Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Aha do na Diajarhon Bibel tu Hita?

 PASAL SIA

Tutu do Nunga Jonok Ajal ni Hasiangan On?

Tutu do Nunga Jonok Ajal ni Hasiangan On?

1. Sian dia do taboto aha na laho masa di ari na naeng ro?

TINGKI mambege barita di TV, hea do didok rohamu, ’Songon dia nama portibi on?’ Godang hasusaan dohot hajahaton na mambahen halak mandok, nunga jonok ajal ni hasiangan on. Tutu do i? Boi do botoonta aha na masa di ari na naeng ro? Boi. Nang pe jolma ndang boi mangida aha na laho masa tu ari na naeng ro, alai Debata Jahowa diboto do aha na laho masa. Dipaboa Ibana tu hita marhite Bibel taringot tu ari na naeng ro dohot aha na laho masa tu tano on.​—Jesaya 46:10; Jakobus 4:14.

2, 3. Aha do disungkun sisean ni Jesus jala aha do alus ni Jesus?

2 Tingki tajaha di Bibel taringot ajal ni hasiangan on, lapatanna ndang ajal ni tano na taingani on. Alai, hajahaton do na laho dipaujung. Jesus mandok, Harajaon ni Debata do na laho mamarenta tu tano on. (Lukas 4:43) Lomo roha ni sisean ni Jesus mamboto andigan ro Harajaon i, disungkun nasida ma Jesus, ”Andigan masa i, jala dia ma tanda ni harorom dohot ajal ni hasiangan on?” (Mateus 24:3) Ndang dipaboa Jesus anggo arina, alai dipaboa do tu nasida aha na laho masa andorang so ro ajal ni hasiangan on. Jala, sude na pinaboana i nunga masa be saonari.

3 Di pasal on, taparsiajari ma angka tanda na patuduhon nunga mangolu hita di ajal ni hasiangan on. Asa taboto boasa masa angka hasusaan di tano on, parjolo  sahali ingkon taboto do taringot porang na masa di surgo.

PORANG DI SURGO

4, 5. (a) Aha do na masa di surgo dung gabe raja Jesus? (b) Songon na didok di Pangungkapon 12:12, aha do na laho masa dung didabu Sibolis tu tano on?

4 Songon na taparsiajari di pasal 8, nunga mamarenta Jesus gabe Raja di surgo di taon 1914. (Daniel 7:13, 14) Bibel paboahon di buku Pangungkapon, ”Masa ma hamusuon di banua ginjang, martongtang ma Mikhael [Jesus] rap dohot angka surusuruanna dompak naga i [Sibolis]. Marmusu ma nang naga i rap dohot angka surusuruanna.” * Sibolis dohot surusuruan na mangihuthon ibana ditaluhon jala didabu sian surgo tu tano on. Marlas ni roha ma surusuruan di surgo! Alai, aha ma na masa tu tano on? Bibel paboahon, marjea ma pangisi ni tano on. Boasa? Ala marrimas situtu Sibolis, ”ai diboto, otik nama tingkina!”​—Pangungkapon 12:7, 9, 12.

5 Dibahen Sibolis ma gok hasusaan di tano on. Marrimas situtu ibana ala diboto ”otik nama tingkina” laho ripashonon ni Debata. Taparsiajari ma angka na laho masa saleleng ari parpudi songon na didok Jesus.​—Ida Lampiran 24.

ARI PARPUDI

6, 7. Aha ma na boi tapaboa taringot porang dohot haraparon na masa saonari?

6 Porang. Jesus mandok, ”Ai na hehe do sogot bangso maralohon bangso.” (Mateus 24:7) Gumodang do  jolma na mate alani porang di tingkinta on sian na mate alani porang di tingki naung salpu. Sada Lembaga Pengamat Dunia paboahon, lobi sian 100 juta halak na mate alani porang sian taon 1914. Halak na mate alani porang sian taon 1.900 sahat tu taon 2.000, tolu hali lompit ma godangna sian halak na mate alani porang saleleng 1.900 taon. Hilala ma songon dia hasusaan ni marjuta halak alani porang i!

