Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tongtong ma di Bagasan Holong ni Roha ni Debata

 PASAL 10

Pardongansaripeon i ma Silehonlehon sian Debata

Pardongansaripeon i ma Silehonlehon sian Debata

”Tali na tinolu maol do tos.”​—PARJAMITA 4:12.

1, 2. (a) Taringot halak na baru mardongan saripe, sungkunsungkun aha do na olo ro tu rohanta jala boasa? (b) Aha do sungkunsungkun na laho taulas di pasal on?

LAS do rohamuna ro tu pesta parbogason? Godang halak marlas ni roha ro tu pesta parbogason. Uli do rupa ni halak na marhasohotan i. Minar bohi ni nasida jala las hian rohana! Hira na mansai denggan situtu do ari na laho sidalananna.

2 Sasintongna, godang do pardongansaripeon na sursar saonari. Nang pe lomo rohanta mangida angka na baru mardongan saripe marlas ni roha, alai olo do sungkunsungkun rohanta, ’Boi do nasida tongtong marlas ni roha? Boi do togu pardongansaripeon ni nasida?’ Taboto ma alusna molo tungganedoli dohot tungganeboru porsea jala mangulahon poda ni Bibel taringot pardongansaripeon. (Jaha Poda 3:5, 6.) On ringkot diulahon asa tongtong nasida di bagasan holong ni roha ni Debata. Saonari, taulas ma songon dia alus ni Bibel taringot opat sungkunsungkun on: Boasa marhasohotan? Ise do na tapillit gabe dongan saripe? Aha do na porlu taparade asa denggan parsaripeon? Songon dia do asa togu pardongansaripeon?

BOASA MARHASOHOTAN?

3. Boasa ndang marbisuk molo marhasohotan holan naeng manggohi lomo ni roha ni halak?

3 Adong do halak mandok, ingkon marhasohotan do sasahalak  asa boi marlas ni roha. Ndang denggan pingkiran sisongon on! Jesus, halak na so hea marhasohotan. Ibana mandok molo adong na so marhasohotan, on sada silehonlehon sian Debata. Jala ndang diorai Jesus molo tarbahen ni sasahalak ndang marhasohotan. (Mateus 19:11, 12) Dipaboa apostel Paulus do muse labana molo ndang marhasohotan sasahalak. (1 Korint 7:32-38) Alai, Jesus dohot si Paulus ndang hea mambahen parenta, asa sude halak ndang marhasohotan. Gariada, ”podapoda ni angka Sibolis” do molo ’diorai mardongan saripe’ angka halak. (1 Timoteus 4:1-3) Alani i, ndang marbisuk molo marhasohotan holan naeng manggohi lomo ni roha ni halak. Umpamana, ala dijujui angka dongan. Alana, godang do laba na dihilala na so marhasohotan ala nasida boi mangalehon gumodang tingkina marhobas tu Jahowa.

4. Aha do pangkorhon ni pardongansaripeon na martua tu ianakhon?

4 Alai, sala do hita molo marhasohotan? Ndang sala. Silehonlehon sian Debata do pardongansaripeon. (Jaha 1 Musa 2:18.) Alani i, adong do labana molo marhasohotan. Boi do on parohon las ni roha di keluarga. Umpamana, pardongansaripeon na martua, i ma mula ni parsaripeon na togu. Boi ma angka natuatua mangalehon na dihaporluhon ni angka ianakhonna. Songon patuduhon holong, mangalehon pinsangpinsang dohot panogunoguon tu nasida. (Psalmen 127:3; Epesus 6:1-4) Alai, ndang holan laho asa marianakhon umbahen marhasohotan sasahalak.

5, 6. (a) Songon na dipatudu di Parjamita 4:9-12, aha do laba ni paralealeon na solhot? (b) Songon dia do pardongansaripeon asa boi dipatudos songon tali na tinolu?

