Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL SAMPULU

Hasintongan taringot Surusuruan

Hasintongan taringot Surusuruan

1. Boasa taparsiajari taringot surusuruan?

LOMO roha ni Jahowa asa tatanda keluargana. Keluarga ni Debata do angka surusuruan. Di Bibel, surusuruan on digoari do ”anak ni Debata”. (Job 38:7) Aha do ulaon ni angka surusuruan? Songon dia do najolo nasida mangurupi jolma? Jala, boi do urupan ni nasida hita saonari?​—Ida Lampiran 8.

2. Sian dia do mula ni surusuruan? Sadia torop do nasida ditompa?

2 Porlu taboto sian dia do mula ni surusuruan. Dung ditompa Jesus, Kolosse 1:16 paboahon tu hita, ”Marhite sian Ibana do ditompa saluhutna, na di banua ginjang dohot na di tano on.” Sadia torop do surusuruan ditompa? Bibel mandok, marjutajuta do torop ni surusuruan ditompa.​—Psalmen 103:20; Pangungkapon 5:11.

3. Aha do dipaboa di Job 38:4-7 tu hita taringot surusuruan?

3 Dipatorang Bibel muse tu hita, nunga ditompa Jahowa surusuruan andorang so ditompa dope tano on. Songon dia do pangkilalaan ni nasida tingki ditompa tano on? Di buku Job dipaboa, marlas ni roha do nasida tingki ditompa tano on. Gabe sada keluarga ma nasida na mangoloi Jahowa.​—Job 38:4-7.

SURUSURUAN MANGURUPI NAPOSO NI DEBATA

4. Sian dia do taboto na las roha ni surusuruan mangida jolma?

4 Las do roha ni surusuruan mangida jolma jala lomo roha ni nasida mangantusi sangkap ni Debata di tano on. (Poda 8:30, 31; 1 Petrus 1:11, 12) Lungun do  rohanasida mangida si Adam dohot si Hawa tingki mangalo tu Debata. Tarlumobi saonari, lungun do rohanasida mangida torop halak na so mangoloi Jahowa. Alai, molo adong na marhamubaon jala mulak tu Debata, marlas ni roha do surusuruan. (Lukas 15:10) Las do roha ni surusuruan mangida halak na mangoloi Debata. Surusuruan pe, dipangke Jahowa do laho  mangurupi angka naposoNa di tano on. (Heber 1:7, 14) Taida ma pigapiga tudosan.

”Disuru Debatangku do surusuruan na mangkuntam baba ni singa i.”​—Daniel 6:22

5. Songon dia do najolo surusuruan mangurupi naposo ni Debata?

5 Disuru Jahowa dua surusuruan laho paluahon si Lot dohot keluargana sian Sodom dohot Gomorra na laho diripashon. (1 Musa 19:15, 16) Marratus taon sian i, didabuhon ma si Daniel tu hurungan ni singa, alai ndang dihahua singa i ibana. Didok si Daniel, ”Disuru Debatangku do surusuruan na mangkuntam [manutup] baba ni singa i.” (Daniel 6:22) Di pudian ni ari, tingki di penjara apostel Petrus, disuru Jahowa do surusuruan laho paluahon ibana. (Ulaon ni Apostel 12:6-11) Diurupi surusuruan do muse Jesus tingki di tano on. Umpamana, ndang sadia leleng dung tardidi Jesus, ”ro ma angka surusuruan marhobasi di Ibana”. (Markus 1:13) Andorang so diuhum mate dope Jesus, ro do surusuruan jala ”dipargogoi ma ibana”.​—Lukas 22:43, Bibel siganup ari.

6. (a) Sian dia do taboto surusuruan mangurupi naposo ni Debata saonari on? (b) Sungkunsungkun dia do na laho taalusi?

6 Ndang hea be taida surusuruan saonari on. Alai, dipangke Jahowa dope nasida mangurupi naposoNa. Didok di Bibel, ”SurusuruanNa do manjaga angka na mangkabiari Jahowa, jala dipalua do nasida sian parmaraan.” (Psalmen 34:8, Bibel siganup ari) Boasa porlu hita diramoti? Alana, adong musu na gogo laho mangago hita. Ise do nasida? Sian dia do haroro ni nasida? Songon dia do nasida laho mangago hita? Asa boi taalusi, taida ma parjolo aha na masa dung ditompa si Adam dohot si Hawa.

MUSU NA SO BOI TAIDA

7. Aha do dihalomohon Sibolis ulahonon ni jolma?

7 Songon na taparsiajari di pasal 3, adong surusuruan  na mangalo tu Debata jala lomo rohana asa disomba. Di Bibel, digoari ma ibana Sibolis manang Setan. (Pangungkapon 12:9) Lomo do roha ni Sibolis asa adong donganna mangalo tu Debata. Dililuhon ibana si Hawa jala dililuhon ma muse torop jolma. Alai adong do na marsihohot tu Jahowa songon si Abel, si Henok dohot si Noak.​—Heber 11:4, 5, 7.

