”Alo hamu ma sibolis i, dung i maporus ma ibana sian hamu.”​—JAKOBUS 4:7.

1, 2. Ise do na marlas ni roha tingki adong na tardidi?

MOLO nunga marpulu taon hamu manomba Jahowa, ra nunga mulahulak ditangihon hamu jamita pandidion di kebaktian. Ra, balga do rohamuna ganup mangida donganta na laho tardidi hundul di jolo, jongjong laho patuduhon naung rade nasida tardidi. Sude na torop martopak laho patuduhon las ni rohana. Olo do ra naeng manetek ilunta mangida halak na rade manomba Jahowa. Mansai las do roha di tingki sisongon i!

2 Ra, taida do pigapiga hali ganup taon pandidion dipatupa di ingananta tading. Alai, ganup minggu angka surusuruan mangida marribu halak di liat portibi on mangalehon dirina laho tardidi gabe sahalak Sitindangi Ni Jahowa. Boi do dipingkirhon hamu songon dia ”las ni roha” na masa di banua ginjang? (Lukas 15:7, 10) Tontu las situtu do roha ni surusuruan mangida godang halak na mangalehon dirina tu Jahowa!​—Haggai 2:7.

NA MAOTAOT DO SIBOLIS SONGON BABIAT NA MARAUANG

3. Boasa didok Sibolis maotaot songon ”babiat na marauang” jala aha do na naeng bahenonna?

3 Marrimas situtu do Sibolis dohot angka begu mangida halak na tardidi. Ndang lomo roha ni nasida mangida marribu halak manadingkon giotgiot ni portibi on. Ala nunga dihatahon Sibolis hian, na so adong jolma na  olo manomba Jahowa sian nasa rohana jala marsihohot manomba Debata. (Jaha Job 2:4, 5.) Alani i, tingki adong halak na tardidi, tarida ma na so tutu gabus ni Sibolis i. Songon na dipastapi ma Sibolis marribu hali ganup minggu. Umbahen i ma didok, ”Na maotaot do alomuna, sibolis i, songon babiat na marauang!” (1 Petrus 5:8) Sibolis na songon ”babiat”, naeng mambondut hita di partondion asa sega paralealeonta tu Jahowa.​—Psalmen 7:2, 3; 2 Timoteus 3:12.

Tingki sasahalak mangalehon dirina tu Jahowa jala tardidi, tarida ma molo Sibolis pargabus

4, 5. (a) Aha do dua cara na dibahen Debata paposhon rohanta na so boi ripashonon ni Sibolis sude naposoNa? (b) Aha do na boi ulahonon ni halak Kristen molo jonok tu Debata?

4 Ndang pola mabiar hita nang pe mangadopi alo na mansai gogo. Boasa? Adong dua dibahen Jahowa laho paposhon rohanta, tongtong do dijaga ibana hita sian ”babiat na marauang” i. Aha ma i? Na parjolo, nunga disurirangkon  Jahowa adong ”mansai torop” halak Kristen na laho malua sian ”haporsuhon godang”. (Pangungkapon 7:9, 14) Taboto, tongtong do saut naung disurirangkon Debata. Alani i, diboto Sibolis do ndang na boi ripashononna sude naposo ni Debata.

5 Na paduahon, taida ma sian hata ni panurirang Azaria tu Raja Asa na mandok, ”Didongani Jahowa hamu, ala marsitiopan hamu tu Ibana.” (2 Kronika 15:2; jaha 2 Petrus 2:9.) Godang do disurat di Bibel, na patuduhon molo Sibolis ndang hea boi mangelaela naposo ni Jahowa na marsihohot. (Heber 11:4-40) Saonari, halak Kristen na tongtong pajonokhon dirina tu Debata, boi mangalo dohot manaluhon Sibolis. Hata ni Debata mandok, ”Alo hamu ma sibolis i, dung i maporus ma ibana sian hamu.”​—Jakobus 4:7.

MARSITUTU MA MANGALO JORAT NI SIBOLIS

6. Aha do dibahen Sibolis mangalo hita ganup marsadasada?

6 Nang pe Sibolis ndang boi mangaripashon sude naposo ni Debata, alai boi do taluhonon ni ibana ganup hita marsadasada molo ndang jaga di partondion. Diboto Sibolis do, molo boi dibahen ibana gale partondionta, talu ma hita. Aha ma dibahen ibana? Marsitutu do ibana manjorat hita ganup marsadasada. Saonari, taparrohahon ma angka na dipangke Sibolis laho mangalo hita.

