Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PASAL SAMPULU DUA

Songon Dia Asa Boi Gabe Aleale ni Debata?

Songon Dia Asa Boi Gabe Aleale ni Debata?

1, 2. Angka ise do na didok ni Jahowa alealeNa?

HALAK na songon dia do pillitonmu gabe alealemu? Tontu, las do rohanta maraleale tu halak na burju jala na denggan parangena. Jotjot mangkatahatai tu ibana jala lomo rohanta rap dohot ibana manang tudia pe.

2 Adong do jolma dipillit Jahowa gabe alealeNa. Umpamana, didok do si Abraham aleale ni Jahowa. (Jesaya 41:8; Jakobus 2:23) Maraleale do muse Jahowa tu si Daud. Didok Ibana do si Daud ”sipasaut nasa na pinangido ni rohangku”. (Ulaon ni Apostel 13:22) Panurirang Daniel pe didok do ”hasudungan ni roha” ni Jahowa.​—Daniel 9:23.

3. Boasa si Abraham, si Daud dohot si Daniel boi gabe aleale ni Jahowa?

3 Boasa si Abraham, si Daud dohot si Daniel boi gabe aleale ni Jahowa? Didok Jahowa tu si Abraham, ”Ala ditangihon ho soarangku.” (1 Musa 22:18) Halak na serep roha na mangoloi Jahowa boi do gabe alealeNa. Gari sada bangso pe boi do maraleale tu Jahowa. Dipaboa Jahowa tu bangso Israel, ”Sai tangihon hamu ma soarangku, asa ahu gabe Debatamuna, jala hamu gabe bangsongku.” (Jeremia 7:23) Alani i, ingkon taoloi do Jahowa asa boi hita gabe alealeNa.

DIONDINGI JAHOWA DO ALEALENA

4, 5. Songon dia do Jahowa mangondingi alealeNa?

4 Bibel mandok, dilului Jahowa do dalan ”laho  mangalehon gogo tu halak parroha na marsitiopan tu Ibana”. (2 Kronika 16:9) Di Psalmen 32:8, dijanjihon Jahowa tu alealeNa, ”Huparrohai jala hupodai pe ho taringot tu dalan sidalananmu, huiringiring pe ho dohot pamereng ni matangku.”

5 Adong do musu na so boi taida, na mangkalomohon asa unang maraleale be hita tu Jahowa. Alai, rade do Jahowa mangondingi hita. (Jaha Psalmen 55:23.) Ala maraleale do hita tu Jahowa, taoloi ma Ibana sian nasa rohanta. Marsihohot ma hita tu Ibana nang pe adong hasusaan. Hita boi marpos ni roha tu Jahowa songon panurat buku Psalmen na mandok, ”Ai molo disiamunku Ibana, ndang tagamon humordit ahu.” (Psalmen 16:8; 63:8) Songon dia do Sibolis mangambati hita asa unang gabe aleale ni Debata?

HATA NA SO TUTU SIAN SIBOLIS

6. Aha do didok Sibolis taringot halak na mangoloi Jahowa?

6 Songon naung taparsiajari di pasal 11, Sibolis mandok na so tutu taringot Jahowa. Didok ibana, Jahowa i ndang tigor jala pargabus. Ndang dipaloas si Adam dohot si Hawa manontuhon na sintong dohot na so sintong. Molo tajaha muse di buku Job, didok Sibolis do hata na so tutu taringot halak na maraleale tu Jahowa. Ninna Sibolis, ala dipasupasu Jahowa do nasida umbahen na mangoloi ndang ala na tutu mangkaholongi Ibana. Ninna Sibolis muse, boi do bahenonna sude halak mangalo tu Debata. Saonari, taida ma aha na boi taparsiajari sian si Job jala songon dia Jahowa mangondingi ibana.

7, 8. (a) Songon dia do roha ni Jahowa mangida si Job? (b) Aha do didok Sibolis taringot si Job?

7 Ise do si Job? Ibana baoa na burju na mangolu  hirahira 3.600 taon naung salpu. Didok Jahowa, ndang adong jolma na burju songon si Job di tingki i. Las do roha ni Jahowa mangida si Job. Dipuji ibana do Debata jala dihasogohon ibana na jahat. (Job 1:8) Tutu ma, si Job aleale ni Jahowa.

8 Didok Sibolis, si Job mangoloi tu Debata ala mangkaringkothon dirina sambing. Ninna ibana tu Jahowa, ”Nda na diramoti Ho ibana dohot jabuna humaliang ro di nasa na di ibana? Ulaon ni tanganna pe nunga ditumpak Ho manjadi, jala ditutup pinahanna do tano i. Alai tung sura disurdukkon Ho tanganmu mambuat saluhut na di ibana, manang so buraanna na ma Ho di hapataron.”​—Job 1:10, 11.

