari di pasal on?

DI SADA tingki, dijumpangi sahalak rohaniwan ma donganta si Charles T. Russell laho mamboto songon dia ulaon ni Parsiajar Bibel dibiayai.

Didok donganta si Russell ma, ”Ndang hea hami manjalo kolekte.”

Disungkun rohaniwan i ma muse, ”Molo songon i, sian dia do hepeng tusi?”

Dialusi donganta si Russell ma, ”Ndang porsea ho annon molo hupatorang taringot i. Tingki ro sasahalak tu parpunguan, ndang dijalo hami kolekte tu ibana, alai taronjar do rohana mangalehon sumbangan ala diboto dihaporluhon do biaya tu parpunguan i. Laos nasida do na mandok, ’Ala dihaporluhon do hepeng . . . Songon dia do bahenonku mangurupi?’”

Ditatap rohaniwan i ma si Russell, patuduhon na so porsea ibana tu hatoranganna i.

Dialusi donganta si Russell ma, ”Nunga hupaboa na sasintongna. Disungkun nasida do ahu, ’Songon dia do hami boi mangurupi ulaon on?’ Tingki adong pansarian ni sasahalak, rade do ibana mangalehon sumbangan tu ulaon Harajaon. Alai, molo so adong do hepengna, paksaonta do ibana mangalehon sumbangan?” *

2 Toho do na nidok ni donganta si Russell i. Sian najolo, dilehon naposo ni Debata do sumbangan laho mangurupi ulaon partondion. Di pasal on, taulas ma songon dia naposo ni Debata na disurat di Bibel dohot di tingkinta on mangurupi ulaon partondion. Huhut taparrohahon i, tasungkun ma dirinta, ’Songon dia do ahu parsidohot mangurupi ulaon Harajaon?’

”Ganup sian Lomo ni Rohana Mamboan Pelean” tu Jahowa

3, 4. (a) Songon dia do Jahowa marpos ni roha tu naposoNa? (b) Songon dia do halak Israel rade mangurupi pajongjongkon tabernakel?

3 Pos do roha ni Jahowa tu naposoNa na marsihohot. Diboto Ibana do, na rade naposoNa mangalehon sumbangan  laho patuduhon holong. Taparrohahon ma dua situasi na masa di tingki ni halak Israel.

4 Dung diurupi Jahowa halak Israel ruar sian Misir, disuru ma nasida pajongjongkon tabernakel manang undungundung, inganan panombaon tu Jahowa. Godang do na dihaporluhon laho pajongjongkon inganan on. Marhite si Musa, diparentahon Jahowa ma tu bangso Israel asa dilehon sumbangan. Ibana mandok asa ”ganup sian lomo ni rohana mamboan pelean” tu Jahowa. (2 Mus. 35:5) Songon dia do alus ni bangso i, hape i dope nasida malua sian parhatobanan? (2 Mus. 1:14) Las do roha ni nasida manjangkon tudutudu i. Rade do nasida mamboan sere (mas), perak dohot na asing na dapot ni nasida sian halak Misir. (2 Mus. 12:35, 36) Dilehon halak Israel do lobi sian na dihaporluhon, alani i disuru ma asa unang ditaruhon nasida be.​—2 Mus. 36:4-7.

5. Songon dia do alus ni halak Israel tingki ditogihon si Daud nasida mangalehon sumbangan?

5 Hirahira 475 taon dungkon i, dilehon si Daud do artana laho pajongjongkon bagas joro laho inganan panombaon na sintong tu Jahowa. Ditogihon si Daud do halak Israel asa dohot mangalehon sumbangan, ”On pe ise do nuaeng na las roha manggohi tanganna mangalehon buas tu Jahowa?” Dilehon bangso i do ”sian nasa rohana . . . margugu tu Jahowa”. (1 Kron. 29:3-9) Taringot tu sumbangan i, didok si Daud do di tangiangna tu Jahowa, ”Marharoroan sian Ho do saluhutna i, jala sian tanganmi do i na hulehon hami tu Ho.”​—1 Kron. 29:14.

