Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL DUAPULU SADA

Marsitutu Mangatasi Biar dohot Ganggu ni Roha

Marsitutu Mangatasi Biar dohot Ganggu ni Roha

1-3. Aha do tanda halongangan na niida ni si Petrus dibahen Jesus, jala aha do na masa tu ibana dung borngin?

DI BORNGIN I, marsitutu do si Petrus mangalugahon parauna hape nunga naeng binsar mata ni ari. Direkrek ma dihilala tanggurungna, ala nunga marjomjom ibana mangalugahon parau i. Nang pe lam balga galumbang ni Tao Galilea, tonu abitna, alai marsitutu do si Petrus mangalugahon parauna i.

2 Jesus ndang rap dohot siseanna. Tingki i, diida nasida do dilehon Jesus marribu halak mangan, marhite lima roti dohot dua dengke. Alani i, naeng paksaon ni na torop i ma Jesus asa gabe raja. Alai, ndang olo ibana parsidohot tu politik jala diajarhon do i tu siseanna. Disuru ibana ma angka siseanna nangkok tu parau jala manaripari tao i, alai anggo Jesus nangkok do tu dolok martangiang sahalakna.​—Mrk. 6:35-45; jaha Johannes 6:14-17.

3 Tiur do bulan tingki borhat sisean i. Alai dung pigapiga kilometer, lam gogo ma alogo dohot galumbang ni tao i jala nunga holom ari. Alani gogona, ndang boi nasida mangkatahatai. Alai, sai dirimangi si Petrus do ulaon ni Jesus.

Nang pe nunga godang diparsiajari si Petrus sian Jesus saleleng dua taon, alai godang dope na ingkon parsiajaranna

4. Boasa denggan molo tatiru si Petrus?

4 Ra, dirimangi si Petrus do na masa saleleng dua taon lobi tingki rap ibana dohot Jesus. Nang pe naung godang na pinarsiajaranna sian Jesus, alai rade do ibana marsiajar mangatasi  hagaleonna, songon biar dohot ganggu ni roha. Alani i, patut do ibana tatiru.

”Nunga Jumpang Hami Messias”

5, 6. Songon dia do parngoluon ni si Petrus?

5 Sai diingot si Petrus do na masa tingki jumpang ibana dohot Jesus. Mulana, dipaboa si Andreas ma tu ibana, ”Nunga jumpang hami Messias.” Hata on mangonjar roha ni si Petrus laho mangihuthon Jesus.​—Joh. 1:41.

6 Si Petrus maringanan di Kapernaum, kota na jonok tu Tao Galilea. Rap manjala dengke do si Petrus, si Andreas dohot anak ni si Sebedeus, i ma si Jakobus dohot si Johannes. Rap tading do si Petrus dohot simatuana, songon i nang anggina si Andreas. Ala ibana do ulu di keluarga, ingkon marsitutu do ibana karejo. Marsitutu do angka panjala saleleng marjomjom manampakhon jalana, dung i manarik mamangke dua parau. Loja do nasida. Sian arian, nasida mamillit dengke, manggadis, padengganhon dohot paiashon jala.

7. Aha do na ditangihon si Petrus taringot tu Jesus, jala boasa on mambahen songgot rohana?

7 Sisean ni si Johannes pandidi do si Andreas. Alani i, manat do ditangihon si Petrus na pinaboa ni si Andreas taringot tu barita na pinasahat ni si Johannes. Tingki i, dipatudu si Johannes ma Jesus na ro sian Nasaret tu si Andreas, huhut didok, ”On do Birubiru ni Debata!” Pintor rade ma si Andreas gabe sisean ni Jesus, jala hatop dipaboa tu si Petrus: Naung ro Messias! (Joh. 1:35-40) Dung na masa di porlak Eden hirahira 4.000 taon andorang so tingki i, marjanji do Jahowa mangalehon pangkirimon tu sude jolma marhite sahalak Sipalua. (1 Mus. 3:15) Nunga jumpang si Andreas dohot Sipalua, i ma Messias! Alani i, songgot ma roha ni si Petrus, jala hatop ma ibana mandapothon Jesus.

