Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tiru ma Haporseaon ni Nasida

 PASAL OPAT

”Tu dia pe Ho Laho, Tusi do Ahu Laho”

”Tu dia pe Ho Laho, Tusi do Ahu Laho”

1, 2. (a) Gombarhon ma pardalanan ni si Rut dohot si Naomi jala boasa nasida marsak. (b) Boasa asing pardalanan on di si Rut?

RAP mardalan ma si Rut dohot si Naomi di adaran Moab na mardolokdolok. Gelleng hian do nasida idaon alani bidang ni adaran i. Nunga bot ari, na laho holom nama. Diida si Rut ma tu simatuana huhut dipingkirhon inganan laho marborngin. Holong hian do roha ni si Rut tu si Naomi. Sai dipingkirhon ibana do na dumenggan tu simatuana i.

2 Lungun dope dihilala nasida na dua. Ndang sadia leleng dung mate tungganedoli ni si Naomi, mate ma muse anakkonna, si Kilian dohot si Malon. Si Malon do tungganedoli ni si Rut. Ditadingkon si Rut do huta Moab, jala diihuthon ibana si Naomi tu Betlehem. Alani i, asing do pardalanan i di nasida na dua. Boi tadok, si Naomi mulak tu hutana, alai si Rut ro mandapothon bangso na so hea tinandana. Ditadingkon ibana do keluarga, hasomalan, dohot debatana di Moab.​—Jaha Rut 1:3-6.

3. Aha do sungkunsungkun na mangurupi hita maniru haporseaon ni si Rut?

3 Boasa olo si Rut manadingkon hutana? Boasa pos rohana pinda tu huta na asing mangihuthon si Naomi? Molo talului alusna, dapotta ma sitiruon na denggan sian si Rut, halak Moab i. (Ida ma kotak ” Surat na Jempek Alai Arga”.) Saonari, taparsiajari ma aha do na mambahen si Rut dohot si Naomi mulak tu Betlehem.

Keluarga na Dangol

4, 5. (a) Boasa pinda keluarga ni si Naomi tu Moab? (b) Aha do parungkilon na masa tu si Naomi di Moab?

4 Di Moab do si Rut magodang. Moab, i ma huta na gelleng di sabola timur ni Laut Mate. Godang do disi dolok, rura, dohot tombak. Alani i, napu do tano di ”Moab”. Tingki masa  haleon di Israel, tongtong do adong sipanganon di Moab. Alani i do si Malon dohot keluargana ro tu Moab, dung i pajumpang dohot si Rut.​—Rut 1:1.

5 Tingki masa haleon di Israel, pinda ma si Elimelek, tungganedoli ni si Naomi rap dohot anaknasida tu Moab. Jala disi ma nasida maringanan. Ala ingkon tu Jerusalem do nasida ganup taon manomba Jahowa, mangkorhon do parpindaonna i tu haporseaonnasida. (5 Mus. 16:16, 17) Sai marsihohot do si Naomi tu Jahowa, alai sada tingki lungun ma rohana ala marujung ngolu tungganedolina.​—Rut 1:2, 3.

6, 7. (a) Boasa jut roha ni si Naomi tingki dioli anakna boru Moab? (b) Songon dia do na binahen ni si Naomi tu parumaenna gabe sitiruon?

6 Di pudian ni ari, marsak ma muse si Naomi ala boru Moab do dioli angka anakna. (Rut 1:4) Diboto si Naomi do na binahen ni si Abraham laho mangalului sisomba Jahowa bahen tungganeboru ni si Isak. (1 Mus. 24:3, 4) Dung i, marhite Patik diorai Jahowa do bangso Israel marhasohotan tu bangso na asing, ala boi mambahen nasida manomba debata sileban.​—5 Mus. 7:3, 4.