5 Parrohahon ma ayat tema na adong di pasal on dohot na tinujuna, ”Dumenggan do dua halak sian apala holan sahalak, ai boi ma nasida rap karejo jala dumenggan ma karejo nasida. Molo tinggang sahalak, boi ma na sahalak nai manogu. Marjea ma na tinggang molo so adong  donganna na manogu. Molo ngali ari, boi ma las dua halak sapodoman, alai molo holan sahalak do sapodoman, boha ma bahenonna palashon dagingna? Molo holan sahalak, mura ma talu; alai, molo dua halak, nunga boi martahan. Maol do magotap tali na tinolu.”​—Parjamita 4:9-12, Bibel siganup ari.

6 Na diulas di ayat on, i ma ringkot ni paralealeon. Pardongansaripeon, i ma paralealeon na mansai solhot. Songon na dipatudu di ayat i, molo nunga mardongan saripe sasahalak, boi ma nasida masiurupan, mangapuli roha jala mangondingi dongan saripena. Lam togu ma pardongansaripeon molo ndang holan nasida na dua maraleale. Songon na didok di ayat i, maol do magotap tali na tinolu. Molo pasonangkon roha ni Jahowa do na rumingkot di tungganedoli dohot tungganeboru, dipatudos ma on songon tali na tinolu. Asa boi togu, ringkot do Jahowa parsidohot di pardongansaripeon.

7, 8. (a) Aha do poda na disurat si Paulus tu halak Kristen na so marhasohotan? (b) Aha do na didok di Bibel taringot pardongansaripeon?

7 Asing ni i, holan tu dongan saripe do boi marsampur di parumatanggaon. Di bagasan parsaripeon, marsampur boi do parohon las ni roha. (Poda 5:18) Ingkon marsitutu do anak boru nang dolidoli mangorom giotgiot ni dagingna, nang pe nunga salpu tingki haposoon di nasida. Molo ndang diorom nasida giotgiot ni daging, on mangkorhon tu ulaon na parohon dosa. Si Paulus manurat poda tu halak na so marhasohotan. Ibana mandok, ”Molo so harajaan nasida dirina, mardongan saripe ma; ai dengganan do mardongan saripe sian na garang [marsigorgor giotgiot ni dagingna].”​—1 Korint 7:9, 36; Jakobus 1:15.

8 Aha pe na mambahen sasahalak marhasohotan, ingkon rade do ibana mangadopi na laho masa di parsaripeon. Si Paulus mandok, ”marniae di daging” do halak naung mardongan  saripe. (1 Korint 7:28) Halak naung mardongan saripe, mangadopi parungkilon na so diadopi halak na so marhasohotan. Alai, molo ingkon marhasohotan do, songon dia do hamu boi mangorui parungkilon jala manambai las ni roha di parsaripeonmuna? Sada cara na denggan, i ma marbisuk mamillit dongan saripe.

ISE DO NA TAPILLIT GABE DONGAN SARIPE?

9, 10. (a) Aha do tudosan na dilehon si Paulus laho manggombarhon na so denggan marhasohotan dohot na so sahaporseaon? (b) Aha do na jotjot dihilala halak ala marhasohotan dohot na so sahaporseaon?

9 Apostel Paulus manurat prinsip na mansai ringkot dipingkiri tingki mamillit dongan saripe. Ibana mandok, ”Unang saauga hamu dohot angka na so porsea!” (2 Korint 6:14) Dipangke ibana do tudosan na jotjot dipangke angka partani. Molo ndang dos balga ni horbo jala ndang dos gogona laho manuhuk auga, marsingkor do horbo i. Dos songon i ma, marsingkor do molo dua halak na so sahaporseaon marhasohotan. Olo do sahalak sian nasida naeng tongtong di bagasan holong ni roha ni Debata, alai dongan saripena, ndang mangkaringkothon i. Alani i, ndang sadalan be nasida di parngoluon, on parohon hasusaan tu nasida. Alani i ma, si Paulus manjujui halak asa marhasohotan ’asal ma dohot dongan sahaporseaon’.​—1 Korint 7:39.

