Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tiru ma Haporseaon ni Nasida

 PASAL TOLU

’Ama ni Saluhut Angka na Porsea’

’Ama ni Saluhut Angka na Porsea’

1, 2. Aha do naung godang muba sian tingki ni si Noak, jala aha do pangkorhon ni i tu si Abram?

DITATAP si Abram ma dompak menara zigurat na adong di Ur. * Tarbege angka soara jala ruar timus sian menara i. Disi, dipelehon angka malim pelean tu dewa bulan. Pingkirhon ma si Abram manadingkon inganan i. Mardalan ma ibana sian tongatonga ni halak na ro tusi huhut marsak alani angka debata sileban, na disomba torop halak di tingki i. Sian tingki ni si Noak, nunga tarsar panombaon na so sintong tu godang inganan!

2 Dua taon dung marujung ngolu si Noak, tubu ma si Abram. Dung ruar si Noak sian parau dilehon ibana do pelean tu Debata. Las do roha ni Jahowa tu peleanna i, dung i diparo Ibana ma halibutongan (pelangi). (1 Mus. 8:20; 9:12-14) Tingki i, holan Jahowa do disomba jolma. Alai, dung marserak sundut pasampuluhon sian pinompar ni si Noak di sandok tano on, gabe godang ma agama. Godang na marsomba tu debata sileban. Gariada si Tara, bapak ni si Abram, dohot do manomba debata sileban.​—Jos. 24:2.

Songon dia do haporseaon ni si Abram gabe sitiruon tu hita?

3. Aha do mambahen si Abram marimbar, jala aha do parsiajaranna tu hita?

3 Marimbar do si Abram sian halak na asing di tingki i. Lam leleng, lam tandi ma ibana alani haporseaonna. Di pudian ni ari, disurat si Paulus do molo si Abram ”gabe ama . . . di saluhut angka na porsea”! (Jaha Rom 4:11.) Taparrohahon ma na mambahen si Abram marhaporseaon, jala on boi tatiru laho patoguhon haporseaonta.

 Ibana Manomba Jahowa Dungkon Aek na Sumar

4, 5. Sian ise do ditanda si Abram Jahowa, jala boasa tadok songon i?

4 Songon dia do si Abram boi mananda Jahowa? Di tingki i, adong dope na mangolu naposo ni Jahowa, songon si Sem. Togu do haporseaon ni si Sem tu Jahowa, i do umbahen goarna jotjot didok parjolo nang pe ibana ndang buhabaju ni si Noak. * Ndang sadia leleng dung aek na sumar, didok si Noak do Jahowa ”Debata ni si Sem”. (1 Mus. 9:26) Dipasangap jala disomba si Sem do Jahowa.

5 Ditanda si Abram do si Sem? Ra, ditanda ibana do. Pingkirhon ma tingki poso dope si Abram. Tontu, las do rohana ala diboto mangolu dope daompung ni ibana naung marumur lobi sian opat ratus taon! Diida si Sem do hajahaton ni jolma andorang so aek na sumar. Diida ibana do muse lam torop jolma dung aek na sumar sahat tu tingki ni si Nimrod, na pajongjongkon Menara Babel. Ndang olo si Sem mangalo Debata, songon si Nimrod. Alani i, tingki digaori Debata bahasa, tongtong do hot bahasa ni si Sem, i ma bahasa na pinangke ni si Noak. Pinompar ni si Sem do si Abram. Alani i, sian na gelleng holong do roha ni si Abram tu si Sem. Leleng do nasida rap mangolu. Boi ma taboto, sian si Sem do si Abram mananda Jahowa.

Ndang olo si Abram manomba debata sileban na adong di kota Ur

6. (a) Songon dia do aek na sumar mangkorhon tu si Abram? (b) Songon dia do parngoluon ni si Abram dohot si Sarai?

6 Dapot ni si Abram do parsiajaran na arga sian aek na sumar. Marsitutu do ibana maniru si Noak, na marparange mardonganhon Debata. Alani i do, ndang disomba ibana debata sileban na mambahen ibana marimbar sian halak di Ur dohot sian keluargana. Marhasohotan ma ibana tu si Sarai, borua na uli jala marhaporseaon na togu tu Jahowa. * Nang pe ndang marianakhon, dihilala nasida do las ni roha ala manomba Jahowa. Dung i, nasida do na mangurus si Lot, anak ni hahana na so marama na so marina.

