Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tiru ma Haporseaon ni Nasida

 PASAL SAMPULU SIA

Manarihon Keluargana jala Marsihohot tu Debata

Manarihon Keluargana jala Marsihohot tu Debata

1, 2. (a) Aha do na laho masa di parngoluon ni si Josep? (b) Aha do barita na laho paboaon ni si Josep tu si Maria?

DIPEAKKON si Josep ma siboanonna tu halode i. Holom dope ari nunga borhat si Josep manadingkon Betlehem. Sai dipingkiri si Josep do dao ni pardalanannasida tu Misir! Ra, sungkunsungkun do rohana songon dia ma keluargana mangadopi hasomalan, bahasa dohot halak di inganan i.

2 Ndang mura di si Josep paboahon barita na binegena sian surusuruan i tu si Maria, alai dipapos ma rohana. Dipaboa ma tu si Maria hata ni surusuruan na mangkatai marhite nipina, na mandok molo raja Herodes marsangkap laho mambunu anakna i! Alani i, porlu nasida hatop laho sian i. (Jaha Mateus 2:13, 14.) Sungkunsungkun ma si Maria, boasa adong halak na marsangkap mambunu anakna i? Nang pe ndang diboto alusna, alai porsea do nasida tu Jahowa, pintor marhobas ma nasida.

3. Paboa ma songon dia pardalanan ni si Josep dohot si Maria sian Betlehem. (Ida ma gombar.)

3 Tarpodom dope halak di Betlehem nunga borhat keluarga ni si Josep tu arah selatan. Dipingkirhon si Josep ma, songon dia do sahalak tukang boi mangalinggomi keluargana sian raja? Boi do ibana manggohi na ringkot di keluargana? Boi do ibana pagodanggodangkon Jesus, anak hasurungan i? Borat do tanggung jawab ni si Josep. Dung taboto songon dia si Josep mangulahon tanggung jawabna, taboto ma boasa ringkot hita dohot angka ama di keluarga, maniru haporseaon ni si Josep.

Dilinggomi Si Josep do Keluargana

4, 5. (a) Songon dia do parngoluon ni si Josep gabe muba? (b) Aha do didok surusuruan laho paposhon roha ni si Josep?

4 Sataon andorang na masa i, nunga muba parngoluan ni si Josep di Nasaret, dung martunangan ibana tu si Maria, boru ni si Eli. Ditanda si Josep do si Maria, anak boru na  marhaporseaon jala na marserep ni roha. Alai, dung diboto gabegabean si Maria, marsangkap do si Josep manirangkon ibana di na so pamotoan ni halak, asa unang maila ibana. * Alai marhite nipi, dipatorang surusuruan do tu ibana molo si Maria gabegabean alani tondi parbadia. Taringot tu posoposo i, dipaboa surusuruan i do na laho ’paluaonna do bangso ni Debata sian angka dosanasida’. Dipapos ma muse roha ni si Josep tingki didok, ”Unang alang roham mangalap si Maria, gabe donganmu saripe.”​—Mat. 1:18-21.

5 Sahalak baoa na marsihohot do si Josep. Rade do ibana pagodanggodangkon jala mangajarajari anakna i, nang pe ndang tubuna sandiri. Di pudian ni ari, diboan si Josep ma si Maria tu Betlehem, laho mangulahon parenta ni Kesar. Laos disi ma ditubuhon anakna i.

6-8. (a) Aha do muse na masa tu keluarga ni si Josep? (b) Aha do na patuduhon molo ”bintang” i marharoroan sian Sibolis? (Ida surat na di toru.)

6 Ndang mulak be si Josep tu Nasaret. Maringanan ma nasida di jabu na gelleng di Betlehem, pigapiga kilometer sian Jerusalem. Nang pe pogos, marsitutu do si Josep manggohi na ringkot di si Maria dohot di Jesus. Alai, dung lam magodang Jesus, hirahira marumur sataon lobi, muba ma muse parngoluon ni nasida.

