Ulaon ni Apostel 7:1-60

  • Si Stepanus marjamita di jolo ni Sanhedrin (1-53)

    • Jaman ni ompu ni halak Israel (2-16)

    • Si Musa manguluhon halak Israel; halak Israel manomba gana-ganaan (17-43)

    • Ndang tading di bagas joro na binahen ni jolma Debata (44-50)

  • Si Stepanus didangguri (54-60)

7  Alai disungkun sintua ni malim ma, “Ate, tutu do i sude?”  Dialusi si Stepanus ma, “Hamu angka haha anggi dohot angka damang, tangihon hamu ma, dipataridahon Debata na marsangap i do dirina tu ompunta si Abraham, tingki di Mesopotamia ibana andorang so maringanan dope di Haran.  Jala didok Debata ma tu ibana, ‘Tadingkon ma huta dohot keluargam jala laho ma ho tu luat sipatuduhononku tu ho.’  Dung i, laho ma ibana sian luat ni halak Kasdim jala maringanan di Haran. Dung mate bapakna, disuru Debata ma asa pinda ibana sian luat i tu ingananmuna saonari.  Nang pe songon i, ndang adong dilehon Debata tu ibana tano parbagiananna disi, nanggo sajongkal pe ndang adong dilehon. Alai dijanjihon Debata do na laho lehononna luat i gabe ampunana dohot ampuna ni pinomparna, nang pe ndang adong dope anakhonna tingki i.  Asing ni i, didok Debata do tu ibana, gabe panompang ma angka pinomparna di huta ni halak, diparhatoban halak ma nasida jala dibahen ma na hansit tu nasida saleleng 400 taon.  Alai ninna Debata ma, ‘Uhumonku ma bangso na mamparhatoban nasida, dung pe i asa kaluar nasida sian i laho marhobas tu ahu di inganan on.’  “Dibahen Debata ma parjanjian parsunaton dohot ibana. Dung adong anakna i ma si Isak, disunat ma anakna i di ari paualuhon. Jala si Isak ma ama ni si Jakkob,* laos si Jakkob ma ama ni angka ompunta na 12 i.  Mangiburu do angka ompunta i tu si Josep jala digadis ma ibana tu Mesir. Alai didongani Debata do ibana, 10  jala dipalua do ibana sian sude hasusaanna. Dibahen Debata do ibana asa dihalomohon jala marbisuk di jolo ni Firaun, raja ni Mesir. Dung i dipillit Firaun do ibana mamarenta Mesir dohot nasa istanana. 11  Alai masa ma haraparon di saluhut Mesir dohot Kanaan na parohon hasusaan bolon, jala ndang adong be dapot ni angka ompunta i sipanganon. 12  Alai dibege si Jakkob ma na adong sipanganon* di Mesir, gabe disuru ma angka ompunta i tusi parjolo sahali. 13  Tingki laho muse nasida paduahalihon, dipatandahon si Josep ma dirina tu haha anggina. Gabe ditanda Firaun ma keluarga ni si Josep. 14  Dung i ditonahon si Josep ma asa ro amana rap dohot saluhut keluargana, 75 halak ma sude. 15  Alani i borhat ma si Jakkob tu Mesir laos disi ma ibana mate, songon i nang angka ompunta. 16  Dung i, ditaruhon ma nasida tu Sikem jala dipeakkon tu kuburan naung tinuhor ni si Abraham sian angka anak ni si Hemor marhite hepeng perak. 17  “Dung lam jonok tingkina naeng pasauton ni Debata janji na pinaboana tu si Abraham, nunga lam martamba jala nunga lam godang bangso i di Mesir. 18  Dung i, jongjong ma raja na asing mamarenta Mesir na so mananda si Josep. 19  Angkal do raja on maradophon bangsonta jala jahat do pambahenanna tu angka ompunta. Dipaksa do nasida mambolongkon poso-poso ni nasida asa mate angka poso-poso i. 20  Di tingki i ma tubu si Musa, jala mansai uli do ibana.