1. Boasa tarbege soara ni na tumatangis di Silo?

LUNGUN HIAN do roha ni si Samuel mambege andungandung ni halak Israel di Silo. Tarbege do soara ni na tumatangis di kota i ala mate angka sisolhotna di parporangan. Adong 30.000 halak Israel na mate di parporangan mangalo halak Palistim. Andorang so i, nunga mate 4.000 halak di parporangan.​—1 Sam. 4:1, 2, 10.

2, 3. Aha do angka parmaraan na mambahen mago hamuliaon sian Silo?

2 On ma sada sian parmaraan na masa di Silo. Dung i, diboan si Hopni dohot si Pinehas anak ni Sintua Malim Eli do poti parpadanan sian tabernakel tu parporangan. Somalna, poti on dibahen di inganan na badia di tabernakel, jala manggombarhon haroro ni Debata. Alani i, dirimpu halak Israel ma molo diboan poti i tu parporangan, boi gabe jimat na mambahen nasida monang. Alai, ditaluhon halak Palistim do halak Israel, mate ma si Hopni dohot si Pinehas, dung i ditaban ma poti parpadanan i.​—1 Sam. 4:3-11.

3 Nunga marratus taon lelengna Silo gabe inganan na badia, ala disi do dibahen inganan ni poti parpadanan i. Dung dibege si Eli diboan halak Palistim poti i, balik ma ibana sian hundulanna laos mate. Tingki i, 98 taon ma umur ni si Eli. Dung i, mate tubutubuan ma muse parumaenna. Andorang so mate, didok ibana do, ”Nunga [mago] hamuliaon sian Israel.” Tutu ma, ndang dos be na masa tu Silo dungkon i.​—1 Sam. 4:12-22.

4. Aha do na laho taparsiajari di pasal on?

4 Songon dia do pangkilalaan ni si Samuel tu pangunjunan na ro i? Pos do rohana mangurupi halak Israel ala naung mabiar nasida ndang didongani Jahowa? Olo do sipata hasusaan na masa tu hita manguji haporseaonta. Alani i, taida ma aha na boi taparsiajari sian si Samuel.

 Diulahon Ibana do ”Hatigoran”

5, 6. Aha do dipaboa Bibel na masa saleleng 20 taon, jala aha do diulahon si Samuel tingki i?

5 Dung dipaboa taringot tu si Samuel, dipaboa ma muse tu hita taringot tu poti parpadanan i. Alai ujungna, dipaulak halak Palistim ma poti i ala parohon hasusaan tu nasida. Nunga salpu 20 taon dung dipaboa Bibel muse taringot tu si Samuel. (1 Sam. 7:2) Aha do na diulahon si Samuel saleleng 20 taon i? Bibel mangalehon alusna tu hita.

Songon dia do si Samuel boi mangapul roha ni halak Israel na marhabot ni roha?

6 Dipaboa tu hita, andorang so masa na 20 taon i, ”sahat do hata ni si Samuel tu sandok Israel”. (1 Sam. 4:1, New World Translation) Dipaboa muse, dung salpu na 20 taon i, sai ro do si Samuel ganup taon tu tolu kota di Israel laho pasaehon parsoalan. Dung i, sai mulak do ibana tu hutana di Rama. (1 Sam. 7:15-17) Sian on taboto ma, godang do na diulahon si Samuel di tingki i, tarlumobi saleleng 20 taon i.

Nang pe ndang ditaringoti Bibel ulaon ni si Samuel saleleng 20 taon, alai pos do rohanta tongtong do godang ulaonna marhobas tu Jahowa

7, 8. (a) Aha do hata ni si Samuel tu halak Israel dung 20 taon? (b) Aha do pangkorhon ni i tu halak Israel?

7 Balga do pangkorhon ni hajahaton ni anak ni si Eli tu halak Israel. Godang do halak Israel na gabe manomba ganaganaan. Alai dung 20 taon si Samuel mangurupi halak Israel, didok ibana ma, ”Molo tung mulak hamu tu Jahowa sian nasa rohamuna, sai paholang hamu ma angka debata sileban sian tongatongamuna, ro di angka sombaon Astarot, jala marsihohot rohamuna tu Jahowa, jala sasada Ibana oloi hamu, asa dipalua hamu sian tangan ni halak Palistim.”​—1 Sam. 7:3.

