1, 2. (a) Boasa marsak si Hanna tingki laho nasida tu Silo? (b) Aha do parsiajaran na tadapot sian si Hanna?

ASA unang sai dipingkiri hasusaanna, dihobasi si Hanna ma siboanonna tu Silo. Ganup taon, diboan si Elkana do keluargana tu tabernakel di Silo. Dihalomohon Jahowa do asa marlas ni roha naposoNa di tingki sisongon i. (Jaha 5 Musa 16:15.) Tontu, las do roha ni si Hanna dohot tu perayaan i sian na gelleng. Alai saonari, ndang songon i be dihilala ibana.

2 Dua do nioli ni si Elkana, i ma si Hanna dohot si Pininna. Dilului si Pininna do dalan laho mambahen hansit roha ni si Hanna. Dibahen ibana do hansit roha ni si Hanna tarlumobi tingki perayaan ganup taon. Songon dia do dibahen ibana? Songon dia do haporseaon ni si Hanna mangurupi ibana mangadopi hasusaan i? Molo adong hasusaan na mambahen mago las ni rohanta, boi do hita diurupi marhite sitiruon sian si Hanna.

Boasa Marsak Ho?

3, 4. Aha do parsoalan na masa tu si Hanna, jala boasa borat parsoalan i?

3 Bibel patuduhon, adong dua parsoalan ni si Hanna. Na parjolo, adong imbangna. Na paduahon, ndang boi ibana marianakhon. Alai umborat do parsoalan na paduahon i diadopi ibana. Susa do pangkilalaan ni sahalak borua molo so boi marianakhon. Di tingki ni si Hanna, ianakhon do manorushon goar ni keluarga. Dung i, hailaon do molo ndang boi marianakhon di tingki i.

4 Molo ndang alani si Pininna, ndang pola balga sitaonon ni si Hanna. Alani i tarida ma sian on, parohon hansit ni roha, parbadaan, dohot pangiburuon do molo marimbang na mardongan saripe. Ndang songon i hian sangkap ni Jahowa sian mulana. (1 Mus. 2:24) Digombarhon do di Bibel, marimbang  parohon hasusaan. Hasusaan na masa di keluarga ni si Elkana ma sada na patuduhon i.

5. Boasa las roha ni si Pininna mambahen hansit roha ni si Hanna, jala songon dia do ibana mangulahon i?

5 Humolong do roha ni si Elkana tu si Hanna. Songon na dipaboa di tarombo ni halak Jahudi, jumolo do si Hanna dioli si Elkana, alai pigapiga taon dungkon i dioli ma muse si Pininna. Nang pe ndang taboto na sasintongna, alai mangiburu do si Pininna tu si Hanna, jala sai dilului do dalan mambahen marsak ibana. Ginjang do roha ni si Pininna, ala boi ibana marianakhon. Dipaboa di Bibel, sai dibahen si Pininna do hansit roha ni si Hanna. (1 Sam. 1:6) Las do roha ni si Pininna molo marsak si Hanna, jala dituntun ibana do mambahen songon i.

Lungun situtu do roha ni si Hanna ala ndang boi marianakhon, jala sai dilului si Pininna do dalan mambahen marsak ibana

6, 7. (a) Boasa ndang dipaboa si Hanna tu si Elkana sude na binahen ni si Pininna tu ibana?(b) Dihaholongi Jahowa do si Hanna nang pe ndang boi ibana marianakhon? Patorang ma. (Ida surat na di toru.)

6 Jotjot do tingki perayaan di Silo dibahen si Pininna dalan laho mambahen hansit roha ni si Hanna. Tingki mamelehon peleanna si Elkana, dilehon do saparbagianan be sian i tu ganup anak dohot boru ni si Pininna. Alai, sumurung dilean tu si Hanna na hinaholonganna. Alani i, mangiburu ma si Pininna jala dibahen hansit roha ni si Hanna. Sai tangis ma si Hanna jala ndang olo mangan. Ala diida si Elkana marsak na hinaholonganna, disungkun ibana ma, ”Ale Hanna, boasa tung tumatangis ho? Jala boasa so olo ho mangan? Jala boasa sai gondok roham? Nda tagonan ahu di ho sian anak sampulu?”​—1 Sam. 1:4-8.

