Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Aha do na Diajarhon Bibel tu Hita?

 PASAL SAMPULU PITU

Tangiang i Sada Hak na Sumurung

Tangiang i Sada Hak na Sumurung

Las roha ni ”Sitompa langit dohot tano on” manangihon tangiangta.​—Psalmen 115:15

1, 2. Boasa boi tadok tangiang i sada silehonlehon na arga jala songon dia do asa ditangihon Jahowa tangiangta?

METMET situtu do portibi on molo dipatudos tu saluhut hasiangan on. Songon santetek aek di timba do diida Jahowa sude jolma na adong di saluhut bangso. (Psalmen 115:15; Jesaya 40:15) Alai, nang pe metmet hita martimbangkon hasiangan on, Psalmen 145:18, 19 mandok, ”Donok do Jahowa di sude angka na manjou Ibana, tongon tahe di sude angka na manjou Ibana di bagasan hasintongan. Ibana mambahen lomo ni roha ni angka na mangkabiari Ibana, jala dibege do angguknasida i, jala dipalua do nasida.” Sada hak na sumurung do on di hita! Jahowa, Sipanompa na sun hinagogo i mangido hita asa jonok tu Ibana jala rade do Ibana manangihon tangiangta. Tutu ma tangiang i hak na sumurung, silehonlehon ni Jahowa tu hita ganup marsadasada.

2 Alai, asa ditangihon Jahowa tangiangta, ingkon taihuthon do cara na dihalomohon rohaNa. Songon dia do mangulahon on? Taida ma aha na diajarhon Bibel taringot tangiang.

BOASA MARTANGIANG TU JAHOWA?

3. Boasa hita martangiang tu Jahowa?

3 Lomo roha ni Jahowa hita martangiang tu Ibana. Sian dia taboto? Jaha ma Pilippi 4:6, 7. Tarimangi ma burju ni Jahowa, na manogihon hita asa martangiang tu Ibana. Disarihon na marhuaso di hasiangan  on do hita jala rade Ibana mamboto pangkilalaan dohot hasusaanta.

4. Songon dia do tangiang boi patoguhon paralealeonta tu Jahowa?

4 Tangiang patoguhon paralealeonta tu Jahowa. Molo jotjot mangkatahatai na maraleale taringot pangkilalaan dohot pingkiran ni nasida be, lam togu ma paralealeon ni nasida. Suang songon i ma molo jotjot martangiang tu Jahowa. Marhite Bibel, dipaboa Jahowa do pingkiran dohot pangkilalaanNa tu hita jala dipaboa do aha sangkapNa tu ari na naeng ro. Marhite tangiang, boi tapaboa tu Ibana pangkilalaanta. Molo tabahen songon on, lam togu ma paralealeonta tu Jahowa.​—Jakobus 4:8.

SONGON DIA ASA DITANGIHON DEBATA TANGIANGTA?

5. Sian dia do taboto na so ditangihon Jahowa sude tangiang?

5 Ditangihon Jahowa do sude tangiang? Ndang. Di tingki ni panurirang Jesaya, didok Jahowa tu halak  Israel, ”Nang dijotjoti hamu martangiang, ndang tagamon tangihononku hamu; ai gok mudar do tanganmuna i.” (Jesaya 1:15) Alani i, manat ma hita asa unang mangulahon na mambahen sogo roha ni Jahowa gabe ndang ditangihon tangiangta.

6. Boasa ringkot marhaporseaon? Songon dia do patuduhon na marhaporseaon hita tu Jahowa?

6 Asa ditangihon Jahowa tangiangta, ingkon marhaporseaon do hita tu Ibana. (Markus 11:24) Songon na sinurat ni apostel Paulus, ”Alai anggo so marhaporseaon, ndang tarbahen halomoan; ai halak na mandapothon Debata, ingkon dihaporseai; Adong Debata; laos Ibana do silehon upa tu angka na manjalahi Ibana.” (Heber 11:6) Alai, ndang sae holan mandok marhaporseaon hita. Ingkon tangkas do tapatuduhon haporseaon i marhite pangoloion tu Jahowa ganup ari.​—Jaha Jakobus 2:26.

7. (a) Boasa ingkon hormat jala serep rohanta tingki martangiang tu Jahowa? (b) Songon dia do patuduhon na tulus hita tingki martangiang?

7 Ingkon hormat jala serep do rohanta tingki martangiang tu Jahowa. Boasa? Molo mangkatai hita tu sahalak raja manang presiden, tontu hormat do hita. Jahowa, i ma Debata Pargogo na so Hatudosan. Alani i, tama do tapatuduhon hormat dohot serep ni roha tingki martangiang tu Ibana. (1 Musa 17:1; Psalmen 138:6) Dung i, ingkon tulus jala sian ias ni roha ma hita tingki martangiang. Unang marganjangganjang manang na diapil tangiangta.​—Mateus 6:7, 8.

