Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tiru ma Haporseaon ni Nasida

 PASAL SAMPULU SADA

Jaga Huhut Paimahon

Jaga Huhut Paimahon

1, 2. Aha do ulaon na borat na disuru tu si Elia, jala aha do imbar ni si Elia dohot si Ahab?

HIRIM dope roha ni si Elia mangkatai tu Jahowa sahalakna marhite tangiang. Alai tingki i, ro do torop halak mangkaliangi ibana, ala diida nasida tanda halongangan na binahen ni si Elia, ra laho mambuat roha manang mangido asi ni rohana. Andorang so laho si Elia martangiang tu Dolok Karmel, disuru Jahowa do ibana mandapothon Raja Ahab. Ulaon na borat do on!

2 Imbar do si Elia tu si Ahab. Pangkean na arga do dipangke si Ahab ala ibana sahalak raja, alai halak na manimbil jala pangahut do ibana. Molo si Elia, marpangkean na hombar tu sahalak panurirang, i ma baju ganjang na ditonun sian kulit ni binatang manang sian imbulu ni unto, manang imbulu ni hambing. Baoa na barani, marsihohot jala marhaporseaon do si Elia. Sian na masa di na sadari i, patar ma tarida imbar ni parange ni nasida.

3, 4. (a) Boasa dipaila si Ahab dohot sisomba Baal na asing? (b) Aha do sungkunsungkun na laho taulas?

3 Di na sadari i, dipaila do si Ahab dohot sisomba Baal. Tangkas ma tarida, na so sintong agama sipelebegu na disomba si Ahab dohot si Izebel, di harajaon ni Israel sisampulu marga i. Nang pe nunga marsitutu angka panurirangna i manjou, pola marhajingjang jala dirarihi dagingnasida, alai ndang tolap Baal parohon api laho mangalusi angka panurirangna. Ndang tolap Baal mangalinggomi panurirang na 450 halak i asa unang dibunu. Saleleng tolu taon, martangiang do panurirang ni Baal tu debatanasida laho parohon udan, alai ndang tolap Baal mangulahon i. Alai satongkin nai, patuduhonon ni Jahowa ma na tolap do Ibana pasohon ari logo di Israel. Tangkas ma, debata na so sintong do Baal.​—1 Raj. 16:30–17:1; 18:1-40.

4 Alai, andigan do bahenon ni Jahowa i? Songon dia do  pangkilalaan ni si Elia paimahon i? Jala, aha do na boi tatiru sian baoa na marhaporseaon on? Taparrohahon ma aha na masa!​—Jaha 1 Rajaraja 18:41-46.

Dijugulhon do Martangiang

5. Aha do na didok si Elia tu si Ahab, jala muba do si Ahab?

5 Dijumpangi si Elia ma si Ahab. Didok ma, ”Nangkok ma ho, asa mangan minum, ai marhasak do hubege songon haroro ni udan na por.” Muba do raja na jahat on dung diida na masa sadari i? Ndang tangkas dipaboa taringot on. Alai, ndang adong tajaha di Bibel na manolsoli roha ni si Ahab, jala ndang adong dipangido ibana tu si Elia asa diurupi mardame tu Debata. Na dipaboa, i ma ”nangkok si Ahab laho mangan minum”. (1 Raj. 18:41, 42) Alai, songon dia do molo si Elia?

6, 7. Aha do na ditangiangkon si Elia, jala boasa?

6 ”Nangkok ma si Elia tu punsu ni Karmel laos manungkap tu tano, jala dibahen bohina tu holangholang ni ulu ni totna.” Dung laho si Ahab mangan, martangiang ma si Elia. Parrohahon ma serep ni roha ni si Elia, marsinggang do ibana tu tano, mansai bungkuk sahat tu naeng dais bohina tu duguldugulna.  Aha do na pinangidona? Songon na dipaboa di Jakobus 5:18, martangiang do si Elia asa salpu ari logo di Israel. Ra, di punsu ni Dolok Karmel do ibana martangiang.

Tangiang ni si Elia patuduhon na rumingkot di ibana, i ma asa saut sangkap ni Jahowa

7 Andorang so i, nunga didok Jahowa, ”Naeng ma tongosonku udan tu tano i.” (1 Raj. 18:1) Alani i, martangiang ma si Elia asa saut janjiNa i, dos songon tangiang na niajarhon ni Jesus tu siseanna hirahira saribu taon dungkon i.​—Mat. 6:9, 10.

8. Aha do na boi taparsiajari sian tangiang ni si Elia?

8 Godang do na boi taparsiajari sian tangiang ni si Elia. Na rumingkot di si Elia, i ma saut sangkap ni Jahowa. Tingki martangiang, sai taingot ma, ”molo tapangido manang aha marguru tu lomo ni rohana, tangihononna do hita”. (1 Joh. 5:14) Alani i, ingkon taboto do lomo ni roha ni Debata asa ditangihon tangiangta. I do umbahen na ringkot taparsiajari Bibel ganup ari. Tontu, hirim do roha ni si Elia hatop salpu ari logo sian Israel, ala nunga susa bangso i. Ra, lam pos do rohana dung diida angka na masa sadari i. Saonari, lomo do rohanta patuduhon hamauliateon dohot holongta tu na asing marhite tangiang.​—Jaha 2 Korint 1:11; Pilippi 4:6.