6. Boasa dihaporluhon hepeng laho mangulahon ulaon Harajaon di tingkinta on, jala aha do sungkunsungkun na ringkot taboto alusna?

6 Ndang dipaksa si Musa dohot si Daud asa dilehon naposo ni Debata pelean tu Jahowa, alai sian na nionjar ni rohanasida do. Songon dia do saonari? Dihaporluhon do hepeng tu ulaon Harajaon ni Debata. Porlu do godang hepeng laho pabinsarhon jala mambagihon Bibel dohot lektur, pajongjongkon jala mangaradoti inganan parpunguan dohot fasilitas cabang, dung i mangalehon pangurupion tu dongan tingki masa mara. Alani i, sian dia do hepeng laho manggohi ulaon on? Dipaksa do angka siihuthon Jesus mangalehon sumbangan?

Ndang Mangidoido Hami tu Halak Asa Boi Mangulahon I

7, 8. Boasa ndang olo naposo ni Debata mangidoido asa diurupi?

7 Ndang diihuthon donganta si  Russell dohot na asing hasomalan ni angka gareja di tingki i. Edisi paduahon Watch Tower na marjudul ”Lomo do Rohamu tu ’Zion’s Watch Tower’?” paboahon hata ni si Russell na mandok, ”Pos do rohanami, urupan ni JAHOWA do hami mambahen majalah ’Zion’s Watch Tower’. Jala hami, ndang  mangidoido manang mangelek halak mangulahon i. Molo nunga didok ’Nampuna sude sere dohot perak’ ndang adong be hepeng, diantusi hami ma, i ma tingkina asa unang pabinsarhon be.” (Hag. 2:7-9) Lobi sian 130 taon dungkon i, tongtong dope dipabinsar organisasi The Watchtower!

8 Ndang mangidoido naposo ni Jahowa. Ndang dibahen nasida piring kolekte manang surat laho mangido sumbangan. Ndang adong lelang, martigatiga manang undian laho papunguhon hepeng. Marsihohot do nasida tu naung didok di Watch Tower, ”Ndang tama dihilala hami mangido hepeng laho mangulahon ulaon ni Tuan, songon hasomalan na masa . . . Ulaon na so maradat do molo mangidoido hepeng mamangke goar ni Tuan, jala on ndang dihalomohon ibana. Halak na mangalehon dohot na mangulahon on ndang dipasupasu Debata.” *

Ganup ma Mangalehon sian na Nionjar ni Rohana

9, 10. Boasa rade naposo ni Debata mangalehon sumbangan?

9 Rayat ni Harajaon ni Debata ndang porlu dipaksa mangalehon sumbangan. Alai, las do rohanta mangalehon hepeng dohot hamoraon mangurupi ulaon ni Harajaon. Boasa rade hita mangalehon sumbangan? Adong tolu na mambahen hita mangulahon i.

10 Na parjolo, rade do hita mangalehon sumbangan ala tahaholongi Jahowa, jala taulahon ”lomo ni rohana”. (1 Joh. 3:22) Las do roha ni Jahowa tu naposoNa na mangalehon sian na nionjar ni rohana. Taparrohahon ma surat ni si Paulus taringot on. (Jaha 2 Korint 9:7.) Halak Kristen na marsihohot ndang holit, alai mangalehon sian na ”nionjar ni rohana”. * Lapatanna, sasahalak nunga mambahen panimbangion tu na dihaporluhon, dung i dilehon ma sumbangan. Arga do halak sisongon i di adopan ni Jahowa, ala ”dihaholongi Debata do na las roha mangalehon”. Molo di terjemahan na asing didok, ”Dihaholongi Debata do na mangalehon sian na nionjar ni rohana.”