7. Boasa sai dibahen Sibolis sitaonon tu naposo ni Jahowa?

7 Sitaonon na sai ro. Apostel Johannes mandok, ”Di bagasan hajahaton do nasa portibi on.” (1 Johannes 5:19) Hata on, sipasingot tu halak Kristen molo Sibolis nunga manaluhon sude jolma di portibi on di bagasan hajahaton. Jala saonari, marsitutu do ibana mambahen sitaonon tu angka naposo ni Debata. (Mika 4:1; Johannes 15:19; Pangungkapon 12:12, 17) Ala diboto ibana otik nama tingkina, tongtong do dibahen Sibolis paraloan tu hita.  Alani i, tarlumobi saonari on, marrimas situtu ma ibana mambahen sega paralealeonta tu Debata.

8. Aha do lapatan ni hata ”marungkil” manang marsiranggut songon na didok si Paulus?

8 Paraloanta ganup marsadasada. Didok apostel Paulus do tu halak Kristen, ”Marungkil [marsiranggut] hita mangalo . . . angka tondi hajahaton na di ginjang i.” (Epesus 6:12) Boasa si Paulus mamangke hata ”marungkil” manang marsiranggut? Hata on patuduhon paraloan na mansai jonok marsiadopadopan. Alani i, hata on patuduhon ganup hita marsadasada ingkon marungkil do mangalo Sibolis dohot angka begu. Nang pe hita ndang tading di inganan ni halak na manghaporseai angka begu, alai taingot ma molo nunga mangalehon diri hita tu Jahowa, dipatudos do hita songon nangkok tu matras laho marsiranggut. Molo talehon diri tu Jahowa, naung rade ma hita marsiranggut dohot Sibolis. Alani i ma, tolu hali si Paulus manjujui halak Kristen di Epesus asa ”hot jongjong”!​—Epesus 6:11, 13, 14.

9. (a) Boasa Sibolis dohot angka begu mamangke marragam jorat? (b) Boasa marsitutu Sibolis manegai pingkiranta jala songon dia do hita mangalo i? (Ida ma kotak ” Jaga ma Hamu tu Angka Jorat ni Sibolis!”) (c) Aha do na laho taulas saonari?

9 Jorat ni Sibolis. Si Paulus manjujui halak Kristen asa marsitutu mangadopi ”utiutian ni sibolis”. (Epesus 6:11) Sian ayat on, si Paulus paboahon ndang holan sada ragam ni utiutian na dipangke ni Sibolis dohot angka begu. Alani i, boi do sasahalak martahan mangadopi sada jorat, alai ndang martahan tingki mangadopi jorat na asing. Sai diparrohahon Sibolis dohot angka begu do ganup hita marsadasada asa diboto nasida didia hahuranganta. Dung i, dipangke ma hahuranganta on laho manegai paralealeonta tu Jahowa. Alai, boi do taantusi marhite Bibel sude jorat na dipangke Sibolis. (2 Korint 2:11) Di pasal na asing sian buku on, nunga taparsiajari jorat na dipangke Sibolis songon  holongan di arta, paralealeon na so denggan dohot parmainanon. Saonari, taulas ma jorat ni Sibolis na asing, i ma ulaon spiritisme.

ULAON SPIRITISME

10. (a) Aha do ulaon spiritisme? (b) Songon dia do roha ni Jahowa mangida spiritisme jala songon dia pandapotmu taringot i?

10 Molo mangulahon ulaon spiritisme sasahalak, on patuduhon ibana marsaor tu Sibolis dohot angka begu. Pigapiga na didok ulaon spiritisme, i ma mardatu, mangulaulai, mandormai dohot manungkun tu halak na mate. Tangkas do taboto, dihasogohon Jahowa do ulaon spiritisme. (5 Musa 18:10-12; Pangungkapon 21:8) Ala didok do hita ingkon ’manghagigihon na jat’, unang ma hita marsaor tu angka begu. (Rom 12:9) Alana molo taulahon spiritisme, dos ma songon mangose padan tu Jahowa!