10 Sipata, adong do halak Kristen na so marhasohotan mandok, dumengganan ma mardongan saripe dohot halak na so sahaporseaon sian na lungunlungunan. Alai, gabe panolsolion do na ro tu nasida. Dihilala nasida ma, molo dongan saripe na so sahaporseaon, ndang boi sapingkiran tingki mamillit na rumingkot di parngoluon. Gariada, umlungun ma dihilala nasida dung marhasohotan. Alai, marribu halak Kristen na so marhasohotan boi do porsea jala  mangoloi poda ni Bibel. (Jaha Psalmen 32:8.) Nang pe hirim roha ni nasida laho marhasohotan di sada tingki, tarbahen ni nasida do ndang mardongan saripe sahat tu na dapot dongan saripena na manomba Jahowa.

11. Aha do na boi mangurupi sasahalak asa marbisuk mamillit dongan saripe? (Ida ma kotak ” Aha do na Porlu Huida sian Halak na Laho gabe Dongan Saripengku?”.)

11 Nang pe sasahalak nunga manomba Jahowa, ndang i na manontuhon molo ibana boi gabe dongan saripe na pas tu hita. Molo naeng marhasohotan hamu, lului ma halak na parangena, holongna tu Debata dohot na tinuju ni partondionna, na dos tu hamu. Rimangi ma poda na dilehon naposo haposan taringot on. Martangiang ma asa boi mamangke poda on tingki mamillit dongan saripe. *Jaha Psalmen 119:105.

12. Aha do hasomalan na jotjot diulahon di godang negeri taringot mangalului dongan saripe? Aha do parsiajaran na boi taida sian na diulahon si Abraham?

12 Di godang inganan, somal do natuatua mamillit dongan saripe tu ianakhonna. Ala porsea nasida, na gumodang do pengalaman dohot bisuk ni natuatua laho mamillit dongan saripe tu ianakhonna. Pardongansaripeon na dipatohotoho jotjot do denggan, songon na disurat di Bibel. Umpamana, disuru si Abraham do naposona mangalului tungganeboru tu si Isak. On gabe parsiajaran na denggan tu angka natuatua saonari on. Ndang hepeng dohot hasangapon na rumingkot di si Abraham. Alai, olo do ibana dao mangalului tungganeboru ni si Isak asal ma halak na manomba Jahowa. *1 Musa 24:3, 67.

 AHA DO NA PORLU TAPARADE ASA DENGGAN PARSARIPEON?

13-15. (a) Songon dia do prinsip di Poda 24:27 boi mangurupi sahalak dolidoli na laho marhasohotan? (b) Aha do na porlu diparade sahalak borua na laho marhasohotan?

13 Molo ingkon marhasohotan hamu, sungkun ma dirimuna sandiri, ’Nunga rade be ahu marhasohotan?’ Ndang holan pangkilalaanta taringot holong, seks, paralealeon manang pagodanggodang ianakhon na ringkot dipingkiri. Alai, adong do tanggung jawab na ingkon dipingkirhon sasahalak na laho gabe tungganedoli manang tungganeboru.

14 Sahalak dolidoli na laho marhasohotan ingkon mamingkirhon prinsip on, ”Jolo sarihon ulaonmu di balian, jala pature ladangmu, dung i pe asa pauli bagasmu.” (Poda 24:27) Aha do lapatan ni ayat on? Di tingki i, sahalak baoa na laho marhasohotan porlu manungkun dirina, ’Nunga rade ahu manarihon na ringkot di tungganeboru dohot ianakhonku?’ Alani i, ingkon ringgas ma ibana mulaulaon. Dos songon i ma saonari, sasahalak na laho marhasohotan ingkon boi do martanggung jawab. Dipaboa do di Bibel, molo sahalak baoa ndang manggohi na ringkot di pardagingon, holong dohot partondion ni keluarga, jumahat do ibana sian halak na so marhaporseaon.​—Jaha 1 Timoteus 5:8.

15 Sahalak borua na laho marhasohotan pe ingkon martanggung jawab tu keluargana. Dipuji do di Bibel tungganeboru na ringgas di keluarga, marparange na denggan jala rade mangurupi tungganedolina. (Poda 31:10-31) Halak na mangkaringkothon dirina sandiri do molo pahatophu marhasohotan, ala ndang dipingkirhon na porlu tu dongan saripena. Alai na rumingkot, halak na laho marhasohotan porlu toras di partondion.