Angka na poso di Mozambik marlas ni roha mangalehon sumbangan

11. Aha do na mangonjar rohanta mangalehon na dumenggan tu Jahowa?

11 Paduahon, rade do hita mangalehon sumbangan ala on dalan mandok mauliate tu pasupasu na dilehon Jahowa tu hita. Taparrohahon ma prinsip sian Patik ni si Musa taringot on. (Jaha 5 Musa 16:16, 17.) Ganup baoa di halak Israel ingkon mamboan pelean na ”hombar tu pasupasu naung nilehon ni Jahowa” tingki mangarayahon tolu ari raya naung ditontuhon tu nasida. Alani i, andorang so ari raya i, ingkon rimangan ni angka baoa do pasupasu na dijalo nasida sian Jahowa jala ringkot pingkirhononna asa mamboan pelean na dumenggan. Dos songon i ma, molo  tarimangi pasupasu na tajalo sian Jahowa, taronjar ma rohanta mangalehon na dumenggan tu Ibana. Silehonlehon na sian nasa roha, dohot ma i hepeng na talehon patuduhon mansai taargai do pasupasu na sian Jahowa tu hita.​—2 Kor. 8:12-15.

12, 13. Songon dia do sumbangan na talehon patuduhon na tahaholongi do Rajanta, jala sadia godang do sumbangan na boi talehon?

12 Na patoluhon, marhite sumbangan tapatudu ma na tahaholongi do Rajanta Jesus. Songon dia do on boi taulahon? Taparrohahon ma hata ni Jesus tu siseanna andorang so mate ibana. (Jaha Johannes 14:23.) Jesus mandok, ”Ganup na holong roha di Ahu, radotan ni i do hatangki.” Sada sian ’hata’ ni Jesus, i ma parenta laho mamaritahon Harajaon ni Debata di liat portibi on. (Mat. 24:14; 28:19, 20) Taulahon do parenta on marhite mangalehon sude na adong di hita, songon tingki, gogo dohot hepeng laho mangurupi ulaon marbarita. On patuduhon tahaholongi do Raja Messias.

 13 Marsitutu do rayat ni Harajaon sian nasa rohana mangurupi ulaon ni Harajaon marhite mangalehon sumbangan. Songon dia do hita mangulahon i? Ingkon hita sandiri do na mambahen putusan taringot i. Talehon ma na dumenggan sian nasa tolapta. Alai godang do donganta na marhahurangan di parhepengon. (Mat. 19:23, 24; Jak. 2:5) Tarapul do roha ni nasida mamboto molo Jahowa dohot Jesus mangargai sude silehonlehon na sian roha, nang pe otik na dilehon.​—Mrk. 12:41-44.

Sian dia do Hepeng na Laho Dilehon?

14. Songon dia do Sitindangi Ni Jahowa mansarhon angka buku saleleng martaontaon?

14 Saleleng martaontaon, disarhon Sitindangi Ni Jahowa do angka buku, jala ditontuhon do sumbangan na laho sijaloon ni nasida tu buku i. Alani i, boi ma sude halak mandapot bukunta. Alai, molo adong parjabu na manjangkon barita na uli alai ndang adong hepengna mangalehon sumbangan, rade do angka parbarita manadingkon buku. Na rumingkot di nasida, i ma mangalehon buku tu halak na olo manjaha jala mandapot laba sian i.

15, 16. (a) Aha do tudutudu na dibahen Punguan na Mangaradoti Organisasi taon 1990? (b) Songon dia do sumbangan na nionjar ni roha dilehon? (Ida ma kotak ” Songon dia do Sumbangan na Dilehon Dipangke?”)

15 Taon 1990, dibahen Punguan na Mangaradoti Organisasi ma tudutudu na baru taringot tu mansarhon buku. Di mula ni taon i, di Amerika Serikat disarhon do angka buku jala ndang ditontuhon be sadia sumbangan na laho dilehon. Surat tu sude huria di negeri i paboahon, ”Majalah dohot lektur diparade tu sude penyiar dohot halak na manjangkon. Ndang ingkon lehonon ni nasida sumbangan asa boi mandapot buku. . . . Ise pe boi do mangalehon sumbangan laho mangurupi ulaon marbarita. Alai, dilehon manang ndang sumbangan, boi do nasida mandapot buku.” Aturan on, patuduhon sian na nionjar ni rohanta do mangurupi halak mananda Debata, jala hita ndang ”mangalansumhon [maniganigahon] hata ni Debata”. (2 Kor. 2:17) Ujungna, tudutudu taringot tu sumbangan on ditontuhon tu sude kantor cabang di liat portibi on.