8. Aha do lapatan ni goar na nilehon ni Jesus tu si Petrus, jala boasa adong na so sapandapot tu goar i?

8 Andorang na masa i, si Simon manang si Simeon do ditanda halak si Petrus. Alai, tingki diida Jesus ibana, didok ma, ”Si Simon, anak ni si Jonas do ho; si Kepas ma ho goaron (astuanna: Batu mamak, Petrus)!” (Joh. 1:42) Lapatan ni hata ”Kepas” dipatudos tu hata ”batu”, manang ”Batu mamak”. Hombar do hata on tu surirang. Dipatudos Jesus do si Petrus songon batu, na togu, hot, jala boi tarparbaga. Ra, ndang songon i  pandapot ni si Petrus taringot tu dirina, songon i nang angka na manjaha Bibel saonari. Diparhatutu nasida do molo si Petrus halak na mardua roha songon na tarsurat di Bibel.

9. Aha do na diida Jahowa dohot Jesus sian angka jolma, jala boasa boi tahaporseai Nasida?

9 Tutu, adong do hagaleon ni si Petrus jala diboto Jesus do i. Alai, ditiru Jesus do Jahowa, mangalului angka na denggan sian jolma. Diboto Jesus, godang do na boi ulahonon ni si Petrus tu joloan ni ari, jala urupanna do ibana asa marparange hadaulaton. Sai dilului Jahowa dohot Jesus do na denggan sian dirinta. Ra olo do ro tu pingkiranta, ndang godang na denggan taringot tu dirinta na boi idaon ni Jahowa dohot Jesus. Alai, ingkon pos do rohanta tu pangajarion ni Nasida, jala tapatudu ma na rade hita diurupi dohot diajari songon si Petrus.​—Jaha 1 Johannes 3:19, 20.

”Unang Ho Mabiar”

10. Hirahira, aha do na diida si Petrus diulahon Jesus, alai songon dia do ibana dungkon mangida i?

10 Dungkon i, jotjot do ra si Petrus rap marbarita dohot Jesus. Ra, diida ibana ma tanda halongangan na binahen ni Jesus na parjolo, mambahen aek gabe anggur di Kana. Na rumingkot, diparrohahon ibana do barita ni Jesus taringot tu Harajaon ni Debata. Alai, mulak do ibana muse manjala dengke. Pigapiga bulan dungkon i, pajumpang do muse Jesus dohot si Petrus. Alai di tingki i, ditogihon Jesus do si Petrus gabe siihuthon ibana jala dijujui asa patujolohon i di ngoluna.

11, 12. (a) Aha do na masa tingki laho si Petrus manjala dengke? (b) Aha do na boi ro tu roha ni si Petrus dung ditangihon ibana hata ni Jesus?

11 Nunga saborngin si Petrus manjala, alai ndang dapotna agia aha. Mulahulak do disampakkon jalana. Marragam cara dipangke si Petrus laho mamboto didia inganan ni dengke sitangkuponna. Songon panjala na asing, hirim do rohana boi mangida didia dengke i marpungu. Ndang holan hasonangan ni rohana umbahen laho si Petrus manjala dengke. Alai, ulaon on manggohi na ringkot di keluargana. Ujungna, mulak balging ma si Petrus. Nang pe songon i, ingkon tongtong do paiasonna jala i, laos di tingki i ma ro Jesus mandapothon ibana.

Tongtong do las rohana manangihon Jesus patorangkon Harajaon ni Debata

12 Lam torop ma jolma ro manangihon Jesus, alani i nangkok ma Jesus tu parau. Dipangido ma tu si Petrus, asa dionjar parau i dompak tonga, jala sian i ma ibana mangajari na  torop i. Manat do si Petrus dohot na torop i manangihon hata ni Jesus. Tongtong do las rohana manangihon Jesus patorangkon Harajaon ni Debata. Tontu, hak na sumurung do boi mangurupi Kristus pasahathon pangkirimon i tu saluhut negeri! Alai, olo do sungkunsungkun roha ni si Petrus, songon dia do manggohi na ringkot di parngoluan siganup ari? Ra, diingot si Petrus ma muse susa ni ibana manjala dengke.​—Luk. 5:1-3.

13, 14. Aha do tanda halongangan na binahen ni Jesus tu si Petrus, jala songon dia do didok si Petrus?