Jaga Huhut Marpos ni Roha

9. Aha do na didok si Elia tu naposona, jala aha do na boi taparsiajari sian ibana?

9 Pos do roha ni si Elia na laho salpuhonon ni Jahowa ari logo di Israel. Alai, ndang diboto ibana andigan Jahowa manalpuhon i. Antong, huhut paimahon Jahowa, aha do diulahon si Elia? Dipaboa di Bibel, ”Didok ma tu naposona: Ua nangkok ma ho manatapnatap tungkan laut.” Alani i, laho ma naposona i. Dung i, ninna ma tu si Elia, ”Ndang adong disi agia aha.” Dung i, didok si Elia ma muse, ”Ulahi laho, pola pitu hali.” (1 Raj. 18:43) Adong dua na boi taparsiajari sian si Elia. Na parjolo, pos ni rohana. Na paduahon, ibana tongtong jaga.

Marsitutu do si Elia manulingkiti angka tanda na patuduhon angka siulahonon ni Jahowa

10, 11. (a) Songon dia do si Elia patuduhon na porsea ibana tu janji ni Jahowa? (b) Boasa boi hita marhaporseaon na togu songon si Elia?

10 Marpos ni roha do si Elia tu janji ni Jahowa marhite manulingkiti angka tanda na patuduhon angka siulahonon ni Jahowa. Alani i, disuru ibana ma nangkok naposona tu inganan  na timbo, laho mangida adong manang ndang tanda di langit na patuduhon naeng ro udan. Tingki ro naposona i paboahon barita, didok ma, ”Ndang adong disi agia aha.” Tiur do langit jala ndang adong ombun. Adong do na hurang taringot tu na masa i? Ingot ma, nunga didok si Elia tu Raja Ahab, ”Marhasak do hubege songon haroro ni udan na por.” Aha do na paposhon roha ni si Elia mandok i, hape so adong tanda naeng ro udan?

11 Tangkas do diantusi si Elia janji ni Jahowa. Sahalak panurirang dohot naposo ni Jahowa do ibana. Alani pos ni rohana tu Jahowa, pola do dihatahon ibana naung dibege haroro ni udan na por. On paingothon hita tu hata ni Bibel na mandok taringot si Musa, ”Ai dapotan gogo do ibana, ala diida rohana Ibana, na so tarida hian.” Tangkas do Jahowa di hamu? Diparade Jahowa do marragam tanda na mangurupi hita marhaporseaon tu Ibana dohot tu angka janjiNa.​—Heb. 11:1, 27.

12. Sian dia do taboto na tongtong do jaga si Elia, jala aha do didok ibana dung dibege adong ombun na metmet?

12 Na mangihut, taparrohahon ma roha ni si Elia na tongtong jaga. Sahat tu pitu hali do disuru ibana naposona mangida tanda di langit. Tapingkirhon ma, nang pe naung loja naposona i mulahulak laho mangida tanda i, alai ndang marnaloja si Elia manuru ibana. Ujungna, dung na papituhalihon, dipaboa naposona i ma tu ibana, ”Ida ma, ombun sada na metmet songon tangan ni baoa sada balgana manaek sian laut.” Boi do dapot rohamu tingki dibahen naposo ni si Elia tanganna mangungkur bolak ni ombun na nangkok sian Laut Tonga i? Ra, ndang pola longang roha ni naposona i mangida tanda i. Alai di si Elia, tanda na ringkot do i. Dung i, ditonahon ibana ma tu naposona i, ”Nangkok ma ho, dok ma tu si Ahab: Pasang ma huretam jala tuat, asa unang ambaton ni udan i ho.”​—1 Raj. 18:44.

13, 14. (a) Songon dia do hita boi maniru si Elia na tongtong dungo? (b) Aha do na boi mangurupi hita asa tongtong dungo?

13 Dipatudu si Elia do muse na togu haporseaonna. Sabar do si Elia paimahon salpu ari logo i. Saonari, maimaima do naposo ni Debata asa disalpuhon Debata portibi na nirajaan ni Sibolis on. Taida ma satongkin nai songon dia Jahowa pasauthon sangkapNa. (1 Joh. 2:17) Songon si Elia, ingkon tongtong do hita dungo paimahon Jahowa paujungkon i. Dipodai Jesus do angka siihuthon ibana, ”Onpe, dungo ma hamu; ai ndang  diboto hamu ari haroro ni Tuhanmuna!” (Mat. 24:42) Aha do lapatan ni hata on? Na so diboto angka siseanna do andigan ro ari i? Ndang songon i. Tangkas do dipaboa Jesus tu siseanna angka tanda ni harorona. Alani i, boi do taparsiajari angka tanda ni ”ajal ni hasiangan on”.​—Jaha Mateus 24:3-7.

