Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Aha do na Diajarhon Bibel tu Hita?

 PASAL TOLU

Aha do Sangkap ni Debata tu Jolma?

Aha do Sangkap ni Debata tu Jolma?

1. Aha do sangkap ni Debata tu jolma?

SANGKAP na denggan do dihalomohon Debata tu jolma. Ditompa Ibana si Adam dohot si Hawa jala dibahen ma nasida tu porlak Eden. Sangkap ni Debata asa marpinompari nasida, mambahen tano on gabe Paradeiso jala mangaradoti angka binatang.​—1 Musa 1:28; 2:8, 9, 15; ida Lampiran 6.

2. (a) Sian dia do taboto laho pasauton ni Debata sude sangkapNa? (b) Halak na songon dia do didok Bibel na boi mangolu salelenglelengna?

2 Hea do ro tu rohamu boi mangolu di Paradeiso? Jahowa paboahon tu hita, ”Molo dung Hudok, ingkon saut do i.” (Jesaya 46:9-11; 55:11, Bibel siganup ari) Tutu ma, pasauton ni Debata do sangkapNa jala ndang adong na boi mangambati Ibana. Adong do alana boasa ditompa Jahowa tano on. Ditompa tano on ndang laho so marisi, alai bahen inganan ni jolma do. (Jesaya 45:18) Lomo rohaNa sude jolma manggohi tano on. Jolma na songon dia do boi maringanan disi jala sadia leleng? Bibel mandok, ”Teanon ni angka partigor i do sogot tano i, jala tongtong do nasida maringanan disi.”​—Psalmen 37:29; Pangungkapon 21:3, 4.

3. Ala marsahit jala mate jolma, sungkunsungkun aha do na ro tu rohanta?

3 Saonari on, marsahit, mate, marmusu jala masibunuan dope jolma. Sasintongna, ndang songon i sangkap ni Debata. Antong, boasa masa angka sisongon on? Holan Bibel do na boi mangalehon alusna.

 MUSU NI DEBATA

4, 5. (a) Ise do na mangkatai tu si Hawa marhite ulok di porlak Eden? (b) Songon dia do jolma na burju boi gabe panangko?

4 Bibel paboahon, adong musu ni Debata na margoar ”Sibolis manang Setan”. Marhite sada ulok, Sibolis mangkatai tu si Hawa di porlak Eden. (Pangungkapon 12:9, Bibel siganup ari; 1 Musa 3:1) Dibahen do ulok i songon na mangkatai tu si Hawa.​—Ida Lampiran 7.

5 Antong, na ditompa Debata do Sibolis? Ndang! Surusuruan hian do ibana di surgo. Diida do Debata manompa tano on laho inganan ni si Adam. Alai, di pudian ni ari muba ma ibana gabe Sibolis. (Job 38:4, 7) Boasa boi songon i? Umpamana, boasa halak na burju boi muba gabe panangko? Ndang ditubuhon hian ibana gabe panangko. Alai, dihalomohon ibana na so ampunana, dung i sai dipingkirpingkiri. Tingki adong dalanna laho mambuat, ditangko ibana ma. Dirina sandiri do mambahen ibana gabe panangko.​—Jaha Jakobus 1:13-15; ida Lampiran 8.

6. Songon dia do sada surusuruan gabe musu ni Debata?

6 On ma na masa tu sada surusuruan. Dung ditompa Jahowa si Adam dohot si Hawa, didok ma tu nasida asa marpinompari jala manggohi tano on. (1 Musa 1:27, 28) Ninna roha ni surusuruan i ma, ”Ahu do na ingkon sombaon ni sude jolma, ndang Jahowa!” Lam dihalomohon ma asa disomba ibana, hape sasintongna ingkon Jahowa do na tama sombaon. Jadi, dipaotooto ibana ma si Hawa. (Jaha 1 Musa 3:1-5.) Ala diulahon songon i, digoari ma ibana Sibolis jala musu ni Debata.

7. (a) Boasa mate si Adam dohot si Hawa? (b) Boasa hita gabe matua jala mate?

7 Ndang dioloi si Adam dohot si Hawa Debata. Alai, dipangan nasida do parbue ni hau i. (1 Musa 2:17; 3:6)  Mardosa ma nasida di adopan ni Jahowa, ujungna mate ma songon na nidok ni Debata. (1 Musa 3:17-19) Sude pinompar ni si Adam dohot si Hawa pe mardosa jala ingkon mate. (Jaha Rom 5:12.) Asa lam taantusi boasa pinompar ni si Adam dohot si Hawa mardosa, taparrohahon ma tudosan on. Songon tuangan ni kambang loyang na matopik. Sude kambang loyang na dibahen mamangke tuangan i gabe matopik do. Ala ndang dioloi si Adam Debata, gabe mardosa ma ibana. Ala sude hita pinompar ni si Adam, gabe mardosa, matua jala mate ma hita.​—Rom 3:23; ida Lampiran 9.

8, 9. (a) Aha do na dihalomohon Sibolis dihaporseai si Adam dohot si Hawa? (b) Boasa ndang pintor diripashon Jahowa angka na mangalo i?