7 Ro ma angka parhapistaran sian Timur, ra sian Babel. Alani tudutudu sian sada ”bintang”, sahat ma nasida tu jabu ni si Josep dohot si Maria. Dilului nasida ma dakdanak na laho raja ni halak Jahudi i. Burju do parhapistaran i tu nasida.

8 Di na so pamotoan ni angka parhapistaran i, ulaonnasida parohon jea tu Jesus. ”Bintang” i, mangurupi nasida sahat tu Jerusalem, ndang pintor tu Betlehem. * Alani i, dipaboa angka parhapistaran i ma tu Raja Herodes molo nasida ro mangalului dakdanak na laho raja ni halak Jahudi. Tarsonggot jala sogo ma roha ni si Herodes mambege i.

9-11. (a) Songon dia do Jahowa patuduhon huasoNa tu si Herodes manang Sibolis? (b) Songon dia do pardalanan ni si Josep tu Misir imbar tu hatorangan na pinaboa ni turiturian ni apokrifa?

9 Alai, adong do huaso na gumogo martimbangkon huaso ni si Herodes dohot huaso ni Sibolis. Songon dia do on boi  masa? Dung sahat di jabu ni si Josep, dilehon angka parhapistaran i ma silehonlehon tu nasida. Ndang hirim roha ni si Josep dohot si Maria mandapot ”sere, haminjon dohot angka na angur”. Marsangkap hian do parhapistaran i paboahon tu raja didia inganan ni dakdanak i. Alai, dipinsang Jahowa ma nasida asa mulak marhite dalan na asing.​—Jaha Mateus 2:1-12.

10 Dung laho parhapistaran i, dipasingot Jahowa ma si Josep marhite surusuruan na mandok, ”Hehe ma ho, boan ma Dakdanak i rap dohot inana i, maporus ma hamu tu tano Misir; disi ma hamu jolo, paima ro muse hatangku, ai na naeng luluan ni si Herodes do Dakdanak i, asa bunuonna.” (Mat. 2:13) Songon na dipaboa di mula ni pasal on, pintor borhat do si Josep. Dipatujolohon ibana do haluaon ni anakna i. Diboan ma keluargana borhat tu Misir. Marhite silehonlehon ni angka parhapistaran i, adong ma bohal ni nasida mangolu di Misir.

Ditadingkon si Josep do parkarejoanna dohot ingananna laho mangalinggomi ianakhonna

11 Imbar situtu do hatorangan on tu na pinaboa ni turiturian ni apokrifa, na patuduhon marhite tanda halongangan do Jesus sahat tu Misir. Dipaboa muse, ditaluhon Jesus do angka panamun jala dibahen do bengkok hau ni kurma asa boi buaton ni si Maria parbuena. * Alai sasintongna, dao do pardalanan i, loja, jala ndang diboto nasida aha na laho masa tu nasida.

Marsitutu do si Josep manggohi na rumingkot di keluargana

12. Aha do na boi diparsiajari angka natuatua sian si Josep?

12 Si Josep gabe sitiruon na denggan tu natuatua. Ditadingkon si Josep do parkarejoan dohot ingananna laho mangalinggomi keluargana. Sada hak na sumurung do on dihilala si Josep. Saonari, marsitutu do angka natuatua mangalinggomi ianakhonna sian mara, dohot ulaon na manegai roha dohot pingkiran ni angka na poso. Tama do mandapot pujian angka natuatua, ala marsitutu mangalinggomi ianakhonnasida, songon si Josep!

Diparade Si Josep do Angka na Ringkot di Keluargana

13, 14. Aha do na mambahen si Josep dohot si Maria maringanan di Nasaret?

13 Ndang leleng nasida tading di Misir, ala dipaboa surusuruan i do tu si Josep naung mate raja Herodes. Diboan si Josep  ma muse keluargana mulak tu tano hatubuanna. On manggohi surirang ni Jahowa na manjou AnakNa ”sian Misir”. (Mat. 2:15) Alani i, parsidohot do si Josep manggohi surirang on. Alai, tu huta dia do boanonna keluargana i?

