Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL SADA

”Marsoara Dope Ibana, Atik Pe Naung Mate”

”Marsoara Dope Ibana, Atik Pe Naung Mate”

1. Boasa ndang boi be si Adam dohot pinomparna masuk tu porlak Eden?

HUHUT diida si Abel birubiruna na manggagat di dolokdolok, ditatap ibana ma tu sada inganan na marsinondang. Diboto ibana do, di inganan i adong podang na marjimburjimbur na mangambat dalan tu porlak Eden. Disi do maringanan natuatuana najolo. Alai saonari, ndang boi be nasida dohot pinomparna laho tu porlak i. Tapingkirhon ma, di tingki botari ditatap si Abel ma tu langit huhut diingot ibana Debata Sitompa saluhut. Sungkunsungkun ma rohana, boi dope jolma maraleale tu Debata? Hirim do roha ni si Abel maraleale tu Debata.

2-4. Songon dia do si Abel mangkatai tu hita saonari?

2 Boi do tabege si Abel mangkatai tu hita saonari? Ra, dohononta do ndang boi, ala nunga mate jala gabe tano ibana saleleng 6.000 taon. Dipaboa do di Bibel taringot tu halak naung mate, ”Ndang diboto [nasida] agia aha.” (Pjm. 9:5, 10) Ndang adong nanggo sangkababa pe hata ni si Abel disurat di Bibel. Antong songon dia do ibana boi marsoara tu hita?

3 Disurat apostel Paulus do taringot tu si Abel, ”Marhite sian i marsoara dope ibana, atik pe naung mate.” (Jaha Heber 11:4.) Marhite aha do si Abel mangkatai tu hita? Marhite haporseaonna. Si Abel do jolma na parjolo na patuduhon haporseaon tu Debata. Haporseaon ni si Abel, boi do denggan jala tangkas mangkatai tu hita molo taparsiajari jala tatiru haporseaonna i.

4 Alai, holan saotik do disurat taringot tu si Abel di Bibel, antong songon dia do hita boi mandapot laba sian haporseaonna? Taparrohahon ma alusna.

Ibana Magodang di Tingki ”Parmulaan ni Tano On”

5. Boasa didok Jesus si Abel mangolu di ”parmulaan ni tano on”? (Ida ma surat na di toru.)

5 Si Abel tubu di mula ni sejarah ni jolma. Di pudian ni ari, Jesus mandok molo si Abel mangolu di tingki ”parmulaan ni  tano on”. (Jaha Lukas 11:50, 51.) Hata tano na nidok ni Jesus, i ma halak na ditobus sian dosa. Nang pe si Abel jolma na paopathon na hea mangolu di tano on, alai di adopan ni Debata holan ibana dope na boi tartobus sian dosa. * Sian on, taboto ma ndang adong dope jolma na boi sitiruon ni si Abel di tingki i.

6. Songon dia hian do parngoluon ni si Adam dohot si Hawa?

6 Ndang sadia leleng dung adong jolma di tano on, masa ma hasusaan tu nasida. Mulana, ndang mardosa si Adam dohot si Hawa, alani i boi do nasida mangolu salelengna. Uli do rupa ni nasida tingki ditompa, jala gogo do nasida. Alai, mardosa ma si Adam dohot si Hawa. Diusir ma nasida sian Paradeiso di porlak Eden ala ndang dioloi nasida Jahowa. Ala manjumolohon hagiot ni rohanasida sandiri, jala ndang mamingkirhon na ringkot tu pinomparna, mago ma pangkirimon tu hangoluan na salelengna.​—1 Mus. 2:15–3:24.

7, 8. Aha do didok si Hawa tingki tubu si Kain, jala aha do na ro tu pingkiranna?

7 Dung diusir si Adam dohot si Hawa sian porlak Eden, susa ma parngoluon ni nasida. Dung tubu buhabajuna, dibahen ma goarna si Kain, lapatanna ”Taruli”. Didok si Hawa, ”Nunga maruli ahu sada baoa sian Jahowa.” Hata ni si Hawa patuduhon diingot ibana janji ni Jahowa tingki di porlak Eden. Disurirangkon  Jahowa do molo ’pinompar’ ni sahalak boruboru mangalisathon ulu ni ulok na paotootohon jolma na parjolo. (1 Mus. 3:15; 4:1) Na dirimpu si Hawa do ibana boruboru i jala si Kain ’pinompar’ i?