* Tolu bulan ma ibana diparorot di jabu ni amangna. 21  Alai tingki dibolongkon ibana, dibuat boru ni Firaun ma ibana jala dipagodang-godang songon anakna sandiri. 22  Diajarhon do tu si Musa sude habisuhon ni Mesir, jala malo do ibana di pangkataion dohot di ulaon. 23  “Dung marumur 40 taon ibana, ro ma tu rohana* laho manjumpangi* angka haha anggina, halak Israel. 24  Tingki diida ibana adong halak Mesir mambahen na jahat tu halak Israel, diurupi ibana ma dongan sabangsona i, dibalos ibana ma i jala dipamate ma halak Mesir i. 25  Dirimpu si Musa do diantusi dongan sabangsona i paluaon ni Debata nasida marhite ibana, alai ndang mangantusi nasida disi. 26  Marsogotna i diida ibana ma marbadai halak Israel. Laho padamehon nasida, ninna si Musa ma, ‘Hamu angka dongan, na marhaha maranggi do hamu. Boasa marbadai hamu?’ 27  Alai dionjarhon na mamungkul donganna i ma si Musa, ninna ma, ‘Ise mamillit ho gabe pamimpin jala panguhum di hami? 28  Naeng pamateonmu do ahu songon halak Mesir na pinamatemi nantoari?’ 29  Dung dibege si Musa i, lari ma ibana jala gabe panompang di luat Midian, dung i tubu ma dua anakna disi. 30  “Dung salpu 40 taon, didapothon suru-suruan ma ibana di padang pasir jonok ni Dolok Sinai, di bagasan api na marsigorgor di ramba na marsuga. 31  Longang ma roha ni si Musa mangida i. Alai tingki dijonoki ibana laho patangkashon, tarbege ma soara ni Jahowa, 32  ‘Ahu do Debata ni angka ompumu, Debata ni si Abraham, si Isak, dohot si Jakkob.’ Gabe hitir-hitir ma si Musa jala ndang barani be ibana mangida dompak ramba i. 33  Ninna Jahowa ma tu ibana, ‘Bungka ma sipatumi, ai tano na badia do na nidegemi. 34  Nunga huida songon dia hansitna ditaon bangsoku di Mesir, nunga hubege orong-orong ni nasida, jala na ro do ahu laho paluahon nasida. Ro ma ho, suruonku ma ho tu Mesir.’ 35  Si Musa on ma na so dijalo halak Israel tingki didok tu ibana, ‘Ise mamillit ho gabe pamimpin jala panguhum di hami?’ Ibana ma na sinuru ni Debata gabe pamimpin jala sipalua marhite suru-suruan na ro mandapothon ibana di bagasan ramba na marsuga. 36  Ibana ma na mamboan nasida kaluar sian Mesir, na mambahen angka tanda halongangan* di Mesir, di Laut Rara, dohot di padang pasir saleleng 40 taon. 37  “Laos si Musa do na mandok tu halak Israel, ‘Paheheon ni Debata ma di hamu sahalak panurirang na songon ahu sian tonga-tongamuna.’ 38  Di tonga-tonga ni halak Israel do ibana di padang pasir. Ibana do na mangkatai tu suru-suruan di Dolok Sinai dohot tu angka ompunta. Jala ibana do na manjalo barita hangoluan sian Debata na nilehonna tu hita. 39  Alai ndang dioloi angka ompunta ibana. Gariada ditulak nasida do ibana, ai dihalomohon roha nasida do naeng mulak tu Mesir. 40  Didok nasida do tu si Aron, ‘Bahen ma di hita debata laho manogu-nogu hita. Ai ndang taboto aha na masa tu si Musa na mamimpin hita kaluar sian tano Mesir.’ 