8. (a) Songon dia do adong surusuruan na gabe angka begu? (b) Songon dia do angka begu malua sian Aek na Sumar?

8 Di tingki ngolu ni si Noak, adong do muse surusuruan na mangalo tu Debata, manadingkon ingananna di surgo jala ro tu tano on. Boasa? Bibel paboahon tu hita, lomo roha ni nasida naeng marripe. (Jaha 1 Musa 6:2.) Alai sala do i. (Judas 6) Songon surusuruan na jahat i, godangan halak di tingki i jahat jala kejam. Alani i, diripashon Jahowa ma halak na jahat marhite aek na sumar. Alai, dipalua do naposoNa na marsihohot. (1 Musa 7:17, 23) Asa malua sian aek na sumar, mulak ma surusuruan na jahat on tu surgo. Di Bibel, digoari ma nasida angka begu. Songon surusuruan na jahat on, torop jolma mangulahon hisaphisap ni daging jala mangulahon na jahat. Diihuthon nasida Sibolis mangalo tu Debata jala Sibolis ma na mangarajai nasida.​—Mateus 9:34.

9. (a) Aha do na masa tu angka begu tingki mulak nasida tu surgo? (b) Aha do na laho taparsiajari?

9 Ala mangalo nasida tu Debata, ndang boi be nasida marsaor tu keluarga ni Jahowa. (2 Petrus 2:4) Saonari, ndang boi be angka begu mardaging jolma, alai tongtong dope nasida ”paotootohon liat portibi on”. (Pangungkapon 12:9; 1 Johannes 5:19) Taparsiajari ma songon dia nasida mangotootoi manang mangaliluhon angka jolma.​—Jaha 2 Korint 2:11.

 ISARA NI ANGKA BEGU MANGALILUHON JOLMA

10. Songon dia do dibahen angka begu laho manjorat jolma?

10 Godang do isara ni Sibolis laho mangaliluhon jolma. Adong na manungkun tu angka begu mamangke parhitean songon ”angka na malo”. Digoari ma on spiritisme. Alai dipaboa di Bibel, ingkon tapadao do dirinta sian ulaon hadatuon. (Galatia 5:19-21) Boasa? Songon parburu na mamangke jorat laho manangkup binatang, songon i ma angka begu manjorat hita asa mangoloi tu nasida.​—Ida Lampiran 26.

11. Aha do ulaon manjujur jala boasa ingkon tapadao?

11 Sada jorat ni Sibolis, i ma ulaon manjujur. Manjujur, i ma ulaon na mamangke gogo ni angka begu laho mangida na laho masa. Adong do na mangulahon on marhite mangida ramalan bintang, manjujur nipi, manjujur ari, manang manjaha gurat ni tangan. Ninna roha ni godangan halak, ndang parohon mara on. Alai sasintongna, ulaon na parohon mara do on. Umpamana, dipaboa di Bibel, angka begu do na mangurupi halak na boi manjujur na laho masa. Di Ulaon ni Apostel 16:16-18 (Bibel siganup ari) paboahon tu hita, taringot sada boruboru ”na sinonggopan ni setan” gabe boi ibana ”manjujur angka na naeng masa”. Dung dipalao apostel Paulus na manonggopi borua i, ndang boi be ibana manjujur angka na laho masa.

12. (a) Boasa sala manungkun tu sahalak partondung? (b) Boasa ndang boi naposo ni Debata mangihuthon adat na hombar tu halak na mate?

12 Dibahen Sibolis do muse cara na asing laho manjorat jolma. Lomo rohana asa porsea hita na tongtong dope mangolu tondi ni halak naung mate. Jala, boi dope nasida mangurupi manang pabiarbiarhon hita.  Umpamana, adong do datu mandok boi nasida mangkatai tu tondi ni na mate. Jala, boi do ra jouonna sada tondi na manuman tu halak na tinandamu naung mate i, songon pangkataionna dohot soarana. (1 Samuel 28:3-19) Jala, godang do adat manang hasomalan na mangihuthon pangantusion na mandok, mangolu dope tondi ni halak naung mate. Songon ulaon adat tu na mate, mamele tu na mate, bungka tujung manang borngin pandungoi. Ala nunga diboto halak Kristen hasintongan taringot tu halak naung mate, ndang parsidohot be nasida tu ulaon sisongon i. Alani i, olo do ra tondong dohot dongan sahuta muruk jala marsogo ni roha tu nasida. (Psalmen 115:17) Alani i, manat ma hita andorang so mangihuthon ulaon na hombar tu halak na mate.​—Jaha 5 Musa 18:10, 11; Jesaya 8:19.