9. Aha do na diloas Jahowa ulahonon ni Sibolis?

9 Sibolis mandok, dioloi si Job pe Jahowa ala adong do na laho binuatna. Ninna ibana muse, boi do bahenonna si Job ndang be mangoloi Jahowa. Alani i, diloas Jahowa ma Sibolis mangunjuni si Job laho mangida tutu do ibana mangkaholongi Jahowa manang ndang.

SIBOLIS MANGUNJUNI SI JOB

10. Aha do dibahen Sibolis mangunjuni si Job jala songon dia do si Job mangadopi i?

10 Parjolo, mago ma sude pinahanna jala mate angka parkarejona, ujungna habis ma sude arta ni si Job. Dung i, mate sude ianakhon ni si Job alani halisungsung. Alai, marsihohot do si Job tu Jahowa. ”Di bagasan saluhut parsorionna i, ndang mardosa si Job, jala ndang manarita rohana dompak Debata.”​—Job 1:12-19, 22.

Dipasupasu Jahowa si Job ala tongtong marsihohot

11. (a) Aha dope na dibahen Sibolis tu si Job? (b) Aha do didok si Job taringot i?

11 Ndang sumurut Sibolis. Didok ibana muse hata na so tutu tu Debata, ”Tung sura disurdukkon Ho tanganmu  manjama holiholina dohot sibukna, manang so buraanna ma. Ho di hapataron.” Dung i, dibahen Sibolis ma baroon sude daging ni si Job. (Job 2:5, 7) Alai, tongtong do si Job marsihohot tu Jahowa. Didok ibana, ”Rasirasa tos hosangku, ndang tagamon sumurut sian ahu habontoranku!”​—Job 27:5.

12. Songon dia do si Job patuduhon na pargabus do Sibolis?

12 Ndang diboto si Job manang aha pe taringot hatahata ni Sibolis tu Debata jala boasa ibana manaon hasusaan. Dirimpu ibana do Jahowa na mambahen hasusaan i. (Job 6:4; 16:11-14) Alai nang pe songon i, marsihohot do si Job tu Jahowa. Alani i, tangkas ma ndang na mangkaringkothon dirina si Job. Alani holongna do umbahen maraleale si Job tu Debata. Gabus do sude hatahata ni Sibolis!

13. Aha do labana ala marsihohot si Job tu Jahowa?

13 Nang pe ndang diboto si Job aha na masa di surgo, marsihohot do ibana tu Debata. Dipasupasu Jahowa do si Job ala marsihohot ibana.​—Job 42:12-17.

HATA NA SO TUTU SIAN SIBOLIS TU HITA SUDE

14, 15. Aha do hata na so tutu na didok Sibolis taringot sude jolma?

14 Boi do hita marsiajar sian na masa tu si Job. Saonari pe, didok Sibolis do hita mangoloi Jahowa ala mangkaringkothon dirinta sandiri. Di Job 2:4, Sibolis mandok, ”Ro di nasa na di ibana dilehon jolma i do singkat ni hosana.” Na didok ni Sibolis dison, sude jolma do ndang holan si Job. Marratus taon dung mate si Job, tongtong dope Sibolis mangarehei Jahowa jala didok hata na so tutu taringot tu halak na mangoloi Jahowa. Umpamana, di Poda 27:11, disurat, ”Marbisuk ma ho ale anaha, jala sai palas ma rohangku, asa huboto mangalusi hata ni halak pangarehe.”

 15 Boi do tapillit mangoloi Jahowa asa tongtong gabe alealeNa jala patuduhon Sibolis i pargabus. Nang pe ingkon mambahen hamubaon asa boi gabe aleale ni Jahowa, denggan ma molo tapillit mangoloi Ibana! Didok Sibolis, ndang oloanta be Jahowa molo masa hasusaan tu hita. Sai dilului ibana do dalan asa unang marsihohot hita tu Debata. Songon dia ma dibahen?

16. (a) Aha do isara dibahen Sibolis mangambati jolma asa unang manomba Jahowa? (b) Songon dia do Sibolis mangambati hamu asa unang manomba Jahowa?

16 Marragam do dalan dibahen Sibolis asa unang gabe aleale ni Debata hita. Olo do ibana ”songon babiat na marauang, mangalului sibondutonna”. (1 Petrus 5:8) Unang pola songgot rohanta molo keluarga, aleale dohot na asing mangorai hita marsiajar Bibel manang mangulahon na sintong. Hira na mangadopi babiat ma tahilala molo masa sisongon i. * (Johannes 15:19, 20) Sibolis pe boi do manumannuman ”songon surusuruan hatiuron”, laho mangaliluhon hita. (2 Korint 11:14) Dibahen Sibolis do muse isara na asing laho padaohon hita sian Jahowa, i ma asa tubu tu rohanta ndang tama hita manomba Ibana.​—Poda 24:10.