11. Boasa Sibolis songon na marhamonangan molo boi mangelaela halak mangulahon spiritisme? Bahen ma tudosan.

11 Diboto Sibolis do na mangose padan tu Jahowa molo taulahon ulaon spiritisme. Alani i, marsitutu do ibana mangelaela hita mangulahon ulaon spiritisme, asa magigi Jahowa tu hita. Molo adong halak na boi dielaela ibana marsaor tu angka begu, songon na mandapot hamonangan na balga ma Sibolis. Boasa? Parrohahon ma tudosan on: Molo boi sahalak tentara dielaela asa mangalo tu komandan jala marpihak tu tentara ni musu, tontu las hian do roha ni komandan ni musu i. Olo do dibahen ibana on gabe dalan laho mangaleai komandan ni alona i. Songon i ma, halak Kristen na olo dielaela mangulahon spiritisme, dos ma songon naung manadingkon Jahowa jala mangalehon dirina diparenta Sibolis. Pingkirhon ma songon dia las ni roha ni Sibolis ala boi mangaleai Jahowa marhite halak na mangulahon spiritisme! Olo do hita parsidohot mambahen las roha ni Sibolis? Tontu ndang olo. Ala ndang pangose padan hita.

 SUNGKUNSUNGKUN NA MAMBAHEN GANGGU ROHA

12. Aha do jorat na dipangke Sibolis asa mangaliluhon pingkiranta taringot spiritisme?

12 Ndang boi dijorat Sibolis hita marhite ulaon spiritisme, molo sai tahagigihon do ulaon i. Alani i, marsitutu ma Sibolis manegai pingkiranta. Songon dia carana? Dilului ibana ma dalan laho mangaliluhon pingkiran ni halak Kristen. Dibahen ma nasida marpingkir molo ”hajahaton i na denggan” jala ”na denggan i hajahaton”. (Jesaya 5:20, Bibel siganup ari) Laho mangulahon on, jotjot do dipangke Sibolis jorat naung mangelaela godang jolma, i ma sungkunsungkun na boi mambahen ganggu roha ni jolma.

13. Songon dia do Sibolis mamangke sungkunsungkun laho paliluhon pingkiran ni jolma?

13 Taparrohahon ma songon dia Sibolis mamangke cara on tingki di porlak Eden. Disungkun ibana tu si Hawa, ”Atehe tongon do didok Debata, na so jadi panganonmuna sian saluhut hau angka na di porlak on?” Tingki pungu surusuruan di surgo, disungkun Sibolis do taringot si Job. Didok Sibolis, ”Nda na marpambuat do biar ni si Job i mida Debata?” Jala tingki Sibolis mangunjuni Jesus, didok do, ”Molo na tutu Ho Anak ni Debata, dokkon ma batu on gabe sipanganon!” Pingkirhon ma, barani do Sibolis mangarehei Jesus mamangke hata na didok ni Jahowa tingki tardidi Jesus, ”On do Anakku, Haholongan i; halomoan ni rohangku do Ibana”!​—1 Musa 3:1; Job 1:9; Mateus 3:17; 4:3.

14. (a) Songon dia do Sibolis paliluhon pingkiran ni halak taringot spiritisme? (b) Aha do na laho taparrohahon di paragraf na mangihut?

14 Saonari, dipangke Sibolis do sungkunsungkun asa ganggu roha ni halak Kristen taringot spiritisme. Jala godang do halak Kristen na gabe ganggu pingkiranna taringot  i. Adong do na gabe sungkunsungkun, ’Tutu do sala sude ulaon spiritisme?’ (2 Korint 11:3) Songon dia do hita mangurupi halak na marpingkiran sisongon on? Sian dia do taboto molo jorat ni Sibolis on ndang mangkorhon tu hita? Laho mangalusi sungkunsungkun on, taparrohahon ma adong dua na ringkot di parngoluonta na dipangke Sibolis laho manjorat mamangke spiritisme. Ulaon on, i ma hiburan dohot parubatan na tapillit.

JORAT NA RO SIAN HIBURAN DOHOT PARUBATAN

15. (a) Songon dia do pandapot ni halak Barat taringot spiritisme? (b) Songon dia do pingkiran ni portibi on taringot spiritisme boi mangkorhon tu pingkiran ni halak Kristen?