7. Songon dia do bahenon ni siihuthon Jesus maniru si Abram?

 7 Tingki di Ur, ndang hea si Abram manadingkon Jahowa laho manomba debata sileban. Ndang mabiar si Abram dohot si Sarai marimbar sian halak na asing. Hita pe, ingkon tatiru do nasida asa boi togu haporseaonta. Unang ma mabiar hita marimbar sian na asing. Jesus mandok, ”ndang sian portibi on” angka siihuthon ibana. (Jaha Johannes 15:19.) Tingki lungun rohanta dibahen keluarga manang halak na asing ala tasomba Jahowa, taingot ma ndang holan hita na mangkilala songon i. On patuduhon, hita maniru si Abram dohot si Sarai na marhaporseaon tu Jahowa.

Tadingkon ma Huta Hagodanganmu

8, 9. (a) Aha do na masa tu si Abram na so boi dihalupahon ibana? (b) Aha do tona ni Jahowa tu si Abram?

8 Sada tingki dijalo si Abram ma tona sian Jahowa! Otik do na dipatorang taringot on. Bibel paboahon tu hita, dipataridahon ”Debata na marsangap” do diriNa tu si Abram. (Jaha Ulaon ni Apostel 7:2, 3.) Olo do ra diida si Abram hasangapon ni Debata marhite surusuruan. Ndang tarlupahon ibana na masa on. Tapingkirhon ma las ni roha ni si Abram ala diida ibana marimbar do Debata na marhuaso sian debata sileban na so marguna.

9 Aha do tona ni Jahowa tu si Abram? ”Bungkas ma ho sian tanomi dohot sian donganmu sabutuha; topot ma tano sipatuduhononku tu ho!” Ndang dipaboa Debata dia tano sitopotonna i, alai tano i, laho sipatuduhononNa dope. Na parjolo siulahonon ni si Abram, i ma manadingkon hutana dohot keluargana. Di tingki i, molo ditadingkon sahalak baoa keluargana jala laho tu inganan na dao, didok halak do i nasib na roa. Di pigapiga halak, jumorbut do on sian hamatean!

10. Boasa ndang mura dihilala si Abram dohot si Sarai manadingkon kota Ur?

10 Ndang mura manadingkon kota Ur, ala maju do kota i. (Ida ma kotak ” Kota na Tinadingkon ni Si Abram dohot Si Sarai”.) Hasil arkeologi patuduhon, balga do angka jabu di Ur jala sonang do tading disi. Godang kamarna, adong kamar ni hatoban jala di tongatonga ni angka kamar i, adong alaman na marlante batu. Adong do air mancur, kamar mandi dohot inganan habuangan ni limbah. Asing ni i, nunga matua nasida, si Abram nunga marumur 70-an jala si Sarai marumur 60-an. Songon na dihalomohon ni tungganedoli, tontu hirim do roha  ni si Abram sonang ngolu ni si Sarai. Pingkirhon ma angka sungkunsungkun na tubu di rohanasida taringot tu siulahonon ni nasida. Alai, tontu las do roha ni si Abram ala rade do si Sarai mangihuthon ibana manadingkon kota Ur.

11, 12. (a) Aha do na diparade jala na ingkon ditontuhon andorang so ditadingkon kota Ur? (b) Songon dia do hita boi mamingkirhon tingki borhat nasida sian Ur?

11 Godang do sikarejoan ni si Abram dohot si Sarai ala nunga ditontuhon nasida laho pinda sian Ur. Ingkon papunguonna do barang siboanonna. Aha do siboanon ni nasida, jala aha sitadingkononna? Na rumingkot muse, songon dia do bahenonna tu halak na rap tading dohot nasida saleleng on? Songon dia do natuatuana, si Tara naung matua? Ujungna, dohot do si Tara pinda sian Ur. Disurat do di Bibel, diboan si Tara do keluargana borhat sian Ur, alani i boi ma tadok rade do ibana laho dohot si Abram. Tontu, nunga ditadingkon ibana debata sileban. Diboan si Abram do muse si Lot, anak ni hahana.​—1 Mus. 11:31.