7 Alai, boru Moab do dioli si Malon dohot si Kilian. Nang pe jut roha ni si Naomi, alai dihaholongi ibana do parumaenna na dua i. Hirim do rohana gabe sisomba Jahowa nasida. Si Rut dohot si Orpa pe dihaholongi do si Naomi. Holong do na patoguhon roha ni nasida tingki ro pangunjunan. Tingki i, nunga mabalu si Rut dohot si Orpa andorang so marianakhon dope nasida.​—Rut 1:5.

8. Aha do na mangonjar roha ni si Rut marsiajar taringot tu Jahowa?

8 Dapot ni si Rut do pangapulion sian agamana tingki marsitaonon ibana? Ndang dapotna. Godang do debata disomba halak Moab, jala na jotjot disomba, i ma dewa Kamos. (4 Mus. 21:29) Jotjot do ulaon ni agama di tingki i jorbut jala parohon hagigion. Songon i do tongtong na masa di Moab, umpamana mamelehon dakdanak tu dewa. Alai, diboto si Rut do sian si Malon dohot sian si Naomi molo Debata Jahowa i, Debata parholong, parasi roha jala imbar sian debata na asing. (Jaha 5 Musa 6:5.) Nang pe lungun roha ni si Rut, alai lam solhot do ibana tu si Naomi. Las do rohana mananda Jahowa, mamboto huasoNa, na tinompaNa, dohot ulaonNa humongkop naposoNa.

Lam solhot do si Rut tu si Naomi tingki marhabot ni roha ibana

9-11. (a) Aha do ditontuhon si Naomi, si Rut dohot si Orpa laho ulahonon ni nasida? (b) Aha do na boi taparsiajari sian parsorion na masa tu si Naomi, si Rut dohot si Orpa?

 9 Dipaima si Naomi do barita sian hutana. Jala diboto ibana ma sian angka partigatiga naung diparrohahon Jahowa muse bangsoNa jala nunga adong muse sipanganon. Nunga songon lapatan ni goarna be Betlehem, i ma ”Inganan ni Sipanganon”. Alani i, mulak ma si Naomi tu Betlehem.​—Rut 1:6.

10 Songon dia do si Rut dohot si Orpa? (Rut 1:7) Lam solhot do nasida tu si Naomi, tarlumobi alani sitaonon na masa tu nasida. Jala si Rut, lomo do rohana mangida haburjuon dohot haporseaon ni si Naomi tu Jahowa. Alani i, borhat ma nasida na tolu tu Betlehem.

11 Taboto ma sian na masa tu si Rut, molo parsorion dohot hamatean mangonai tu sude jolma, na burju manang na jahat. (Pjm. 9:2, 11) Dung i, molo marsak hita ala marujung ngolu na tahaholongi, tapangido ma pangurupion sian donganta, tarlumobi sian halak na marhaporseaon na togu tu Jahowa.​—Poda 17:17.

Si Rut Patuduhon Holong na Marsihohot

12, 13. Boasa disuru mulak si Rut dohot si Orpa tu hutana di Moab, jala songon dia do didok nasida?

12 Dung lam dao ditadingkon nasida huta Moab, holsoan ma muse si Naomi jala marsak. Dipingkiri ibana ma holong ni parumaenna i tu angka anakna dohot tu ibana sandiri. Ndang olo si Naomi manambai sitaonon ni nasida, tarlumobi ala ingkon tadingkonon ni nasida hutana. Aha ma na boi lehonon ni si Naomi tu nasida di Betlehem?

13 Dung i, ninna si Naomi ma tu parumaenna na dua i, ”Laho ma hamu mulak ganup tu bagas ni inana be. Sai marasi ni roha ma Jahowa mamaloshon tu hamu, hombar tu na binahenmuna tu angka na mate dohot tu ahu!” Didok ibana  do muse anggiat ma dilehon Jahowa tu nasida tungganedoli dohot ngolu na denggan. Dung i, ”diumma ma nasida, laos dipangiar be suarana tumatangis”. Alai, ndang olo si Rut dohot si Orpa manadingkon si Naomi, sai diingot nasida do haburjuon ni si Naomi. Alani i, marsitutu do nasida mandok, ”Ingkon udur hita mulak tu bangsom.”​—Rut 1:8-10.

