Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Aha do na Diajarhon Bibel tu Hita?

 PASAL OPAT

Jesus Kristus Ise do Ibana?

Jesus Kristus Ise do Ibana?

1, 2. (a) Boi do tadok hita mananda sasahalak alai holan goarna do taboto? Patorang ma. (b) Aha do na dihaporseai jolma taringot Jesus?

GODANG do jolma na tarbarita di tano on. Ra, deba sian nasida diboto hamu do goarna. Alai, ndang na gabe tangkas tatanda nasida ala holan na mamboto goarna sambing. Ingkon taboto do sude taringot tu parngoluonna jala songon dia parangena.

2 Jotjot do tabege taringot Jesus Kristus, nang pe 2.000 taon naung salpu ibana mangolu di tano on. Alai, godang halak ndang mananda ise Jesus. Adong do na mandok ibana halak na burju, debanai mandok ibana panurirang jala adong muse na porsea molo ibana Debata. Songon dia do pandapotmuna?​—Ida Lampiran 12.

3. Boasa ringkot tatanda Debata Jahowa dohot Jesus Kristus?

3 Ringkot do taboto hasintongan taringot tu Jesus. Boasa? Bibel mandok tu hita, ”Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.” (Johannes 17:3) Tutu ma, molo taboto hasintongan taringot Jahowa dohot Jesus, boi ma hita mangolu salelenglelengna di Paradeiso. (Johannes 14:6) Asing ni i muse, sitiruon na binahen ni Jesus boi mangurupi hita asa denggan marsaor dohot dongan. (Johannes 13:34, 35) Di Pasal 1, nunga taboto hasintongan  taringot Debata. Saonari, taparsiajari ma aha na diajarhon Bibel taringot Jesus.

NUNGA JUMPANGNAMI MESSIAS

4. Aha do na pinatudu ni hata ”Messias” dohot ”Kristus”?

4 Leleng andorang so tubu dope Jesus, nunga dijanjihon Jahowa di Bibel laho suruonNa ro Messias manang Kristus. Molo ”Messias” sian hata Heber, jala ”Kristus” sian hata Junani. Hata Messias manang Kristus, patuduhon Debata do na mamillit Messias na dijanjihon i jala dilehon tu ibana hak na sumurung. Marhite Messias ma digohi sude janji ni Debata. Saonari pe, boi do tahilala pangurupion sian Jesus asa lam denggan parngoluonta. Alai, andorang so tubu dope Jesus, sungkunsungkun do roha ni halak, ’Ise do na gabe Messias?’

5. Aha do na patuduhon angka sisean i porsea molo Jesus Messias?

5 Angka sisean ni Jesus porsea do molo Jesus i Messias na dijanjihon. (Johannes 1:41) Songon hata ni si Simon Petrus na mandok tu Jesus, ”Kristus (Messias), Raja na pinarbagabaga i do Ho.” (Mateus 16:16) Aha do na paposhon rohanta molo Jesus i Messias?

6. Songon dia do Jahowa mangurupi halak na serep roha mamboto ise do Messias i?

6 Leleng andorang so ro dope Jesus, nunga disurathon panurirang angka tanda na boi mangurupi jolma mananda Messias. Songon dia i boi mangurupi? Umpamana, molo disuru hita laho tu terminal mangalap sasahalak na so hea dope jumpangta. Molo dipaboa do tangkas hatorangan taringot tu sasahalak i, boi ma hatop tandaonta ibana. Dos songon i ma, disuru Jahowa do angka panurirang paboahon tu hita aha na laho ulahonon ni Messias i jala aha na laho masa tu ibana. Sude  angka surirang naung masa, mangurupi sude halak na serep roha mananda Jesus i Messias.