15 Tarlumobi di halak Barat, ndang parohon jea be di nasida ulaon hadatuon, sulap dohot ulaon spiritisme na asing. Di nasida, hiburan na palashon roha dohot na so hatinggalan jaman do film, acara ni TV dohot game di komputer na mamangke spiritisme. Adong do film dohot buku na patuduhon ulaon hadatuon na mansai dihalomohon halak. Alani i, dibahen nasida ma sada punguan na mangkalomohon i. Tangkas ma, nunga godang jolma na boi dielaela angka begu asa leas roha ni nasida tu jea na boi ro sian ulaon hadatuon. Mangkorhon do ulaon on tu halak Kristen? I do. Dung ditonton sahalak Kristen film na patuduhon ulaon hadatuon, didok ibana do, ”Nang pe hutonton film i, ndang hea huulahon ulaon spiritisme.” Boasa pingkiran sisongon on boi parohon jea?

16. Boasa ndang denggan mamillit hiburan na marisi ulaon spiritisme?

16 Adong do imbar ni mangulahon spiritisme dohot na manonton ulaon spiritisme. Alai, ndang na gabe so parohon jea molo holan manonton ulaon spiritisme. Boasa? Pingkirhon ma on: Dipaboa do di Bibel molo Sibolis  dohot angka begu ndang boi mamboto isi ni pingkiranta. * Alani i do umbahen na sai diparrohahon angka begu ulaonta, songon hiburan na tapillit asa diboto nasida aha na tapingkiri jala naung gale partondionta. Molo tahalomohon do film dohot buku taringot ulaon hadatuon, ulaula dohot sarito taringot halak na hasurupan, dos ma on songon na paboahon hagaleonta tu Sibolis dohot angka begu! Pangkorhon ni on, lam marsitutu ma angka begu mambahen paraloan mamangke hagaleon ni halak na mangulahon i, asa sega situtu partondionna. Sasintongna, sasahalak na mulana tarelaela manonton ulaon spiritisme, boi do ujungna gabe mangulahon ulaon spiritisme.​—Jaha Galatia 6:7.

Marsitutu ma hamu asa dipargogoi Jahowa tingki marsahit

17. Aha do jorat na dipangke Sibolis laho manegai partondion ni halak na marsahit?

17 Ndang holan marhite hiburan Sibolis mangelaela hita, alai dohot do sian na ringkot tu hita, i ma parubatan na tapillit. Songon dia do Sibolis mamangke jorat on? Olo do sahalak Kristen mandele molo ndang marnamalum sahitna hape nunga loja mangalului parubatan. (Markus 5:25, 26) On ma dipangke Sibolis dohot angka begu laho manegai partondionna. Dielaela ma halak naung mandele on asa mamillit parubatan na mamangke spiritisme manang ulaon ”hajahaton [’hagogoon ni Sibolis’, New World Translation (NWT)]”. (Jesaya 1:13) Molo diulahon halak na marsahit i do ulaon on, gabe gale ma partondionna. Boasa?

18. Aha do parubatan na ingkon pasidingon ni halak Kristen jala boasa?

18 Dipasingot Jahowa do halak Israel na mangulahon  ”hajahaton [’mamangke hagogoon ni Sibolis’, NWT]”. Ibana mandok, ”Nang dipaherbang hamu tanganmuna, padaoonku do matangku maradophon hamu; jala nang dijotjoti hamu martangiang, ndang tagamon tangihononku hamu.” (Jesaya 1:15) Alani i, sai tapasiding ma sude ulaon na boi mambahen tangiangta ndang dihalomohon Jahowa manang na mambahen ndang dipargogoi Debata hita tarlumobi tingki marsahit. (Psalmen 41:3) Alani i, ingkon pasidingon ni halak Kristen do molo adong parubatan na mamangke spiritisme. * (Mateus 6:13) Molo diulahon on, dipargogoi Debata ma ibana.​—Ida ma kotak ” Tutu do On Ulaon Spiritisme?”.

UNANG MANSARHON BARITA TARINGOT ANGKA BEGU

19. (a) Aha do na dihalomohon Sibolis umbahen na diotootoi godang jolma? (b) Aha do na so boi saritohonon ni halak Kristen?

