Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tongtong ma di Bagasan Holong ni Roha ni Debata

 PASAL 15

Hilala ma Las ni Roha sian Sude Ulaonmuna

Hilala ma Las ni Roha sian Sude Ulaonmuna

”Denggan ma ganup hita . . . mangkalashon na taula.”​—PARJAMITA 3:13, Bibel siganup ari.

1-3. (a) Songon dia do pangkilalaan ni godang halak taringot parkarejoan? (b) Aha do didok Bibel taringot parkarejoanta jala aha do sungkunsungkun na laho taulas di pasal on?

GODANGAN halak saonari on ndang mangkilala las ni roha di parkarejoanna. Ganup ari, nasida ingkon loja mangulahon karejo na so dihalomohon nasida. Alani i, borat do roha ni nasida borhat tu inganan parkarejoan. Molo songon i, aha do na ingkon ulahonon ni nasida asa boi mangkilala las ni roha sian sude ulaonna?

2 Dipaboa do di Bibel, silehonlehon sian Debata do parkarejoan dohot laba na tadapot. Si Salomo manurat, ”Denggan ma ganup hita mangan, minum, jala mangkalashon na taula, ai silehonlehon ni Debata do i.” (Parjamita 3:13, Bibel siganup ari) Lomo do roha ni Jahowa asa tahilala las ni roha sian sude ulaonta. Asa tongtong hita di bagasan holong ni roha ni Jahowa, ingkon tapahombar do pingkiran dohot prinsip ni Debata taringot parkarejoanta.​—Jaha Parjamita 2:24; 5:18.

3 Di pasal on, taparrohahon ma adong opat sungkunsungkun: Songon dia do hita asa boi mangkilala las ni roha sian sude ulaonta? Aha do karejo na boi diulahon halak Kristen? Songon dia do asa unang tading ulaon di partondion dibahen parkarejoan? Jala, aha do parkarejoan na rumingkot di parngoluonta? Alai, andorang so taboto alusna, parjolo sahali taparrohahon  ma sitiruon na dumenggan sian Jahowa dohot Jesus tu hita.

SITIRUON SIAN JAHOWA DOHOT JESUS

4, 5. Songon dia do Bibel patuduhon molo Jahowa sitiruon na dumenggan?

4 Jahowa do sitiruon na dumenggan di hita taringot mulaulaon. Di 1 Musa 1:1 mandok, ”Di mula ni mulana ditompa Debata langit dohot tano on.” Dung ditompa Debata sude na adong di tano on, didok Ibana do, ”nunga denggan situtu” sude na tinompaNa. (1 Musa 1:31) On patuduhon, mansai las do roha ni Jahowa mangida ulaonNa di tano on. Alani i ma, Jahowa didok Debata na ”martua”, na mangkilala las ni roha sian sude na tinompaNa.​—1 Timoteus 1:11.

5 Tongtong do Debata Jahowa mulaulaon sahat tu saonari on. Dung leleng sae ditompa tano on dohot sude isina, Jesus mandok, ”Na mangula do Damang rasirasa nuaeng”. (Johannes 5:17) Aha do na diulahon Jahowa? Tongtong do Ibana manogunogu jala mamparrohahon angka jolma sian surgo. Dibahen Debata do halak na pinillitNa gabe ”na tinompa na imbaru”, na dimiahi tondi na laho mamarenta rap dohot Jesus sian surgo. (2 Korint 5:17) Tongtong do Debata mulaulaon laho pasauthon sangkapNa tu jolma, i ma mambahen halak na dihaholongi Ibana mangolu salelengna di tano na imbaru. (Rom 6:23) Marjuta halak manjangkon barita on jala ditogu Debata nasida asa mambahen hamubaon jala tongtong di bagasan holong ni rohaNa. Las do roha ni Jahowa mangida na masa on.​—Johannes 6:44.

6, 7. Aha do na patuduhon molo Jesus sahalak parkarejo na ringgas?