OLOI MA HATA NI JAHOWA

17. Boasa olo hita mangoloi Jahowa?

17 Tapatuduhon ma Sibolis i pargabus marhite pangoloionta tu Jahowa. Songon dia do bahenonta asa boi mangoloi Jahowa? Bibel mandok, ”Ingkon  haholonganmu Jahowa, Debatam sian nasa roham dohot sian nasa ateatem dohot sian nasa gogom.” (5 Musa 6:5) Taoloi Jahowa ala tahaholongi Ibana. Molo lam togu holongta tu Jahowa, rade ma hita mangulahon na pinangidoNa. Apostel Johannes manurat, ”Ai on do holong ni roha di Debata; molo taradoti patikna. Ndada na dokdok patikna i.”​—1 Johannes 5:3.

18, 19. (a) Angka aha do ulaon na sala na pinaboa ni Jahowa? (b) Songon dia do taboto ndang dipangido Jahowa aha na so boi taulahon?

18 Angka aha do ulaon na sala na dipaboa ni Jahowa? Adong dipaboa di kotak ”Hasogohon ma na dihasogohon ni Jahowa.” Tingki tajaha on, ndang sude on sala ninna rohanta. Alai, molo manat tarimangi hata ni Bibel, lam taantusi ma songon dia laba ni mangoloi parenta ni Jahowa. Dung i, taboto ma muse na ingkon  mambahen hamubaon hita di ngolunta. Nang pe mulana maol mangulahon on, alai boi do las rohanta jala dame tahilala molo tabahen hamubaon laho marsihohot gabe aleale ni Debata. (Jesaya 48:17, 18) Songon dia do hita boi mambahen hamubaon?

19 Ndang dipangido Jahowa sian hita aha na so boi taulahon. (5 Musa 30:11-14) Ala alealeNa hita, umbotoan do Jahowa tu hita sian dirinta sandiri. Diboto Ibana do na boi taulahon jala diboto do hagaleonta. (Psalmen 103:14) Songon na didok ni panurirang Jesaya, ”Ibana balik mangalehon gogo tu na loja, jala dipargogoi situtu angka na so margellok.” (Jesaya 40:29) Boi do pos rohanta, patoguon ni Jahowa do hita laho mangulahon na sintong. LehononNa do tu hita ”hagogoon na sumurung” na mangurupi hita asa martahan mangadopi hasusaan. (2 Korint 4:7) Dung dihilala si Paulus  pangurupion ni Jahowa, didok ibana ma, ”Saluhutna do tarpatupa ahu marhitehite Ibana, na margogoihon ahu!”​—Pilippi 4:13.

MANIRU PARANGE NI DEBATA

20. Parange na songon dia do na ingkon tapatuduhon jala boasa?

20 Asa boi gabe aleale ni Jahowa, unang ma taulahon na so dihalomohon Jahowa. (Rom 12:9) Alai ndang holan i, ingkon taulahon do aha na dihalomohon Jahowa, songon na dipaboa di Psalmen 15:1-5. (Jaha.) Aleale ni Jahowa pe ingkon patuduhon parange songon, ”holong, las ni roha, dame, hasabaron, roha pangurupi, haburjuon, jala boi mangarajai dirina”.​—Galatia 5:22, 23, Bibel siganup ari.

21. Songon dia do patuduhon parange na dihalomohon Debata?

21 Songon dia do hita asa boi patuduhon parange na denggan? Jotjot ma hita manjaha jala marsiajar Bibel laho mamboto na dihalomohon Jahowa. (Jesaya 30:20, 21) Molo taulahon on, lam togu ma holongta tu Jahowa, dung i taronjar ma rohanta mangoloi Ibana.

22. Aha do laba ni mangoloi Jahowa?

22 Hamubaon na tabahen di ngolunta boi dipatudos songon na mananggalhon pahean na kotor, dung i mamangke pahean na ias. Bibel mandok, asa ”ditanggal hamu jolma na buruk i” jala patuduhon ma parange ”na imbaru”. (Kolosse 3:9, 10) Nang pe ndang mura laho mangulahon on, molo tabahen hamubaon laho mangoloi Jahowa, ”godang do upa” lehononNa tu hita. (Psalmen 19:12) Alani i, tapillit ma mangoloi Jahowa jala tapatuduhon ma Sibolis i pargabus. Tasomba ma Jahowa mardongan holong na sian roha, ndang holan alani bagabagaNa. Dung i, boi ma hita gabe aleale ni Debata!

^ par. 16 Ndang gabe Sibolis na manjujui sude halak laho mangorai hamu marsiajar Bibel. Alai Sibolis do ”debata ni portibi on” jala ”di bagasan hajahaton do nasa portibi on”. Alani i, unang pola songgot rohanta molo adong na mangorai hita asa unang manomba Jahowa.​—2 Korint 4:4; 1 Johannes 5:19.