12 Dapot ma tingkina laho borhat nasida. Pingkirhon ma, nunga marpungu rombongan ni si Abram di luar ni tembok dohot parit ni kota Ur. Pingkirhon ma muse angka unto dohot halode na mamboan angka barang. Nunga dipapungu angka pinahan, songon i nang angka hatoban nunga rade laho borhat. * Dung i, borhat ma nasida. Tontu, si Abram do na mangalehon boaboa asa borhat nasida. Ujungna, ditadingkon nasida ma kota Ur salelengna.

13. Songon dia do torop naposo ni Jahowa saonari maniru si Abram dohot si Sarai?

13 Godang do naposo ni Jahowa saonari pinda tu inganan na mangkaporluhon parbarita. Adong do muse na marsiajar bahasa na baru asa boi nasida marbarita mamangke bahasa i. Adong do na mamangke cara na baru laho marbarita. Ndang mura mangulahon i. Ingkon rade do nasida manadingkon parngoluon ni nasida hian. Sitiruon do na binahen ni nasida i. Dos do i songon na niulahon ni si Abram dohot si Sarai! Molo marhaporseaon do hita, boi do pos rohanta gumodang do na boi tajalo sian Jahowa, martimbangkon na talehon tu Ibana. LehononNa do upa tu naposoNa na marhaporseaon. (Heb. 6:10; 11:6) Songon i do dibahen tu si Abram?

 Manaripari Sunge Euprat

14, 15. Patorang ma songon dia do pardalanan sian Ur tu Haran, jala boasa ingkon tading nasida satongkin di Haran?

14 Ndang maol be dihilala rombongan ni si Abram pinda sian sada inganan tu inganan na asing, ala nunga jotjot nasida pinda. Pingkirhon ma si Abram dohot si Sarai di pardalanan, sipata naek unto jala sipata mardalan pat. Tarbege do muse soara ni lonceng na dibahen di kokang ni unto. Jala dung pigapiga hali, nunga somal be nasida mamasang dohot mambungka tenda, songon i nang mangurupi si Tara, amana hundul di unto manang halode. Tongtong ma nasida mardalan tu sabola barat laut, mangkaliangi sunge Euprat sian ari tu ari, minggu tu minggu, mamolus dalan na so hea diida jala didalani nasida.

15 Dung mardalan nasida hirahira 960 kilometer daona, sahat ma nasida tu Haran, huta na maju, dalan ni partigatiga sian Timur tu Barat. Disi godang do halak marjabu pondok na songon asar ni loba. Ra di tingki i, ndang tolap be si Tara manorushon pardalanan i. Alani i, di Haran ma nasida maringanan satongkin.

16, 17. (a) Aha do janji na mambahen las roha ni si Abram? (b) Songon dia do si Abram dipasupasu Jahowa tingki di Haran?

 16 Marujung ngolu ma si Tara tingki marumur 205 taon. (1 Mus. 11:32) Alai, hatop do tarapul roha ni si Abram ala diulahi Jahowa do muse paboahon parenta dohot janji na pinaboaNa di Ur. Didok Jahowa, gabe ”bangso na bolon” si Abram jala mandapot pasupasu ma sude bangso di tano on marhite ibana. (Jaha 1 Musa 12:2, 3.) Las do roha ni si Abram mambege janji na binahen ni Debata tu ibana. Dung i, diboto ibana ma na ingkon udutanna muse pardalanan i.

17 Tamba do siboanon ni si Abram tingki pinda sian Haran, ala dipasupasu Jahowa do ulaonna. Dipaboa tu hita, diboan si Abram do ”sude arta dohot angka hatoban na binuatna di Haran”. (1 Mus. 12:5, Bibel siganup ari) Asa boi gabe bangso na bolon, ringkot do di si Abram arta dohot hatoban. Nang pe ndang sai dilehon Jahowa hamoraon tu naposoNa, alai dilehon do tu nasida na dihaporluhon laho mangulahon sangkapNa. Ala nunga dipatogu roha ni si Abram, diboan ibana ma muse rombonganna tu inganan na so binotona dope.

Ala manadingkon kota Ur, godang ma hasusaan na dihilala si Abram dohot si Sarai

18. (a) Nandigan do diida si Abram huaso ni Jahowa na mangkorhon tu naposo ni Debata? (b) Aha do muse na masa na ringkot diingot naposo ni Debata tanggal 14 Nisan? (Ida ma kotak ” Tanggal na Ringkot di Bibel”.)