8 Dibahen ”halak Palistim” do hasusaan tu halak Israel. Ala nunga hea talu halak Israel, dirimpu halak Palistim ma boi lomolomona tu nasida. Dipatogu si Samuel do roha ni halak Israel na urupan ni Jahowa nasida molo olo muba. Olo do nasida? Dipaboa tu hita, diambolongkon halak Israel ma ganaganaan i jala ”sasada Jahowa dioloi nasida”. Dijou si Samuel ma halak Israel marpungu di Mispa, kota di sabola utara ni Jerusalem. Ro ma nasida, huhut marpuasa jala manolsoli alani dosa ni nasida.​—Jaha 1 Samuel 7:4-6.

Tingki marpungu halak Israel, dirimpu halak Palistim, i ma tingki na denggan laho mangaripashon nasida

9. Aha do sangkap ni halak Palistim dung diboto marpungu halak Israel di Mispa, jala songon dia do halak Israel mangadopi i?

 9 Diboto halak Palistim do na marpungu halak Israel di Mispa. Alani i, ro ma nasida laho mamorangi halak Israel. Dung dibege halak Israel i, mabiar ma nasida. Disuru ma si Samuel martangiang tu Debata. Martangiang ma si Samuel huhut dipelehon pelean tu Debata. Tingki mamelehon pelean i tu Jahowa, nunga sahat halak Palistim di Mispa. Dung i, ditangihon Jahowa ma tangiang ni si Samuel. Alani i, digaori Jahowa ma halak Palistim. Jala ”mangkuling ma ronggur mansai gogo sadarina i dibahen Jahowa mangalo halak Palistim”.​—1 Sam. 7:7-10.

10, 11. (a) Boasa tadok marimbar do ronggur na diparo Jahowa mangalo halak Palistim? (b) Aha do na masa di parporangan i?

10 Na mabiar do halak Palistim songon dakdanak mambege soara ni ronggur? Ndang songon i. Tentara na barani do nasida. Alani i, ndang taboto boasa gabe mabiar nasida. Olo do ra, ndang hea dope dibege halak Palistim soara ni ronggur sisongon i. Na ”mansai gogo” do soara ni ronggur i? Na tarbege do soara ni ronggur di hos ni ari? Manang, na tarbege do soara ni ronggur i di angka dolok? Songon dia pe na masa di tingki i, soara i mambahen halak Palistim mabiar. Ala nunga mabiar, gabe ditaluhon halak Israel ma nasida jala dilelei sahat tu sabola barat ni Jerusalem.​—1 Sam. 7:11.

11 Mulai sian i, talu ma halak Palistim maradophon halak Israel. Saleleng ngolu ni si Samuel, mulak ma muse tu bangso Israel godang kota na tinaluhon ni halak Palistim hian.​—1 Sam. 7:13, 14.

12. Boasa didok si Samuel mangulahon ”hatigoran”, jala songon dia do ibana boi mangulahon i?

12 Marratus taon dungkon i, didok si Paulus ma taringot tu si Samuel, sahalak panurirang na marhaporseaon jala na mangulahon ”hatigoran”. (Heb. 11:32, 33) Diulahon si Samuel do na sintong di adopan ni Jahowa. Dung i, dijujui ibana do na asing mangulahon songon i. Boi do si Samuel mangulahon hatigoran ala sabar ibana paimahon Jahowa, jala diurupi ibana halak Israel mangoloi Jahowa. Dipajongjong ibana do tugu tu Jahowa patuduhon pangargaionna, ala nunga dipamonang Jahowa bangsoNa.​—1 Sam. 7:12.

13. (a) Parange na songon dia do na tahaporluhon asa boi tatiru si Samuel? (b) Didok rohamu, sian mulai andigan do denggan tapatuduhon parange sisongon i?

 13 Lomo do rohamuna mangulahon ”hatigoran”? Molo songon i, ringkot do tatiru hasabaron, pangargaion dohot serep ni roha ni si Samuel. (Jaha 1 Petrus 5:6.) Ise sian hita na so mangkaporluhon parange on? Dipatuduhon si Samuel do angka parange i sian na gelleng, jala on ma na mangurupi ibana boi manaon godang pangunjunan di ngoluna.