6 Tarbarita do Jesus sahalak parkarejo na ringgas. Andorang so ro ibana tu tano on, didok do ibana ”pande”  ni Debata laho manompa sude ”na di banua ginjang dohot na di tano on”. (Poda 8:22-31; Kolosse 1:15-17) Tingki Jesus di tano on, ditanda do ibana parkarejo na ringgas. Di tingki haposoonna, didok do ibana sahalak ”tukang” hau. * (Markus 6:3) Alani i, ingkon ringgas jala malo do ibana asa boi mangulahon on. Di tingki i, ndang adong dope gargaji masin, toko na manggadis alat bangunan, panglong dohot listrik. Boi do dipingkirhon hamu songon dia Jesus mangalului hau na laho pangkeonna pajongjong jabu? Ra, ingkon tabaonna jala tuhukonna hau i tu inganan parkarejoanna. Boi do dipingkirhon hamu ibana pajongjong jabu, paradehon jala panangkokhon kudakuda, mambahen pintu dohot meja? Tontu, las do roha ni Jesus tingki diida ibana denggan situtu ulaonna.

7 Sahalak na marhiras ni roha do Jesus laho marbarita na uli. Saleleng tolusatonga taon, marsitutu do Jesus marbarita na uli. Lomo rohana naeng manjumpangi godang halak. Alani i, sogot dope ari nunga dungo ibana laho borhat marbarita na uli sahat tu tonga borngin. (Lukas 21:37, 38; Johannes 3:2) Dijumpangi ibana do angka jolma sian ”angka huta dohot lumban marjamita, laho mamaritahon harajaon ni Debata”. (Lukas 8:1) Mardalan pat do Jesus marratus kilometer mamolus dalan na so diaspal laho pasahathon barita na uli.

8, 9. Aha do na dihilala Jesus sian sude ulaonna?

8 Boi do dihilala Jesus las ni roha sian ulaon marbarita na uli? Boi! Disabur ibana do boni hasintongan tu godang halak jala bidang do sisabion ditadingkon ibana di angka siseanna. Di adopan ni Jesus, mangulahon lomo ni roha ni Debata dos songon sipanganon na mambahen ibana margogo jala sehat. Alani i, olo do ibana ndang mangan  sahat tu na sae ulaonna. (Johannes 4:31-38) Pingkirhon ma las ni roha na dihilala Jesus dung sae sude ulaonna di tano on. Songon na didok ibana tu Amana, ”Nunga hupasangap Ho di tano on, ai nunga hupasidung ulaon na nilehonmi siulaonku.”​—Johannes 17:4.

9 Jahowa dohot Jesus do sitiruon na mansai denggan taringot mangkilala las ni roha sian sude ulaonna. Holong tu Jahowa mangonjar rohanta asa gabe ”sitiru Debata”. (Epesus 5:1) Holongta tu Jesus manjujui hita asa mangihuthon ”bogas ni patna”. (1 Petrus 2:21) Saonari, taparrohahon ma songon dia hita boi mangkilala las ni roha sian sude ulaonta.

ASA BOI MANGKILALA LAS NI ROHA SIAN SUDE ULAONTA

Mangihuthon prinsip ni Bibel boi mangurupi hita mangkilala las ni roha sian sude ulaonta

10, 11. Aha do na porlu tarimangi asa boi taargai parkarejoanta?

10 Ingkon mulaulaon do halak Kristen di parngoluonna. Lomo do rohanta boi tahilala las ni roha sian sude ulaonta nang pe ndang tahalomohon ulaon na taulahon i. Antong, songon dia do hita boi mangkilala las ni roha sian sude ulaonta?