13 Didok Jesus ma tu si Petrus, ”Lugai ma tu na umbagas jala sampakkon hamu ma jalamuna, asa dapotan.” Dialusi si Petrus ma, ”Guru! Manipat saborngin on do huhalojahon hami, so adong dapot; alai mangasahon hatami olo do ahu sumampakkon.” I dope disunsi ibana jalana. Dung i, ndang di tingki sisongon i dengke mangalului siallangonna! Alai, dioloi si Petrus do Jesus, jala ditogihon angka donganna asa mangihuthon ibana.​—Luk. 5:4, 5.

14 Borat do jala na tinarik ni si Petrus i. Alani i, lam gogo ma ditarik, jala diida ma mansai godang dengke mangangkati di jala i! Dijou ma donganna laho mangurupi. Ndang sae holan sada parau inganan ni dengke i. Diisi nasida ma parau na dua i, gabe gok duansa, pola naeng lonong. Longang situtu ma roha ni si Petrus. Nang pe nunga hea diida ibana Jesus mambahen tanda halongangan tu torop halak, alai dihilala ibana do molo tanda halongangan i, dipatupa tu dirina sandiri! Pingkirhon ma, marhuaso do Jesus mambahen dengke masuk tu jala! On parohon biar tu si Petrus. Didok ibana ma, ”Laho ma Ho sian ahu, Tuhan, ai halak pardosa do ahu!” Dihilala si Petrus, ndang tama ibana rap dohot Jesus na boi mamangke huaso ni Debata.​—Jaha Lukas 5:6-9.

”Halak pardosa do ahu!”

15. Songon dia do Jesus mangurupi si Petrus asa marpos ni roha?

15 Didok Jesus ma tu si Petrus, ’Unang ho mabiar: Olat ni on, gabe sijala jolma ma ho!’ (Luk. 5:10, 11) On ma tingkina ibana ingkon marpos ni roha. Ulaon ni si Petrus manjala dengke laho manggohi na ringkot di keluarga, dohot mabiar alani hagaleonna, ndang mangambati ibana asa unang  mangihuthon Jesus. Ulaon na balga do na laho diulahon Jesus. Jala Jesus mangoloi parenta ni Debata na ”burju manesa dosa”. (Jes. 55:7, Bibel siganup ari) Alani i, Jahowa do na manggohi na ringkot di partondion, nang di parngoluon siganup ari.​—Mat. 6:33.

16. Songon dia do si Petrus, si Jakobus, dohot si Johannes tu Jesus, jala boasa i dalan na dumenggan di ngolunasida?

16 Pintor diihuthon si Petrus, si Jakobus, dohot si Johannes ma Jesus. ”Dipadarat nasida ma angka parau i, ditadingkon ma saluhutna i mangihuthon Ibana.” (Luk. 5:11) Pos do roha ni si Petrus tu Jesus dohot tu Debata. Tontu, on ma dalan ngolu na dumenggan di ngoluna. Saonari, ndang ganggu  jala ndang mabiar halak Kristen manomba Debata, ala pos do rohanasida na tongtong diparrohahon Jahowa halak na marpos ni roha tu ibana.​—Ps. 22:5, 6.

’Boasa ma Pola Ganggu Roham?’

17. Aha do na masa tu si Petrus dung ditanda ibana Jesus saleleng dua taon?

17 Dung dua taon si Petrus rap dohot Jesus, mulak do ibana muse manjala di Tao Galilea. Di borngin i, sai marpingkiri do si Petrus nang pe gogo alogo. Nang pe ndang taboto aha di bagas roha ni si Petrus, alai nunga godang diparsiajari ibana tingki rap dohot Jesus! Dipamalum Jesus do simatua ni si Petrus, dibege ibana do jamita ni Jesus di dolok. Jotjot do dipatudu Jesus sian ajaran dohot ulaonna, molo ibana Messias na pinillit ni Jahowa. Dung marbulanbulan, moru ma biar dohot ganggu ni rohana. Dipillit Jesus do si Petrus gabe sahalak sian 12 apostelna. Alai satongkin nai, botoon ni si Petrus ma ndang togu dope haporseaonna.