’Ndang Diihuthon Angka Anakmu Angka Dalanmu’

14, 15. (a) Aha do na mambahen marsak si Samuel dung matua ibana? (b) Songon na binahen ni si Eli do dibahen si Samuel? Patorang ma.

14 Dipaboa muse tu hita taringot tu si Samuel naung matua. Adong dua anak ni si Samuel, i ma si Joel dohot si Abia. Nasida ma na mangurupi si Samuel gabe panguhum di Israel. Alai, ndang diihuthon nasida pangalaho ni amana. Sahalak na tigor do si Samuel, alai ndang songon i angka anakna. Dipapeol nasida do uhum marhite manjalo sogok.​—1 Sam. 8:1-3.

15 Sada tingki, ro ma angka pamimpin ni Israel mandapothon si Samuel di Rama. Ninna nasida ma, ’Ndang diihuthon  angka anakmu angka dalanmu.’ (1 Sam. 8:4, 5) Diboto si Samuel do taringot i? Ndang taboto taringot i. Alai, ndang na gabe hurang denggan si Samuel mangajari ianakhonna, songon si Eli. Diuhum Jahowa do si Eli ala sumangap dibahen ibana angka anakna sian Jahowa. (1 Sam. 2:27-29) Ndang adong diida Jahowa hasalaan ni si Samuel songon na binahen ni si Eli.

Songon dia do si samuel boi mangadopi jut ni roha jala mangurupi bangsona?

16. Songon dia do pangkilalaan ni natuatua molo ndang sioloi ajar anakkonna, jala songon dia do sitiruon sian si Samuel boi mangapul rohanasida?

16 Dung diboto si Samuel hajahaton ni angka anakna, ndang dipaboa di Bibel molo ibana gabe maila, mandele manang holsoan. Alai, boi do tahilala pangkilalaan ni si Samuel, tarlumobi angka natuatua. Di tingki parpudi on, jotjot do angka dakdanak mangalo tu natuatuana. (Jaha 2 Timoteus 3:1-5.) Alai, boi do tarapul roha ni natuatua na mangadopi sisongon i, molo ditiru nasida si Samuel. Ndang diloas ibana hajahaton ni anakna mambahen ibana ndang marsihohot tu Jahowa. Hamu angka natuatua, ingot ma, nang pe pangkataion dohot sipasingot ndang mangonjar roha ni ianakhonmu asa muba, alai mangkorhon na denggan do parniulaonmuna. Jala songon si Samuel, boi do tongtong bahenonmu las roha ni Jahowa.

Pabangkit ma ”di Hami Sada Raja”

17. Aha do dipangido pamimpin ni Israel tu si Samuel, jala songon dia do pangkilalaan ni ibana?

17 Ndang dipingkirhon ianakhon ni si Samuel pangkorhon ni ulaon ni nasida tu halak Israel. Di tingki i, didok pamimpin ni Israel ma tu si Samuel, ”On pe [pabangkit] ma di hami sada raja, asa ibana manguhum hami, suang songon saluhut bangso parbegu.” Nunga marpulu taon si Samuel gabe panguhum di Israel. Alai saonari, dipangido halak Israel ma sada raja. Antong, na so dihalomohon be si Samuel gabe panguhum? Songon dia do pangkilalaanna? Bibel mandok, ”Sogo ni roha ni si Samuel do hata, na nidoknasida i.”​—1 Sam. 8:5, 6.

18. Aha do mambahen tarapul roha ni si Samuel, jala songon dia do Jahowa patuduhon naung mardosa halak Israel?

18 Parrohahon ma songon dia Jahowa mangalusi tangiang ni si Samuel, ”Tangihon ma suara ni bangso i di saluhut na nidoknasida i tu ho, ai ndada ho, Ahu do na binolonghonnasida disi, asa unang be Ahu rajanasida.” Tontu, tarapul do roha ni si Samuel mambege i. Alai, pangidoan ni halak Israel i ndang pasangaphon Jahowa! Dipaboa Jahowa do tu si Samuel pangkorhonna molo dipillit halak Israel jolma gabe raja ni nasida.  Alai, sai didok nasida do, ”Agia songon i, ingkon adong raja di hami.” Dioloi si Samuel do Jahowa, alani i dimiahi ibana ma raja na pinillit ni Jahowa.​—1 Sam. 8:7-19.