7 Haraparon. Jesus mandok, ”Masa ma nang haleon.” (Mateus 24:7) Nang pe gumodang sipanganon saonari sian tingki naung salpu, torop dope halak na raparon. Boasa? Ala ndang adong hepengna laho manuhor sipanganon jala ndang adong tano na boi ulaon ni nasida. Lobi sian samiliar halak margaji hurang sian sampululima ribu sadari. Organisasi Kesehatan Dunia (WHO) paboahon, marjuta dakdanak mate ganup taon ala hurang mangan.

8, 9. Aha do na patuduhon naung masa surirang ni Jesus taringot lalo dohot sahit?

8 Gempa. Songon na didok  Jesus, ”Masa ma lalo angka na bolon.” (Lukas 21:11) Godang gempa na gogo masa ganup taon. Sian taon 1.900, lobi sian dua juta halak na mate alani gempa. Nang pe dipangke teknologi laho mamboto na laho masa gempa, alai godang dope jolma na mate alani gempa.

9 Sahit. Songon na disurirangkon Jesus, masa ma ”sahit na jorbut”. Sahit on hatop bali jala godang na mate alani i. (Lukas 21:11) Nang pe naung diparsiajari dokter mangobati angka sahit i, alai godang dope angka sahit na so boi diobati. Umpamana, adong laporan paboahon, ganup taon marjuta halak mate alani TBC, malaria dohot kolera. Alai ndang holan i, adong 30 sahit na baru na so adong dope obatna.

PARANGE NI JOLMA DI ARI PARPUDI

10. Songon dia do hata na disurat di 2 Timoteus 3:1-5 nunga masa be saonari?

10 Dipaboa Bibel di 2 Timoteus 3:1-5, ”Na ro ma angka ari hasusaan, di angka tingki parpudi.” Apostel Paulus  patorangkon songon dia parange ni torop halak di ari parpudi. Didok ibana, angka jolma

  • mangkaholongi dirina sandiri

  • holongan di hepeng

  • na so mangoloi natorasna

  • pangoseose

  • na so marholong ni roha tu keluarga

  • ndang boi mangarajai dirina

  • parmurukmuruk

  • holongan di hisap ni daging asa di Debata

  • paragama do nasida idaon, alai ndang diulahon hata ni Debata

11. Songon na disurat di Psalmen 92:8, aha do na laho masa tu halak parjahat?

11 Songon i do na masa taida saonari? Torop do halak songon i di liat portibi on. Alai, ndang sadia lelengnai uhumon ni Debata ma na mangulahon sisongon i. Ibana marjanji, ”Lam martumbur pe angka parjahat songon duhutduhut, jala marbunga pe sude angka siulahon hajahaton,  asa siaphononhon do nasida salelenglelengna.”​—Psalmen 92:8.

BARITA NA ULI DI ARI PARPUDI

12, 13. Aha do na diajarhon Jahowa tu hita saleleng ari parpudi?

12 Songon na dipaboa di Bibel, masa ma gok hasusaan di liat portibi on di tingki ari parpudi. Alai, adong dope muse angka na denggan na laho masa.

”Laos baritahononhon do barita na uli on taringot Harajaon i di liat portibi on.”​—Mateus 24:14

13 Pangantusion na sintong. Panurirang Daniel manurat taringot ari parpudi, ”jadi torop halak manulingkiti hata i, gabe tamba situtu parbinotoanna”. (Daniel 12:4) Di ari parpudi, diajari Debata ma angka naposoNa asa boi lam tangkas mangantusi Bibel. Umpamana, sian taon 1914, diurupi Jahowa do hita pabadiahon goarNa dohot mangantusi sangkapNa tu tano on. Taantusi ma muse aha na masa tu halak naung mate, laba ni tobusan dohot pangkirimon tu haheheon. Songon naung taparsiajari, holan Harajaon ni Debata do na boi pasohothon hasusaan. Nunga taparsiajari songon dia asa marlas ni roha jala songon dia asa boi mangolu hombar tu lomo ni roha ni Debata. Alai, songon dia do naposo ni Debata mamangke pangantusion on? Alusna adong di surirang na asing.​—Ida Lampiran 21 dohot 25.

