1, 2. (a) Aha do na mambahen arga sada silehonlehon? (b) Boasa tobusan silehonlehon ni Debata na ummarga?

AHA do silehonlehon na ummarga na hea dijalo hamu? Ndang pola ingkon na arga sada silehonlehon asa mambahen las roha. Alai, molo silehonlehon i na tahaporluhon, tahamauliatehon do i.

2 Sian sude silehonlehon ni Debata, adong sada apala na rumingkot di hita. Jala, on ma silehonlehon ni Debata na ummarga tu jolma. Songon na laho taparsiajari di pasal on, disuru Jahowa anakNa, Jesus Kristus tuat tu tano on asa boi hita mangolu salelenglelengna. (Jaha Mateus 20:28.) Ala ro Jesus tu tano on humongkop hita, on patuduhon na dihaholongi Jahowa do hita.

AHA DO TOBUSAN I?

3. Boasa mate jolma?

3 Tobusan, i ma dalan ni Jahowa paluahon jolma sian dosa dohot hamatean. Asa taantusi boasa tahaporluhon tobusan, porlu botoonta aha na masa marribu taon naung salpu di porlak Eden. Mardosa ompungta na parjolo si Adam dohot si Hawa. I do umbahen mate nasida. Ala manean dosa ni si Adam dohot si Hawa, pinomparna pe dohot do mate.​—Epesus 1:7; ida Lampiran 9.

4. Songon dia do hangoluan ni si Adam?

 4 Tingki ditompa Jahowa si Adam, dilehon do sada hasurungan di ibana, i ma hangoluan na tipak (sempurna). Tipak pingkiran dohot pamatangna, ndang na laho matua, marsahit jala mate ibana. Didok do si Adam anak ni Debata, ala Jahowa do na manompa ibana. (Lukas 3:38) Jotjot do Jahowa mangkatai tu si Adam jala dipaboa do tangkas aha na boi ulahononna. Dung i, dilehon do karejo na boi mambahen las rohana.​—1 Musa 1:28-30; 2:16, 17.

5. Aha do lapatanna si Adam ditompa tumiru rupa ni Debata?

5 Ditompa Debata si Adam ”tumiru rupana”. (1 Musa 1:27) Lapatanna, nunga disuanhon Debata parangeNa tu roha ni si Adam, i ma holong, bisuk, huaso dohot hatigoranNa. Alani i, boi ibana maniru parange ni Debata. Ndang songon robot ibana ditompa, boi do si Adam mamillit aha na laho siulahononna. Molo dipillit ibana mangoloi Debata, mangolu ma ibana salelenglelengna di Paradeiso.

6. Tingki ndang mangoloi tu Debata, aha do na pinamago ni si Adam? Jala aha do pangkorhonna tu hita?

6 Tingki dipillit si Adam ndang mangoloi Debata, hamatean ma uhum tu ibana. Mago ma paralealeonna tu Jahowa, jala mago ma hangoluanna na tipak dohot Paradeiso ingananna. (1 Musa 3:17-19) Laos alani i ma, ”bongot dosa i tu portibi on marhite sian sada halak jala marhite dosa i ro hamatean, songon i sahat hamatean i tu saluhut jolma, ala sude nasida mardosa”. (Rom 5:12) Tingki mardosa si Adam, ”targadis” ma ibana dohot sude pinomparna gabe hatoban ni dosa dohot hamatean. (Rom 7:14) Alai, adong do pangkirimon di hita? Adong.

7, 8. Aha do na nidokna tobusan?

 7 Aha do tobusan i? Hata tobusan, boi dua lapatanna. Na parjolo, i ma arga sigararon ni sasahalak laho manobus naung targade. Paduahon, i ma arga laho manutup manang laho manggarar harugian.

8 Ndang adong jolma na tolap manggarar harugian alani dosa ni si Adam na parohon hamatean sahat tu hita. Alai, adong do dalan dibahen Jahowa paluahon hita sian dosa dohot hamatean. Taparsiajari ma songon dia tobusan manggohi i jala songon dia on marlaba tu hita.