19, 20. (a) Songon dia do pangkilalaan ni si Samuel tingki disuru Jahowa miahanna si Saul gabe Raja? (b) Songon dia do si Samuel mangurupi halak Israel?

19 Songon dia do pangkilalaan ni si Samuel mangulahon i? Jut do rohana? Tongtong do sogo rohana? Olo do ra adong na gabe sogo rohana, alai ndang songon i pangkilalaan ni si Samuel. Dimiahi do si Saul, jala didok ibana do si Saul raja na pinillit ni Jahowa. Dihaol ibana do si Saul, patuduhon na unduk ibana tu raja i. Jala, ninna ma tu bangso i, ”Ida hamu ma na pinillit ni Jahowa, ai tudoshon ibana ndang adong di sandok bangso i.”​—1 Sam. 10:1, 24.

20 Angka parange na denggan do diida si Samuel sian si Saul, ndang hagaleonna. Sai dipingkiri do parange na mambahen si Saul marsihohot tu Jahowa jala ndang diihuthon hata ni jolma na jotjot mubauba. (1 Sam. 12:1-4) Marsihohot do ibana mangurupi halak Israel asa sai marhaporseaon tu Jahowa. Taronjar do roha ni halak Israel mangoloi Jahowa dung dibege hata ni si Samuel. Didok halak Israel do asa ditangiangkon si Samuel nasida. Didok si Samuel do, ”Dao ma i sian ahu, tung mardosa dompak Jahowa, tung mansohot tumangiangkon hamu, sai podahononku do tu hamu dalan na denggan dohot na tigor i.”​—1 Sam. 12:21-24.

Sitiruon sian si Samuel, mangajari hita asa unang paloashon pangiburuon dohot jut ni roha mian di rohanta

21. Songon dia do hita maniru si Samuel tingki dongan na asing na mandapot sada hak na sumurung?

21 Hea do lungun rohamu ala ndang hamu dipillit mandapot hak na sumurung? Sitiruon sian si Samuel, mangurupi hita asa unang mangiburu tu na asing. (Jaha Poda 14:30.) Godang do ulaon lehonon ni Jahowa laho mambahen las roha ni ganup naposoNa.

”Sadia Leleng On Ho Marsak taringot tu Si Saul”

22. Songon na niida ni si Samuel, halak na songon dia do mulana si Saul?

22 Songon na niida ni si Samuel, halak na burju do si Saul. Timbo do si Saul jala uli rupana. Tingki dipabangkit gabe raja, serep do rohana. (1 Sam. 10:22, 23, 27) Asing ni i, dilean do  tu si Saul hak laho mamillit na dumenggan di ngoluna. (5 Mus. 30:19) Saonari, aha do na laho ulahonon ni si Saul?

23. Aha do na parjolo muba sian si Saul, jala songon dia do ibana patuduhon i?

23 Tingki dilehon huaso tu sasahalak, somalna parange na parjolo mago, i ma serep ni roha. Songon i ma na masa tu si Saul. Ndang sadia leleng, gabe ginjang ma roha ni si Saul. Ndang dioloi ibana be Jahowa. Dibuat ibana do ulaon ni si Samuel laho mamelehon pelean. Alani i, dipasingot si Samuel ma ibana jala didok buatonna ma huaso harajaon sian pinompar ni si Saul. Ndang gabe muba si Saul alani sipasingot i, alai lam godang do hajahaton na diulahon ibana.​—1 Sam. 13:8, 9, 13, 14.

24. (a) Songon dia do si Saul ndang mangoloi hata ni Jahowa? (b) Songon dia do didok si Saul tingki dipinsang ibana, jala aha do ditontuhon Jahowa tu ibana?