13. Aha do na boi hilalaon ni halak na hea mabiar tu angka begu?

13 Angka begu ndang holan mangaliluhon, alai nasida pe huhut do pabiarbiarhon jolma. Saonari, nunga diboto Sibolis dohot angka begu ”otik nama tingkina” laho ripashonon ni Debata nasida sian tano on. Alani i, lam marrimas ma nasida. (Pangungkapon 12:12, 17) Nang pe songon i, marribu halak na hea mabiar tu angka begu ndang mabiar be nasida saonari. Songon dia do nasida boi malua sian i?

TAPADAO JALA TAALO MA ANGKA BEGU

14. Songon halak Kristen di abad parjolo, songon dia do hita boi malua sian angka begu?

14 Dipaboa Bibel do tu hita songon dia mangalo angka begu jala songon dia paluahon dirinta sian nasida. Umpamana, mangulahon hadatuon do torop halak di kota Epesus andorang so marsiajar tu hasintongan. Songon dia do nasida malua sian ulaon hadatuon i?  Bibel mandok, ”Torop do nang angka na mangulahon ajiajian dipamboan be ma angka bukuna tu jolo ni jolma na torop jala ditutung ma disi.” (Ulaon ni Apostel 19:19, Bibel siganup ari) Asa gabe halak Kristen nasida, ditutung ma sude buku hadatuon i. Songon i do tongtong ingkon ulahononta saonari. Ganup halak na mangoloi Jahowa, ingkon mambolongkon do sude na hombar tu ulaon hadatuon. Songon angka buku, majalah, buku ramalan bintang, film, musik, game dohot poster na mambahen ulaon hadatuon idaon songon na so parohon mara. Dohot ma muse angka ugasan na dipangke laho manjaga dirina sian angka begu.​—1 Korint 10:21.

15. Aha dope na porlu taulahon laho mangalo Sibolis dohot angka begu?

15 Ditongos si Paulus do surat tu halak Kristen na di Epesus, asa tongtong ”mangalo, . . . angka tondi hajahaton”. (Epesus 6:12) Nang pe naung ditutung buku hadatuon i, tongtong dope angka begu marsangkap mangago nasida. Alani i, aha dope na porlu ulahonon ni nasida? Didok si Paulus tu nasida, ”Jalo hamu ma lombulombu haporseaon i; haintopan hamu do marhite sian i sude sumbia api ni parjahat i.” (Epesus 6:16) Songon lombulombu [perisai] na mangondingi tentara tingki marporang, songon i ma haporseaon boi mangondingi hita. Molo marhaporseaon na togu hita tu Jahowa, margogo ma hita mangalo Sibolis dohot angka begu.​—Mateus 17:20.

16. Songon dia do patoguhon haporseaonta tu Jahowa?

16 Songon dia do patoguhon haporseaonta tu Jahowa? Porlu tajaha Bibel ganup ari jala marpangunsandean tu Jahowa. Molo togu haporseaonta tu  Jahowa, boi ma hita monang mangalo Sibolis.​—1 Johannes 5:5.

17. Aha dope na boi mangondingi hita sian Sibolis dohot angka begu?

17 Aha dope na porlu ulahonon ni halak Kristen di Epesus? Nasida maringanan di tongatonga ni halak na mangulahon hadatuon. Alani i, didok si Paulus tu nasida, ”Martangiang ma hamu, . . . manang sadihari pe.” (Epesus 6:18) Porlu jaloon ni nasida pangurupion sian Jahowa asa diondingi ganup tingki. Saonari pe, hita mangolu di tongatonga ni halak na mangulahon spiritisme. Alani i, tapangido ma asa diondingi Jahowa hita jala tajou ma goarNa tingki martangiang. (Jaha Poda 18:10.) Molo tapangido pangurupion sian Jahowa asa dipalua sian Sibolis, tangihonon ni Jahowa do tangiangta.​—Psalmen 145:19; Mateus 6:13.

18, 19. (a) Songon dia do hita boi mangalo Sibolis dohot angka begu? (b) Sungkunsungkun dia do na laho dialusi di pasal na mangihut?

18 Molo tabolongkon sude na hombar tu ulaon hadatuon jala tapangido pangurupion sian Jahowa laho mangondingi hita, boi do taalo Sibolis dohot angka begu. Unang pola mabiar hita tu nasida. (Jaha Jakobus 4:7, 8.) Gumogo do Jahowa sian angka begu. Nunga diuhum Jahowa nasida di tingki ni si Noak jala na laho ripashononNa do muse nasida di joloan ni ari on. (Judas 6) Taingot ma, dipangke Jahowa do surusuruanna mangondingi hita sian Sibolis. (2 Rajaraja 6:15-17) Boi do taalo Sibolis dohot angka begu marhite pangurupion ni Jahowa.​—1 Petrus 5:6, 7; 2 Petrus 2:9.

19 Ala Sibolis dohot angka begu mambahen hasusaan tu hita, boasa ndang pintor diripashon Jahowa nasida? Taida ma alus ni sungkunsungkun on.