14 Manat do si Josep mambahen haputusan. Manat jala ingkon marbisuk do ibana mangadopi anak ni si Herodes, i ma si Arkilaus na kejam. Borhat ma si Josep rap dohot keluargana tu utara, laho tu Nasaret di Galilea na dao sian Jerusalem. Disi ma nasida maringanan.​—Jaha Mateus 2:19-23.

15, 16. Aha do karejo ni si Josep, jala aha do alat na dipangke ibana?

15 Ndang na mora si Josep, alai ringgas do ibana mulaulaon. Disurat do di Bibel ibana sahalak tukang. Ulaon ni sahalak tukang dohot ma i manaba hau, mamboan jala patupahon hau i asa boi dipangke mambahen jabu, parau, jambatan na gelleng, padati, roda, auga, dohot ragam ni alat laho mangula. (Mat. 13:55) Tontu ulaon na borat do on. Di tingki i, jotjot do tukang mambahen ingananna karejo di jolo manang di samping ni jabuna.

16 Marragam do alat na pinangke ni si Josep. Ra, deba sian i puna ni amana hian. Dipangke si Josep do sikusiku, batu lot, bonang pangungkur, kampak na gelleng, gargaji, beliung, tokkok bosi, tokkok hau, pahat, bor songon busur, ragam ni lem dohot labang. Ra, arga do deba sian alat on.

17, 18. (a) Aha do na boi diparsiajari Jesus sian si Josep, amana? (b) Boasa ingkon lam marsitutu si Josep mulaulaon?

17 Pingkirhon ma songon dia Jesus tingki gelleng mamparrohahon si Josep martukang. Manat do diparrohahon ibana ganup ulaon ni bapakna i. Las do rohana mangida gogo ni tangan ni si Josep, jala malo ni bapakna i tingki mangungkur dohot mamonggol hau i. Ra, nunga diajari si Josep anakna i pahalushon hau mamangke kulit ni dengke na mahiang. Dipaboa do muse tu ibana ragam ni hau na dipangke, songon hau ara harangan, hau maranti manang hau jetun.

Dilatik si Josep do anakna gabe partukang

18 Nang pe gogo tangan ni si Josep laho manaba, mambola  hau jala martukang, alai lambok do ibana mangkaholongi Jesus, si Maria dohot angka hahaanggi ni Jesus. Ra, tingki i nunga adong onom halak anggi ni Jesus. (Mat. 13:55, 56) Alani i, ingkon lam marsitutu do si Josep mulaulaon asa boi mangalehon mangan keluargana.

Na rumingkot ulahonon ni si Josep, i ma manggohi partondion ni keluargana

19. Songon dia do si Josep manggohi na ringkot di partondion ni keluargana?

19 Diboto si Josep do siulahononna na rumingkot, i ma manggohi partondion ni keluargana. Ingkon paradeonna do tingki laho mangajari ianakhonna asa mananda Jahowa dohot angka patikNa. Diboan si Josep dohot si Maria do muse ianakhonna tu angka parguruan (sinagoga), inganan ni Patik ni Jahowa dijahahon jala dipatorang. Dung i, marsitutu do si Josep mangalului alus ni sungkunsungkun ni Jesus na ringkot tu partondion. Ditogihon si Josep do muse keluargana tu Jerusalem laho mangulahon angka ari raya. Dung i tingki Paska tahunan, dihaporluhon nasida do tingki saleleng dua minggu laho mardalan hirahira 120 kilometer, mangarayahon ari Paska, dung i mulak muse tu hutana.

Diboan si Josep do keluargana tu bagas joro di Jerusalem laho manomba Jahowa

20. Songon dia do angka ulu di keluarga mangihuthon na binahen ni si Josep?

20 Saonari, angka ulu di keluarga mangihuthon na binahen ni si Josep. Nang pe diboto nasida ringkot mangalului hepeng laho manggohi haporluon ni keluarga, alai na rumingkot di nasida, i ma mangajari ianakhonna mananda Jahowa. Marsitutu do nasida mangulahon panombaon na sasaripe, mamboan ianakhonna tu parpunguan dohot tu kebaktian. Songon si Josep, diboto natuatua do molo ulaon on ma na dumenggan di ianakhonna.