16, 17. Aha do prinsip ni Bibel na porlu dipingkirhon halak na laho marhasohotan?

 16 Porlu do mangarimangi tanggung jawab na dilehon Debata tu tungganedoli manang tungganeboru molo naeng marhasohotan. Porlu do botoon ni sahalak baoa, aha lapatan ni ulu di keluarga. Ditiru ma songon dia Jesus manguluhon huria asa unang marlomolomo maradophon keluargana. (Epesus 5:23) Songon i ma nang borua, ingkon diantusi do tanggung jawab ni sahalak tungganeboru. Ingkon olo do ibana unduk tu ”patik pardongansaripeon”. (Rom 7:2) Sahalak tungganeboru, ingkon mangihuthon patik ni Jahowa dohot Kristus. (Galatia 6:2) Alai, boi do ibana tongtong manjangkon jala unduk tu aturan na dibahen sahalak baoa na mardosa? Molo ndang boi dope, dumengganan ma ibana unang marhamulian.

17 Asing ni i, angka na mardongan saripe ingkon paradehon na ringkot di dongan saripena. (Jaha Pilippi 2:4.) Si Paulus manurat, ”Alai sandok ganup hamu, masihaholongi pardihutana be songon dirina; alai dihabiari parompuan i ma baoana!” Sian ayat on, sahalak baoa porlu mangkilala na diargai tungganeboruna do ibana. Jala, sahalak borua ingkon mangkilala molo ibana mansai dihaholongi tungganedolina.​—Epesus 5:21-33.

Godang do na laho mardongan saripe manogihon sasahalak mandongani nasida tingki marhamlet

18. Boasa ingkon mangorom diri halak na masihaholongan tingki marhamlet?

18 Alani i, ndang holan na laho marmeammeam molo marhamlet. Di tingki on ma, boi idaon ni sahalak baoa dohot borua naung boi nasida marhasohotan. Tingki sisongon on ma nasida porlu mangorom diri! Somalna, lomo do roha ni halak na masihaholongan sai naeng rap. Halak na masihaholongan ingkon pasidingkon ulaon na so denggan, na mambahen sega partondion ni halak na dihaholongina. (1 Tessalonik 4:6) Alani i, taorom ma diri tingki marhamlet, asa dapot las ni roha salelengna nang pe ndang marhasohotan.

 SONGON DIA DO ASA TOGU PARDONGANSARIPEON?

19, 20. Songon dia do pangantusion ni halak Kristen marimbar tu pangantusion ni godangan halak taringot pardongansaripeon? Patorang ma jala bahen tudosan.

19 Asa togu pardongansaripeon, ingkon tangkas do antusan ni nasida janji manang padan taringot parbogason ni nasida. Di bagasan buku dohot film, jotjot do pardongansaripeon dipaujung dohot las ni roha. Sasintongna, pardongansaripeon i ndang dope ujungna, alai on do mula ni parsaripeon na ingkon tongtong dijaga asa boi togu. (1 Musa 2:24) Godang halak ndang marpingkiran sisongon on taringot pardongansaripeon. Di pigapiga hasomalan, mardongan saripe dipatudos songon ”dua tali na dipudun”. Alai, ndang diboto nasida molo hata on manggombarhon pandapot ni godangan halak taringot pardongansaripeon. Di nasida, tali na dipudun on togu saleleng dihaporluhon, alai ingkon mura do dibungka manang dipudun muse di tingki na asing.

20 Saonari, godang do halak marpingkir holan parsatongkinan do parsaripeon i. Hatop do nasida marhasohotan ala holan mangkaringkothon hisaphisap ni daging. Alai, tingki adong parungkilon, hatop do nasida marsirang. Ingot ma, pardongansaripeon dipatudos Bibel do songon tali na tinolu manang na dipilin. Tali na dipilin manang tali tambang, na dipangke tu kapal laut ndang mura magotap, nang pe ro habahaba manang halisungsung. Songon i ma, ingkon togu do pardongansaripeon. Jesus mandok, ”Naung pinadomu ni Debata, ndang jadi sirangon ni jolma.” (Mateus 19:6) Ringkot do hamu mangingot patik on molo naeng marhasohotan. Sada ulaon na borat do mangulahon on di parsaripeon? Ndang songon i.