24 Marhite si Samuel, diparentahon Jahowa do tu si Saul asa diporangi halak Amalek. Didok Jahowa, ingkon bunuonna do si Agag, raja ni Amalek. Alai, ndang dohot si Agag dibunu si Saul. Dung i, ditaban nasida do arta ni halak Amalek na sinuru ni Jahowa laho ripashononna. Tingki ro si Samuel pasingothon si Saul, ndang ditangihon ibana be hata ni si Samuel. Marsidalian do ibana laho pasintongkon dirina. Disalahon ibana do rayatna. Tingki didok si Saul mambuat angka arta i laho dipelehon tu Jahowa, ninna si Samuel ma, ”Ida ma, dumenggan do roha panangihon sian pelean sipotongon.” Dipinsang si Samuel do si Saul, jala barani do ibana paboahon naung tinontuhon ni Jahowa. Buatonna ma harajaon i sian si Saul jala lehononna tu halak na dumenggan sian ibana. *1 Sam. 15:1-33.

25, 26. (a) Boasa sai marsak si Samuel alani si Saul, jala songon dia do didok Jahowa tu ibana? (b) Aha do parsiajaran na dapot ni si Samuel tingki laho ibana tu jabu ni si Isai?

25 Marsak situtu do si Samuel mangida dosa ni si Saul. Martangiang do ibana tu Jahowa saborngin manipat. Mulana, pos  do roha ni si Samuel boi godang ulahonon ni si Saul. Alai saonari, ndang songon i be pangkilalaanna. Gabe ginjang do roha ni si Saul jala ndang dioloi ibana be Jahowa. Mulai sian i, ndang olo be si Samuel mandapothon si Saul. Sada tingki didok Jahowa ma tu si Samuel, ”Sadia leleng on ho marsak taringot tu si Saul, naung pola hubolongkon, asa unang be raja ibana gumomgom Israel? Gohi ma sahanmu dohot miak, jala laho ho, naeng suruhononku ho tumopot si Isai, isi ni Betlehem; ai nunga hupillit di Ahu sada sian angka anakna bahen raja.”​—1 Sam. 15:34, 35; 16:1.

26 Ndang jolma na manontuhon saut sangkap ni Jahowa. Jolma olo do mubauba, alani i molo ndang marsihohot sasahalak, boi do pilliton ni Jahowa halak na asing laho pasauthon sangkapNa. Ndang pola ingkon sai marsak si Samuel alani si Saul. Disuru Jahowa ma si Samuel laho tu Betlehem tu jabu ni si Isai. Dung i, dipasingot Jahowa do asa unang mangida bohi ibana tingki diida angka anak ni si Isai. (Jaha 1 Samuel 16:7.) Ujungna, ro ma si Daud anak siampudan ni si Isai mandapothon si Samuel, jala ibana do na pinillit ni Jahowa!

Diboto si Samuel do molo Jahowa boi mangapul manang paubahon arsak ni roha gabe pasupasu

27. (a) Aha do na mambahen togu haporseaon ni si Samuel? (b) Songon dia do pangkilalaanmuna tu sitiruon na tinadingkon ni si Samuel?

27 Boi ma diida si Samuel boasa denggan Jahowa mamillit si Daud manggantihon si Saul gabe raja. Sai mangiburu do si Saul tu si Daud, jala naeng do bunuonna ibana. Dung i, ndang marhaporseaon be si Saul tu Jahowa. Alai, dipatuduhon si Daud do parange na denggan songon habaranion, roha na marsihohot, dohot haporseaon tu Jahowa. Dung matua si Samuel, lam togu do haporseaonna. Diboto ibana do molo Jahowa boi mangapul manang manguba arsak ni roha gabe pasupasu. Marujung ngolu ma si Samuel jala ditadingkon ibana do sitiruon na denggan. Dung i, diandungi saluhut bangso Israel ma ibana! Saonari, ringkot do naposo ni Debata mamingkiri sungkunsungkun on, ’Hutiru do haporseaon ni si Samuel?’

^ par. 24 Si Samuel do ujungna pamatehon si Agag. Ndang tama raja na jahat i dohot keluargana mandapot asi ni roha. Marratus taon dungkon i, si Haman halak Agag, olo do ra sahalak sian pinompar ni si Agag na marsangkap mangaripashon bangso ni Debata.​—Est. 8:3; ida Pasal 15 dohot 16 di buku on.