Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Barita na Uli sian Debata!

 PARSIAJARAN 5

Aha do na Dihalomohon Debata tu Tano on?

Aha do na Dihalomohon Debata tu Tano on?

1. Aha do na tinuju ni Debata manompa tano on?

Dilehon Jahowa do tano on tu manisia. On ma jabunta. Si Adam dohot si Hawa jolma na parjolo, ndang ditompa Debata laho mangolu di surgo. Nunga ditompa Debata surusuruan na laho maringanan di surgo. (Job 38:4, 7) Dibahen Debata jolma na parjolo maringanan di Paradeiso inganan na sonang, digoari ma i porlak Eden. (1 Musa 2:15-17) Dilehon Jahowa do tu ibana dohot angka na laho pinomparna tingki, asa mangolu salelenglelengna di tano on.Jaha Psalmen 37:29; 115:16.

Di mulana, holan porlak Eden do na songon Paradeiso. Angka pinompar ni si Adam dohot si Hawa do na laho manggohi tano on. Tu joloan ni ari, na laho marhuaso ma nasida di liat portibi on, jala manjadihon i gabe Paradeiso. (1 Musa 1:28) Ndang na laho segaanna tano on alai na laho inganan ni jolma do salelenglelengna.Jaha Psalmen 104:5.

2. Boasa tano on ndang saut gabe Paradeiso?

Ala ndang dioloi si Adam dohot si Hawa Debata gabe dipabali Jahowa ma nasida sian porlak i. Paradeiso pe ujungna ndang adong be, jala ndang adong be jolma na boi paojakhonsa. Didok Bibel, ”Nunga dipasahat Ibana luat i tu tangan ni parjahat.”—Job 9:24.Jaha 1 Musa 3:23, 24.

Na gabe sundat do lomo ni roha ni Jahowa na parjolo tu jolma? Daong! Ai pargogo na so hatudosan do Ibana. Ndang hea sundat na dihalomohon ni rohaNa. (Jesaya 45:18) Songon di mulana i, pasautonNa do hombar tu na dihalomohon Ibana taringot angka jolma.Jaha Psalmen 37:11, 34.

3. Songon dia do Paradeiso on dijadihon muse?

Dung dimiahi Debata Jesus gabe Raja jadihononna do tano on gabe Paradeiso. Di porang na digoari Armagedon, Jesus manguluhon angka surusuruan ni Debata jala mangaripashon  sude na mangalo tu Debata. Dung i, ranteon ni Jesus ma Sibolis lelengna 1.000 taon. Alai na mangoloi Debata malua do sian ari pangaripason i ala ditogutogu Jesus jala diramoti nasida. Hilalaon nasida ma hangoluan na manontong di Paradeiso di tano on.Jaha Pangungkapon 20:1-3; 21:3, 4.

4. Andigan sitaonon on salpu?

Andigan salpuhonon ni Debata sitaonon sian tano on? Dipabotohon Jesus ma ”tanda” na patuduhon molo ari i nunga jonok. Salpu do angka jolma on molo portibi on torus songon na taida saonari. Alai sude na i, patuduhon molo hita nunga mangolu ”di ajal ni hasiangan on”.Jaha Mateus 24:3, 7-14, 21, 22.

Di tingki Jesus mamarenta sian surgo tu tano on lelengna 1.000 taon laho pasidingonna do sude sitaonon. (Jesaya 9:6, 7; 11:9) Sesaon ni Jesus ma sude dosa ni angka na manghaholongi Debata. Alani i, marhite Jesus, pasidingon ni Debata ma sahit, matua, jala hamatean.Jaha Jesaya 25:8; 33:24.

5. Ise do na mangingani Paradeiso on sogot?

Di bagas parpunguan ni Sitindangi Ni Jahowa pajumpang ma hita dohot angka halak na manghaholongi jala na olo marsiajar songon dia pasonanghon Ibana

Laho mangolu di Paradeiso do angka na mangoloi Debata. (1 Johannes 2:17) Disuru Jesus do angka siseanna laho mangalului angka jolma parlambok roha jala mangajari nasida asa dihalomohon Debata. Saonari on, nunga diparade Jahowa marjuta halak na laho mangolu di Paradeiso di tano on sogot. (Sepania 2:3) Di bagas parpunguan Sitindang Ni Jahowa, angka jolma boi marsiajar gabe tungganidoli huhut ama na burju dohot gabe tungganiboru huhut ina na burju. Ianakhon dohot natorasna rap manomba jala marsiajar mangulahon parbinotoan na sian Bibel asa lam denggan hangoluan nasida.Jaha Mika 4:1-4.