21. Pingkiran sisongon dia do na porlu patuduhonon ni na mardongan saripe jala aha do na mangurupi nasida boi mangulahon on?

21 Sahalak tungganedoli dohot tungganeboru porlu marpos  ni roha tu dongan saripena. Molo marsitutu do nasida mangida parange dohot ulaon na denggan na binahen ni dongan saripena, dihilala nasida ma dame dohot las ni roha. Boi do hita marpingkiran positif tu dongan saripe, nang pe marhahurangan nasida? Tongtong do positif Jahowa mangida hita nang pe marhahurangan parniulaonta. Panurat ni Psalmen mandok, ”Molo tung manjujur Ho, ale Jahowa, di angka dosa, tung ise ma manahan jongjong?” (Psalmen 130:3) Songon Jahowa, angka na mardongan saripe ingkon  marpingkiran na positif jala sai marpamuati rohana tu dongan saripena.​—Jaha Kolosse 3:13.

22, 23. Aha do sitiruon ni halak naung mardongan saripe sian si Abraham dohot si Sarah?

22 Godang do las ni roha na dihilala nang pe naung leleng parsaripeon i. Songon parsaripeon ni si Abraham dohot si Sarah, tongtong do marlas ni roha sahat tu na matua nasida. Gok do hasusaan dohot parsoalan na diadopi nasida. Pingkiri ma, songon dia pangkilalaan ni si Sarah naung marumur hirahira 60 taon manadingkon jabu dohot godang artana di huta Ur jala tading di undungundung. Alai, gabe dongan dohot pangurupi do si Sarah tu haputusan ni tungganedolina. Ndang holan di pamangan sambing dipatudu si Sarah na unduk ibana tu tungganedolina, alai dohot do ”di bagasan rohana”. (1 Musa 18:12; 1 Petrus 3:6) Tutu ma, sian roha do pangargaion ni si Sarah tu si Abraham.

23 Alai, ndang sai sapandapot si Abraham dohot si Sarah. Hea do pandapot ni si Sarah mambahen ”sogo situtu” roha ni si Abraham. Alai, marhite tudutudu sian Jahowa, marserep ni roha do si Abraham manangihon hata ni si Sarah jala tutu do marlaba hatana i tu keluargana. (1 Musa 21:9-13) Angka tungganedoli dohot tungganeboru naung marhasohotan saleleng marpulu taon boi marsiajar sian on.

24. Parsaripeon na songon dia do na parohon sangap tu Jahowa, jala boasa?

24 Di huria, adong do marribu parsaripeon na marlas ni roha. Tungganeboru patuduhon pangargaion na sian roha tu tungganedolina. Tungganedoli mangkaholongi jala mangargai tungganeboruna. Marsitutu do nasida asa rap patujolohon Harajaon ni Debata. Molo naeng marhasohotan hamu, marbisuk ma mamillit dongan saripe, parade ma na ringkot di parsaripeon. Marsitutu ma mambahen parsaripeon na dame, na togu jala parohon sangap tu Jahowa. Molo diulahon on, boi ma parsaripeonmuna mangurupi hamu tongtong di bagasan holong ni roha ni Debata.

^ par. 11 Ida ma pasal 2 sian buku Rahasia Kebahagiaan Keluarga, na dipabinsar Sitindangi Ni Jahowa.

^ par. 12 Adong do pigapiga halak na marsihohot tu Debata, na disurat di Bibel na martungganeboru lobi sian sada. Dipasombu Jahowa do nasida dohot halak Israel najolo mangulahon i. Alai, ndang hea diparentahon Jahowa asa diulahon nasida songon i. Jala porlu do diingot halak Kristen, molo Jahowa ndang paloashon naposoNa martungganeboru lobi sian sada.​—Mateus 19:9; 1 Timoteus 3:2.