”Ndang sian portibi on hamu”.​—JOHANNES 15:19.

1. Aha do na dipaboa Jesus tu siseanna andorang so dibunu ibana?

DI BORNGIN na parpudi andorang so dibunu Jesus, dipatudu ibana do holso ni rohana taringot na masa tu siseanna di ari na naeng ro. Martangiang ma ibana tu Amana, ”Ndang apala hupangido, taitonmu nasida sian portibi on; alai naeng ma ramotanmu nasida maralohon na jahat i. Ndang na sian portibi on nasida, songon Ahu na so sian portibi on.” (Johannes 17:15, 16) Sian tangiang on, taida ma holong situtu do roha ni Jesus tu siseanna. Ringkot do mangingot hata ni Jesus na mandok, ”Ndang sian portibi on hamu.” (Johannes 15:19) Tangkas ma, mansai ringkot do di Jesus asa unang diihuthon siseanna tondi ni portibi on!

2. Aha do lapatan ni hata ”portibi” songon na didok Jesus?

2 Hata ”portibi” lapatanna, i ma sude jolma naung mardosa na dirajai Sibolis jala gabe hatoban ni parange na mangkaringkothon diri sandiri. (Johannes 14:30; Epesus 2:2; 1 Johannes 5:19) Tutu ma, ”hamusuon dompak Debata do paralealeon dohot portibi on”. (Jakobus 4:4) Songon dia do hita na maringanan di portibi on, ndang mangihuthon lomo ni roha ni portibi on? Taulas ma lima cara: Marsihohot ma tu Harajaon ni Debata na diparenta Kristus jala ndang parsidohot tu politik, ndang mangihuthon tondi ni portibi on, pantun marpangkean, parngoluon na sederhana jala mamangke sinjata na sian Debata.

 MARSIHOHOT JALA NDANG PARSIDOHOT TU POLITIK

3. (a) Songon dia do roha ni Jesus mangida politik? (b) Boasa siihuthon Jesus na dimiahi tondi digoari partonaan (duta)? (Ida ma surat na di toru.)

3 Ndang olo Jesus parsidohot tu politik. Na rumingkot di ngoluna, i ma marbarita na uli taringot Harajaon ni Debata, sada pamarentaon sian surgo na laho mamarenta di ari na naeng ro jala Jesus ma na laho gabe Raja. (Daniel 7:13, 14; Lukas 4:43; 17:20, 21) Di adopan ni Gubernur Rom Pontius Latus, didok Jesus ma, ”Ndang sian portibi on harajaonku.” (Johannes 18:36) Angka siihuthon Jesus marsihohot tu Harajaon ni Debata jala mamaritahon i, di liat portibi on. (Mateus 24:14) Alani i, disurat si Paulus ma, ”Partonaan ni Kristus do hami, ai na mangapoi do Debata marhite sian hami. Singkat ni Kristus do hami mangelehelek: Sai olo ma hamu padengganon tu Debata!” *2 Korint 5:20.

4. Songon dia do halak Kristen patuduhon molo nasida marsihohot tu Harajaon ni Debata? (Ida ma kotak ” Ndang Marpihak Halak Kristen di Abad na Parjolo”.)

4 Sasahalak didok do partonaan (duta) ala ibana disuru laho tading di negara na asing laho mangurus na ringkot tu negarana sandiri. Nasida ndang parsidohot tu sude ulaon ni negara ingananna tading. Alai, sahalak duta ingkon mangihuthon aturan ni negarana sandiri. Songon i ma angka halak na miniahan ni Kristus, nasida gabe sambulon [warganegara] ”di banua ginjang”. (Pilippi 3:20) Marhite marbarita, nasida mangurupi marjuta ’birubiru na asing’ ni Kristus asa ’mardenggan tu Debata’. (Johannes 10:16; Mateus 25:31-40) Birubiru na asing on, gabe halak na disuru Kristus laho mangurupi halak na miniahan. Nasida sada  punguan na mangurupi Harajaon ni Messianik jala ndang parsidohot tu politik.​—Jaha Jesaya 2:2-4.

