Ulaon ni Apostel 16:1-40

  • Dipillit si Paulus ma si Timoteus (1-5)

  • Parnidaan taringot tu sahalak baoa Makedonia (6-10)

  • Gabe porsea si Lidia na di Pilippi (11-15)

  • Si Paulus dohot si Silas dipenjarahon (16-24)

  • Tardidi ma penjaga penjara dohot sude donganna sajabu (25-34)

  • Disuru si Paulus asa mangangku sala angka pejabat (35-40)

16  Dung i sahat ma si Paulus di Derbe dohot di Listra. Disi adong ma sahalak sisean na margoar si Timoteus. Boru Jahudi do inangna jala nunga gabe sisean, alai halak Junani do amangna.  Dipuji angka dongan na di Listra dohot na di Ikonium do ibana.  Didok si Paulus ma naeng togihononna si Timoteus mandongani ibana. Diboan si Paulus ma ibana jala disunat, ai sude do halak Jahudi na di inganan i mamboto na halak Junani amangna.  Huhut didalani nasida angka kota i, dipaboa ma tu angka dongan na disi naung tinontuhon ni angka apostel dohot angka sintua na di Jerusalem i jala dijujui ma nasida mangulahon i.  Gabe lam togu ma haporseaon ni angka huria i jala lam tamba ma bilangan ni nasida ganup ari.  Asing ni i, didalani nasida ma Prigia dohot angka luat na di Galatia. Ai marhite tondi parbadia, diorai do nasida paboahon hata ni Debata di Provinsi Asia.  Dung sahat nasida di Misia, naeng laho ma nasida tu Bitinia. Alai marhite tondi parbadia, diorai Jesus ma muse nasida tusi.  Gabe ditorushon nasida ma pardalanan ni nasida sian Misia tu Troas.  Di borngin i, ro ma tu si Paulus parnidaan. Diida ibana ma sahalak baoa Makedonia jongjong huhut mangelek-elek, ninna ma, “Ro ma ho tu Makedonia, jala urupi ma hami.” 10  Dung mandapot parnidaan si Paulus, marsangkap ma hami naeng laho tu Makedonia. Ai dihilala hami, Debata do na manjou hami asa marbarita tu nasida. 11  Dung i markapal ma hami sian Troas tu Samotrake jala marsogotna i tu Neapolis. 12  Jala sian i borhat ma hami tu Pilippi sada kota jajahan ni Rom, i ma kota na sumurung na adong di Makedonia. Disi ma hami manang na piga ari. 13  Tingki ari Sabbat, laho ma hami tu topi ni sunge na di luar ni harbangan ni kota. Ai dibege hami, adong do disi inganan martangiang. Hundul ma hami jala mangkata-hatai tu angka borua na marpungu disi. 14  Adong ma sahalak borua partiga-tiga abit na piolet, goarna si Lidia. Sian Tiatira do ibana jala sisomba Debata. Tingki ditangihon ibana hami, dibungka Jahowa ma rohana asa dijalo na nidok ni si Paulus. 15  Dung tardidi ibana dohot sude donganna sajabu, dielek-elek ibana ma hami, ninna ma, “Molo pos do rohamuna naung porsea ahu tu Jahowa, ro ma hamu jala tading ma di jabungku.” Sai dielek-elek ibana do hami asa huoloi hami pangidoanna i. 16  Di sada tingki, laho hami tu inganan partangiangan i. Pajumpang ma hami dohot sahalak hatoban borua na sinonggopan ni suru-suruan na jahat. Godang do untung dapot ni angka tuanna sian ulaonna na manjujur nasib i. 17  Sai diihuthon ibana do hami dohot si Paulus, jala gogo ma didok, “Ai angka naposo ni Debata Natumimbul i do halak on, na paboahon dalan haluaon i tu hamu.” 18  Sai dibahen ibana do songon i manang na piga ari. Ujungna jut ma roha ni si Paulus mambege i, diida ma dompak borua i jala didok ma tu suru-suruan na jahat i, “Marhite goar ni Jesus Kristus, hudok ma tu ho, kaluar ma ho sian ibana.” Laos satongkin i, kaluar ma suru-suruan na jahat i. 19  Alai dung diida angka tuanna i naung mago pansarian ni nasida, ditangkup nasida ma si Paulus dohot si Silas jala disarat ma nasida tu pasar tu jolo ni angka na marhuaso.