7. Aha do surirang na patuduhon Jesus i Messias?

7 Adong dua surirang taringot Messias. Na parjolo, 700 taon andorang so tubu dope Jesus, panurirang Mika paboahon Messias i tubu di Betlehem huta na metmet. (Mika 5:1) Tutu ma, di huta Betlehem do Jesus tubu! (Mateus 2:1, 3-9) Na paduahon, dipaboa panurirang Daniel muse Messias i ro di taon 29 M. (Daniel 9:25) Holan dua dope dison na dipaboa sian godang surirang na patuduhon Jesus i, Messias na dijanjihon.​—Ida Lampiran 13.

Tingki tardidi Jesus, digoari ma ibana Messias manang Kristus

8, 9. Aha do na masa tingki Jesus tardidi na patuduhon ibana Messias?

8 Tangkas do dipatuduhon Jahowa molo Jesus i Messias. Marjanji do Debata na lehononNa tanda tu si Johannes Pandidi asa ditanda ibana ise Messias i. Tingki ro Jesus tu aek Jordan taon 29 M asa dididi si Johannes, diida si Johannes ma tanda i. Bibel paboahon tu hita, ”Dung tardidi Ibana, hehe ma Jesus sian aek i. Dung i bungka ma langit i, diida ibana ma Tondi Parbadia songon darapati, turun jala songgop tu Ibana. Dung i tarbege ma soara sian banua ginjang, na mandok, ”On do anakku, haholongan ni rohangku, las do rohangku di Ibana.”” (Mateus 3:16, Bibel siganup ari) Tingki diida jala dibege si Johannes soara i, diboto ibana ma molo Jesus i, Messias. (Johannes 1:32-34)  Tingki dilehon Jahowa Tondi ParbadiaNa tu Jesus sadari i, digoari ma ibana Messias. Ibana ma halak naung pinillit ni Debata gabe Raja.​—Jesaya 55:4.

9 Marhite surirang ni Bibel dohot soara ni Jahowa sandiri jala tanda na nilehonNa tingki tardidi Jesus, patuduhon molo Jesus i Messias. Alai, sian dia do haroro ni Jesus jala songon dia do parangena? Taida ma aha na didok Bibel.

 SIAN DIA DO HARORO NI JESUS?

10. Aha do diajarhon Bibel taringot parngoluon ni Jesus tingki di surgo?

10 Dipaboa di Bibel, nunga leleng Jesus di surgo andorang so ro tu tano on. Panurirang Mika mandok, Messias i nunga adong sian ”na robi”. (Mika 5:1) Jala, jotjot do Jesus sandiri paboahon nunga mangolu ibana di surgo andorang so ro dope tu tano on. (Jaha Johannes 3:13; 6:38, 62; 17:4, 5.) Tingki di surgo Jesus, togu do paralealeonna tu Jahowa.

11. Boasa mansai holong roha ni Jahowa tu Jesus?

11 Mansai holong do roha ni Jahowa tu Jesus. Boasa? Alana, andorang so adong dope angka na asing nunga parjolo Jesus ditompa. I do umbahen na dijou Jesus ”na parjolo tubu sian na tinompa”. * (Kolosse 1:15) Holong do roha ni Jahowa tu Jesus, ala sasada ibana do na tinompaNa sandiri. Alani i ma didok Jesus ”AnakNa na sasada i”. (Johannes 3:16) Jala, Jesus do dipangke Jahowa manompa angka na asing. (Kolosse 1:16) Dijou do muse Jesus ”Hata”, ala marhite ibana do dipasahat Debata tona dohot parentaNa tu surusuruan dohot tu jolma.​—Johannes 1:14.

12. Sian dia do taboto ndang sarupa Jesus dohot Debata?

12 Torop halak porsea, sarupa do Jesus dohot Debata. Alai, ndang songon i diajarhon di Bibel. Bibel mandok, ditompa do Jesus. Lapatanna, marmula do ibana ala ditompa. Alai, Jahowa sitompa saluhutna ndang  marmula. (Psalmen 90:2) Nang pe Jesus anak ni Debata, ndang hea tubu tu rohana asa dos ibana songon Debata. Bibel tangkas mangajarhon, umbalga do Ama sian Anak. (Jaha Johannes 14:28; 1 Korint 11:3) Holan Jahowa do Debata na ”sun hinagogo”. (1 Musa 17:1) Ndang adong na gumogo sian Ibana di hasiangan on.​—Ida Lampiran 14.