19 Nang pe godangan halak Barat leas rohana tu hagogoon ni Sibolis, alai ndang songon i pandapot ni halak di inganan na asing. Di pigapiga inganan, jotjot do Sibolis mangotootoi godang jolma asa porsea na margogo situtu do ibana. Adong do halak na karejo, mangan jala modom  mardongan biar ni roha tu angka begu. Godang sarito taringot halongangan na dibahen angka begu. Dung i, lam digandai ma sarito taringot na masa on, gabe longang ma roha ni godangan halak. Parsidohot do hita mansaritohon angka na masa sisongon on tu jolma? Ndang boi angka naposo ni Debata mangulahon sisongon on. Taparrohahon ma adong dua na mambahen hita ndang boi mangulahon on.

20. Songon dia do sasahalak boi parsidohot mangulahon lomo ni roha ni Sibolis?

20 Na parjolo, molo tasarhon sarito taringot halongangan na binahen ni angka begu, dos songon na mangurupi ulaon ni Sibolis ma hita. Boasa? Ala nunga tangkas hita dipasingot marhite Bibel, molo Sibolis boi mambahen ”tanda halongangan na so tutu” jala na ”paotootohon”. (2 Tessalonik 2:9, 10, Bibel siganup ari) Ala pangotootoi do Sibolis, diboto ibana do songon dia mangelaela  pingkiran ni jolma na manghaporseai ulaon spiritisme. Halak sisongon on, olo do porsea molo nasida hea mangida jala mambege soara ni angka begu jala paboahon i tu na asing. Dung i, lam dihaporseai halak ma sarito on ala nunga mulahulak ditaringoti. Molo diulahon sahalak Kristen sisongon on, sasintongna ibana mangulahon lomo ni roha ni Sibolis, ”ama ni gapgap”.​—Johannes 8:44; 2 Timoteus 2:16.

21. Aha do na rumingkot tabahen di pangkataionta?

21 Na paduahon, unang ma mulahulak dihatahon sahalak Kristen taringot angka begu tu angka dongan sahaporseaon, nang pe hea diida ibana di tingki naung salpu. Boasa? Ala didok do tu hita, ”Tabereng ma induk ni haporseaon i jala na paujungkonsa, i ma Jesus.” (Heber 12:2) Tangkas ma, ingkon tu Jesus do talehon gumodangan pingkiranta, ndang tu Sibolis. Taingot ma, tingki Jesus di tano on, ndang hea ibana mangkatahatai taringot angka begu tu angka siseanna. Nang pe sasintongna diboto Jesus do aha na boi dohot na so boi diulahon Sibolis. Barita taringot Harajaon do na rumingkot di Jesus. Alani i, molo tatiru do Jesus dohot angka apostel, tabahen ma ”angka ulaon habalgaon ni Debata” na rumingkot di pangkataionta.​—Ulaon ni Apostel 2:11; Lukas 8:1; Rom 1:11, 12.

22. Songon dia do hita boi tongtong parohon ”las ni roha di banua ginjang”?

22 Marragam do jorat na dipangke Sibolis laho manegai paralealeonta tu Jahowa. Alai, molo tahagigihon do angka na jahat jala tahaholongi ulaon na denggan, on patuduhon na so tapaloas do Sibolis mambahen gale rohanta laho pasidingkon angka ulaon spiritisme. (Jaha Epesus 4:27.) Tapingkirhon ma songon dia ”las ni roha di banua ginjang” molo taralo hita ”utiutian ni sibolis i” sahat tu na diripashon ibana!​—Lukas 15:7; Epesus 6:11.

^ par. 16 Goar panjouon na dipangke tu Sibolis (Pangalo, Pargabus, Panipu, Pangotootoi) ndang patuduhon na boi ibana mamboto isi ni roha dohot pingkiranta. Alai taringot Jahowa, didok do di Bibel, na boi Ibana ”manguji angka roha ni jolma” jala dipaboa do muse molo Jesus ”sidodo ateate dohot roha”.​—Poda 17:3; Pangungkapon 2:23.

^ par. 18 Ida ma gumodang hatorangan di artikel ”Tes Kesehatan untuk Saudara?” di Menara Pengawal 15 Desember 1994, halaman 19-22, dohot artikel ”Pandangan Alkitab: Memilih Perawatan Medis—Pentingkah?”, di Sedarlah! 8 Januari 2001.