5. Aha do imbar ni halak Kristen dohot halak Israel najolo? Jala songon dia do nasida patuduhon i?

5 Na mambahen halak Kristen ingkon ndang parsidohot  tu politik, ndang holan ala marsihohot tu Kristus. Hita ndang songon bangso Israel najolo, na tading di sada inganan na pinarade ni Debata. Halak Kristen saonari on, i ma punguan ni dongan sahaporseaon na adong di liat portibi on. (Mateus 28:19; 1 Petrus 2:9) Alani i, molo parsidohot hita tu politik na adong di ingananta, on mangambati hita mangkatai taringot Harajaon ni Debata dohot taringot dongan sahaporseaon na adong di liat portibi on tu na asing. (1 Korint 1:10) Molo parsidohot hita marporang, maralo ma hita dohot angka dongan sahaporseaon. Hape diparentahon do hita asa masihaholongan dohot angka dongan. (Johannes 13:34, 35; 1 Johannes 3:10-12) Alani i ma, diparentahon Jesus do tu siseanna asa dipasarung podang ni nasida jala dihaholongi angka musuna.​—Mateus 5:44; 26:52; ida ma kotak ” Boi do Ahu Tongtong Netral?”.

6. Songon dia do sahalak Kristen naung mangalehon dirina tu Debata maradophon Kesar?

6 Sahalak Kristen nunga mangalehon dirina tu Debata, ndang tu pamarentaon ni jolma manang tu sada bangso. Di 1 Korint 6:19, 20 mandok, ”Ndada hamu nampuna dirimuna. Ai arga do hamu ditobus.” Nang pe angka siihuthon Jesus disuru mangalehon sangap, pajak dohot pangoloion na patut tu ”Kesar”, ingkon lehonon ni nasida do ”tu Debata na sian Debata!” (Markus 12:17; Rom 13:1-7) Dohot ma i, panombaon na sintong, holong na sian nasa roha dohot pangoloion tu sude parentaNa. Molo dihaporluhon, nasida ingkon rade mangalehon ngolu ni nasida tu Debata.​—Lukas 4:8; 10:27; jaha Ulaon ni Apostel 5:29; Rom 14:8.

NDANG MANGIHUTHON TONDI NI PORTIBI ON

7, 8. Aha do ”tondi ni portibi on” jala songon dia do tondi i ”mangula” di bagasan roha ni jolma?

7 Halak Kristen ndang mangihuthon portibi on molo  ndang diihuthon nasida tondi ni portibi on. Si Paulus manurat, ”Ndang hujalo hami tondi portibi on; Tondi na sian Debata do.” (1 Korint 2:12) Ibana mandok tu huria Epesus, ”Angka na niulahonmuna marguru tu tingki ni hasiangan on, mangihuthon lomolomo ni na marhuaso di aoangaoang, i ma tondi na mangula nuaeng di bagasan angka anak na so siat hata.”​—Epesus 2:2, 3.

8 Hata ”aoangaoang” manang alogo dohot tondi ni portibi on lapatanna, i ma huaso na so tarida, na manjujui jolma ndang mangoloi Debata jala na patubuhon ”lomolomo ni roha ni daging, giotgiot ni roha ni mata”. (1 Johannes 2:16; 1 Timoteus 6:9, 10) ”Marhuaso” do tondi on mangelaela pingkiran na mardosa, manipu roha jala marsitutu asa mangulahon dosa. Songon alogo, adong do ulaon na sala on didia pe. Tondi ni portibi on ”mangula” do di roha ni sasahalak, lapatanna lam leleng boi do dibahen roha ni sasahalak mangulahon parange na so denggan. Songon mangkaringkothon diri sandiri, roha haginjangon, pangahution jala mangalo tu uhum. * Tangkas ma, tondi ni portibi on lam leleng boi mambahen parange ni Sibolis tubu di roha ni sasahalak.​—Johannes 8:44; Ulaon ni Apostel 13:10; 1 Johannes 3:8, 10.