16 Songon dia do sumbangan on dilehon? Adong do diparade kotak sumbangan di inganan na so patar di Bale Harajaon ni Sitindangi Ni Jahowa. Ganup halak boi mangalehon manang manongos sumbangan tu badan hukum na dipangke ni Sitindangi Ni Jahowa. Ganup taon, dipaboa do cara mangalehon sumbangan di artikel Joujou Paboahon.

Tudia do Dipangke Sumbangan I?

17-19. Paboa ma songon dia sumbangan dipangke tu (a) ulaon di liat portibi on, (b) pajongjongkon Bale Harajaon di liat portibi on, dohot (c) haporluan di huria.

17 Ulaon di liat portibi on. Hepeng na dilehon dipangke mangurupi ulaon marbarita di liat portibi on. Dohot  ma i pabinsarhon angka buku, pajongjongkon dohot mangaradoti kantor cabang, rumah Betel, jala patupahon angka singkola teokratis. Dipangke do muse sumbangan on tu angka misionaris, sintua kaliling, dohot perintis istimewa. Dung i, dipangke laho mangurupi angka donganta na hona mara. *

18 Pajongjongkon Bale Harajaon di liat portibi on. Dipangke do sumbangan mangurupi angka huria pajongjongkon manang padengganhon Bale Harajaon. Jala hepeng na dilehon boi do dipangke mangurupi angka huria na asing. *

19 Haporluon ni huria. Dipangke do hepeng laho mangaradoti Bale Harajaon. Diatur angka sintua do asa adong hepeng na ditongoshon tu kantor cabang na dipangke mangurupi ulaon marbarita di liat portibi on. Alani i, dibahen angka sintua do resolusi tu huria, jala hasilna ditongoshon tu kantor cabang. Ganup bulan, donganta na mangaradoti parhepengon di huria mambahen laporan na laho dijahahon tu huria.

20. Songon dia do hita boi pasangaphon Jahowa marhite ’hamoraon’?

20 Molo tarimangi do sude naung diulahon laho mangurupi ulaon marbarita dohot mambahen sisean di liat portibi on, taronjar do rohanta ’pasangaphon Jahowa marhite hamoraon’. (Poda 3:9, 10) Hamoraonta, i ma dirinta, pingkiranta, dohot partondionta. Las do rohanta mamangke on laho mangurupi ulaon marbarita. Alai taingot ma, boi do talehon arta manang hepeng tu ulaon on. Marsitutu ma hita asa mangalehon aha na boi talehon. Sumbangan na nionjar ni roha boi parohon sangap tu Jahowa, jala mangurupi ulaon ni Pamarentaon ni Messias.

^ par. 1 The Watch Tower 15 Juli 1915, halaman 218-219.

^ par. 8 Watch Tower 1 Agustus 1899, halaman 201.

Sahalak panulingkit mandok molo hata ”na nionjar” lapatanna di bahasa Junani, i ma nunga ”ditontuhon”. Didok muse, ”Nang pe las rohanta mangalehon, alai ringkot asa tongtong tatontuhon mangalehon sumbangan.”​—1 Kor. 16:2.

^ par. 10 Sahalak panulingkit mandok molo hata ”na nionjar” lapatanna di bahasa Junani, i ma nunga ”ditontuhon”. Didok muse, ”Nang pe las rohanta mangalehon, alai ringkot asa tongtong tatontuhon mangalehon sumbangan.”—1 Kor. 16:2.

^ par. 17 Ida ma Pasal 20, laho mandapot hatorangan taringot tu pangurupion tu angka dongan na hona mara.

^ par. 18 Ida ma Pasal 19 taringot tu hatorangan pajongjongkon Bale Harajaon.