Ulaon ni Apostel 22:1-30

  • Alus ni si Paulus di jolo ni natorop (1-21)

  • Dipaboa si Paulus na warga negara Rom ibana (22-29)

  • Marpungu anggota ni Sanhedrin (30)

22  “Hamu angka haha anggi dohot hamu angka ama, tangihon hamu ma jolo hatorangankon.”  Dung dibege nasida si Paulus mangkatai di bahasa Heber, lam hohom ma nasida. Didok si Paulus ma,  “Halak Jahudi do ahu, tubu di Tarsus na di Kilikia. Alai di kota on do ahu singkola jala diajari si Gamaliel. Diajari do ahu mangihuthon sude Patik na nioloan ni angka ompunta. Songon hamu na pungu dison sadari on, marsitutu do ahu marhobas tu Debata.  Hulelei do angka na mangihuthon Dalan ni Tuan i jala hupamate. Hutangkup do angka baoa dohot borua jala hupamasuk tu penjara.  Tangkas do i diboto sintua ni malim dohot sude pangituai. Ai sian nasida do hujalo angka surat na tu angka donganta di Damaskus. Dung i, laho ma ahu tusi manangkup angka siihuthon Dalan ni Tuan i jala mamboan nasida tu Jerusalem asa diuhum.  “Alai tingki di pardalanan ahu jala nunga naeng sahat tu Damaskus, hira-hira di tonga ari, tompu ma ro sinondang sian langit di humaliangku.  Dabu ma ahu tu tano jala hubege ma soara na mandok, ‘Saulus, Saulus, boasa dibahen ho na hansit tu ahu?’  Gabe ningku ma, ‘Ise do ho Tuan?’ Dialusi ibana ma, ‘Jesus halak Nasaret i do ahu, na pinaporsuk-porsukmi.’  Diida angka donganku do sinondang i, alai ndang dibege nasida soara ni na mangkatai tu ahu. 10  Dung i hudok ma, ‘Aha ma sibahenonku Tuan?’ Didok Tuan i ma tu ahu, ‘Hehe ma ho, laho ma ho tu Damaskus. Disi ma paboaonna tu ho sude naung tinontuhon na laho ulahononmu.’ 11  Alai ndang boi be ahu marnida alani sinondang na mansai tiur i. Gabe ditogu-togu angka donganku ma ahu sahat tu Damaskus. 12  “Dung i adong ma sasahalak na margoar si Ananias, dihabiari ibana do Debata, diihuthon do Patik i jala denggan do baritana di sude halak Jahudi na disi. 13  Ro ma ibana mandapothon ahu. Jongjong ma ibana di lambungku jala ninna ma, ‘Saulus, dongan, marnida ma ho muse!’ Laos satongkin i, boi ma ahu marnida jala hubereng ma ibana. 14  Didok ibana ma, ‘Nunga dipillit Debata ni angka ompunta ho asa botoonmu lomo ni rohana, asa idaonmu Jesus na mangulahon na sintong i jala asa begeonmu soarana. 15  Ai gabe saksina ma ho tu sude halak laho paboahon taringot tu na niidam dohot na binegem. 16  Antong, aha dope na pinaimam? Hehe ma ho jala tardidi. Paias ma dirim sian angka dosam marhite manjou goar ni Jesus.’ 17  “Alai dung mulak ahu tu Jerusalem, tingki martangiang ahu di bagas joro, ro ma tu ahu sada parnidaan. 18  Di parnidaan i, huida ma Tuan jala didok ma tu ahu, ‘Hatop, kaluar ma ho sian Jerusalem. Ai ndang tangihonon ni nasida angka na pinaboami taringot tu ahu.’ 19  Hudok ma, ‘Tuan, tangkas do diboto nasida na hudalani do angka sinagoga* laho manangkup dohot mamungkuli angka na porsea tu ho. 20  Jala tingki dipamate nasida si Stepanus saksimi, jongjong do ahu disi jala lomo do rohangku dipamate ibana. Ahu do na manjaga pangkean luar ni na mambunu i.’ 21  Alai didok Tuan i ma tu ahu, ‘Borhat ma ho, ai suruonku ma ho tu angka bangso di inganan na dao.’” 22  Sahat tusi, ditangihon natorop i dope si Paulus. Alai dungkon i, marsurak ma nasida, “Pamate ma ibana! Ndang loason mangolu jolma sisongon on!” 23  Marsuraki ma nasida, dipasampathon be ma pangkean luarna jala disampathon nasida ma orbuk tu ginjang. 24  Alai disuru komandan ni tentara i ma asa diboan si Paulus tu markas ni nasida. Disuru ma muse asa disungkuni nasida si Paulus huhut dilinsingi, asa diboto komandan i alani aha marsuraki natorop i tu si Paulus. 25  Alai dung ditali nasida ibana laho dilinsingi, didok si Paulus ma tu perwira na jongjong disi, “Mangihuthon uhum, boi do linsingan sahalak warga negara Rom so jolo diadili?” 26  Dung dibege perwira i hatana i, laho ma ibana paboahon i tu komandan ni tentara i, ninna ma, “Aha do na laho bahenonmu tu ibana? Ai warga negara Rom do hape ibana.” 27  Dung i didapothon komandan ni tentara i ma si Paulus jala ninna ma, “Tutu do ho warga negara Rom?” Dialusi ibana ma, “Tutu.” 28  Didok komandan ni tentara i ma, “Arga do hugarar asa boi ahu gabe warga negara Rom.” Didok si Paulus ma, “Alai anggo ahu, sian mulai tubu do ahu warga negara Rom.” 29  Laos satongkin i, laho ma angka tentara na naeng manungkuni si Paulus i. Gabe mabiar ma komandan ni tentara i, ala naung nirantena i si Paulus, hape warga negara Rom do ibana. 30  Marsogotna i, dipalua komandan ni tentara i ma si Paulus jala disuru ma marpungu angka malim kepala* dohot sude anggota ni Sanhedrin,* ala naeng botoonna boasa bahenon ni halak Jahudi songon i tu si Paulus. Dung i diboan ma si Paulus tu jolo ni nasida.

Surat na di toru

Manang “parguruan”. Ida di Kamus.
Ida di Kamus.
Ida di Kamus.