Holan mangida ombun na metmet pe nunga boi pos roha ni si Elia na laho paujungon ni Jahowa nama ari logo. Tanda di tingki parpudi paposhon rohanta laho paimahon Jahowa

14 Ganup tanda paposhon rohanta naung jonok ari rimas ni Jahowa. Taronjar do rohanta marhobas tu Jahowa alani angka tanda i? Nunga sae holan ombun na metmet paposhon roha ni si Elia na laho paujungon ni Jahowa nama ari logo. Alai, pailaon ni Jahowa do panurirangNa i?

Dilehon Jahowa Haluaon dohot Pasupasu

15, 16. Aha do na masa di na satongkin i, jala aha do na dipingkirhon si Elia taringot si Ahab?

15 Bibel paboahon tu hita, ”Satongkin i, mangholom ma langit, mangullus ma alogo, dung i ro ma udan mansai doras. Naek ma si Ahab tu karetana, mulak tu Jisreel.” (1 Raj. 18:45, Bibel siganup ari) Sangkidop mata do sude na masa i. Tingki laho naposo ni si Elia mandapothon si Ahab, lam godang ma ombun, jala mangkolom ma langit. Mangullus ma alogo, dung i ro ma udan mansai dobar, paujungkon ari logo na masa saleleng tolu satonga taon. Gok ma aek di tano na mahiang i dohot di sunge Kison, laos dibaor aek i ma mudar ni angka panurirang Baal i. On ma muse tingki ni halak Israel laho paubahon roha, jala paiashon dirinasida sian dosa ala manomba Baal.

”Ro ma udan tipotipo”

16 Tontu, hirim do roha ni si Elia asa dipasiding nasida panombaon tu Baal! Sungkunsungkun do roha ni si Elia, aha na laho ulahonon ni si Ahab dungkon i. Muba do si Ahab? Sasintongna nian, holan mangida na masa i pe, ingkon muba do roha ni si Ahab. Alai, ndang taboto aha na di roha ni si Ahab tingki i. Dipaboa tu hita, ”marhureta ma anggo si Ahab laho tu Jisreel”. Dirimangi ibana do sude na masa i? Taronjar do rohana laho muba? Angka na masa dungkon i patuduhon, ndang taronjar rohana laho muba. Alani i, ndang i dope ujungna di si Ahab dohot di si Elia.

17, 18. (a) Aha do na masa tu si Elia tingki laho tu Jisreel? (b) Boasa longang rohanta ala boi si Elia marlojong sian Karmel tu Jisreel? (Ida surat na di toru.)

 17 Ujungna, borhat ma si Elia mangihuthon dalan ni si Ahab. Dao do pardalanan i, margambo, jala golap muse. Alai, adong ma na masa na mambahen longang roha.

18 ”Ro ma tangan ni Jahowa manogu si Elia, laos dihohosi ma gontingna marlojong manjoloani si Ahab sahat ro di Jisreel.” (1 Raj. 18:46) Tangkas ma, ”tangan ni Jahowa” nunga manogu si Elia marhite tanda halongangan. Longang do rohanta alani on. Hirahira 30 kilometer ma dao ni Jisreel, jala ndang poso be si Elia. * Pingkirhon ma songon dia si Elia mansai gomos manali baju ganjangna i tu gontingna, asa boi ibana hatop marlojong. Dung i, marlojong ma ibana sahatop ni hatopna di tano na maraek i, gabe boi dilumba hureta ni si Ahab, jala dao manadingkon si Ahab di pudi!

19. (a) Aha do janji na taingot tingki dilehon Jahowa hagogoon tu si Elia? (b) Huhut marlojong si Elia, aha do na dihilala ibana?

19 Sada pasupasu do on di si Elia! Boi ibana margogo lobi sian uju di haposoonna. Tontu, on sada pengalaman na palongang roha. Ra, taingot do angka janji na laho saut di Paradeiso, hita sude sehat jala margogo songon uju di haposoon. (Jaha Jesaya 35:6; Luk. 23:43) Huhut marlojong si Elia di dalan na margambo i, dihilala ibana ma na holong do roha ni Jahowa tu ibana!

20. Aha do na ingkon taulahon asa dapotta pasupasu ni Jahowa?

20 Lomo do roha ni Jahowa mangalehon pasupasu tu hita. Alani i, marsitutu ma hita asa mandapot pasupasu; ingot ma, ndang marisuang sude na taulahon i. Songon si Elia, ingkon jaga do hita, tarimangi ma angka tanda na patuduhon naung jonok ari ni Jahowa. Jala songon si Elia, godang do na paposhon rohanta tu janji ni Jahowa, ”Debata ni hasintongan”.​—Ps. 31:6.

^ par. 18 Ndang leleng dungkon i, disuru Jahowa ma si Elia mangalatik si Elisa, na ditanda sahalak na ’mangusehon aek pamuri tu tangan ni si Elia’. (2 Raj. 3:11) Parhobas ni si Elia do si Elisa, jala ibana ma na mangurupi panurirang na matua i.