14. Sahat tudia do Harajaon ni Debata dibaritahon jala ise na mamaritahon?

14 Ulaon marbarita na uli di liat portibi on. Taringot tu ari parpudi, Jesus mandok, ”Laos baritahononhon do barita na uli on taringot tu Harajaon i di liat portibi on.” (Mateus 24:3, 14) Saonari, nunga dibaritahon taringot Harajaon ni Debata di lobi sian 230 negara dohot di lobi sian 700 bahasa. Sitindangi  Ni Jahowa ”sian nasa bangso, marga dohot houm” di liat portibi on, rade mangurupi godang halak asa marpangkirimon tu Harajaon ni Debata. (Pangungkapon 7:9) Ndang ala digaji nasida mangulahon i. Songon surirang ni Jesus, godang halak na marsogo ni roha tu nasida, alai tongtong do nasida ringgas marbarita na uli.​—Lukas 21:17.

AHA DO NA LAHO ULAHONONTA?

15. (a) Tutu do hita naung mangolu di ari parpudi jala boasa boi tadok songon i? (b) Aha do na laho hilalaon ni halak na mangoloi dohot na so mangoloi Jahowa?

15 Porsea do hamu naung mangolu hita di ari parpudi? Godang surirang ni Bibel taringot ari parpudi nunga digohi. Ndang sadia lelengnai, pasoon ni Jahowa ma ulaon marbarita na uli, dung i ro ma ”ujungna”. (Mateus 24:14) Aha do na laho dipaujung? Hajahaton laho paujungon ni Debata di Armagedon. Suruon ni Jahowa ma Jesus dohot angka surusuruan mangaripashon sude halak na so mangoloi Ibana dohot AnakNa. (2 Tessalonik 1:6-9) Dung i, ndang liluhonon ni Sibolis dohot surusuruanna be angka jolma. Alai, halak na manjangkon Harajaon ni Debata boi mangkilala bagabaga ni Debata.​—Pangungkapon 20:1-3; 21:3-5.

16. Ala nunga lam jonok ”ujungna”, aha do na ringkot ulahononta?

16 Portibi na nirajaan ni Sibolis laho paujungonNa satongkinnari. Alani i, tasungkun ma dirinta, aha do na ingkon huulahon? Lomo roha ni Jahowa hita marsiajar Bibel jala mangulahon songon na taparsiajari. (Johannes 17:3) Adong do dipatupa Sitindangi Ni Jahowa parpunguan laho marsiajar Bibel. Boi do ro hamu tu parpunguan i ganup minggu. (Jaha Heber 10:24, 25.)  Ulahon ma na pinarsiajaranmu jala bahen ma hamubaon. Molo diulahon hamu i, boi ma lam togu paralealeonmuna tu Jahowa.​—Jakobus 4:8.

17. Boasa songgot roha ni godang halak tingki halak parjahat diripashon?

17 Apostel Paulus paboahon, sian na so panagaman ni godang halak, ”songon panangko borngin”, songon i ma parjahat i diripashon. (1 Tessalonik 5:2) Jesus muse paboahon, godang halak na so mangalehon rohana tu tanda ni ari parpudi i. Didok ibana, ”Alai songon uju di ngolu si Noak i, songon i do sogot haroro ni Anak ni jolma i! Ai tagan so ro aek na sumar i, marmangani nasida jala minumminum, mangoli dohot pabolihonsa, paima dapot ari habobongot ni si Noak tu bagasan parau i. Laos so mamoto nasida paima ro aek na sumar i mangaupi nasida saluhutna. Suman tusi do sogot haroro ni anak ni jolma i.”​—Mateus 24:37-39.

18. Aha do na dipodahon Jesus tu hita?

18 Jesus mamodai hita asa unang lalap ”binahen ni angka pesta na marmabukmabuk, manang lalap mamingkiri holan na porlu siganup ari”. Didok ibana tompu do ro ajal i, ”songon jorat”. Didok ibana muse, ”Ingkon ro do i tu ganup jolma, manang di dia pe di portibi on. Jaga ma hamu jala tongtong ma hamu martangiang, asa margogo hamu mangadopi sude angka na naeng masa i, jala asa tahan hamu mangadopi Anak ni Jolma i.” (Lukas 21:34-36, Bibel siganup ari) Boasa ringkot manangihon hata ni Jesus on? Alana ndang sadia lelengnai, laho paujungonna portibi na nirajaan ni Sibolis. Alai, malua do na marsihohot tu Jahowa dohot tu Jesus jala mangolu salelenglelengna di tano on.​—Johannes 3:16; 2 Petrus 3:13.

^ par. 4 Mikhael, i ma goar na asing tu Jesus Kristus. Tu hatoranganna muse, ida Lampiran 23.