8. Molo adong na tapangido tingki martangiang, aha do na ingkon taulahon?

8 Molo adong na tapangido tingki martangiang, ingkon taulahon ma hombar tu na tapangido i. Umpamana,  molo tapangido tu Jahowa na porlu di hita siganup ari, ndang paradeon ni Jahowa na tahaporluhon i molo ndang olo hita karejo. Ingkon ringgas ma hita karejo jala unang mamillitmillit parkarejoan. (Mateus 6:11; 2 Tessalonik 3:10) Manang, molo tapangido tu Jahowa asa diurupi hita manadingkon ulaon na sala, tapasiding ma dirinta sian situasi na boi mambahen hita mangulahon i. (Kolosse 3:5) Saonari, taparsiajari ma sungkunsungkun na jotjot disungkun taringot tangiang.

NA JOTJOT DISUNGKUN TARINGOT TANGIANG

9. Tu ise do hita martangiang? Aha do dipaboa di Johannes 14:6 taringot tangiang?

9 Tu ise do hita martangiang? Jesus mangajari siseanna martangiang mandok, ”Ale Amanami na di banua ginjang!” (Mateus 6:9) Didok ibana muse, ”Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu.” (Johannes 14:6) Alani i, holan tu Jahowa do hita martangiang marhite Jesus. Aha do lapatan ni martangiang marhite Jesus? Asa dijalo Jahowa tangiangta, ingkon taargai do hak na sumurung naung dilehon Jahowa tu Jesus. Songon naung taparsiajari, Jesus ro tu tano on laho paluahon hita sian dosa dohot hamatean. (Johannes 3:16; Rom 5:12) Dung i muse, nunga dimiahi Jesus gabe Sintua ni malim jala Panguhum.​—Johannes 5:22; Heber 6:20.

Boi do hita martangiang ganup tingki

10. Ditontuhon do parpeakta tingki martangiang? Patorang ma.

10 Songon dia do parpeakta tingki martangiang? Ndang dipangido Jahowa hita ingkon marsinggang, hundul, manang jongjong tingki martangiang. Bibel paboahon, boi do hita martangiang tu Jahowa songon dia pe parpeakta asal ma hormat. (1 Kronika 17:16; Nehemia 8:6; Daniel 6:11; Markus 11:25) Rohanta do na niida ni  Jahowa tingki martangiang ndang parpeakta. Boi do hita martangiang di bagasan roha manang marsoara tingki sadihari pe. Boi do pos rohanta tangihonon ni Jahowa do tangiangta, nang pe ndang diboto halak hita martangiang.​—Nehemia 2:1-6.

11. Angka aha do na boi tatangiangkon tu Jahowa?

11 Aha do na boi tatangiangkon? Aha pe boi do tatangiangkon hombar tu lomo ni roha ni Jahowa. Bibel mandok, ”Molo tapangido manang aha marguru tu lomo ni rohana, tangihononna do hita.” (1 Johannes 5:14) Boi do tatangiangkon taringot tu dirinta sandiri? Boi. Martangiang tu Jahowa dos do songon na mangkatai tu alealenta. Boi do tapaboa sude na di bagasan roha nang pingkiranta tu Debata Jahowa. (Psalmen 62:9) Boi do tatangiangkon asa dilehon gogo tu hita laho mangulahon na sintong. (Lukas 11:13) Boi do tapangido habisuhon asa marbisuk hita mamillit na dumenggan di ngolunta. Jala, boi do tatangiangkon asa martahan hita mangadopi pangunjunan. (Jakobus 1:5) Mangido hasesaan ni dosa. (Epesus 1:3, 7) Boi tatangiangkon angka na asing, songon keluarga dohot dongan sahaporseaonta.​—Ulaon ni Apostel 12:5; Kolosse 4:12.

12. Aha do na rumingkot tatangiangkon?

12 Aha do na rumingkot laho tatangiangkon? Sangkap ni Jahowa dohot goarNa. Ingkon mandok mauliate do hita tu Jahowa alani sude na niulahonNa tu hita. (1 Kronika 29:10-13) Tingki di tano on Jesus, diajari do siseanna martangiang. (Jaha Mateus 6:9-13.) Na parjolo sian tangiang na niajarhon ni Jesus tu siseanna, i ma asa diparbadia goar ni Debata. Dung i, dipaboa Jesus muse asa tatangiangkon ro Harajaon ni Debata jala asa saut sangkapNa di tano on. Dungkon i pe asa  tatangiangkon na ringkot di hita. Molo parjolo goar ni Debata dohot sangkapNa tatangiangkon, patuduhon na rumingkot do i di hita.

13. Sadia leleng do hita martangiang?

13 Sadia leleng do hita martangiang? Ndang dipaboa di Bibel sadia leleng hita martangiang. Boi do ganjang manang jempek. Umpamana, tingki paboahon holso ni rohanta tu Jahowa manang tingki mandok mauliate  tu Ibana boi do ganjang tangiangta. Alai, di tingki na asing boi do jempek tangiangta songon tangiang laho mangan. (1 Samuel 1:12, 15) Unang ma marganjangganjang tangiangta holan asa dipuji halak, songon halak di tingki ni Jesus. (Lukas 20:46, 47) Ndang lomo roha ni Jahowa tu tangiang sisongon i. Tangiang na sian roha do na dihalomohon Jahowa.

