Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Tongtong ma di Bagasan Holong ni Roha ni Debata

 LAMPIRAN

Manghormat Bendera, Pemilihan Umum dohot Dinas Sipil

Manghormat Bendera, Pemilihan Umum dohot Dinas Sipil

Manghormat bendera. Sitindangi Ni Jahowa porsea molo manghormat bendera na diiringi lagu kebangsaan, i ma ulaon na patuduhon molo haluaon marharoroan sian Negara manang pemimpin ni negara, ndang sian Debata. (Jesaya 43:11; 1 Korint 10:14; 1 Johannes 5:21) Umpamana, songon Raja Nebukadnesar sian Babel najolo. Asa tarbarita hasangapon dohot hiras ni roha ni raja i maragama, dipajongjong ma patung na timbo. Dung i, dibahen ma parenta asa sude na torop marsinggang manomba patung i, tingki dipatubegehon soara ni sarune na songon lagu kebangsaan ni negara i. Alai, si Sadrak, si Mesak dohot si Abednego, ndang olo marsinggang manomba patung i, nang pe gabe diuhum mate halak na so mangulahon i.​—Daniel, bindu 3.

Sejarawan Carlton Hayes mandok, molo bendera, i ma sada ”objek sisombaon” saonari. Didok muse, ”Tingki mamolus diboan bendera, dibungka angka baoa do tahulukna. Angka pujangga mambahen ode (puisi pujian) jala angka dakdanak mangendehon himne tu bendera.” Dohot do ”angka ari raya kebangsaan” tu ulaon nasionalisme. Umpamana tanggal 4 Juli, i ma ari kemerdekaan ni Amerika Serikat. Asing ni i, angka ”santo nang pahlawan” dohot ”inganan panombaon”,  dibahen do i di ulaon nasionalisme. Tingki adong upacara di Brasil, sahalak menteri mandok, ”Dipasangap jala disomba do bendera . . . songon negara na jotjot dipasangap rakyatna.” The Encyclopedia Americana mandok, ”Marhagogoon do di nasida bendera i, dos songon silang.”

Ensiklopedia on pe mandok, lagu kebangsaan i ma ”ende na patuduhon pangkilalaan na mansai sangap tu negara jala isina taringot tangiang asa diramoti jala ditogutogu angka rakyat dohot pemimpin di negara i”. Alani i, ndang sian pingkiran ni angka Sitindangi Ni Jahowa sandiri, molo didok nasida ulaon paragamaon do upacara patriotik, na di bagasanna adong ulaon manghormat bendera dohot mangendehon lagu kebangsaaan. Adong do na mangalehon pandapot taringot ianakhon ni Sitindangi Ni Jahowa, na so manghormat bendera manang na so dohot mandok sumpa di angka singkola di Amerika Serikat. Buku The American Character mandok, ”Diakkui Mahkamah Agung do di pigapiga pengadilan, molo upacara na dibahen ganup ari on, dos songon ulaon paragamaon.”

Naposo ni Jahowa ndang parsidohot di ulaon na dibahen di upacara, ala ndang hombar tu Bibel. Alai, diargai nasida do hak ni sasahalak na mamillit mangulahon i. Dipatuduhon nasida do pangargaion tu bendera na gabe simbol ni negara jala diakkui nasida do ”pamarenta”, i ma ”naposo ni Debata”. (Rom 13:1-4, Bibel siganup ari) Alani i, martangiang do Sitindangi Ni Jahowa ”humongkop angka raja dohot saluhut parhuaso”. Alai na tinujuna, i ma ”asa marsonangsonang jala so hariboriboan hita marpangalaho, di bagasan sandok hadaulaton dohot hahormaton”.​—1 Timoteus 2:2.

Pemilihan umum. Diargai halak Kristen do hak ni jolma laho mamilit sasahalak di pemilihan umum. Ndang ditogihon halak asa unang dohot tu ulaon pemilu jala olo do nasida mangihuthon aturan ni halak na tarpillit. Alai, tongtong do nasida ndang parsidohot di sude ulaon politik. (Mateus 22:21; 1 Petrus 3:16) Aha do na ingkon diulahon halak Kristen molo negara ingananna tading mamaksa nasida ingkon mamillit  di pemilu manang gabe dihosomi ala ndang laho tu inganan pamillitan i? Ingot ma si Sadrak, si Mesak dohot si Abednego na laho tu rura Dura. Sahalak Kristen na mangadopi situasi na sarupa, boi do laho tu inganan mamillit i, molo ndang ganggu panggora ni rohana. Alai, manat ma asa unang parsidohot tu politik. Denggan ma dipingkirhon onom prinsip na mangihut:

  1. Halak na mangihuthon Jesus ”ndang sian portibi on”.​—Johannes 15:19.

  2. Halak Kristen nunga gabe duta ni Kristus dohot Harajaonna.​—Johannes 18:36; 2 Korint 5:20.

  3. Sada do haporseaon ni huria Kristen jala dipasada holong do nasida.​—1 Korint 1:10; Kolosse 3:14.

  4. Molo tapillit sasahalak gabe pejabat dohot do hita martanggung jawab tu sude ulaonna.​—Parrohahon ma prinsip na adong di 1 Samuel 8:5, 10-18 dohot 1 Timoteus 5:22.

  5. Na manulak Jahowa do halak Israel tingki dipangido nasida sahalak raja.​—1 Samuel 8:7.

  6. Unang ma gabe tarambat hita mangkatai taringot Harajaon ni Debata tu angka halak sian saluhut partai politik.​—Mateus 24:14; 28:19, 20; Heber 10:35.

Dinas sipil. Di pigapiga negara, pamarenta mamaksa halak na so olo parsidohot tu dinas militer asa mangulahon dinas sipil saleleng tingki na ditontuhon. Tingki mamillit dinas sipil, hita porlu martangiang jala mangkatai dohot dongan sahaporseaon na toras partondionna. Dung i, tapillit ma aha na laho taulahon hombar tu panggora ni rohanta na denggan.​—Poda 2:1-5; Pilippi 4:5.

Dipaboa Bibel do tu hita ”asa marroha na unduk mangoloi panggomgomi na mangarajai, huhut ringgas tu nasa ulaon na denggan, . . . parroha na lambok”. (Titus 3:1, 2) Dung i, tasungkun ma dirinta, ’Parsidohot do ahu tu politik manang tu agama na so sintong molo hupillit dinas sipil?’ (Mika 4:3, 5; 2 Korint 6:16, 17) ’Tarambati do ahu mangulahon ulaon di partondion molo hupillit dinas sipil?’ (Mateus 28:19, 20; Epesus 6:4; Heber 10:24, 25) ’Boi do hubahen hamajuon di  partondion, songon gabe perintis molo huulahon dinas sipil?’​—Heber 6:11, 12.

Molo ndang ganggu panggora ni roha ni sahalak Kristen mangulahon dinas sipil asa unang di penjara, angka dongan sahaporseon na asing porlu mangargai aha na pinillitna. (Rom 14:10) Alai, ingkon taargai do molo sasahalak ndang olo mangulahon dinas sipil on.​—1 Korint 10:29; 2 Korint 1:24.