1. Sude do ugamo denggan?

Adong do angka halak na tobok roha di sude ugamo. Diparateatehon Debata do halak sisongon i jala sai disarihon do nasida. On pe barita na uli do. Alai asing sian i, godang do hajahaton diula mangasahon goar ni ugamo. (2 Korint 4:3, 4; 11:13-15) Tarbege barita, adong ugamo na parsidohot tu terorisme, pamunuon massal, porang, manggosa dakdanak. Tontu sude angka on mambahen hansit situtu roha ni angka halak na porsea tu Debata!​—Jaha Mateus 24:3-5, 11, 12.

Ugamo na sintong pasangaphon Debata. Alai, ugamo na so sintong mambahen ndang lomo rohaNa. Ugamo na so sintong mangajarhon angka na so adong di Bibel, dohot ajaran na so tutu taringot tu Debata dohot halak na mate. Alai, lomo do roha ni Debata nasa jolma mananda hasintongan taringot tu Ibana.​—Jaha Hesekiel 18:4; 1 Timoteus 2:3-5.

2. Aha ma na laho masa tu ugamo?

Tuani ma, ala Debata ndang boi digabusi Ugamo na mangakku na manghaholongi Ibana alai sasintongna manghaholongi portibi na jahat on. (Jakobus 4:4) Hata ni Debata mandokhon sude ugamo na so sintong songon Babel na Balga. Najolo Babel on i ma sada huta inganan haroroan ni ugamo na so sintong dunghon Aek Na Sumar tingki ni si Noak. Ndang sadia leleng nai, ripashonon ni Debata ma ugamo na mangaliluhon jala manusai jolma manisia.​—Jaha Pangungkapon 17:1, 2, 5, 16, 17; 18:8.

Alai adong dope barita na uli na asing muse. Jahowa ndang lupa tu halak na tobok roha na marserak di sude ugamo na so sintong di sandok portibi on. TogihononNa do nasida ruar sian ugamo na so sintong marhite ajaran hasintongan.​—Jaha Mika 4:2, 5.

 3. Aha do na ingkon siulahonon ni angka halak na tobok roha?

Ugamo na sintong pasadahon jolma

Disarihon Jahowa do halak na manghaholongi na denggan dohot na sintong. Diparentahon Ibana do nasida asa ditadingkon ugamo na so sintong. Angka halak na manghaholongi Debata olo do marhamubaon laho pasonanghon Debata.​—Jaha Pangungkapon 18:4.

Di abad parjolo, tingki halak na tobok roha manangihon barita na uli sian angka apostel, nasida marlas ni roha. Marsiajar ma nasida tu dalan hangoluan na imbaru sian Jahowa. On ma dalan ngolu silas ni roha, na mangalehon dalan dohot panghirimon. Nasida gabe sitiruonta saonari alana dijalo barita na uli jala dipatujolohon Jahowa di ngolu nasida.​—Jaha 1 Tessalonik 1:8, 9; 2:13.

Janghonon ni Jahowa do halak na manadinghon ugamo na so sintong jala manogihon nasida marsaor tu punguan na manomba Ibana. Molo dijanghon hamu do joujou ni Jahowa, boi ma hita gabe alealena, gabe sada sian halak na dipapungu laho manomba Ibana, jala mandapot hangoluan salelenglelengna.​—Jaha Markus 10:29, 30; 2 Korint 6:17, 18.

4. Boasa sude halak di tano on ujungna marlas ni roha?

Panguhumon na laho ro tu ugamo na so sintong tontu barita na uli do i tu hita. Ugamo na so sintong ndang boi be paliluhon jala mamolamola jolma manisia. Sude jolma na mangolu di tano on marsaor ma laho manomba tu Debata na sintong i.​—Jaha Pangungkapon 18:20, 21; 21:3, 4.