14, 15. (a) Tu dia do si Orpa mulak? (b) Songon dia do didok si Naomi asa olo si Rut manadingkon ibana?

14 Alai, didok si Naomi do muse asa mulak nasida tu Moab, ala ndang adong be na boi sibahenonna tu nasida dung sahat di Israel. Ndang adong be tungganedolina jala ndang boi be ibana manubuhon anak bahen tungganedoli ni parumaenna na dua i. Alani i, mulak ma si Orpa tu Moab ala disi do keluargana, na boi manarihon ibana. Didok roha ni si Orpa, dumenggan ma ibana di Moab. Diumma si Orpa ma simatuana i, dung i mulak ma ibana.​—Rut 1:11-14.

15 Songon dia do si Rut? Bibel paboahon, ”Alai marsihohot ma anggo roha ni si Rut tu [si Naomi].” Ra nunga mardalan si Naomi manadingkon si Rut dohot si Orpa, alai ujungna diboto ma na diihuthon si Rut dope ibana. Didok si Naomi ma, ”Ale inang Rut! Nunga mulak angkangmu, mulak tu bangsona dohot tu ugamona. Ihuthon ma ibana.” (Rut 1:15, Bibel siganup ari) Hata ni si Naomi on patuduhon molo si Orpa mulak tu bangsona dohot tu debatana. Jala sonang do rohana manomba dewa Kamos, debata sileban. Songon i do pangkilalaan ni si Rut?

16-18. (a) Songon dia do si Rut patuduhon holong na marsihohot? (b) Aha do na boi taparsiajari sian si Rut taringot tu holong na marsihohot? (Ida ma gombar ni dua halak borua na di halaman 34 dohot 37.)

 16 Pos do roha ni si Rut mangihuthon si Naomi. Holong do roha ni si Rut tu si Naomi dohot tu Debata Jahowa. Alani i, didok si Rut ma, ”Unang sai dokhon ahu mulak, manadingkon ho. Loas ma ahu rap dohot ho. Manang tu dia pe ho laho, tusi do ahu laho; manang di dia ho maringanan, disi do ahu maringanan. Bangsom na ma bangsongku, jala Debatam na ma Debatangku. Manang di dia ho mate disi do ahu mate, jala disi ma ahu tanomonna. Uhum na posi sian Jahowa, i ma mangonai tu ahu molo gabe sirang ahu sian ho, holan hamatean i na ma na boi manirang ahu sian ho.”​—Rut 1:16, 17, Bibel siganup ari.

”Bangsom na ma bangsongku, jala Debatam na ma Debatangku”

17 Balga do pangkorhon ni hata ni si Rut on tu hita, tongtong do i diingot nang pe 3.000 taon naung salpu i didok ibana. Sian hata ni si Rut i, tarida do parange sitiruon, i ma holong na marsihohot. Parange on ma na mangonjar rohana rade mangihuthon si Naomi tudia pe ibana laho. Holan hamatean do na boi manirang nasida. Ditadingkon si Rut do Moab dohot debatana, alani i bangso ni si Naomi ma na gabe bangsona sandiri. Asing sian si Orpa, pos do roha ni si Rut manomba Debata Jahowa. *

18 Si Rut nama dohot si Naomi na rap mardalan tu Betlehem. Hirahira saminggu ma pardalanan ni nasida asa sahat tu Betlehem. Lungun dope roha ni si Rut dohot si Naomi, alai tarapul do rohanasida ala masiurupan mangadopi sitaonon i.

19. Songon dia do hita boi patuduhon holong na marsihohot di pardongansaripeon, keluarga, paralealeon, dohot di huria?

19 Godang do sitaonon saonari na mambahen hita marsak. Hita mangolu di ”angka ari hasusaan”. (2 Tim. 3:1) Alani i, ringkot do tatiru si Rut na patuduhon holong na marsihohot. Holong sisongon i, mangonjar roha ni sasahalak marsihohot tu na dihaholongi jala ndang olo paluahon i. Porlu do tapatuduhon parange sisongon i di pardongansaripeon, keluarga, paralealeon dohot di huria Kristen. (Jaha 1 Johannes 4:7, 8, 20.) Molo tapatuduhon do holong sisongon i, hita maniru parange ni si Rut.