* 20  Diboan nasida ma si Paulus dohot si Silas tu jolo ni angka pejabat pengadilan jala ninna ma, “Manggunturi do angka halak on di kota on. Halak Jahudi do nasida, 21  diajarhon nasida do angka hasomalan na maralo tu uhum, na so boi tajalo manang taihuthon, ai halak Rom do hita.” 22  Jala dohot do natorop i mangalo nasida. Dung diribakkon angka pejabat pengadilan i pangkean ni si Paulus dohot si Silas, disuru ma nasida dipungkuli dohot hau. 23  Dung sae dipungkuli, dipamasuk ma nasida tu penjara jala disuru ma angka panjaga asa manat manjaga nasida. 24  Alani parenta i, dipamasuk panjaga i ma nasida tu penjara parbagasan jala dipasung* ma pat ni nasida. 25  Alai hira-hira di tonga borngin, martangiang ma si Paulus dohot si Silas jala marende ma nasida mamuji Debata. Dibege angka na di penjara i do nasida marende. 26  Tompu ma ro gempa na gogo jala humutur ma penjara i. Satongkin i, bungka ma sude pintu jala malua ma rante ni sude na di penjara i. 27  Tingki tarsunggul panjaga ni penjara i, diida ibana ma nunga bungka sude pintu ni penjara i. Disintak ma podangna, naeng maningkot ma ibana, ai dirimpu do naung lari sude na di penjara i. 28  Alai didok si Paulus ma gogo, “Unang ulahon i, ai dison do hami sude!” 29  Dipangido panjaga penjara i ma asa diboan lampu, dung i marlojong ma ibana tu bagasan. Hitir-hitir ma ibana huhut marsinggang tu jolo ni si Paulus dohot si Silas. 30  Ditogihon ibana ma nasida tu luar jala ninna ma, “Aha do sibahenonku asa malua ahu?” 31  Didok nasida ma, “Haporseai ma Tuan Jesus, asa malua ho dohot keluargam.” 32  Dung i dibaritahon nasida ma hata ni Jahowa tu ibana dohot tu sude donganna sajabu. 33  Diboan ibana ma nasida borngin i, jala dipaias ma angka luka ni nasida. Laos di tingki i, tardidi ma ibana dohot sude donganna sajabu. 34  Dung i ditogihon ibana ma nasida tu jabuna jala diparade ibana ma sipanganon tu nasida. Las situtu ma roha ni panjaga penjara i dohot sude donganna sajabu, ala nunga gabe porsea nasida tu Debata. 35  Marsogotna i, disuru angka pejabat pengadilan i ma angka petugas laho mandok, “Palua ma nasida.” 36  Dipaboa panjaga penjara i ma hata ni nasida i tu si Paulus, ninna ma, “Nunga disuru angka pejabat pengadilan i halak paboahon asa dipalua hamu. Alani i, kaluar ma hamu, mulak ma hamu di bagasan dame.” 37  Alai didok si Paulus ma, “Nunga dipungkuli nasida hami di jolo ni natorop so jolo diadili, dipamasuk tu penjara hape halak Rom do hami. Saonari naeng paluaonna ma hami sipsip? Ndang boi songon i! Ingkon nasida do ro paluahon hami.” 38  Dipaboa angka petugas i ma hata i tu angka pejabat ni pengadilan i. Dung diboto nasida halak Rom do si Paulus dohot si Silas, gabe mabiar ma nasida. 39  Dung i ro ma angka pejabat i, mangangku sala ma nasida tu si Paulus dohot tu si Silas. Dung dipalua petugas i nasida sian penjara, dipangido ma asa laho nasida sian kota i. 40  Alai dung kaluar nasida sian penjara, laho ma nasida tu jabu ni si Lidia. Dung pajumpang nasida dohot angka dongan na disi, dipatogu si Paulus dohot si Silas ma nasida. Dung i borhat ma si Paulus dohot si Silas.

Surat na di toru

Manang “angka pamarenta”.
Ida di Kamus.