11 Taargai ma parkarejoanta. Ndang sai boi songon lomo ni rohanta karejo na taulahon. Alai, boi do tapauba pingkiranta asa las rohanta mangulahon i. Molo tarimangi do pingkiran ni Debata, boi ma taargai parkarejoanta. Umpamana, molo hamu ulu di keluarga, ingkon martanggung jawab do hamu manggohi na ringkot di keluargamuna. Didok do di Bibel halak na so mangalehon na ringkot tu keluargana, ”jumahat do i sian halak na so porsea”. (1 Timoteus 5:8) Alani i, las ma rohamuna ala nunga boi manggohi na ringkot tu keluarga, nang pe karejomuna leas di adopan ni godangan halak. Ra, pangkilalaan sisongon on ndang dihilala angka dongan sakarejomuna.

12. Boasa marparange na jujur jala ringgas di parkarejoan mangkorhon na denggan tu hita?

 12 Ringgas jala marparange na jujur. Molo marsitutu hita karejo dohot marsiajar songon dia asa denggan mangulahon sada ulaon, boi do on parohon na denggan tu hita. Diargai tongke do parkarejo na ringgas dohot na malo. (Poda 12:24; 22:29) Sahalak Kristen ingkon marparange na jujur di parkarejoan, ndang manangko hepeng dohot ugasan na adong di parkarejoanna. Karejo ma di tingki naung ditontuhon. (Epesus 4:28) Songon naung taida di pasal 14, mangkorhon na denggan do molo marparange  na jujur. Sahalak parkarejo na jujur jotjot do dihaporseai tongkena. Alai, nang pe ndang diparrohahon tongke aha na taulahon, boi do las rohanta ala ias panggora ni rohanta jala taboto nunga taulahon lomo ni roha ni Debata.​—Heber 13:18; Kolosse 3:22-24.

13. Aha do pangkorhon ni parange na denggan di parkarejoanta?

13 Ingot ma, parangenta boi do parohon sangap tu Debata. Molo tongtong tajaga parangenta na denggan di parkarejoan, halak na asing boi do mamparrohahon hita. Aha ma pangkorhon ni on? Hita parsidohot mambahen ”marsangap poda ni Debata, Sipalua hita”. (Titus 2:9, 10) Marhite parangenta na denggan, idaon ni halak ma panombaonta na sintong jala olo ma nasida manjangkon hita. Pingkirhon ma songon dia las ni rohamuna molo sahalak dongan sakarejomu mananda hasintongan alani parangemuna na denggan di parkarejoan! Alai na rumingkot, pingkirhon ma on: Adong dope na asing na boi mambahen las rohanta, asing ni marparange na denggan na parohon sangap tu Jahowa jala mambahen las rohaNa?​—Jaha Poda 27:11; 1 Petrus 2:12.

MARBISUK MAMILLIT PARKAREJOAN

14-16. Tingki mamillit parkarejoan, aha do sungkunsungkun na porlu tapingkirhon?

14 Ndang dipatorang sude di Bibel taringot karejo na boi manang na so boi taulahon. On ndang patuduhon boi taulahon sude parkarejoan. Bibel mangurupi hita asa boi tapillit parkarejoan na denggan, na so diorai uhum jala na palashon roha ni Debata. (Poda 2:6) Tingki mamillit parkarejoan na denggan, adong dua sungkunsungkun na porlu tapingkirhon.

15 Disuru do ahu mangulahon ulaon na diorai Debata di parkarejoan on? Tangkas do dipaboa di Bibel, ndang dihalomohon  Debata panangko, pargabus dohot na mambahen ganaganaan. (2 Musa 20:4; Ulaon ni Apostel 15:29; Epesus 4:28; Pangungkapon 21:8) Unang ma tapillit karejo na manuru hita mangulahon on. Ala tahaholongi do Jahowa, unang ma hea tapillit karejo na so dihalomohon Debata.​—Jaha 1 Johannes 5:3.

16 Na parsidohot do ahu mangulahon na sala molo hupillit karejo on? Parrohahon ma sada tudosan. Ndang diorai  hita karejo di bagian administrasi ni sada kantor. Alai, songon dia do molo hita karejo di bagian administrasi ni kantor na manggadis mudar? Ra, ndang hita na disuru laho mambuat mudar na laho ditransfusihon. Alai, ndang na parsidohot hita tu ulaon mambuat jala mantransfusihon mudar molo tongtong hita karejo disi? (Ulaon ni Apostel 15:29) Sasahalak na mangkaholongi Jahowa, ndang lomo rohana parsidohot tu ulaon na so hombar tu Bibel.