8 Molo songon i do didok roha ni si Hawa, sala do ibana. Tarlumobi, molo diajarhon i tu si Kain, on boi parohon ginjang ni roha tu si Kain. Di pudian ni ari, tubu ma anak ni si Adam na paduahon, alai ndang didok si Hawa be hatana songon na tu si Kain. Dibahen ma goarna si Abel, lapatanna ”Alogo sambing” manang ”Sisoada”. (1 Mus. 4:2) Sian goar i, na sumurung do si Kain sian si Abel dibahen natuatuana? Olo do ra songon i.

9. Aha do parsiajaran na boi dapot ni natuatua sian na masa tu si Adam dohot si Hawa?

9 Godang do na boi parrohahonon ni natuatua sian na masa tu si Adam dohot si Hawa. Diboto hamu do molo pangkataion dohot parniulaonmu boi mambahen anakkonmu marginjang ni roha manang mangkaringkothon dirina sandiri? Manang, diajari hamu do nasida mangkaholongi jala maraleale tu Jahowa? Nang pe ndang denggan si Adam dohot si Hawa mandalanhon tanggung jawabna, alai adong dope pangkirimon tu pinompar ni nasida.

Songon dia do Si Abel Patoguhon Haporseaonna?

10, 11. Aha do karejo ni si Kain dohot si Abel, jala aha do na ringkot di si Abel?

10 Dung lam magodang si Abel dohot si Kain, ra diajari natuatuana do nasida manarihon na ringkot tu nasida. Si Kain gabe sahalak partani, si Abel gabe parmahan.

11 Alai, adong do na ringkot diulahon si Abel di ngoluna. Saleleng martaontaon, dipatogu ibana do haporseaonna, jala disurat si Paulus do taringot on. Pingkirhon ma! Ndang adong dope jolma na boi sitiruon ni si Abel tingki i. Antong, songon dia do ibana patoguhon haporseaonna? Adong tolu na mambahen togu haporseaon ni si Abel.

12, 13. Songon dia do haporseaon ni si Abel lam togu marhite na tinompa ni Jahowa?

12 Na tinompa ni Jahowa. Ala nunga hona bura tano i, dipantubuhon ma ramba na marsuga na manegai suansuanan. Alai, tubu dope suansuanan na boi allangon ni keluarga ni si Adam. Boi do idaon ni si Abel bisuk, holong, dohot haburjuon ni Jahowa sian angka na tinompa ni Debata. Umpamana, binatang, dolok, sunge, laut, tao, ombun, langit, mata ni ari,  bulan dohot bintang. (Jaha Rom 1:20.) Mangarimangi sude na tinompa ni Jahowa, patoguhon haporseaon ni si Abel.

Na tinompa ni Jahowa, patoguhon haporseaon ni si Abel tu Panompa na mangkaholongi ibana

13 Tontu, dipangke si Abel do tingkina mangarimangi na ringkot di partondion. Pingkirhon ma ulaon ni parmahan tingki marmahan birubiruna. Jotjot do diiringiring parmahan angka birubiruna mamolus rura, dolok, manaripari sunge, mangalului ramba na lomak, aek na tio, dohot inganan parlinggoman. Birubiru do binatang na gumale sian sude binatang, alani i ingkon sai adong do na manjaga birubiru. Ulaon on do na mambahen si Abel mamboto na ingkon adong na umbisuk jala na umgogo sian jolma laho manogunogu, mangalinggomi dohot manarihon ibana? Tontu, i do na ditangiangkon ibana na mambahen lam togu haporseaonna.

14, 15. Aha do angka janji ni Jahowa na boi rimangan ni si Abel?

14 Angka janji ni Jahowa. Tontu, dipaboa si Adam dohot si Hawa do tu anakkonna na masa di porlak Eden, jala boasa nasida dipalao sian i. Alani i, godang do na boi dirimangi si Abel di ngoluna.

15 Songon naung didok Jahowa hona bura ma tano i, diida si Abel do tubu ramba na marsuga na patuduhon sintong hata ni Jahowa. Dipaboa Jahowa do, hansit taonon ni si Hawa tingki gabegabean jala tingki manubuhon anak. Diida si Abel do masa i tingki tubu angka anggina. Dipaboa Jahowa muse, sai masihol ma si Hawa tu holong ni tungganedolina, jala rajaanna ma ibana. Diida si Abel do sude masa na nidok ni Jahowa. Alani i, boi do pos rohana saut sude hata ni Jahowa. Jala, lam togu ma haporseaonna tu janji ni Jahowa taringot tu ’pinompar’ na padengganhon parsoalan na masa di porlak Eden.​—1 Mus. 3:15-19.