41  Dibahen nasida ma patung ni anak ni lombu di ari i jala dipelehon nasida ma pelean tu patung i. Marpesta ma nasida mangarayahon na binahen ni nasida i. 42  Alani i ditinggalhon Debata ma nasida jala dipasombu ma nasida marsomba tu mata ni ari, bulan, dohot, tu angka bintang di langit, songon na tarsurat di Buku ni Angka Panurirang, ‘O Pinompar ni Israel, diboto hamu do ndang tu ahu hamu marsomba jala ndang tu ahu hamu mangalehon pelean saleleng 40 taon di padang pasir. 43  Alai diboan hamu do kemah ni Molok dohot bintang ni debata Repan. Angka i ma patung na binahenmu laho sombaonmu. Alani i, bolongkononku ma hamu tu inganan na umdao sian Babel.’ 44  “Adong do kemah ni angka ompunta di padang pasir i, na patuduhon di tonga-tonga ni nasida do Debata. Dibahen do kemah i songon parenta ni Debata tu si Musa jala mangihuthon tiruan na niida ni si Musa. 45  Dijalo angka ompunta do i gabe ampuna ni nasida. Diboan do i tingki masuk nasida rap dohot si Josua tu tano ni angka bangso na pinalao ni Debata di jolo ni angka ompunta. Tongtong dope i disi sahat tu tingki ni si Daud. 46  Lomo do roha ni Debata tu si Daud jala dipangido ibana do asa dilehon hasangapon tu ibana pajongjongkon bagas ni Debata ni si Jakkob. 47  Alai si Salomo do na pajongjongkon bagas i di Debata. 48  Nang pe songon i, ndang tading di inganan na binahen ni jolma Natumimbul i, songon na nidok ni sahalak panurirang, 49  ‘Surgo do habangsaku jala tano on ma sidege-degean ni pathu. Bagas na songon dia ma na laho bahenonmuna di ahu? Ninna Jahowa. Manang didia ma inganan paradiananku? 50  Nda tanganku do na mambahen saluhutna i?’ 51  “Hamu angka sijogal rungkung jala naung tartutup roha dohot pinggolna,* sai dialo hamu do tondi parbadia songon angka ompumuna i. 52  Ise ma panurirang na so manaon angka na hansit dibahen angka ompumuna? Dipamate nasida do angka na paboahon haroro ni halak na mangulahon lomo ni roha ni Debata. Ibana ma na dijehehon jala na pinamatemuna. 53  Hamu do angka na manjalo Patik na pinasahat marhite angka suru-suruan, alai ndang diulahon hamu i.” 54  Dung dibege nasida sudena i, sogo situtu ma roha ni nasida* jala muruk situtu* dompak ibana. 55  Alai ditatap si Stepanus na gok tondi parbadia i ma dompak langit, diida ibana ma hasangapon ni Debata jala diida ma jongjong Jesus di siamun ni Debata. 56  Jadi ninna ibana ma, “Huida do bungka langit i jala jongjong do Anak ni jolma i di siamun ni Debata.” 57  Mambege i gogo ma nasida marsurak, ditutup be ma pinggolna, jala sude ma nasida mangaroro si Stepanus. 58  Dung diboan nasida ibana tu luar ni kota, didangguri ma ibana dohot batu. Dipampeakkon angka saksi na so tutu i do pangkean luar ni nasida tu jolo ni sahalak baoa na poso, na margoar si Saulus. 59  Tingki didangguri nasida si Stepanus dohot batu, didok ibana ma, “Tuan Jesus, tu ho ma hupasahat hosangkon.” 60  Dung i marsinggang ma ibana, gogo ma dijouhon, “Ale Jahowa, unang ma uhum nasida alani dosa on.” Dungkon didok ibana i, mate ma ibana.*

Surat na di toru

Manang boi do “Jala songon i do muse dibahen si Isak tu si Jakkob”.
Manang “gandum”.
Manang “uli di adopan ni Debata”.
Manang “dipaputus ma di rohana”.
Manang “mamareso”.
Manang “mukjizat”.
Manang “na so tarsunat roha dohot pinggolna”.
Manang “hansit situtu ma roha nasida”.
Manang “patungoripon”.
Manang “modom ma ibana di hamatean”.