Susa do Pingkiran

21. Songon dia do pardalanan ni keluarga ni si Josep tu Jerusalem?

21 Tingki marumur 12 taon Jesus, songon na somal diboan si Josep do ibana laho mangarayahon ari Paska. Rap sauduran do nasida dohot sisolhotna mamolus angka huta di musim semi. Huhut do nasida mangendehon ende sian Psalmen tingki laho nangkok tu Jerusalem. (Ps. 120-134) Ro do marratus ribu halak tu kota i. Dung sae perayaan i, borhat ma muse  angka na sasaripe mulak tu hutana be. Ala godang siparesoon ni si Josep dohot si Maria, dirimpu nasida ma naung rap Jesus dohot sisolhotna mulak tu hutana. Dung salpu sadari pardalanan ni nasida sian Jerusalem, diboto nasida ma na so dohot Jesus mulak. On mambahen nasida busisaon!​—Luk. 2:41-44.

22, 23. Aha do na diulahon si Josep dohot si Maria dung diboto ndang rap nasida dohot Jesus, jala aha do didok si Maria?

22 Mulak ma muse si Josep dohot si Maria tu Jerusalem laho mangalului anakna i. Tapingkirhon ma, nunga lungun kota i, jala saleleng di pardalanan sai dijou nasida ma goar ni anakna i. Didia do anakna i? Dung tolu ari dilului nasida, ra marsak ma si Josep ala dihilala ndang boi diradoti ibana tanggung  jawab na nilehon ni Jahowa tu ibana. Laho ma nasida tu bagas joro. Jumpang nasida ma angka siboto surat na mangantusi Patik marpungu di bagas joro, jala hundul ma Jesus di tongatonga ni nasida! Dapot rohanta do pangkilalaan ni si Josep dohot si Maria tingki i!​—Luk. 2:45, 46.

23 Marsitutu do Jesus manangihon angka siboto surat i, jala godang do sungkunsungkunna tu nasida. Longang do roha ni nasida tu pangantusion dohot alus ni Jesus. Jala songgot do roha ni si Josep dohot si Maria mangida na masa i. Sian hatorangan ni Bibel, taboto ma sip do si Josep tingki i. Alai, didok si Maria do, ”Boasa dibahen Ho songon i tu hami, anaha? Bernit do huahap hami dohot amangmu mangalului Ho.”​—Luk. 2:47, 48.

24. Songon dia do Bibel patuduhon na laho diadopi angka natuatua?

 24 Tarida do sian ayat i na boi mambahen marsak angka natuatua. Susa do pingkirannasida nang pe ianakhonnasida halak na so mardosa! Tarlumobi ma pagodanggodangkon ianakhon di portibi na jahat on. Alai tarapul ma rohanasida, ala disurat do di Bibel angka parsoalan na diadopi nasida.

25, 26. Songon dia do alus ni Jesus jala songon dia do pangkilalaan ni si Josep manangihon i?

25 Las situtu do roha ni Jesus tingki di bagas joro, ala boi lam solhot paralealeonna tu Jahowa. Di inganan i, boi ma diparsiajari ibana godang taringot tu Jahowa. Alani i ma didok ibana tu natuatuana, ”Boasa pola luluanmuna Ahu? Ndang diboto hamu, na patut Ahu di bagasan bagas ni Damang?”​—Luk. 2:49.

26 Sai dirimangi si Josep do mulahulak sungkunsungkun i. Las do rohana ala marlaba do pangajarion na nilehonna tu Jesus. Marsitutu do si Josep mangurupi Jesus asa jonok tu Jahowa. Nang pe poso dope Jesus, nunga diantusi ibana songon dia ama na burju jala parholong roha, tarlumobi ala solhot ni paralealeonna tu si Josep.

