Angka Dongan na Mangkaholongi Jahowa,

Jesus mandok, ”Tandaonmuna ma na sintong i, jala paluaon ni na sintong i ma hamu.” (Johannes 8:32) Dame do pangkilalaan mambege hata on! Boi taantusi hasintongan saonari, nang pe ”di angka tingki parpudi” on godang hatorangan na so sintong. (2 Timoteus 3:1) Diingot hamu do nandigan hamu parjolo sahali mananda hasintongan? Mansai las do roha di tingki i!

Taboto do, na ringkot marparbinotoan na denggan taringot hasintongan jala paboahon i tu na asing. Alai, ingkon tapahombar do parangenta tu na tarsurat di Bibel. Alani i, porlu do hita tongtong di bagasan holong ni roha ni Debata. Aha do na porlu taulahon? Alusna, boi ma taida sian hata ni Jesus tu angka apostelna, na mandok, ”Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohana.”​—Johannes 15:10.

Ala tongtong do Jesus mangaradoti angka patik na sian Jahowa, boi ma ibana tongtong di bagasan holong ni roha ni Debata. Songon i ma nang hita. Ingkon taulahon do hasintongan di parngoluonta siganup ari, asa boi hita tongtong di bagasan holong ni roha ni Debata. Di borngin andorang so mate Jesus, didok ibana do, ”Molo diboto hamu i, martua ma hamu mangulahonsa!”​—Johannes 13:17.

Hirim do rohanami, buku on boi mangurupi hamu asa mangulahon hasintongan ganup ari jala tongtong ”di bagasan holong ni roha ni Debata! . . . asa sahat hamu tu hangoluan salelenglelengna”.​—Judas 21.

Punguan na Mangaradoti Organisasi Sitindangi Ni Jahowa