Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tongtong ma di Bagasan Holong ni Roha ni Debata

 LAMPIRAN

Mangadopi Parsoalan alani Bisnis

Mangadopi Parsoalan alani Bisnis

Songon na disurat di 1 Korint 6:1-8, apostel Paulus mangulas parsoalan taringot uhum na masa di angka dongan sahaporseaon. Marsak do ibana ala adong halak Kristen di Korint, na barani laho ”mangaluhon parkarona i tu hakim sipelebegu”. (Ayat 1, Bibel siganup ari) Dilehon si Paulus do hatorangan boasa sahalak Kristen ndang porlu mangaluhon parsoalanna tu pengadilan alai, denggan ma nasida paboahon i tu angka sintua di huria. Taparrohahon ma pigapiga poda na dilehon taringot on jala taulas ma songon dia prinsip on ndang dipangke di pigapiga situasi.

Molo adong parsoalan alani marbisnis dohot dongan sahaporseaon, parjolo sahali ingkon marsitutu do hita mangulahon lomo ni roha ni Jahowa, ndang lomo ni rohanta sandiri. (Poda 14:12) Songon na didok Jesus, denggan ma unang dipalelengleleng parsoalan i. (Mateus 5:23-26) Alai, adong do halak Kristen na parbada, na lomo rohana mamboan parsoalan i tu pengadilan. Si Paulus mandok, ”Sandok hataluanmuna hian do i, anggo marparkaro hamu sama hamu.” Boasa? Ala ulaon sisongon on ndang parohon sangap tu goar ni Debata dohot huria. Porlu ma taingot sungkunsungkun ni si Paulus na mandok, ”Boasa so tagonan ditaon hamu na so uhum?”​—Ayat 7.

Adong do angka sintua diparade Jahowa di huria laho mangurupi hita mangadopi parsoalan. Nasida, i ma angka baoa na marbisuk, na marpangantusion taringot Hata ni Debata. Jala, didok si Paulus, boi do nasida ”manguhum dongan sama dongan” taringot tu ”ugasan tano on [parkaro na somal]”. (Ayat 3-5) Dipaboa Jesus do muse, molo masa parsoalan na balga songon fitnah dohot mangotootoi, boi do diadopi marhite tolu cara: na parjolo, dua halak na mangadopi parsoalan i porlu denggan mangkatai. Na paduahon, molo ndang mardenggan dope, boi  ma mangkatai di adopan ni sada manang dua halak na boi mangkatindangkon. Na patoluhon, molo ndang sae dope, boi ma dipaboa parsoalan i tu angka sintua.​—Mateus 18:15-17.

Taboto do, ndang sude sintua di huria sahalak pengacara manang parbisnis na boi mangalehon poda taringot uhum manang bisnis. Ndang ditontuhon nasida angka aturan laho mangadopi parsoalan alani bisnis na masa tu dongan sahaporseaon. Alai, marsitutu do nasida mangurupi sude asa mangulahon prinsip na sian Bibel jala mangulahon i dohot dame ni roha. Molo borat do parsoalan i, boi do pangidoon ni nasida tudutudu sian sintua kaliling manang kantor cabang. Alai, adong do situasi na so porlu mangihuthon prinsip na dipaboa si Paulus. Aha ma i?

Sipata, holan formalitas do sasahalak laho tu pengadilan manang asa boi mandapot angka hakna, na so mangharingkothon tu diri sandiri. Umpamana, laho mangurus surat sirang, hak asuh tu ianakhon, laho manontuhon tunjangan perceraian, mandapot ganti rugi asuransi, surat asa boi maminjam molo tumpur dohot papatehon surat wasiat. Asing ni i, sahalak donganta porlu mambahen surat tuntutan balasan asa boi mangalinggomi diri sian parkaro hukum. *

Ndang maralo tu na didok si Paulus molo sasahalak laho tu pengadilan, asal ma unang na laho marbada. * Nang pe songon i, ringkot do sahalak Kristen pasangaphon goar ni Jahowa dohot mambahen dame di huria. Ala ditanda do angka siihuthon Jesus sian holong ni nasida jala ”holong ni roha i . . . ndang mangalului laba tu dirina sandiri.”​—1 Korint 13:4, 5, Bibel siganup ari; Johannes 13:34, 35.

^ par. 2 Olo do sahalak Kristen mangulahon hajahaton tu dongan sahaporseaonna. Songon mamerkosa, martumbuk, mambunu jala manangko. Alani i, ndang sala molo sahalak Kristen mangaluhon parsoalan i tu polisi, nang pe gabe marpengadilan.

^ par. 3 Laho mandapot gumodang hatorangan, ida ma Menara Pengawal, 15 Maret 1997, halaman 17-22 dohot 15 Oktober 1991, halaman 25-28.