18, 19. (a) Gombarhon ma na niida ni si Petrus di Tao Galilea. (b) Aha do alus ni Jesus tu si Petrus?

18 Hirahira pukul 3.00 manogot, tarsonggot ma si Petrus ala diida adong na mardalan di ginjang ni aek i. Ndang dilugahon ibana be parauna i. Dirimpu rohana halinu ni galumbang do i. Dung lam dipamanat, ndang halinu i, ala ndang molengoleng. Alai, adong halak mardalan di ginjang ni aek i. Dung lam jonok tu nasida, mabiar jala dirimpu sisean ma i begu. Didok na mardalan i ma, ”Pos ma rohamuna, Ahu do! Unang hamu mabiar!” Tutu, Jesus do na mardalan i!​—Mat. 14:25-28.

19 Didok si Petrus ma, ”Ale Tuhan, anggo Ho do hape, dokkon ahu ro mandapothon Ho, mardalan sian aek i!” Sian alusna on, barani do si Petrus jala lomo do rohana naeng mangkilala sandiri tanda halongangan i. Ditogihon Jesus ma ibana asa ro. Tuat ma si Petrus sian parau, jala didalani ma tao i. Songon dia do pangkilalaanna tingki boi mardalan di atas ni aek i? Longang situtu rohana boi mardalan mandapothon Jesus. Alai, muba ma muse pangkilalaanna.​—Jaha Mateus 14:29.

”Mamereng alogo na gogo i, mabiar ma ibana”

20. (a) Boasa ganggu roha ni si Petrus, jala aha do pangkorhonna? (b) Aha do didok Jesus tu si Petrus?

20 Ingkon porsea do si Petrus tu Jesus. Marhite huaso ni Jahowa do umbahen na boi dibahen Jesus ibana mardalan di  atas ni aek i. Jala haporseaon ni si Petrus do mambahen Jesus mangulahon i. Dipaboa tu hita, ”Mamereng alogo na gogo i, mabiar ma ibana.” Ganggu ma rohana dung diida galumbang i. Dipingkirhon ibana ma muse molo lonong ibana. Alani i, gabe gale ma haporseaonna. Baoa na digoari Batu Mamak on, nunga lonong songon batu ala lam gale haporseaonna. Nang pe malo si Petrus marlange, alai ndang dipangasahon ibana gogona sandiri. Didok ibana, ”Tuhan, palua ahu!” Ditangkup Jesus ma tanganna jala ditarik. Di ginjang ni aek i dope nasida, didok Jesus ma, ”E ho, siotik haporseaon; aha ma pola ganggu roham?”​—Mat. 14:30, 31.

21. Boasa ndang denggan ganggu ni roha, jala songon dia do mangatasi i?

21 ’Pola ma ganggu roham?’ Hata na pas manggombarhon pangkilalaan ni si Petrus! Molo tapasombu do ganggu ni roha, boi ma sega haporseaonta. Porlu do hita marsitutu mangalo i. Songon dia carana? Molo tongtong do tapingkirhon angka na mambahen hita mabiar, na mambahen hita marmetmet ni roha, gabe mandao ma hita sian Jahowa dohot Jesus, jala on patuduhon nunga ganggu rohanta. Alai, molo tarimangi do aha naung diulahon dohot na laho siulahonon ni Jahowa dohot Jesus tu hita, lam togu ma haporseaonta.

22. Boasa denggan tatiru haporseaon ni si Petrus?

22 Lam moru ma galumbang ni aek i diida si Petrus tingki diihuthon ibana Jesus mardalan tu parau. Didok si Petrus dohot sisean na asing ma, ”Tutu do Ho Anak ni Debata!” (Mat. 14:33) Dung lam tiur ari, las situtu ma roha ni si Petrus. Ndang ganggu be rohana jala ndang mabiar. Tutu do, ingkon bahenonna do godang hamubaon di dirina, andorang so gabe sahalak Kristen na togu, songon batu na niida ni Jesus. Alai, marsitutu do ibana asa mangulahon i, jala tongtong mambahen hamubaon. Marsangkap do hita naeng mangulahon i? Satolop do hita, molo haporseaon ni si Petrus gabe sitiruon di hita.