18 Dung marpigapiga ari di pardalanan, sahat ma nasida di Karkemis, inganan na jotjot dibolus rombongan ni partigatiga laho manaripari sunge Euprat. Di inganan on ma dipatuduhon Jahowa huasoNa tu si Abram. Jala on ma tingki na ringkot, na tongtong mangkorhon tu naposo ni Debata. Ditaripari si Abram ma sunge Euprat di ari pasampuluopathon bulan Nisan taon 1943 SM. (2 Mus. 12:40-43) Di sabola selatan ni sunge Euprat i do tano na jinanjihon ni Debata tu si Abram. Mulai sian tingki i, saut ma janji ni Debata tu si Abram.

19. Aha do janji ni Debata tu si Abram jala aha do na diingot si Abram alani janji i?

19 Ditorushon si Abram ma pardalananna tu sabola selatan, dung i sahat ma  ibana di Sikem, jonok tu tombak More. Di Sikem, marjanji ma muse Jahowa tu ibana. Didok Jahowa tu ibana, lehononNa do tano i tu pinompar ni si Abram. Olo do ra gabe diingot si Abram janji ni Jahowa di porlak Eden taringot tu ’pinompar’ na laho paluahon sude jolma. (1 Mus. 3:15; 12:7) Ra, mulai sian i ma diboto si Abram molo ibana parsidohot laho manggohi sangkap ni Jahowa.

20. Songon dia do si Abram patuduhon las ni rohana alani hak na sumurung na dilehon tu ibana?

20 Las do roha ni si Abram tu janji ni Jahowa i. Alani i, dipajongjong ibana ma mezbah tu Jahowa, parjolo di tombak More, dung i di jonok ni Betel. Alai, ingkon manat do si Abram mangulahon on, alana maringanan do halak Kanaan di humaliang ni inganan i. Dijou ibana do goar ni Debata, i ma Jahowa laho patuduhon hamauliateonna huhut mamingkirhon na laho masa tu pinomparna. Ra, dipaboa ibana do taringot tu Jahowa tu halak Kanaan na adong disi. (Jaha 1 Musa 12:7, 8.) Tontu, godang dope hasusaan na masa tu si Abram alani haporseaonna. Nang pe songon i, ndang sihol rohana mulak tu kota Ur naung tinadingkonna. Ditatap ibana do upa sijaloonna di joloan ni ari. Heber 11:10 mandok, ”Dipaimaima do huta na marojahan na hot, na pinandean jala na pinauli ni Debata.”

21. Sadia godang do na taboto taringot tu Harajaon ni Debata, jala taronjar do rohanta laho mangulahon aha?

21 Gumodang do na taboto sian si Abram taringot tu huta na marojahan na hot, i ma Harajaon ni Debata. Taboto do nunga jongjong Harajaon i di surgo, jala satongkinnari Harajaon i pasohothon hajahaton di tano on. Nunga mamarenta gabe raja pinompar ni si Abram naung dijanjihon i, i ma Jesus. Tontu, las do rohanta boi pajumpang muse dohot si Abraham tingki dipahehe ibana. Jala, las do rohanta mangida pangkilalaan ni si Abraham dung diboto ibana naung digohi sangkap ni Debata! Lomo do rohamu mangida sude janji ni Jahowa digohi? Ingkon taulahon do songon na diulahon si Abram. Ingkon manjumolohon lomo ni roha ni Jahowa, mangoloi jala patuduhon pangargaion tu hak na sumurung na nilehon ni Jahowa. Molo tatiru si Abram, boi ma hita maramahon ’ama ni saluhut angka na porsea’!

^ par. 1 Martaontaon dungkon i, diganti Debata ma goar ni si Abram gabe si Abraham lapatanna, ”Ama ni Torop Halak”.​—1 Mus. 17:5.

^ par. 4 Jotjot do goar ni si Abram didok na parjolo sian anak ni si Tara, nang pe ibana ndang buhabaju ni si Tara.

^ par. 6 Di pudian ni ari, diganti Debata ma goar ni si Sarai gabe si Sarah, lapatanna ”Boru ni Raja”.​—1 Mus. 17:15.

^ par. 12 Angka pakar mandok, ndang tutu adong unto na jinak di tingki ni si Abram. Alai, ndang boi dihatindangkon nasida pandapotna i. Jotjot do dipaboa di Bibel, molo unto sada sian arta ni si Abram.​—1 Mus. 12:16; 24:35.