17. (a) Aha do na ingkon tapingkirhon muse tingki mamillit parkarejoan na denggan? (Ida ma kotak ” Boi do Huulahon Karejo On?”.) (b) Songon dia do panggora ni rohanta boi mangurupi hita mamillit karejo na pasonangkon roha ni Debata?

17 Molo manat taida alus ni dua sungkunsungkun na adong di paragraf 15 dohot 16, boi ma tapillit parkarejoan na denggan. Alai adong dope na asing na porlu tapingkirhon  tingki mamillit parkarejoan. * Porlu do tapangke bisuk ala ndang dibahen naposo haposan aturan tu sude ulaonta. Songon na taparsiajari di Pasal 2, porlu do tapasomalsomal panggora ni rohanta marhite mamparsiajari songon dia mangulahon Hata ni Debata di parngoluon siganup ari. Molo nunga tapasomalsomal panggora ni rohanta ”malo mambolati na denggan sian na roa”, boi ma panggora ni rohanta mangurupi hita mamillit parkarejoan na pasonangkon roha ni Debata.​—Heber 5:14.

UNANG MA TADING ULAON DI PARTONDION ALANI PARKAREJOAN

18. Boasa ndang mura patujolohon ulaon di partondion saonari?

18 Ndang mura tongtong patujolohon ulaon di partondion di ”tingki parpudi” na gok ”hasusaan”. (2 Timoteus 3:1) Ndang mura mangalului jala mampartahanhon parkarejoan. Sahalak Kristen ingkon ringgas karejo asa boi manggohi na ringkot tu keluargana. Alai porlu do nasida manat, ala elaela sian dongan sakarejo dohot pingkiran na holongan di hepeng boi manegai partondion. (1 Timoteus 6:9, 10) Taparrohahon ma songon dia hita boi tongtong patujolohon ulaon di partondion marhite ”manangkasi na rumingkot”.​—Pilippi 1:10.

19. Boasa tama hita marhaposan tu Jahowa jala ulaon aha do na so boi tatadingkon?

19 Marhaposan ma tu Jahowa. (Jaha Poda 3:5, 6.) Tama do hita marhaposan tu Jahowa sian nasa rohanta? Tama. Ala disarihon Ibana do hita. (1 Petrus 5:7) Umbotoan do Debata taringot na tahaporluhon sian dirinta sandiri. Jala,  boi do ibana patupahon sude na ringkot di hita. (Psalmen 37:25) Alani i, tatangihon ma Hata ni Debata na mandok, ”Unang ma marholong ni roha di hepeng pangalahomuna; hasabamhon hamu ma na adong! [Debata] sandiri do mandok: ”Sandok na so tadingkononku do ho; sandok na so pasombuonku do ho!” (Heber 13:5) Godang halak naung mangalehon gumodangan tingkina mangkilala  molo Jahowa boi patupahon aha na ringkot di hita. Molo marhaposan hita tu Jahowa na parrohahononNa hita, unang ma holsoan rohanta laho manggohi na ringkot tu keluarga. (Mateus 6:25-32) Alani i, unang ma tatadingkon angka ulaon di partondion songon marbarita na uli dohot ro tu parpunguan holan alani parkarejoan.​—Mateus 24:14; Heber 10:24, 25.

