Si Timoteus sahalak na poso, las rohana mangurupi halak na asing. Laho do ibana tu inganan na asing mangurupi angka jolma. I do na mambahen si Timoteus marlas ni roha. Lomo do roham mamboto taringot si Timoteus?​—

Diajari ompungna dohot omakna do si Timoteus taringot Jahowa

Di Listra do si Timoteus maringanan. Sian dakdanak, nunga diajari ompungna ibana, i ma si Lois dohot omakna, i ma si Eunike taringot Jahowa. Alani i, lomo do rohana mangurupi na asing asa mananda Jahowa.

Dung dolidoli, ditogihon si Paulus ma ibana marbarita tu inganan na asing. Dioloi si Timoteus do hata ni si Paulus. Laho ma ibana mangurupi halak na asing.

 Laho ma si Paulus dohot si Timoteus tu Tessalonik di Makedonia. Mardalan pat jala markapal do nasida tusi. Diurupi nasida ma godang halak marsiajar taringot Jahowa di luat i. Alai pigapiga halak muruk jala mangalele nasida. Alani i, marbarita ma si Timoteus dohot si Paulus tu inganan na asing.

Marlas ni roha do si Timoteus di parngoluonna

Dungkon i, disuru si Paulus ma si Timoteus laho muse tu Tessalonik mangida angka dongan sahaporseaon disi. Nang pe godang na marsogo ni roha, barani do si Timoteus mulak tu Tessalonik laho patoguhon huria i! Diboan ibana do barita na denggan tu si Paulus. Ibana mandok, togu do haporseaon ni huria di Tessalonik!

Leleng do si Timoteus rap marbarita dohot si Paulus. Disurat si Paulus do molo si Timoteus denggan mangurupi huria. Boasa? Ala holong do roha ni si Timoteus tu Jahowa dohot tu dongan sahaporseaonna.

Dihaholongi hamu do angka jolma, jala lomo do roham mangurupi nasida marsiajar taringot Jahowa?​—Molo diulahon hamu i, marlas ni roha ma hamu songon si Timoteus!