 Si Rut dohot Si Naomi di Betlehem

20-22. (a) Aha do na tarida muba sian si Naomi dung mulak ibana sian Moab? (b) Songon dia do pandapot ni si Naomi taringot tu hasusaanna? (Ida ma Jakobus 1:13.)

20 Ndang holan hata holong i, ingkon tarida do i marhite parniulaon. Boi do lam tarida holong ni si Rut na marsihohot tu si Naomi dohot tu Jahowa dung sahat nasida di Betlehem.

21 Sahat ma si Naomi dohot si Rut di Betlehem. Huta on, hirahira sampulu kilometer di sabola selatan ni Jerusalem. Godang do na mananda si Naomi dohot keluargana di kota i. On tarida sian godang ni halak na manaringoti ibana tingki mulak tu Betlehem. Godang borua mandok, ”On do hapengani si Naomi?” Ndang pintor ditanda nasida be si Naomi, ala nunga matua hian ibana idaon dibahen godang ni sitaononna di Moab.​—Rut 1:19.

22 Dipaboa si Naomi do hansit ni parngoluonna di Moab tu angka sisolhotna dohot tu hombar jabuna. Didok ibana ma asa diganti goarna, i ma si Naomi manang ”Las ni Rohangku” gabe si Mara, lapatanna ”Paet”! Songon si Job, dirimpu si Naomi do Jahowa na parohon hasusaan i tu ibana.​—Rut 1:20, 21; Job 2:10; 13:24-26.

23. Aha do dipingkirhon si Rut dung sahat di Betlehem jala aha do didok di Patik ni si Musa taringot tu na pogos? (Ida ma surat na di toru.)

23 Dung tading nasida di Betlehem, dilului si Rut ma karejo laho manggohi na ringkot di nasida. Diboto ibana do patik ni Jahowa taringot tu halak na pogos. Boi do nasida ro tu hauma ni halak tingki gotilon laho mamutiki biur ni eme na mardabuan, dohot turiang na so disabi. *3 Mus. 19:9, 10; 5 Mus. 24:19-21.

24, 25. Aha do diulahon si Rut tingki ro ibana tu hauma ni si Boas, jala songon dia do didok na mamutiki biur ni eme?

24 Masa ni gotilon do tingki i di Betlehem, bulan April ma i mangihuthon  kalenderta saonari. Laho ma si Rut tu hauma ni na paloashon ibana mamutiki eme na tading di hauma i. Tingki i, topet do ibana ro tu hauma ni si Boas, sisolhot ni si Elimelek, sahalak baoa na mora. Nang pe marhak si Rut mamutiki eme na tading i, alai parjolo do dipangido ibana tu na mangaradoti angka panabi asa diloas ibana mamutiki eme di hauma i. Dung i, laho ma si Rut mamutiki eme i.​—Rut 1:22–2:3, 7.

25 Pingkirhon ma si Rut mamutiki biur ni eme na madabu sian pudi ni angka panabi. Dung i, dipapungu jala dipaspas ma eme i. Leleng jala loja do mangkarejohon on. Tarlumobi molo mohop ari. Alai, nunut do si Rut mangulahon i, holan satongkin do ibana maradi laho mangan dohot minum ”di bagasan soposopo”.

Ndang losok roha ni si Rut mangulahon karejo na borat asa boi manggohi na ringkot di ibana dohot simatuana

26, 27. Halak na songon dia do si Boas, jala songon dia do ibana maradophon si Rut?