20. Aha do lapatanna mangkalashon na adong di hita jala songon dia do asa boi tongtong mangulahon on?

20 Tahalashon ma na adong di hita. (Jaha Mateus 6:22, 23.) Mangkalashon na adong di hita lapatanna, i ma mambahen hangoluan na sesep manang sederhana. Sada do na tinuju ni halak na mambahen sesep hangoluanna, i ma mangulahon lomo ni roha ni Debata. Alani i, ndang marsitutu be hita mangalului karejo na margaji na balga jala ndang mangihuthon parngoluon ni na mora. Ndang sai tatuhori be angka barang na imbaru dohot na adong di iklan. Songon dia do asa boi tahalashon na adong di hita? Unang ma marutang molo so porlu hian. Unang ma sai tatuhori angka ugasan na boi pahabishon godang tingki dohot pingkiran. Ihuthon ma poda ni Bibel na mandok, tahalashon ma ”molo adong di hita sipanganon dohot parabiton”. (1 Timoteus 6:8) Marsitutu ma asa boi tongtong tahalashon na adong di hita.

21. Boasa porlu tatontuhon ulaon na rumingkot di parngoluonta jala aha do na ingkon tajumolohon?

21 Tontuhon ma na rumingkot jala ulahon ma. Ala ndang boi sude taulahon, porlu do tatontuhon aha na rumingkot di parngoluonta. Molo ndang, angka ulaon na so ringkot boi pahabishon tingki na laho tapangke mangulahon na rumingkot. Aha do ulaon na rumingkot di parngoluonta? Godang halak marsitutu laho marsingkola na timbo asa boi mandapot karejo dohot sangap di portibi on. Alai, Jesus manjujui angka siseanna asa jumolo  mangalului ”harajaon ni Debata”. (Mateus 6:33) Sahalak Kristen ingkon patujolohon Harajaon ni Debata di parngoluonna. Tapatuduhon ma on sian haputusanta dohot aha na tatuju di parngoluonta. Jala unang ma hita holsoan tu arta dohot ulaon ni portibi on.

MARHIRAS NI ROHA DI ULAON PARTONDION

Tapatudu ma holong tu Jahowa marhite manjumolohon ulaon marbarita di parngoluonta

22, 23. (a) Aha do ulaon na rumingkot di halak Kristen jala songon dia patuduhon na ringkot di hita ulaon on? (Ida ma kotak ” Aha na Hupillit Mambahen Ngolungku Marlas ni Roha”.) (b) Martahi do hita mangulahon aha?

22 Ala nunga taboto hita mangolu di ari parpudi, tongtong ma tajumolohon ulaon marbarita na uli dohot mambahen sisean. (Mateus 24:14; 28:19, 20) Songon Jesus, marhiras ni roha ma hita mangulahon on. Songon dia do hita patuduhon na ringkot ulaon on di hita? Godang naposo ni Debata mangalehon dirina laho marbarita na uli jala didok do nasida penyiar di huria. Adong do muse na gabe perintis manang missionaris. Angka natuatua manjujui ianakhonna asa mangalehon gumodang tingki laho patujolohon Harajaon ni Debata di ngolu ni nasida. Las do roha ni nasida mangulahon on? I do. Molo marhiras ni roha hita di ulaon partondion, on boi parohon las ni roha dohot pasupasu.​—Jaha Poda 10:22.

23 Godang sian hita ingkon mamangke gok tingki laho karejo asa boi manggohi na ringkot tu keluarga. Ingot ma, lomo do roha ni Jahowa tahilala las ni roha sian sude ulaonta. Molo tapahombar do parange dohot parniulaonta tu pingkiran dohot prinsip ni Jahowa, boi ma tahilala las ni roha di sude ulaonta. Martahi ma hita asa unang tading ulaon marbarita na uli alani parkarejoan. Molo rumingkot do ulaon marbarita di ngolunta, on patuduhon na tahaholongi do Jahowa jala asa boi hita tongtong di bagasan holong ni rohaNa.

^ par. 6 Hata Junani na diterjemahon gabe ”tukang” hau, i ma ”panjouon na somal didok tu halak na paturehon ugasan sian hau songon jabu, meja, kursi dohot na asing”.

^ par. 17 Laho mandapot gumodangan hatorangan taringot aha na porlu tapingkirhon tingki mamillit parkarejoan, boi ma taida di Menara Pengawal, 15 April 1999, halaman 28-30, dohot 15 Juli 1982, halaman 26.