27. Boasa didok sada hak na sumurung do gabe sahalak ama, jala boasa ringkot ingotonmu sitiruon ni si Josep?

27 Molo hamu sahalak ama, ingot ma, sada hak na sumurung do i. Hamu boi mangurupi ianakhonmu mangantusi molo Jahowa sahalak Ama na burju jala parholong. Alani i, molo adong anak tirimu, ingot ma sitiruon sian si Josep. Patudu ma pangargaion tu ianakhonmu, jala marsitutu ma mangantusi roha ni nasida. Urupi ma nasida asa lam jonok tu Ama ni nasida, i ma Jahowa.​Jaha  Epesus 6:4.

 Marsihohot do Si Josep tu Debata

28, 29. (a) Aha do na pinatudu ni Lukas 2:51, 52 taringot tu si Josep? (b) Aha do na sai diajarhon si Josep tu Jesus?

28 Saotik do hatorangan taringot tu si Josep di Bibel, alai ringkot do i taparrohahon. Didok di Bibel, ”pangoloi” do Jesus tu natuatuana. Dipaboa muse, ”Lam ganda ma [habisuhon] ni Jesus nang dagingna, lam dihalomohon Debata nang jolma Ibana.” (Jaha Lukas 2:51, 52.) Aha do na taboto sian ayat i? Adong pigapiga. Ala rade do halak na so mardosa patuduhon unduk ni roha tu si Josep, taboto ma na tongtong do denggan diuluhon si Josep keluargana.

29 Dipaboa do di ayat i, na lam marbisuk Jesus. Ra, on binahen ni pangurupion ni si Josep. Adong do umpasa ni halak Jahudi na mandok, holan halak na sonang do parngoluonna boi marbisuk. Alai, partukang, partani dohot pande bosi ”ndang diboto taringot tu hatigoran dohot bisuk; jala nasida ndang hea dipaboa di angka tarombo”. Alai, dipatuduhon Jesus do na so tutu hata on. Sian dakdanak, jotjot do ditangihon ibana bapakna mangajarhon ”hatigoran dohot bisuk” ni Jahowa, nang pe sahalak tukang si Josep!

30. Songon dia do si Josep gabe sitiruon tu angka ulu di keluarga saonari?

30 Dung dolidoli Jesus, tarida ma laba ni pangurupion ni si Josep. Diajari si Josep do Jesus gabe partukang na malo, jala ditanda do ibana ”tukang”. (Mrk. 6:3) Alani i, ringkot do angka ulu ni keluarga maniru si Josep, na denggan pagodanggodangkon ianakhonna asa gabe halak na boi mangurus dirina sandiri.

31. (a) Nandigan do si Josep marujung ngolu? (Ida ma  kotak.) (b) Aha do sitiruon sian si Josep?

31 Dung tardidi Jesus di umur 30 taon, ndang hea be dipaboa taringot tu si Josep. On patuduhon, nunga mabalu si Maria dung tardidi Jesus. (Ida ma kotak ” Nandigan do Si Josep Marujung Ngolu?”) Alai, sitiruon sian si Josep patuduhon molo ibana sahalak ama na manarihon keluargana jala na marsihohot tu Debata. Ganup ama, ganup ulu di keluarga, jala ganup halak Kristen ingkon maniru haporseaon ni si Josep.

^ par. 4 Di tingki i, dos do uhum dibahen tu halak na martunangan dohot tu na marhasohotan.

^ par. 8 ”Bintang” na nidokna dison, ndang parhusor ni angka bintang; jala on ndang marharoroan sian Jahowa. Tangkas ma, marsangkap do Sibolis laho mambunu Jesus mamangke tanda halongangan on.

^ par. 11 Tangkas do dipatudu di Bibel ”tanda na parjolo, na binahen ni Jesus”, i ma ndang leleng dung tardidi ibana.​—Joh. 2:1-11.