Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 3

Si Rahab Marhaposan tu Jahowa

Si Rahab Marhaposan tu Jahowa

Tarimangi ma molo hita saonari di kota Jeriko. Kota on adong di Kanaan, inganan ni jolma na so manomba Jahowa. Sada borua na margoar si Rahab maringanan di kota on.

Tingki dakdanak dope si Rahab, jotjot do dibege ibana songon dia si Musa manguluhon halak Israel ruar sian tano Misir, jala boi do dibolus nasida Laut na Rara. Dibege ibana do molo bangso Israel ndang hea talu marporang, alana sai diurupi Jahowa do nasida. Jala, dibege ibana do molo halak Israel maringanan di bagas undungundung jonok ni Jeriko!

Ditabunihon si Rahab do matamata i ala porsea ibana tu Jahowa

Dung bot ari, ro ma dua matamata sian Israel tu Jeriko. Masuk ma nasida tu jabu ni si Rahab. Jala disuru si Rahab do nasida marborngin di jabuna. Hape, dibege raja Jeriko ma adong matamata sian Israel na ro tu kota i, jala diboto do molo nasida masuk tu jabu ni si Rahab. Disuru raja i ma naposona laho manangkup nasida. Alai, ditabunihon si Rahab do matamata i di tarup [atap] ni jabuna jala didok ma tu naposo ni raja i: Sian on do nasida nangkaning, alai nunga laho be nasida sian kota on. Lojong hamu ma, boi dope dapotmuna nasida! Molo pandapotmu, boasa ditabunihon si Rahab matamata i?​— Alana, porsea do ibana tu Jahowa jala diboto ibana do molo tano Kanaan lehonon ni Jahowa tu halak Israel.

Andorang so laho dope matamata i sian jabu ni si Rahab, marjanji ma nasida molo diripashon kota Jeriko, paluaonna ma si Rahab dohot keluargana. Alai, adong do pangidoan ni matamata i tu si Rahab. Diboto hamu do aha i?​— Didok nasida ma: Bahen ma tali na rara on gantung di jandelam. Molo diulahon ho songon i, malua ma ho dohot sude na adong di bagasan jabumon. Diulahon si Rahab ma pangidoan ni matamata i. Dung i, diboto hamu do aha na masa?​—

Dipalua Jahowa do si Rahab dohot keluargana

Ro ma halak Israel mangkaliangi kota Jeriko. Nasida mangkaliangi kota i sahali sadari, saleleng onom ari. Alai, di ari na papituhon, pitu hali ma nasida mangkaliangi kota i. Dung i, marsurak ma nasida. Marumpak ma dibahen Jahowa tembok na adong di kota i. Alai, ndang rumpak jabu ni si Rahab! Ala dibahen ibana do sada tanda, i ma tali na rara. Boi do diida hamu di gombar on?​— Tutu do, dipalua Jahowa do si Rahab dohot keluargana!

 Aha do na taparsiajari sian si Rahab?​— Porsea do si Rahab tu Jahowa ala nunga diparsiajari ibana sude halongangan na binahen ni Jahowa. Jala hamu pe, nunga diparsiajari hamu taringot halongangan na binahen ni Jahowa. Songon si Rahab, porsea do hamu tu Jahowa?​— Mansai denggan do i!

JAHA MA DI BIBELMU