Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tongtong ma di Bagasan Holong ni Roha ni Debata

 LAMPIRAN

Fraksi Darah dohot Prosedur Tingki Operasi

Fraksi Darah dohot Prosedur Tingki Operasi

Fraksi darah. Adong opat komponen utama darah, i ma sel darah merah, sel darah putih, keping darah dohot plasma. Sian i ma dibuat na gabe fraksi darah. Umpamana, adong do protein hemoglobin di bagasan sel darah merah. Adong do ubat na dibahen sian hemoglobin ni jolma manang binatang laho mangubati sahit anemia akut manang sasahalak na habis mudarna.

Adong 90 persen aek di bagasan plasma. Adong muse hormon, garam anorganik, enzim, mineral dohot gula. Di plasma on pe, adong zat pembeku darah, antibodi dohot protein songon albumin. Molo marsahit sasahalak, disuntik dokter do gamma globulin na dibuat sian plasma ni sasahalak naung kebal tu sahit i. Sel darah putih, boi do dibahen gabe interferon dohot interleukin, na dipangke laho mangubati halak na marsahit infeksi alani virus dohot mangubati sahit kanker.

Boi do sahalak Kristen manjalo parubatan na mamangke fraksi darah? Ndang dipatorang sude di Bibel taringot parubatan na laho tapangke. Alani i, ganup halak boi mamillit hombar tu panggora ni rohana. Adong do halak na so olo mamangke sude fraksi darah ala songon na dipaboa di Patik ni si Musa, ingkon diusehon do mudar ni binatang ”tu tano”. (5 Musa 12:22-24) Sasahalak na so manjalo transfusi darah manang opat komponen utama darah, olo do ra manjalo  parubatan na mamangke fraksi darah. Ra, pangantusion ni nasida, fraksi darah na dipangke i ndang dos be tu mudar.

Pingkirhon ma sungkunsungkun on tingki mamillit parubatan na mamangke fraksi darah: Tangkas do huantusi molo ndang hupangke sude fraksi darah lapatanna, ndang hupangke be manang aha ubat na dibuat sian fraksi darah, laho mangubati sahit manang na mambahen beku mudar? Boi do hupatorang tu dokter aha na mambahen ahu manjalo manang ndang parubatan na mamangke fraksi darah?

Prosedur tingki operasi. Prosedur on, i ma hemodilusi dohot penyelamatan sel. Hemodilusi, i ma deba sian mudar ni sasahalak na dialirhon tu kantong darah marhite salang. Dung i, dipamasuk ma cairan pengembang volume darah tu pamatangna. Dung sae operasi, dipamasuk ma mudar na di kantong i tu pamatangna. Penyelamatan sel, i ma prosedur mambuat mudar na ruar sian pamatang na dioperasi. Dungkon i, dialirhon tu masin na paiashon mudar. Laos dipamasuk tu pamatang ni halak na dioperasi i. Ala ndang sai dos cara ni sude dokter mangulahon on, ingkon sungkunon ni halak Kristen do cara na laho bahenon ni dokter i.

Tingki naeng mangulahon on, tasungkun ma dirinta: ’Molo so satongkin mudar na dialirhon tu kantong darah manang masin i, ganggu do panggora ni rohangku pamasukhon mudar i tu pamatangku, ala huhilala mudarhu dope i jala  ndang porlu diusehon ”tu tano”? (5 Musa 12:23, 24) Ganggu do panggora ni rohangku molo dibuat deba mudarhu jala dimodifikasi, dung i dipamasuk tu pamatangku? Tangkas do huboto molo ndang hupangke sude parubatan na mamangke mudar, lapatanna ndang olo ahu mangalehon mudarhu laho dipareso, mamangke prosedur hemodialisis manang mamangke mesin pintas jantung-paru?

 Sahalak Kristen ingkon mamillit sandiri prosedur na songon dia pangkeonna tingki operasi. Suang songon i ma, ingkon dirina sandiri do na manontuhon tingki adong parubatan na mambahen ibana porlu mangalehon deba mudarna, laho dimodifikasi jala dipamasuk muse tu pamatangna.