7 Tapujihon do si Elkana ala diantusi ibana pangkilalaan ni si Hanna, na marsak ala ndang boi ibana marianakhon. Tontu, las do roha ni si Hanna ala diparrohahon si Elkana ibana. * Alai, ndang adong ditaringoti si Elkana pambahenan ni si Pininna i, jala ndang dipaboa di  Bibel molo si Hanna paboahon i tu si Elkana. Molo dipaboa si Hanna pangalaho ni si Pininna i, songon dia ma bahenon ni si Elkana? Nda lam sogo ma roha ni si Pininna, ianakhonna, dohot naposona tu si Hanna? Tontu, lam dihasogohon ma si Hanna alani i.

Tingki adong na mambahen susa rohana di jabu, dilului si Hanna do pangurupion sian Jahowa

8. Molo manaon hasusaan hita alani uhum na so tigor, boasa tarapul rohanta mamboto Jahowa Debata na tigor?

8 Nang pe ndang diboto si Elkana, alai diboto Jahowa do sude na niulahon ni si Pininna. Bibel paboahon tu hita na so denggan pambahenan ni si Pininna i, jala dipaingot do hita asa unang mangiburu manang marsogo ni roha tu na asing. Parsiajaran na asing tu hita, i ma pasupasuon ni Jahowa do halak na lambok roha jala patuduhononNa do hatigoran di tingkina. (Jaha 5 Musa 32:4.) Tontu, diboto si Hanna do taringot i, ala tu Jahowa do dipangido ibana pangurupion.

”Ndang Marsak be Ibana”

9. Aha do parsiajaran sian si Hanna ala dohot do ibana tu Silo nang pe diboto hasusaan na laho diadopi?

9 Marhobas ma keluarga ni si Elkana manogot i laho borhat tu Silo. Dao ni pardalanan ni nasida lobi sian 30 kilometer, nangkok mamolus Epraim. * Sadari manang dua ari ma nasida mardalan pat asa sahat tu Silo. Diboto si Hanna do songon dia bahenon ni si Pininna tu ibana, alai dohot do ibana tu Silo. Sitiruon na denggan do tu angka naposo ni Jahowa. Unang ma taloas parange ni na asing manggugai panombaonta tu Jahowa. Molo ndang tatadingkon parpunguan, dapotta ma pasupasu dohot gogo laho mangadopi hasusaan na masa.

10, 11. (a) Boasa hatop laho si Hanna tu tabernakel? (b) Songon dia do si Hanna pasahathon sude na di rohana tu Jahowa?

10 Dung sadari di pardalanan, lam jonok ma keluarga ni si Elkana tu Silo. Dihaliangi angka dolok do kota Silo. Lam jonok tu inganan i, ra nunga dipingkirhon si Hanna sitangiangkononna tu Jahowa. Dung sahat di Silo, mangan ma nasida. Di tingki i laho ma si Hanna tu tabernakel sahalakna. Hundul do si Eli, sintua ni malim di pintu ni tabernakel. Alai, ndang diparrohahon si Hanna be i, ala holan pangidoanna tu Debata do na sai dipingkirhon ibana. Pos do rohana molo laho  ibana tu tabernakel, tangihonon ni Debata tangiangna. Jala diboto do diida Debata na di surgo i do sitaononna. Dung i, tangis ma ibana alani lungun ni rohana.

11 Huhut tangis, martangiang ma si Hanna tu Jahowa di bagasan rohana. Mangubitubit do bibirna, jala leleng do ibana martangiang pasahathon sude na di rohana tu Jahowa. Ndang holan asa marianakhon dipangido si Hanna. Alai, marjanji do ibana molo adong anakna lehononna ma i marhobas tu Debata.​—1 Sam. 1:9-11.