13. Boasa didok di Bibel Jesus i ”suman ni Debata na so tarida”?

13 Nunga marmiliar taon rap Jahowa dohot Jesus di surgo andorang so ditompa langit dohot tano on. Alani i ma, mansai togu do holong ni nasida! (Johannes 3:35; 14:31) Ditiru Jesus do angka parange ni Amana. I do alana Bibel mandok, ”Ibana do suman ni Debata na so tarida i.”​—Kolosse 1:15.

14. Songon dia do anak haholongan ni Debata ditubuhon gabe jolma?

14 Rade do Jesus manadingkon ingananna di surgo asa ro tu tano on gabe jolma. Marhite tanda halongangan, dipapinda Jahowa ngolu ni anakNa sian surgo tu bortian ni si Maria. I do alana, ndang maramahon jolma Jesus. Jadi, tipak do ibana ditubuhon si Maria jala dibahen ma goarna Jesus.​—Lukas 1:30-35.

SONGON DIA DO PARANGE NI JESUS?

15. Songon dia do hita asa boi lam mananda Debata?

15 Boi do lam tatanda parange dohot parngoluon ni Jesus marhite manjaha buku Mateus, Markus, Lukas dohot Johannes. Angka buku on, digoari do buku Barita na Uli. Ala songon Amana do Jesus, aha na tajaha boi mangurupi hita asa lam denggan mananda Jahowa. Alani i do didok Jesus, ”Na marnida Ahu, marnida Ama i do.”​—Johannes 14:9.

16. Aha do na diajarhon ni Jesus? Sian dia do haroro ni ajaranna i?

 16 Godang do na manjou Jesus i ”Guru”. (Johannes 1:38; 13:13) Ulaon ni Jesus na rumingkot, i ma mangajarhon barita na uli taringot Harajaon ni Debata. Harajaon ni Debata, i ma Pamarentaon ni Debata sian surgo na laho mamarenta tu liat portibi on jala mangalehon pasupasu tu jolma na mangoloi Ibana. (Mateus 4:23) Sude na diajarhon ni Jesus ro sian Jahowa. Jesus mandok, ”Ndang na sian Ahu na Huajarhon i, alai na ro do i sian Debata na marsuru Ahu.” (Johannes 7:16, Bibel siganup ari) Diboto Jesus, lomo do roha ni Jahowa asa sude jolma manangihon barita na uli taringot tu Harajaon ni Debata na laho mamarenta tu liat portibi on.

17. Didia do Jesus mangajar? Boasa marsitutu ibana laho mangajari angka jolma?

17 Didia do Jesus mangajar? Didia pe na adong jolma. Laho do ibana mangajar sian huta tu huta, sian kota tu kota, di pasar, di inganan partangiangan dohot sian jabu tu jabu. Ndang dipaima asa didapothon jolma ibana. Alai, ibana do na jotjot manjumpangi nasida. (Markus 6:56; Lukas 19:5, 6) Marsitutu do Jesus mangulahon ulaonna. Dilehon do godang tingkina laho mangajari angka jolma. Boasa? Ala marsihohot do Jesus tu Debata, diboto Jesus on do ulaon na dipangido Debata asa ulahononna. (Johannes 8:28, 29) Na mambahen Jesus ingkon mambaritahon muse, ala asi rohana tu angka jolma. (Jaha Mateus 9:35, 36.) Diida ibana angka pangulu ni agama ndang mangajarhon hasintongan taringot tu Debata dohot HarajaonNa. Alani i, lomo rohana mangurupi godang halak asa manangihon barita na uli.