9. Marhite aha do tondi ni portibi on masuk tu roha dohot pingkiranta?

9 Boi do tondi ni portibi on marurat di bagasan pingkiran dohot rohamuna? Boi, molo ndang jaga di partondion. (Jaha Poda 4:23.) Jotjot do ndang pintor tarida pangkorhon ni tondi ni portibi on. Boi do on ro sian angka dongan na taida burju, alai sasintongna ndang mangkaholongi Jahowa. (Poda 13:20; 1 Korint 15:33) Boi do tondi ni portibi on masuk tu pingkiranta marhite aha pe, na pasahathon parange ni Sibolis dohot lomo ni rohana. Umpamana, situs  pornografi manang hata ni halak na dipabali, sijahaon, hiburan dohot olahraga na so denggan.

10. Songon dia do hita asa unang mangihuthon tondi ni portibi on?

10 Songon dia do hita asa unang mangihuthon tondi ni portibi on jala tongtong di bagasan holong ni roha ni Debata? Martangiang ma hita mangido tondi parbadia jala tapangke ma sude sipanganon partondion na pinarade ni Jahowa. Umbalga do huaso ni Jahowa sian  Sibolis dohot portibi na jahat on. (1 Johannes 4:4) Alani i, ringkot do molo tongtong tapajonok tu Debata marhite tangiang!

PANTUN MARPANGKEAN

11. Songon dia do tondi ni portibi on marpangkorhon tu cara ni sasahalak marpangkean?

11 Boi do taida aha tondi na mangula di diri ni sasahalak sian carana marpangkean, parsurion dohot haiason. Di godang negara, ndang diharingkothon be cara ni sasahalak marpangkean. Sahalak pembawa acara di TV paboahon, ndang leleng nai, ndang marimbar be pangkean ni boruboru na so hasea tu na asing. Sada surat kabar paboahon, angka anak boru na poso pe, nunga ”mamangke baju na so tama idaon”. Na asing muse, ndang maratur marpangkean na patuduhon parange na mangalo jala ndang patuduhon sangap tu dirina sandiri.

12, 13. Aha do prinsip na boi tapangke asa pantun marpangkean?

12 Naposo ni Jahowa ingkon marpangkean na ias, na pantun, tama idaon jala hombar tu na taulahon. Sian pangkeanta, tarida ma molo hita manomba Jahowa jala ”marpangkean hahormaton dohot toruk ni roha”. Na rumingkot, unang ma marpangkean asa parohon sangap tu diri sandiri alai asa tongtong do ”di bagasan holong ni roha ni Debata”. (1 Timoteus 2:9, 10; Judas 21) Tutu, las do rohanta mamangke pangkean na arga. Alai, ”jolma parbagasan na buni . . . , i do na arga dietong Debata”.​—1 Petrus 3:3, 4

13 Ingot ma, cara marpangkean dohot parsurionta mangkorhon do tu cara ni sasahalak mangida panombaon na sintong. Hata Junani na diterjemahon gabe hata ”pantun” lapatanna, i ma parange na parohon sangap dohot pangargaion tu pangkilalaan manang pandapot ni na asing. Alani i, rumingkot do mangargai panggora ni roha ni halak sian hakta laho manontuhon pangkean na tapangke.  Taingot ma, hita naeng parohon sangap tu Jahowa dohot naposoNa. Tapataridahon ma molo hita olo ”pasangaphon Debata” di saluhut ulaon.​—1 Korint 4:9; 10:31; 2 Korint 6:3, 4; 7:1.

Parohon sangap tu Jahowa do carangku marpangkean?

14. Aha do na porlu tasungkun tu dirinta tingki mamilit cara marpangkean na pantun?

14 Ringkot do mamparrohahon pangkean dohot haiason tingki marbarita manang laho tu parpunguan. Sungkun ma dirimuna, ’Parohon sangap tu diringku do carangku marpangkean? Parohon ila do i tu na asing? Na rumingkot do di ahu mangihuthon giotgiot ni roha taringot pangkean sian mandapot hak na sumurung laho marbarita na uli?’​—Psalmen 68:6; Pilippi 4:5; 1 Petrus 5:6.