8 Jahowa do na dialo Sibolis, tingki dielaela ibana si Adam dohot si Hawa asa ndang mangoloi Debata. Didok Sibolis, margabus do Jahowa tu si Adam dohot si Hawa jala ndang panggomgomi na denggan Jahowa. Didok do muse, diboto si Adam dohot si Hawa do mamillit na denggan dohot na roa tu dirina sandiri jala ndang pola dihaporluhon nasida panogunoguon ni Jahowa. Aha ma na laho ulahonon ni Jahowa? Boi do ripashononNa angka na mangalo tu Ibana. Alai, molo diripashon nasida, boi do dipatudu Sibolis i pargabus? Ndang.

9 Alani i ma, ndang pintor diripashon Jahowa angka na mangalo i. Alai, dilehon Ibana do tingki tu jolma asa diatur nasida dirina sandiri. On boi patuduhon Sibolis i pargabus jala holan Jahowa do na umboto aha na denggan tu angka jolma. Hita boi mandapot lam godang hatorangan taringot on di Pasal 11. Alai, songon dia do pandapotmu tu na binahen ni si Adam dohot si Hawa on? Tama do nasida manangihon Sibolis jala mangalo tu Debata? Diparade Jahowa do sude na ringkot tu nasida.  Dilehon hangoluan na tipak, inganan na denggan dohot ulaon ni nasida. Hape, Sibolis ndang hea mangalehon na denggan tu nasida. Molo hamu mangolu di tingki ni si Adam, aha do ulahononmu?

10. Aha do na ingkon pilliton ni ganup halak di ngoluna?

10 Saonari pe, ingkon tapillit do ise na laho taoloi,  Sibolis manang Jahowa. Jala, aha na tapillit mangkorhon do i tu hita. Molo tapillit mangoloi Jahowa gabe panggomgomi, hita mandok Sibolis i pargabus. (Psalmen 73:28; Jaha Poda 27:11.) Alai saonari on, otik do halak na mamillit mangoloi Debata di portibi on. Jala, ndang Debata dope na mangarajai portibi on. Antong, molo ndang Debata ise do?

ISE DO NA MANGARAJAI PORTIBI ON?

Molo sude harajaon na di portibi on ndang puna ni Sibolis, lehononna do i tu Jesus?

11, 12. (a) Aha do na boi taparsiajari tingki dipatudu Sibolis nasa harajaon na di tano on tu Jesus? (b) Angka ayat na dia do sian Bibel na patuduhon Sibolis i mangarajai portibi on?

11 Diboto Jesus do ise na mangarajai portibi on. Tingki di tano on Jesus, dipatuduhon Sibolis ma tu ibana ”nasa harajaon na di portibi on ro di hasangaponna”. Jala, didok ma tu Jesus, ”Saluhutna i lehononku do tu Ho, molo olo Ho marsomba tu ahu.” (Mateus 4:8, 9; Lukas 4:5, 6) Molo harajaon i ndang harajaon ni Sibolis, boi do ibana mangalehon i tu Jesus? Ndang. On patuduhon, sude harajaon na di tano on dirajai Sibolis.

12 Ra, sungkunsungkun do rohamu: Boasa Sibolis na marhuaso di tano on? Ndang na Jahowa na manompa sude hasiangan on? (Pangungkapon 4:11) I do, Debata do na manompa portibi on. Alai Jesus mandok, Sibolis do ”raja ni portibi on”. (Johannes 12:31; 14:30; 16:11) Apostel Paulus mandok, Sibolis do ”debata ni portibi on”. (2 Korint 4:3, 4) Jala, apostel Johannes manurat, ”Di bagasan hajahaton do nasa portibi on.”​—1 Johannes 5:19.

SONGON DIA DO PAMARENTAON NI SIBOLIS PASOHOTONNA?

13. Boasa tahaporluhon tano na imbaru?

13 Lam tu segana do portibi on. Masa dope porang,  korupsi dohot hajahaton taida di godang inganan. Ndang na boi jolma paluahon hita sian sude hasusaan tung aha pe dibahen nasida. Alai ndang sadia lelengnai, pasohoton ni Debata ma hajahaton na manggohi tano on di Armagedon jala bahenonNa halak partigor mangingani tano on.​—Pangungkapon 16:14-16; ida Lampiran 10.

14. Ise do dipillit Debata gabe Raja di HarajaonNa i? Aha do na disurirangkon di Bibel taringot Jesus?

14 Jahowa nunga mamillit Jesus gabe Raja ni HarajaonNa. Marribu taon naung salpu, nunga disurirangkon di Bibel molo Jesus ”Raja ni hadameon” jala Harajaonna hot ro di salelenglelengna. (Jesaya 9:6, 7) Diajarhon Jesus tu angka siseanna asa manangiangkon, ”sai ro ma harajaon mu! Sai saut ma lomo ni roham di banua tonga on songon na di banua ginjang!” (Mateus 6:10) Di Pasal 8, taida ma songon dia Harajaon ni Debata manggantihon harajaon na di tano on. (Jaha Daniel 2:44.) Dung i, Harajaon ni Debata paulihon tano on gabe Paradeiso.​—Ida Lampiran 11.