12. Aha do na taparsiajari sian tangiang ni si Hanna?

12 Marhite tangiangna, dipatudu si Hanna do sitiruon tu sude naposo ni Debata. Dipangido Jahowa do naposoNa martangiang sian roha, jala paboahon holso ni rohanasida tu Ibana. (Jaha Psalmen 62:9; 1 Tessalonik 5:17.) Disurat apostel Petrus do, ”Tinggangkon hamu ma nasa na hinolsohon ni rohamuna tu Ibana, ai disarihon do hamu!”​—1 Ptr. 5:7.

13, 14. (a) Aha do didok si Eli tingki martangiang si Hanna? (b) Songon dia do alus ni si Hanna tu si Eli gabe sitiruon tu hita?

13 Tingki martangiang si Hanna huhut tangis, tompu ma dibege ibana soara ni si Eli, sintua ni malim na mamparrohahon ibana martangiang. Ninna ma, ’Sadia leleng on ho mabuk? Utahon ma anggur na niinummi sian ho?’ Diida si Eli do martangiang si Hanna huhut tangis. Alai ndang jumolo disungkun ibana, pintor didok ibana do na mabuk si Hanna.​—1 Sam. 1:12-14.

14 Pingkirhon ma pangkilalaan ni si Hanna, nunga lungun rohana alani hasusaanna, hape didok dope ibana mabuk, jala sintua ni malim do na mandok i. Alai, sahali nai tadapot do sitiruon sian ibana. Ndang dipasombu hagaleon ni sasahalak mangambati ibana manomba Jahowa. Denggan do dialusi ibana si Eli. Dung i didok si Eli ma, ”Laho ma ho [mulak] mardamedame! Sai na lehonon ni Debata ni Israel tu ho na pinangidom sian Ibana.”​—1 Sam. 1:15-17.

15, 16. (a) Aha do pangkorhonna tu si Hanna dung dipaboa na di rohana tu Jahowa? (b) Songon dia do hita boi maniru si Hanna tingki hita susa?

15 Songon dia do pangkilalaan ni si Hanna dung dipaboa tu Jahowa na di rohana? Bibel mandok, ”Dung i laho ma ibana, mangan ma ibana jala ndang marsak be ibana.” (1 Sam. 1:18, Bibel siganup ari) Nunga lumbang be roha ni si Hanna, nunga dipasahat ibana tu Debata na marhuaso i sude holso ni  rohana. (Jaha Psalmen 55:23.) Adong do hasusaan na paborathu di Debata? Ndang adong. Ndang adong na so boi diulahon Debata sian najolo sahat tu saonari nang di ari na naeng ro!

16 Molo marsak jala lungun rohanta, tatiru ma si Hanna na pasahathon sude na di rohana tu Debata, ”sitangihon tangiang”. (Ps. 65:3) Molo tapatuduhon i marhite haporseaon, hilalaonta ma ”dame ni Debata na sumurung sian saluhut roha”, manggantihon hasusaanta.​—Plp. 4:6, 7.

”Ndang Adong Partanobatoan, Dungkon ni Debatangku”

17, 18. (a) Songon dia do pandapot ni si Elkana tu janji ni si Hanna? (b) Songon dia do parange ni si Pininna ndang mangkorhon be tu si Hanna?

17 Laho ma muse si Hanna dohot tungganedolina tu tabernakel marsogotna i. Ra, nunga dipaboa tu si Elkana pangidoan dohot janjina tu Jahowa. Hombar tu Patik ni si Musa, boi do sahalak tungganedoli manundati janji ni tungganeboruna. (4 Mus. 30:11-16) Alai, ndang disundati si Elkana janji ni si Hanna. Gariada rap do nasida manomba Debata di tabernakel andorang so mulak tu hutana.

18 Sadihari do diboto si Pininna na so tarbahensa be mangarsaki si Hanna? Ndang pola dipaboa tu hita taringot i, alai didok di Bibel taringot tu si Hanna ”ndang marsak be ibana”. On patuduhon, ndang sai holsoan be si Hanna. Tangkas ma diboto si Pininna, na so mangkorhon be parangena na so denggan tu si Hanna. Jala dungkon i, ndang hea be didok goarna di Bibel.

