Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Ajar ma Ianakhonmuna

 PARSIAJARAN 11

Nasida Manurat taringot Ngolu ni Jesus

Nasida Manurat taringot Ngolu ni Jesus

Ise do na di gombar on?​— Nasida si Mateus, si Markus, si Lukas, si Johannes, si Petrus, si Jakobus, si Judas, dohot si Paulus. Nasida mangolu tingki Jesus di tano on jala nasida manurat taringot ngolu ni Jesus. Taparsiajari ma taringot nasida.

Aha do na taparsiajari sian nasida?

Tolu sian nasida hea marbarita na uli raphon Jesus. Ise do nasida?​— Si Mateus, si Johannes, dohot si Petrus. Solhot do paralealeon ni apostel Mateus dohot apostel  Johannes tu Jesus, jala disurat nasida do taringot hangoluan ni Jesus. Disurat apostel Johannes do buku Pangungkapon dohot tolu surat na digoari Sada sampe Tolu Johannes. Apostel Petrus manurat surat na asing di Bibel, i ma Sada dohot Dua Petrus. Di surat na paduahon i, disurat si Petrus do molo Jahowa hea mangkatai taringot Jesus sian surgo, ”On do Anakku, haholongan ni rohangku.”

Asing ni nasida, adong do muse na manurat taringot ngolu ni Jesus. Songon si Markus. Ra, diida ibana do Jesus tartangkup tingki i. Na asing, i ma si Lukas. Dokter do ibana. Ra, ibana gabe halak Kristen dung mate Jesus.

Dua panurat na asing, anggi ni Jesus. Ise do nasida?​— Si Jakobus dohot si Judas. Mulana, ndang porsea nasida. Didok nasida do na rintik Jesus. Alai, ujungna porsea ma nasida tu Jesus jala gabe halak Kristen.

Panurat na asing, i ma si Paulus. Andorang so halak Kristen ibana, goarna si Saulus. Mulana, jahat jala sogo do rohana mangida halak Kristen. Alai, diboto hamu do boasa gabe halak Kristen si Paulus?​— Tingki di pardalanan si Paulus tu Damaskus, tompu ma dibege ibana soara sian surgo. Soara ni Jesus do i! Disungkun Jesus ma si Paulus: Boasa jahat ho tu siseanku? Dung i, muba ma pangalahona jala gabe halak Kristen. Si Paulus manurat 14 buku di Bibel mulai buku Rom sahat tu buku Heber.

Manjaha Bibel do hita ganup ari, kan?​— Molo tajaha Bibel ganup ari, godang ma parbinotoanta taringot Jesus. Lomo do rohamu marsiajar taringot Jesus?​—

JAHA MA DI BIBELMU

  • 2 Petrus 1:16-18

  • Markus 3:21; 14:51

  • Judas 1

  • Ulaon ni Apostel 9:1-18