TANO NA IMBARU NUNGA JONOK

15. Aha do lapatan ni ”tano na imbaru”?

15 Songon na dijanjihon di Bibel, ”alai na maimaima do hita di langit na imbaru dohot di tano na imbaru” i ma ”inganan ni hatigoran i”. (2 Petrus 3:13; Jesaya 65:17) Di Bibel, hata ”tano” boi do lapatanna jolma na maringanan di portibi on. (1 Musa 11:1) Jadi, ”tano na imbaru” lapatanna, i ma sude jolma na dihalomohon ni Debata jala na mangoloi Ibana.

16. Aha do na laho lehonon ni Debata tu jolma na maringanan di tano na imbaru jala aha do na ingkon taulahon?

16 Dijanjihon Jesus do, lehononna ”hangoluan na  salelenglelengna” tu jolma na maringanan di tano na imbaru. (Markus 10:30) Aha do na ingkon taulahon asa mangolu salelenglelengna? Asa tadapot alusna, jaha Johannes 3:16 dohot 17:3. Saonari, taida ma songon dia Bibel paboahon hangoluan di Paradeiso.

17, 18. Sian dia do taboto na laho ndang adong be porang jala hadameon ma na tahilala?

17 Angka hajahaton dohot porang ndang adong be. Ndang adong be halak parjahat na maringanan di tano on. (Psalmen 37:10, 11) Debata do na ”pasohothon hamusuon ro di ujung ni tano on”. (Psalmen 46:10; Jesaya 2:4) Sude portibi on, diingani halak na mangkaholongi Debata jala na mangoloi Ibana. Tahilala ma hadameon salelenglelengna.​—Psalmen 72:7.

18 Angka naposo ni Jahowa mangkilala hadameon. Tingki dioloi bangso Israel Debata, dihilala nasida do hadameon ala diondingi Debata do nasida. (3 Musa 25:18, 19) Di Paradeiso, ndang adong be na tahabiari jala tongtong ma hita mangkilala hadameon!​—Jesaya 32:18; Mika 4:4.

19. Boasa pos rohanta gok sipanganon di tano na imbaru?

19 Gok sipanganon. ”Gabe situtu ma eme di tano on ro di punsu ni angka dolok.” (Psalmen 72:16) Sai pasupasuon ni Jahowa do hita, jala ”tano mangalehon gogona”.​—Psalmen 67:7.

20. Sian dia do boi taboto sude tano on gabe Paradeiso?

20 Saluhut tano on gabe Paradeiso. Sude na maringanan di Paradeiso, adong do jabuna be jala suanon ni nasida ma hau anggurna. (Jaha Jesaya 65:21-24; Pangungkapon 11:18.) Sude liat portibi on boi gabe songon porlak Eden. Paradeon ni Jahowa do sude na tahaporluhon. Bibel mandok, ”Dibungka Ho do tanganmu  pasombu lomo ni roha ni nasa na mangolu.”​—Psalmen 145:16.

21. Sian dia do taboto na laho mardame jolma dohot binatang?

21 Mardame ma jolma dohot binatang. Ndang parohon jea be angka binatang tu jolma. Ndang mabiar be jolma tu binatang panoro manang tu binatang na marbisa. Jala, dakdanak pe boi jonok tu singa dohot tu ulok.​—Jaha Jesaya 11:6-9; 65:25.

22. Aha do na laho ulahonon ni Jesus tu halak na marsahit?

22 Ndang adong be sahit. Tingki Jesus di tano on, dipamalum ibana do godang na marsahit. (Mateus 9:35; Markus 1:40-42; Johannes 5:5-9) Dung Raja ibana di Harajaon ni Debata, pamalumonna ma sude jolma na marsahit. Bibel mandok, ”Ndang adong be sian tongatonganta na morongorong ala ni parsahiton.”​—Jesaya 33:24, Bibel siganup ari; 35:5, 6.

23. Aha do na laho bahenon ni Debata tu halak na mate?

23 Na mate mulak mangolu. Dijanjihon Debata do laho pahehehon marjuta halak naung mate. ”Mulak mangolu sogot angka na tigor dohot angka na geduk.”​—Jaha Johannes 5:28, 29; Ulaon ni Apostel 24:15.

24. Songon dia do pangkilalaanmu taringot hangoluan di Paradeiso?

24 Sude hita boi mamillit aha na laho taulahon. Boi tapillit tongtong marsiajar tu Jahowa jala manomba Ibana, manang holan mangulahon lomo ni rohanta sandiri. Molo tapillit do manomba Jahowa, dapotta ma pangkirimon na denggan tu ari na naeng ro. Tingki didok sahalak baoa asa diingot ibana, marjanji do Jesus, ”Ho rap dohot ahu di Paradeiso!” (Lukas 23:43) Di parsiajaran na mangihut, taboto ma taringot Jesus Kristus jala songon dia ibana manggohi janji ni Debata.