16, 17. Aha do na boi diparsiajari si Abel sian angka kerubim?

16 Angka naposo ni Jahowa. Ndang adong jolma na boi gabe sitiruon ni si Abel di tingki i. Alai, boi do si Abel marsiajar  sian tompaan ni Debata na asing. Dung diusir si Adam sian porlak Eden, ndang diloas Jahowa be nasida masuk tu porlak i. Dibahen Jahowa do kerubim, i ma surusuruan na tumimbo jala podang na marjimburjimbur manjaga dalan tu porlak Eden.​—Jaha 1 Musa 3:24.

17 Pingkirhon ma pangkilalaan ni si Abel tingki diida ibana angka kerubim i. Boi do diida ibana molo kerubim i mansai gogo. Jala mabiar do ra ibana mangida ’podang’ na marjimburjimbur na tongtong marputar. Hea do diida si Abel kerubim i ngolngolan jala manadingkon inganan i? Ndang hea. Arian dohot borngin saleleng marpulu taon tongtong do di inganan i angka surusuruan i. On mambahen pos roha ni si Abel adong do angka naposo ni Debata na marsihohot. Ndang songon keluargana, diida si Abel do na marsihohot kerubim i tu Jahowa. Sitiruon sian surusuruan i patoguhon haporseaonna.

Diida si Abel do saleleng ni ngoluna molo kerubim marsihohot jala mangoloi Jahowa

18. Aha do na boi patoguhon haporseaonta saonari?

18 Lam togu ma haporseaon ni si Abel ala dirimangi ibana do taringot tu Jahowa marhite na tinompaNa, janjiNa dohot surusuruanNa. On patuduhon, boi do mangkatai si Abel tu hita saonari. Tarlumobi tu angka na poso, boi do nasida mampartahanhon haporseaonna tu Jahowa nang pe ndang dihalomohon natuatua ni nasida. Marhite Bibel, na tinompa ni Debata dohot angka sitiruon sian halak na marhaporseaon, mangurupi hita patoguhon haporseaonta saonari.

 Boasa Sumurung Pelean ni Si Abel?

19. Aha do hasintongan na diantusi si Abel di pudian ni ari?

19 Dung lam togu haporseaon ni si Abel, dilului ibana ma dalan laho patuduhon i marhite parniulaonna. Alai, aha do na boi lehonon ni sasahalak tu Sitompa saluhut? Tangkas do, ndang dihaporluhon Debata silehonlehon dohot pangurupion sian jolma. Alai diantusi si Abel do, molo dilehon ibana na dumenggan tu Jahowa sian roha na ias, las do roha ni Jahowa manjalo i.

Marhite haporseaon, dipelehon si Abel peleanna; alai si Kain ndang songon i

20, 21. Aha do pelean na dilehon si Kain dohot si Abel, jala songon dia do pangkilalaan ni Jahowa?

20 Tingki paradehon birubiru sipelehononna, dipillit si Abel ma birubiru na dumenggan sian angka birubiruna na parjolo tubu. Si Kain pe, hirim do rohana manjalo pasupasu ni Jahowa, diparade ibana ma peleanna sian parbue ni na niulana. Ndang songon si Abel, asing do roha ni si Kain. Tarida do i tingki dipelehon nasida peleanna.

21 Ra, dibahen si Abel dohot si Kain do langgatan dohot api laho mamelehon pelean i. Ra, diida kerubim i do nasida mangulahon i. Di tingki i, holan nasida do suruan (perwakilan) ni Jahowa di tano on. Taringot tu pelean i, didok do, ”Lomo ma roha ni Jahowa mamereng si Abel dohot na pinelehonna i.” (1 Mus. 4:4) Alai, ndang dipaboa di Bibel cara ni Jahowa manjalo pelean i.

22, 23. Boasa dijalo Jahowa pelean ni si Abel?