26 Ndang dirimpu si Rut adong na mamparrohahon ibana. Hape, diparrohahon si Boas do ibana. Disungkun si Boas do naposona dung diida si Rut. Si Boas sahalak baoa na toras di partondion. Nang pe parkarejona i ro sian bangso na asing manang holan sadari karejo, alai didok si Boas do tu sude parkarejona i, ”Didongani Jahowa ma hamu!” Dung i, dialusi nasida do muse songon i tu si Boas. Jala songon panarihon ni sahalak ama tu anakna do dibahen si Boas tu si Rut.​—Rut 2:4-7.

27 Dijou si Boas do si Rut ”ito”. Jala dipangido si Boas do asa sai tu haumana ibana mamutiki eme. Disuru do muse si Rut asa sai jonok tu angka panabi borua, unang diganggu  angka panabi baoa. Ditonahon ibana do tu naposona asa diparade sipanganon dohot siinumon ni si Rut. (Jaha Rut 2:8, 9, 14.) Alai na rumingkot, dipuji jala dibahen ibana do las roha ni si Rut. Songon dia on boi masa?

28, 29. (a) Halak na songon dia do si Rut ditanda halak? (b) Songon dia do hita boi maniru si Rut marlinggom tu Jahowa?

28 Disungkun si Rut ma boasa songon i asi ni roha ni si Boas tu ibana, hape ibana halak Moab. Dipaboa si Boas ma naung dibege ibana barita ni si Rut dohot sude pambahenanna tu simatuana. Ra, dipaboa si Naomi do haburjuon dohot holong ni si Rut tu angka borua di Betlehem, jala tarbege ni si Boas do i. Diboto si Boas do naung sisomba Jahowa si Rut. Didok ibana ma, ”Sai dibalos Jahowa ma tu ho uhummu na denggan i, jala ingkon marupa na gok ma ho sian Jahowa, Debata ni Israel, na nidapothonmu, laho marondingonding tu toru ni habonghabongna.”​—Rut 2:12.

29 Tontu, las do roha ni si Rut mambege i! Dipillit si Rut do asa marlinggom tu toru ni habong ni Jahowa, songon anak ni pidong na marlinggom di toru ni habong ni indukna. Mandok mauliate do si Rut tu haburjuon ni si Boas, na mambahen dame rohana. Dung i, diuduti ibana ma muse ulaonna sahat tu bot ari.​—Rut 2:13, 17.

30, 31. Aha do na boi taparsiajari sian cara ni si Rut karejo, pangargaion, dohot holongna na marsihohot?

30 Haporseaon ni si Rut, gabe sitiruon do di hita tingki susa mangalului ngolu siganup ari. Nang pe ndang hirim roha ni si Rut ingkon urupan ni donganna ibana, alai diargai ibana do molo adong na mangalehon pangurupion. Ndang losok rohana mangulahon karejo na borat. Ditangihon ibana do sipaingot asa tarondingi sian halak na jahat jala asa ummura mangulahon ulaon i. Na rumingkot, diingot ibana do Debata Jahowa na tongtong mangalehon parlinggoman tu ibana.

31 Boi ma tiruon ni na asing haporseaonta molo tapatudu holong na marsihohot songon si Rut, serep ni roha, ringgas jala patuduhon pangargaion. Alai, songon dia do Jahowa manggohi na ringkot di ngolu ni si Rut dohot si Naomi? Taparsiajari ma i di pasal na mangihut.

^ par. 17 Ringkot taparrohahon, ndang holan gelar ”debata” didok si Rut songon na somal didok bangso na asing. Dipangke ibana do goar ni Debata, i ma Jahowa. The Interpreter’s Bible mandok, ”Panurat pataridahon molo si Rut halak Moab i, nunga gabe sisomba Jahowa.”

^ par. 23 Balga do pangkorhon ni patik on. Asing do on sian na masa di Moab. Di tingki i, di Wilayah Timur, hansit do dibahen tu ina na mabalu. Sada karya referensi mandok, ”Molo mabalu sahalak ina, anakkonna ma na manarihon ibana, alai molo ndang adong anakna, gabe hatoban, pelacur, manang mandele gabe mate.”