SONGON DIA DIBAHEN JAHOWA PARADEHON TOBUSAN

9. Songon dia do tobusan on boi digarar?

9 Ndang tartobus ni manang ise hangoluan na tipak na pinamago ni si Adam. Boasa? Alana, sude hita ndang tipak be. (Psalmen 49:8, 9) Bibel mandok, ingkon jolma na tipak do ”bahen tobus humongkop saluhut”. (1 Timoteus 2:6) Tobusan on, ingkon dos argana songon arga ni hangoluan na tipak na mago dibahen si Adam.

10. Songon dia do Jahowa paradehon tobusan?

10 Songon dia do Jahowa paradehon tobusan? Disuru Ibana ma anak haholonganNa ro tu tano on, i ma Jesus anakNa na sasada i. (1 Johannes 4:9, 10) Rade do Jesus ro tu tano on manadingkon Amana di surgo. (Pilippi 2:7) Dipapinda Jahowa ma hangoluan ni Jesus sian surgo tu tano on jala tubu gabe jolma na tipak.​—Lukas 1:35.

Dilehon Jahowa anakNa na sasada i bahen tobusan

11. Songon dia do Jesus boi manobus torop halak?

 11 Dung mardosa si Adam, mago ma hangoluan na tipak jala parohon hamatean tu sude pinomparna. Boi do halak na asing paluahon pinompar ni si Adam sian hamatean? Boi. (Jaha Rom 5:19.) Jesus na so mardosa mangalehon hangoluanna na tipak bahen tobusan. (1 Korint 15:45) Tobusan on ma na paluahon sude pinompar ni si Adam.​—1 Korint 15:21, 22.

12. Boasa ingkon marsitaonon Jesus?

12 Bibel paboahon songon dia hansit ni partinaonan ni Jesus andorang so mate. Dilinsingi ibana, dipakku tu sada tiang jala marsiak sahat tu na mate. (Johannes 19:1, 16-18, 30) Boasa ingkon marsitaonon Jesus? Ala didok Sibolis, ndang adong jolma na marsihohot tu Debata molo diunjuni. Alai, Jesus patuduhon molo jolma na tipak boi marsihohot tu Debata nang pe manaon pangunjunan na borat. Hilala ma las ni roha ni Jahowa ala marsihohot Jesus tu Ibana!​—Poda 27:11; ida Lampiran 15.

13. Songon dia do tobusan i digarar?

13 Songon dia do tobusan on digarar? Dilehon Jesus ma hangoluanna na tipak bahen tobusan. Tanggal 14 Nisan taon 33 M di kalender ni halak Jahudi, diloas Jahowa ma Jesus mate dibunu angka musuna. (Heber 10:10) Tolu ari dung mate Jesus, dipahehe Jahowa ma ibana mardaging tondi. Dung i, manaek ma Jesus tu surgo, dipelehon ma hangoluanna na tipak tu Jahowa bahen tobusan. (Heber 9:24) Ala naung digarar tobusan i, marhite i ma hita boi malua sian dosa dohot hamatean.​—Jaha Rom 3:23, 24.

 SONGON DIA MA ASA MARLABA TOBUSAN I TU HITA

14, 15. Aha do na ingkon taulahon asa disesa dosanta?

14 Nunga boi be tadapot laba ni silehonlehon ni Debata tu hita. Jala, taparsiajari ma labana tu hita saonari dohot tu ari na naeng ro.

15 Disesa ma dosanta. Ndang mura mangulahon na sintong. Jotjot do hita sala di pangkataion dohot di parniulaon. (Kolosse 1:13, 14) Songon dia do asa disesa dosanta? Unang be sai taulahon na sala jala serep ma rohanta mangido tu Jahowa asa marpamuati rohaNa. Jala, pos ma rohanta sesaonNa do dosanta.​—1 Johannes 1:8, 9.

16. Aha do na ingkon taulahon asa denggan panggora ni rohanta?

16 Denggan ma panggora ni rohanta. Panggora ni roha na denggan boi paingothon hita tingki mangulahon na sala, mambahen hita mabiar manang marlungun ni roha. Alai, unang pola mandele. Molo tapangido hasesaan ni dosa sian Jahowa, boi do pos rohanta na tangihononNa do hita. (Heber 9:13, 14) Jala, tangihononNa do molo tapaboa hasusaan dohot hagaleonta tu Ibana. (Heber 4:14-16) Dung i, boi ma hita mardame tu Debata.