14. Sadia jotjot do hita martangiang jala aha do na taparsiajari sian on taringot Jahowa?

14 Sadia jotjot do hita martangiang? Dipangido Jahowa do asa sai martangiang hita tu Ibana. Bibel mandok, ”Dungo ma hamu jala martangiang,” ”jugulhon hamu ma martangiang,” jala ”unang mansadi hamu martangiang.” (Mateus 26:41; Rom 12:12;  1 Tessalonik 5:17) Rade do Jahowa manangihon hita. Ganup ari boi tadok mauliate tu Ibana alani holong dohot pasupasuNa. Boi do muse tapangido gogo, dame ni roha dohot panogunoguonNa. Molo taargai do hak na sumurung, i ma tangiang, tapangke ma tingkinta jotjot martangiang tu Ibana.

15. Boasa ingkon tadok ”amen” dung sae hita martangiang?

15 Boasa ingkon tadok ”amen” dung sae hita martangiang? Hata ”amen” lapatanna ”tutu” manang ”saut ma”. On patuduhon, na taantusi jala sian ias ni rohanta do hita martangiang. (Psalmen 41:13) Dipaboa Bibel do muse, asa tadok ”amen”, laho patuduhon setuju do hita di tangiang i. Boi do marsoara manang holan di bagasan roha.​—1 Kronika 16:36; 1 Korint 14:16.

SONGON DIA DO DEBATA MANGALUSI TANGIANGTA

16. Tutu do ditangihon Jahowa tangiangta? Patorang ma.

16 Tutu do ditangihon Jahowa tangiangta? Tutu. Di Bibel, dijou do Ibana ”Sitangihon tangiang”. (Psalmen 65:3) Ditangihon jala dialusi Jahowa do tangiang ni marjuta halak na dipasahat sian ias ni rohana. Jala, marragam do dibahen Jahowa cara laho mangalusi tangiang i.

17. Songon dia do Jahowa mamangke surusuruan dohot naposoNa di tano on laho mangalusi tangiang?

17 Dipangke Jahowa do surusuruan dohot naposoNa di tano on laho mangalusi tangiang ni sasahalak. (Heber 1:13, 14) Torop do halak martangiang mangido pangurupion asa mangantusi Bibel, dung i ro ma Sitindangi Ni Jahowa tu jabuna. Dipaboa di Bibel, dohot do surusuruan mamaritahon ”barita na uli” di liat portibi on. (Jaha Pangungkapon 14:6.) Godang do sian hita na martangiang tu Jahowa mangido pangurupion,  dung i adong ma dongan sahaporseaonta na mangalehon pangurupion.​—Poda 12:25; Jakobus 2:16.

Boi do alusan ni Jahowa tangiangta marhite pangurupion ni dongan sahaporseaon

18. Songon dia do tondi parbadia dohot Bibel dipangke Jahowa laho mangalusi tangiang?

18 Dipangke Jahowa do muse tondi parbadia laho mangalusi tangiangta. Molo martangiang hita mangido pangurupion tingki masa hasusaan, boi do tondi parbadia sian Jahowa manogunogu jala mangalehon gogo tu hita. (2 Korint 4:7) Dipangke Jahowa do muse Bibel laho mangalusi tangiangta jala mangurupi hita asa marbisuk laho mamillit na dumenggan di ngolunta. Tingki tajaha Bibel, adong do ra tajaha ayat na boi mangurupi hita. Boi do muse dipangke Jahowa komentar sian dongan sahaporseaon manang jamita sian sintua laho mangurupi hita.​—Galatia 6:1.

19. Boasa sipata songon na so dialusi Jahowa tangiangta?

19 Sipata olo do sungkunsungkun rohanta, ’Boasa ndang dialusi Jahowa dope tangiangta?’ Taingot ma, diboto Ibana do andigan jala songon dia laho mangalusi tangiangta. Diboto Ibana do aha na tahaporluhon. Tajugulhon ma martangiang laho patuduhon na ringkot situtu do na tapangido i jala patuduhon na holan tu Ibana do hita mangkirim. (Lukas 11:5-10) Sipata, olo do Jahowa mangalusi tangiangta ndang songon na tapangido i. Umpamana, olo do ra tatangiangkon asa salpu parungkilon na ro tu hita, alai ndang dibahen Jahowa salpu parungkilon i. Gogo do na dilehon tu hita asa boi martahan mangadopi i.​—Jaha Pilippi 4:13.

20. Boasa ingkon jotjot hita martangiang tu Jahowa?

20 Hak na sumurung do di hita boi martangiang tu Jahowa! Boi pos rohanta tangihononNa tangiangta. (Psalmen 145:18) Lam jotjot hita martangiang sian rohanta tu Jahowa, lam togu ma paralealeonta tu Ibana.