15. Boasa ndang dipatorang sude di Bibel taringot caranta marpangkean, parsurion dohot haiason?

15 Ndang disurat sude di Bibel taringot cara marpangkean, parsurion dohot haiason tu halak Kristen. Lomo do roha ni Jahowa asa tapangke hakta mamillit laho mambahen haputusan. Alani i, lomo do rohaNa asa tapangke prinsip ni Bibel jala gabe halak ”naung pasomalsomal rohana, gabe malo mambolati na denggan sian na roa”. (Heber 5:14) Lomo do rohaNa asa sude ulaonta mardongan holong, i ma holong tu Debata dohot tu dongan. (Jaha Markus 12:30, 31.) Molo tapangke prinsip on, boi ma tapillit  marragam pangkean dohot parsurion. Tarida ma on sian marragam pangkean na dipangke naposo ni Debata na adong di liat portibi on.

PARNGOLUON NA SEDERHANA

16. Songon dia do tondi ni portibi on maralo tu ajaran ni Jesus jala aha do na porlu tasungkun tu dirinta sandiri?

16 Tondi ni portibi on mangaliluhon jala manjujui marjuta halak asa mangalului hepeng dohot arta na parohon las ni roha. Alai, Jesus mandok, ”Ai nang pe marlobilobi halak, ndada sian artana i ngoluna.” (Lukas 12:15) Ndang lomo roha ni Jesus molo humolongan rohanta tu hepeng dohot tu arta. Alai, songon na didok Jesus, marlas ni roha do sasahalak na ”umboto na pogos partondionna”, sederhana di parngoluon jala mangkaringkothon ulaon partondion di ngoluna. (Mateus 5:3, Bibel siganup  ari; 6:22) Sungkun ma dirimuna, ’Tutu do huhaporseai aha na diajarhon ni Jesus? Manang, lomo ni roha ni ”ama ni sude gabus” do huihuthon? (Johannes 8:44, Bibel siganup ari.) Aha do na tarida sian pangkataionta, sangkapta dohot na ringkot di ngolunta?’​—Lukas 6:45; 21:34-36; 2 Johannes 6.

17. Paboa ma aha do laba na tadapot molo sederhana di parngoluon.

17 Disurat do di Bibel, ”Gabe siulahon Hata i ma hamu, unang holan pananginangi.” (Jakobus 1:22) Parrohahon ma laba na dihilala halak na manjaga parngoluonna tongtong sederhana. Dapot ni nasida ma las ni roha ala parsidohot marbarita na uli. (Mateus 11:29, 30) Ndang palobihu nasida mamingkiri hasusaan asa unang marsahit jala mura tarrimas. (Jaha 1 Timoteus 6:9, 10.) Ala boi do mamangke na adong, godang ma tingki nasida tu keluarga jala marsaor dohot dongan sahaporseaon. Alani i, renge ma nasida modom. (Parjamita 5:12) Dapot las ni roha do nasida ala lomo rohana mangalehon nasa na tolap nasida. (Ulaon ni Apostel 20:35) Dame ma roha, ”marpangkirimon” jala las roha ni nasida mandalani ngolu saonari. (Rom 15:13; Mateus 6:31, 32) Mansai las roha mandapot laba sisongon on!

MAMANGKE ”SINJATA NA SIAN DEBATA”

18. Songon dia do musunta dohot carana laho mangalo hita digombarhon di Bibel?

18 Halak na tongtong di bagasan holong ni roha ni Debata, diramoti do asa togu partondionna. Ala sogo do roha ni Sibolis tu halak Kristen, na boi marlas ni roha saonari jala mandapot hangoluan salelengna di ari na naeng ro. (1 Petrus 5:8) Si Paulus mandok, ”Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i.” (Epesus 6:12) Hata ”marungkil” di Terjemahan Dunia Baru dibahen  gabe hata ”marsiranggut”. On patuduhon molo paraloan i, ndang ro sian inganan na dao manang inganan na buni alai sian inganan na mansai jonok. Hata ”angka harajaon”, ”angka parhuaso” dohot ”angka sigomgomi hasiangan haholomon”, patuduhon molo paraloan i, marharoroan sian tondi ni portibi on jala diatur laho mamorangi haporseaonta.