17. Pasupasu aha do na boi tahilala ala naung mate Jesus humongkop hita?

17 Boi hita marpangkirimon mangolu salelenglelengna. ”Upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus.” (Rom 6:23) Ala naung mate Jesus humongkop hita, boi ma hita mangolu salelenglelengna jala mangkilala hangoluan na  sonang. (Pangungkapon 21:3, 4) Alai, aha do na ingkon taulahon asa boi tajalo pasupasu on?

JANGKONONMUNA DO TOBUSAN I?

18. Sian dia do taboto na dihaholongi Jahowa hita?

18 Tutu ma, las do rohanta tingki manjalo sada silehonlehon sian dongan. Sian sude silehonlehon na tajalo sian Debata, tobusan ma na ummarga jala na ingkon tahamauliatehon tu Jahowa. Johannes 3:16 paboahon tu hita, ”Songon on do holong ni roha ni Debata di portibi on, pola do Anakna na sasada i dilehon.” Ala holong roha ni Jahowa tu hita, dilehon ma anakNa na sasada i. Jesus pe, holong do rohana tu hita. I do umbahen rade ibana mate humongkop hita. (Johannes 15:13) Tobusan on ma patuduhon holong ni roha ni Jahowa dohot Jesus tu hita.​—Galatia 2:20.

Songon naung taparsiajari, boi do hita gabe aleale ni Jahowa jala boi do lam togu holongta tu Ibana

19, 20. (a) Songon dia do asa boi gabe aleale ni Jahowa? (b) Songon dia do patuduhon na tajangkon do tobusan ni Jesus?

19 Nunga taboto holong ni roha ni Debata tu hita. Saonari, songon dia ma asa boi hita gabe alealeNa? Ndang boi holong rohanta tu sasahalak molo so tatanda ibana. Johannes 17:3 paboahon, ingkon tatanda do Jahowa. Molo tatanda Ibana, holong ma rohanta tu Ibana. Olo ma hita mangulahon lomo ni rohaNa, dung i boi ma hita gabe alealeNa. Antong, lam tatanda ma parange ni Jahowa marhite marsiajar Bibel.​—1 Johannes 5:3.

20 Jangkon ma tobusan ni Jesus. Bibel mandok, ”Naung dapotan hangoluan na salelenglelengna do na mangkaporseai Anak i.” (Johannes 3:36) Aha do lapatan ni mangkaporseai Anak i? Lapatanna, mangulahon sude na diparentahon ni Jesus tu hita.  (Johannes 13:15) Ndang sae holan mandok porsea hita tu Jesus. Molo tajangkon tobusan, ingkon tarida do sian parniulaon. Songon na disurat di Jakobus 2:26, ”Mate do haporseaon na so marulaon.”

21, 22. (a) Boasa ingkon ro hita tu ari Parningotan Hamamate ni Kristus? (b) Aha do na laho taulas di pasal 6 dohot 7?

21 Ro ma tu ari Parningotan Hamamate ni Jesus. Di borngin andorang so mate Jesus, disuru do hita marningot ari hamamatena. Taulahon ma on ganup taon, i ma na digoari Borngin Parningotan ni Tuan. (1 Korint 11:20; Mateus 26:26-28) Lomo roha ni Jesus asa taingot hangoluanna na tipak na dilehon bahen tobusan di hita. Didok ibana, ”Ula hamu ma i, bahen parningotan di Ahu.” (Jaha Lukas 22:19.) Molo ro hita tu ari Parningotan, on patuduhon na taingot do tobusan dohot holong ni Jahowa nang Jesus tu hita.​—Ida Lampiran 16.

22 Tobusan ni Jesus ma silehonlehon na ummarga tu hita. (2 Korint 9:14, 15) Jala, marlaba do on tu halak naung mate. Taparsiajari ma on di pasal 6 dohot 7.