Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 2

Si Rebekka Palashon Roha ni Jahowa

Si Rebekka Palashon Roha ni Jahowa

Si Rebekka, sahalak borua na mangkaholongi Jahowa. Si Isak ma tunggani dolina. Si Isak pe mangkaholongi Jahowa. Songon dia do si Rebekka boi pajumpang dohot si Isak? Aha do tandana molo si Rebekka palashon roha ni Jahowa? Taida ma songon dia masa on.

Anak ni si Abraham dohot si Sarah do si Isak on. Nasida rap tading dohot na so manomba Jahowa di Kanaan. I do alana, ndang lomo roha ni si Abraham molo si Isak mangoli tu borua na so manomba Jahowa. Jadi, disuru ma naposona laho tu jabu ni tondongna di Haran, mangalului borua na naeng gabe tunggani boru ni si Isak. Si Elieser ma na disuru si Abraham.

Las do roha ni si Rebekka mambuat aek asa adong inumon ni angka unto i

Borhat ma si Elieser dohot angka naposo ni si Abraham. Mansai dao do pardalanan ni nasida. Diboan nasida do sampulu unto mamboan sipanganon dohot silehonlehon. Alai, songon dia do si Elieser boi pajumpang dohot borua na pas tu si Isak? Maradi ma nasida di sumur na adong di Haran. Diboto si Elieser do angka jolma somal mambuat aek sian i. Martangiang ma si Elieser tu Jahowa, didok ma: Molo hupangido annon aek tu sada borua na adong dison, jala olo ibana mangalehon aek i tu ahu dohot tu untoku, huboto ma ibana do na pinillitMu.

Ndang sadia leleng, ro ma si Rebekka tu sumur i. Bibel mandok, mansai uli do si  Rebekka on. Dipangido si Elieser ma aek tu ibana, dialusi si Rebekka ma: Olo. Hubuat pe di hamu, jala hulehon pe minum untomuna on. Boi do dapot roham! Somalna, angka unto na mauas ingkon godang do minum. Marulakulak do si Rebekka mambuat aek i. Ida ma di gombar on, ringgas do si Rebekka?​— Las situtu ma roha ni si Elieser ala dialusi Jahowa tangiangna.

Dilehon si Elieser ma angka silehonlehon tu si Rebekka. Ditogihon si Rebekka ma nasida asa ro tu jabuna. Dipatorang si Elieser ma boasa nasida ro tu Haran jala didok ibana ma, molo si Rebekka na pinillit ni Jahowa gabe tunggani boru ni si Isak. Marlas ni roha situtu do keluarga ni si Rebekka jala diloas ma ibana diboan asa gabe tunggani boru ni si Isak.

Olo do si Rebekka laho tu Kanaan raphon si Elieser jala marhamulian tu si Isak

Songon dia do pandapotmu, olo do si Rebekka muli tu si Isak?​— Diboto si Rebekka do na Jahowa mangurupi si Elieser. Jadi, disungkun ma si Rebekka na olo manang na ndang ibana dohot tu Kanaan jala muli tu si Isak. Dialusi ibana ma: Olo, dohot pe ahu. Dung i, borhat ma ibana rap dohot si Elieser. Dung sahat nasida di Kanaan, marhamulian ma ibana tu si Isak.

Ala diulahon si Rebekka lomo ni roha ni Jahowa, dipasupasu Jahowa ma ibana. Dung marribu taon, tubu ma Jesus sian pinompar ni si Rebekka! Molo tatiru si Rebekka, palashon roha ni Jahowa, tadapot ma pasupasu.

JAHA MA DI BIBELMU

  • 1 Musa 12:4, 5; 24:1-58, 67