Molo adong aleale na dihaholongi jala diparsangapi hamu, naeng ma songon ibana hamu. ”Pardenggan basa jala na bonar do Jahowa.” (Psalmen 25:8) Asa gabe aleale ni Debata, ingkon pardenggan basa jala na bonar do hita. Bibel mandok: ”Sitiru Debata ma hamu, songon angka halak na hinaholongan, jala parangehon hamu ma haholongan i.” (Epesus 5:1, 2) On ma pigapiga na ingkon taulahon:

Mangurupi angka dongan. ”Taulahon ma na denggan di saluhut halak.”—Galatia 6:10.

Padot karejo. ”Naung manangko i, unang be manangko; mulaulaon ma ibana, tanganna i ma sumarihon ngoluna.”—Epesus 4:28.

Pamatang dohot parange na ias. ”Tapaias ma dirinta sian nasa na tau pahodarhon daging dohot tondi, laho patulushon habadiaon mardongan biar mida Debata.”—2 Korint 7:1.

 Masihaholongan dohot masipasangapan di na saripe. ”Alai sandok ganup hamu masihaholongi pardihutana be songon dirina; alai dihabiari parompuan i ma baoana. Hamu angka anak oloi hamu ma angka natuatuamuna.”—Epesus 5:33-6:1.

Patuduhon holong tu angka na asing. ”Masihaholongan ma hita, ai sian Debata do haholongon i.”—1 Johannes 4:7.

Unduk tu uhum ni pamarenta. ”Ganup halak ingkon oloanna do pamarenta . . . garar ma tu sude halak na ingkon gararonmu, garar ma pajak ni dirim dohot artam.”—Rom 13:1, 7, Bibel Siganup Ari.