22 Boasa lomo roha ni Jahowa tu si Abel? Alani peleanna i do? Diboan si Abel do birubiru gabe pelean na mangolu jala diusehon do mudarna, jala on manggombarhon hangoluan. Naung diboto si Abel hian do lapatan ni pelean sisongon i? Marratus taon dungkon i, dipangido Jahowa do asa dilehon anak ni birubiru bahen pelean. Jala on manggombarhon AnakNa sandiri, i ma Jesus na laho dipelehon, didok do ibana ”Birubiru ni Debata” na mangalehon haluaon marhite mudarna. (Joh. 1:29; 2 Mus. 12:5-7) Alai, ndang tangkas dope diboto si Abel taringot i.

23 Na tangkas taboto, i ma: Dipelehon si Abel do na dumenggan tu Jahowa. Las do roha ni Jahowa tu si Abel dohot tu peleanna. Holong dohot haporseaon ni si Abel do na mangonjar rohana mangulahon i.

24. (a) Boasa pelean ni si Kain i ndang sala? (b) Songon dia do si Kain dos dohot torop halak saonari?

24 Asing do na masa tu si Kain. Bibel paboahon, ”Alai anggo si Kain dohot na pinelehonna i, ndang dibereng” Jahowa. (1 Mus. 4:5) Ndang pelean ni si Kain na sala manang na so  denggan; alana di pudian ni ari, dipangido Jahowa do parbue ni suansuanan bahen pelean. (3 Mus. 6:7, 8) Dipaboa do di Bibel taringot tu si Kain, ”na jahat ulaonna”. (Jaha 1 Johannes 3:12.) Songon torop halak saonari, dirimpu si Kain do sae holan mangalehon pelean laho manomba Jahowa. Alani i, tarida do sian parniulaon ni si Kain na so togu haporseaon dohot holongna tu Jahowa.

25, 26. Aha do sipasingot ni Jahowa tu si Kain, alai aha do diulahon ibana?

25 Dung diboto si Kain ndang dijalo Jahowa peleanna, olo do ibana marsiajar sian na binahen ni si Abel? Ndang olo. Diida Jahowa do roha ni si Kain, jala dipasingot do ibana taringot tu dosa na boi masa molo ndang muba ibana. Jala didok do tu si Kain, ’Padirgakonna’ do ibana molo olo marhamubaon.​—1 Mus. 4:6, 7.

26 Ndang ditangihon si Kain hata ni Jahowa. Ditogihon ma si Abel tu hauma jala dibunu si Kain ma ibana. (1 Mus. 4:8) Boi ma tadok si Abel do na parjolo mate ala mampartahanhon haporseaonna tu Jahowa. Nang pe naung mate ibana, alai boi do tadapot parsiajaran sian na masa di ngoluna.

27. (a) Boasa pos rohanta na paheheon ni Debata si Abel? (b) Songon dia do hita asa boi jumpang dohot si Abel di ari na naeng ro?

27 Digombarhon do di Bibel, na joujou mudar ni si Abel tu Jahowa, mangido hatigoran dohot pamaloson. Dipatudu Jahowa do hatigoranNa jala diuhum do si Kain alani hajahatonna. (1 Mus. 4:9-12) Na rumingkot, disurat do taringot tu haporseaon ni si Abel na boi mangkatai manang mangajari hita saonari. Ibana mangolu hirahira 100 taon. Jempek do umurna martimbangkon halak na asing na mangolu di tingki i. Alai, dipangke ibana do ngoluna mangulahon na dumenggan jala mangoloi Jahowa. Diboto do na dihaholongi jala dijangkon Jahowa ibana. (Heb. 11:4) Alani i, pos do rohanta ingoton jala paheheon ni Jahowa do si Abel di paradeiso. (Joh. 5:28, 29) Lomo do rohamu boi pajumpang dohot ibana? Boi do hamu pajumpang dohot ibana molo ditangihon hamu ibana mangkatai, jala ditiru hamu haporseaonna.

^ par. 5 Hata ”parmulaan ni tano on”, boi do on dipatudos tu manabur boni manang marpinompari. Alani i, hata on boi do manggombarhon buhabaju ni jolma na parjolo. Alai, boasa dipahombar Jesus si Abel tu ”parmulaan ni tano on” hape si Kain do anak buhabaju? Ala dipillit jala dituntun si Kain do mangalo tu Debata Jahowa. Songon si Adam dohot si Hawa, ndang adong be tobusan manang pangkirimon tu haheheon di si Kain.