19. Aha do pasupasu na jinalo ni si Hanna, jala songon dia do ibana patuduhon pangargaion?

19 Dung pigapiga bulan, muba ma arsak ni si Hanna gabe las ni roha. Gabegabean ma ibana! Di bagasan las ni rohana sai diingot si Hanna do Jahowa. Ujungna tubu ma anakna, dibahen ma goarna si Samuel, lapatanna ”Goar ni Debata”, na patuduhon, manjou goar ni Debata songon na binahen ni si Hanna. Saleleng tolu taon ndang dohot be si Hanna tu Silo. Alai dung sirang susu si Samuel, dipapos si Hanna ma rohana laho marsirang jala manaruhon anakna i tu tabernakel.

20. Songon dia do si Hanna dohot si Elkana manggohi janjina tu Jahowa?

20 Tontu, lungun do roha ni si Hanna marsirang sian  si Samuel. Gelleng dope si Samuel, alani i nang pe adong na manarihon si Samuel di tabernakel, tongtong do lungun rohana. Dung i, ndang adong natuatua na so lungun rohana molo sirang sian anakna. Alai di bagasan las ni roha, ditaruhon si Hanna dohot si Elkana ma si Samuel tu Silo. Dung dilehon nasida pelean, dipasahat ma si Samuel tu si Eli.

Pasupasu do si Hanna di si Samuel

21. Songon dia do tangiang ni si Hanna patuduhon na togu haporseaonna? (Ida ma kotak ” Dua Tangiang na Patoguhon Roha”.)

21 Martangiang ma si Hanna tu Debata jala disurat do tangiangna on di Bibel. Molo tajaha di 1 Samuel 2:1-10, taida ma togu ni haporseaon ni si Hanna tu Jahowa. Dipasangap ibana do Jahowa dohot huasoNa na patutoru siginjang roha, mamasumasu na marsitaonon, manguhum manang mangalehon hangoluan. Dipasangap si Hanna do Jahowa Debata partigor, badia, jala parasi roha. Didok si Hanna, ”Ndang adong partanobatoan, dungkon ni Debatangku.” Boi do pos rohanta tu Jahowa, ndang olo Ibana muba. Ibana do parlinggoman ni sude halak na marsitaonon dohot na mangalului pangurupion.

22, 23. (a) Aha do na paposhon rohanta na dihaholongi natuatuana do si Samuel sahat tu na magodang? (b) Aha do pasupasu na dilehon Jahowa tu si Hanna?

22 Hak na sumurung do di si Samuel ala marhaporseaon omakna tu Jahowa. Nang pe sipata masihol ibana tu omakna, alai diboto ibana do na tongtong diingot omakna ibana. Sian taon tu taon, ro do si Hanna tu Silo mamboan baju ganjang, pangkeon ni si Samuel marhobas di tabernakel. Dijait si Hanna do  baju di si Samuel patuduhon holong ni rohana. (Jaha 1 Samuel 2:19.) Tapingkirhon ma tingki dipangkehon si Hanna tu si Samuel baju i, huhut dipatogu roha ni si Samuel. Dihilala si Samuel do pasupasu alani omakna na marhaporseaon, jala dapot pasupasu do natuatuana dohot bangso Israel alani ibana.

23 Dipasupasu Jahowa do tongtong si Hanna. Ditubuhon do muse lima nai ianakhonna. (1 Sam. 2:21) Alai, pasupasu na umbalga na dihilala ibana, i ma paralealeonna na lam togu tu Jahowa sian taon tu taon. Anggiat ma tahilala pasupasu ni Jahowa molo tatiru haporseaon ni si Hanna.

^ par. 7 Dipaboa di Bibel, Jahowa do na mambahen si Hanna ndang marianakhon, alai ndang na patuduhon na so lomo roha ni Jahowa tu ibana. (1 Sam. 1:5) Sipata, molo disurat di Bibel Jahowa mambahen masa hasusaan, lapatanna, diloas Jahowa hasusaan i masa.

^ par. 9 Dao ni huta on boi ditontuhon ala huta ni si Elkana di Rama, ra dos do tu huta Arimatea na adong di tingki ni Jesus.