Ulaon ni Apostel 25:1-27

  • Si Paulus diadili di jolo ni si Festus (1-12)

    • “Naik banding ma ahu tu Kesar!” (11)

  • Dipaboa si Festus parsoalan i tu Raja Agrippa (13-22)

  • Si Paulus di jolo ni si Agrippa (23-27)

25  Tolu ari dung mamarenta si Festus di provinsi i, borhat ma ibana sian Kaesarea tu Jerusalem.  Dung i ro ma malim kepala* dohot angka halak Jahudi na sangap paboahon hatorangan laho mangalo si Paulus. Dielek-elek nasida ma si Festus  asa ditangihon pangidoan ni nasida paborhathon si Paulus mulak muse tu Jerusalem. Alai nunga marsangkap nasida laho manangkup jala mambunu si Paulus di tonga dalan.  Didok si Festus ma, ingkon tongtong do si Paulus di Kaesarea jala ndang sadia leleng nai mulak nama ibana tusi.  Didok ibana ma, “Suru hamu ma pamimpinmuna borhat rap dohot ahu tu Kaesarea, disi ma aluhon hamu ibana molo adong hasalaanna.”  Dung adong hira-hira ualu manang sampulu ari si Festus rap dohot nasida, mulak ma ibana tu Kaesarea. Marsogotna i hundul ma ibana di kursi paruhuman jala disuru ma asa diboan si Paulus tu jolona.  Dung masuk si Paulus, jongjong ma sude halak Jahudi na ro sian Jerusalem i mangkaliangi ibana. Godang ma dipandok nasida hasalaan ni si Paulus, alai ndang boi dipatudu nasida na tutu hata nasida i.  Alai didok si Paulus ma mangalusi, “Ndang adong na sala hubahen tu Patik ni halak Jahudi manang tu bagas joro manang tu Kesar.”  Ala naeng mambuat roha ni halak Jahudi, disungkun si Festus ma tu si Paulus, “Olo do ho laho tu Jerusalem, asa disi ho diadili di jolongku taringot tu parsoalan on?” 10  Alai dialusi si Paulus ma, “Di jolo ni kursi paruhuman ni Kesar do ahu nuaeng jongjong, antong dison ma ahu diadili. Ndang adong na sala hubahen tu halak Jahudi jala tangkas do i diboto damang. 11  Molo na tutu adong na sala huulahon na mambahen ahu patut diuhum mate, ndang pola pangidoonku asa dipalua ahu sian hamatean. Alai molo ndang tutu na nidok ni nasida i taringot tu ahu, ndang adong na marhak pasahathon ahu tu nasida. Naik banding ma ahu tu Kesar!” 12  Dung mangkatai si Festus dohot angka penasehatna, didok ibana ma, “Ala dipangido ho naik banding tu Kesar, borhat ma ho tu Kesar.” 13  Dung salpu manang na piga ari, sahat ma Raja Agrippa dohot si Bernike di Kaesarea laho manjumpangi si Festus. 14  Ala disi do nasida tading manang na piga ari, dipaboa si Festus ma parsoalan ni si Paulus tu Raja i, ninna ma, “Adong do dison sahalak tahanan ditadingkon si Feliks. 15  Tingki di Jerusalem ahu, ro do angka malim kepala* dohot angka pangituai ni halak Jahudi paboahon hatorangan taringot tu ibana. Dipangido nasida do asa diuhum ibana. 16  Alai hudok ma tu nasida, ndang somal di halak Rom pasahathon sasahalak tu na mangaluhon ibana andorang so pajumpang ibana tu na mangaluhon i, jala ingkon dipaloas do ibana mangalehon alusna. 17  Alani i, dung sahat nasida dison ndang pola hupaleleng-leleng be. Marsogotna i, hundul ma ahu di kursi paruhuman jala husuru ma asa diboan ibana. 18  Jongjong ma na mangaluhon i paboahon hatorangan laho mangalo ibana. Alai, ndang adong hape diulahon ibana hajahaton. 19  Parsalisian ni nasida holan alani agama ni nasida dohot alani sasahalak na margoar Jesus do. Hape nunga mate ibana, alai sai didok si Paulus do naung mangolu ibana muse. 20  Ala ndang huboto be songon dia sibahenonku, husungkun ma manang na olo do ibana laho tu Jerusalem asa disi ibana diadili taringot tu parsoalan on. 21  Ala dipangido si Paulus asa ditahan ibana sahat tu na adong putusan sian Kesar, husuru ma ibana ditahan paima hupaborhat ibana tu Kesar.” 22  Dung i didok si Agrippa ma tu si Festus, “Lomo do rohangku naeng mambege na nidok ni baoa i.” Didok si Festus ma, “Marsogot boi ma begeonmu ibana.” 23  Marsogotna i, ro ma si Agrippa dohot si Bernike, dipatudu-tudu nasida do hasangaponna. Masuk ma nasida tu pengadilan i rap dohot angka komandan ni tentara, songon i nang angka halak na sangap di kota i. Dung i diparentahon si Festus ma asa diboan si Paulus. 24  Didok si Festus ma, “Ale Raja Agrippa dohot sude na pungu dison. Ida hamu ma, sude do halak Jahudi na di Jerusalem dohot na dison mangaluhon baoa on tu ahu. Jala marsurak do nasida mandok ingkon mate do ibana. 25  Alai na huboto, ndang adong diulahon ibana hajahaton na mambahen ibana patut diuhum mate. Tingki dipangido ibana asa naik banding tu Kesar, huputushon ma asa boanon ibana tu Kesar. 26  Alai ndang adong dope hatorangan taringot tu ibana na boi husurat tu Kesar.* Alani i do huboan ibana tu jolomuna, tarlumobi tu jolom, ale Raja Agrippa. Asa dung sae ibana dipareso di pengadilan on, adong ma na boi surathononku tu Kesar taringot tu ibana. 27  Ala huhilala, ndang patut paborhaton sahalak tahanan molo so pinaboa hasalaanna.”

Surat na di toru

Ida di Kamus.
Ida di Kamus.
As. “tu Tuan i”.