19. Gombarhon ma songon dia sinjata na sian Debata dibahen di Bibel.

19 Nang pe hita halak na mardosa jala marhahurangan, alai boi do monang. Songon dia carana? Mamangke ”sinjata na sian Debata.” (Epesus 6:13) Di Epesus 6:14-18, sinjata na sian Debata digombarhon songon on, ”Jongjong ma hamu, marhohoshon hasintongan di gontingmuna, angka naung manolukkon bajubaju partahanan, i ma hatigoran i. Marsipatu ma patmuna, laho mangkaringgashon barita na uli, pardamean i. Angkup ni sudena i, jalo hamu ma lombulombu haporseaon i; haintopan hamu do marhite sian i sude sumbia api ni parjahat i. Jangkon hamu ma nang tahuluk haluaon dohot podang ni tondi, i ma hata ni Debata. Martangiang ma hamu, mardongan sandok pangidoan dohot elehelek di bagasan Tondi.”

20. Boasa imbar halak Kristen dohot tentara?

20 Ala sude sinjata on marharoroan sian Debata, tarondingi ma hita molo tongtong tapangke. Halak Kristen, ndang songon tentara na boi maradi tingki marporang. Tongtong do nasida marporang ala mangkorhon tu hangoluan dohot hamatean. Marporang do nasida sahat tu na ripashonon ni Debata portibi na nirajaan ni Sibolis dohot angka begu. (Pangungkapon 12:17; 20:1-3) Alani i, marsitutu ma hamu tongtong mangalo hahurangan dohot giotgiot na sala, ala hita sude ingkon ’mamukpuhi’ dirinta sandiri asa boi tongtong marsihohot tu Jahowa. (1 Korint 9:27) Porlu do pingkirhononmuna molo ndang olo hamu marsiranggut!

21. Songon dia do hita asa boi monang tingki mandapot paraloan di partondion?

 21 Ndang boi hita monang di paraloan on molo holan mangasahon gogonta sandiri. Alani i, si Paulus paingothon porlu do martangiang tu Jahowa ”di bagasan Tondi, manang sadihari pe”. Tatangihon ma Jahowa marhite marsiajar Bibel dohot marsaor tu angka dongan na ”marungkil” ganup ari! (Pilemon 2; Heber 10:24, 25) Halak na marsihohot mangulahon sude cara on, ndang holan asa mandapot hamonangan. Alai, rade ma nasida mangkatindangkon haporseaonna manang sadihari pe.

TONGTONG MA HATINDANGKON HAPORSEAONMU

22, 23. (a) Boasa hita ingkon tongtong rade mangkatindangkon haporseaonta jala aha do na porlu tasungkun tu dirinta sandiri? (b) Aha do na laho taulas di pasal na mangihut?

22 Jesus mandok, ”Ndang sian portibi on hamu. . .  . ala ni i do, umbahen na dihosomi portibi on hamu.” (Johannes 15:19) Alani i, halak Kristen ingkon sai rade do mangkatindangkon haporseaonna mardongan lambok ni roha dohot biar. (Jaha 1 Petrus 3:15.) Sungkun ma dirimuna, ’Tangkas do huantusi boasa Sitindangi Ni Jahowa olo mambahen pandapot na imbar sian pandapot ni godangan halak? Tingki mangulahon prinsip on, porsea do ahu molo on na marharoroan sian Bibel dohot naposo haposan? (Mateus 24:45; Johannes 17:17) Tingki mangulahon na sintong, rade do ahu marimbar sian na asing jala las do rohangku tingki mangulahon on?’​—Psalmen 34:2; Mateus 10:32, 33.

23 Alai, ndang mura asa unang mangihuthon portibi on. Tongtong do hita dielaela sian cara na so tangkas tarida. Umpamana, songon naung dipaboa nangkin, Sibolis marsitutu mangelaela naposo ni Debata marhite hiburan. Songon dia do hita mamillit hiburan na denggan jala mambahen panggora ni rohanta ias? Taulas ma on di pasal na mangihut.

^ par. 3 Sian Pentakoste 33 M, Kristus nunga gabe Raja tu huria ni angka halak na miniahan ni tondi, na adong di tano on. (Kolosse 1:13) Taon 1914, Kristus nunga gabe raja ni ”harajaon ni hasiangan on”. Alani i ma, halak Kristen na miniahan pe gabe duta ni Harajaon ni Messianik.​—Pangungkapon 11:15.

^ par. 8 Ida ma buku Bertukar Pikiran mengenai Ayat-Ayat Alkitab, halaman 312-315, na dipabinsar Sitindangi Ni Jahowa.