18. Dia do sian parange ni Jesus na dihalomohon rohamu?

 18 Dihaholongi jala disarihon Jesus do angka jolma. Na burju do ibana jala ndang ginjang rohana. Dakdanak pe, lomo do rohana jonok tu Jesus. (Markus 10:13-16) Ndang marimbar jolma dibahen ibana. Jala, sogo do rohana mangida korupsi dohot uhum na so tigor. (Mateus 21:12, 13) Tingki di tano on Jesus, godang na so mangargai angka borua. Alai, burju do Jesus maradophon angka borua jala sangap do nasida dibahen. (Johannes 4:9, 27) Halak na serep roha do ibana. Umpamana, hea do diburi Jesus pat ni angka siseanna jala somalna ulaon ni sada hatoban do on.​—Johannes 13:2-5, 12-17.

Marbarita na uli do Jesus manang didia adong jolma

19. Sian dia taboto na diantusi Jesus do na porlu di jolma jala lomo rohana mangurupi nasida?

19 Diboto Jesus do aha na dihaporluhon ni jolma jala lomo rohana mangurupi nasida. On dipatudu ibana tingki dibahen halongangan laho pamalum jolma marhite huaso na dilehon Debata tu ibana. (Mateus 14:14) Umpamana, tingki sada baoa na marsahit kusta ro mandapothon Jesus huhut mandok, ”Molo na olo Ho, tarpamalum Ho do ahu!” Asi ma roha ni Jesus alani sahitna i. Dijama ma baoa i, huhut didok, ”Na olo do Ahu; ias ma ho!” Jala malum ma baoa na marsahit kusta i! (Markus 1:40-42) Boi do dipingkiri hamu songon dia pangkilalaan ni baoa na dipamalumna i?

TONGTONG MARSIHOHOT TU DEBATA

20, 21. Songon dia do Jesus gabe sitiruon laho mangoloi Debata?

20 Jesus do sitiruon na dumenggan laho mangoloi Debata. Umpamana, nang pe Sibolis mangunjuni Jesus, alai marsihohot do ibana tu Debata.  (Mateus 4:1-11) Deba sian sisolhot ni Jesus ndang porsea molo ibana Messias jala didok do ”na rintik” ibana, alai tongtong do Jesus marbarita na uli. (Markus 3:21) Tingki musu ni Jesus manginsahi ibana, sai marsihohot do Jesus tu Debata jala ndang hea tubu tu rohana laho mambalos nasida.​—1 Petrus 2:21-23.

21 Nang pe hansit ditaon Jesus sahat tu na mate, sai marsihohot do ibana tu Jahowa. (Jaha Pilippi 2:8.) Taparrohahon ma dokdok ni sitaononna sahat tu ari hamamatena. Ditangkup jala didok do ibana mangaleai Debata. Diburai, diparengkelengkeli na torop jala dilinsingi tentara ni Rom, dung i dipaku tu sada tiang. Andorang so mate Jesus, gogo ma didok, ”Nunga  marujung!” (Johannes 19:30) Di ari patoluhon dung mate Jesus, dipahehe Jahowa ma ibana mardaging tondi. (1 Petrus 3:18) Opatpulu ari dungkon hehe, manaek ma ibana tu surgo, ”dung i hundul do Ibana di siamun ni Debata”, paima dibahen Debata ibana gabe Raja.​—Heber 10:12, 13.

22. Aha do na boi tadapot saonari ala marsihohot Jesus tu Debata?

22 Ala marsihohot do Jesus tu Debata, boi ma hita saonari on marpangkirimon laho mangolu salelenglelengna di Paradeiso, songon sangkap ni Debata. Di parsiajaran na mangihut, taulas ma songon dia hamamate ni Jesus boi mambahen hita mangolu salelenglelengna.

^ par. 11 Digoari do Jahowa sada Ama ala Ibana do Panompa. (Jesaya 64:7) Didok do Jesus anak ni Debata ala Jahowa do manompa ibana. Surusuruan manang si Adam pe digoari do anak ni Debata.​—Job 1:6; Lukas 3:38.