Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 1

Debata Manggokhon Hamu Gabe AlealeNa

Debata Manggokhon Hamu Gabe AlealeNa

Dihalomohon Debata do hamu asa gabe alealeNa. Hea do tarpingkir hamu gabe aleale ni sada Hadirion na tumimbul di hasiangan on? Si Abraham, na ujui digoari do ibana aleale ni Debata. (Jakobus 2:23) Angka halak na asing pe na disurat di Bibel manghilala paralealeon tu Debata jala dipasupasu do nasida. Saonari pe, torop do halak di liat portibi on nunga gabe aleale ni Debata. Hamu pe boi do gabe aleale ni Debata.

Maraleale tu Debata dumengganan do sian maraleale tu jolma. Ndang hea Debata pajuthon roha ni angka aleale na marsihohot tu Ibana. (Psalmen 18:26) Gabe aleale ni Debata dumengganan do sian mararta hamoraon. Di tingki mate halak na mora, gabe di halak na asing do hepengna. Alai, angka halak naung manghilala parealealean tu Debata dapotan arta na so boi ditangko manang ise pe.—Mateus 6:19.

Pigapiga halak ra mangorai hamu marsiajar taringot tu Debata. Ra, na mangorai hamu angka dongan manang sian bagas jabu mu sandiri. (Mateus 10:36, 37) Molo adong na mangerehei manang na mangondam hamu, sungkun ma dirimu, ‘roha ni ise do naeng hu pasonang—jolma manang Debata?’ Rimangi ma on: Molo adong na mangorai hamu asa unang be mangan, oloan muna do i? Daong! Ingkon mangan do asa mangolu. Alai, Debata boi do mambahen hamu mangolu salelenglelengna! Alani i, unang ma pasombu hamu manang ise pe lao pasohon parsiajaran na mambahen hamu gabe aleale ni Debata.—Johannes 17:3.