Ulaon ni Apostel 14:1-28

  • Lam martamba na porsea di Ikonium alai adong paraloan (1-7)

  • Dirimpu do nasida debata tingki di Listra (8-18)

  • Si Paulus malua sian angka halak na mandangguri ibana (19, 20)

  • Patoguhon angka huria (21-23)

  • Mulak muse tu Antiokia na di Siria (24-28)

14  Di Ikonium, masuk ma si Paulus dohot si Barnabas tu sinagoga* ni halak Jahudi. Dipasahat nasida do denggan barita i, alani i torop ma halak Jahudi dohot halak Junani na gabe porsea.  Alai dipamohop-mohop halak Jahudi na so porsea i ma roha ni angka halak na sian bangso na asing, asa sogo roha ni nasida tu si Paulus dohot tu si Barnabas.  Leleng do si Paulus dohot si Barnabas marbarita disi di bagasan habaranion marhite huaso ni Jahowa. Dilehon Debata do tu nasida huaso mambahen angka tanda halongangan,* laho patoguhon barita ni nasida taringot tu asi ni roha ni Debata na mansai balga i.  Alai gabe tarbagi ma penduduk ni kota i, na deba mamihak tu halak Jahudi na deba nai mamihak tu angka apostel.  Marsangkap ma angka halak na sian bangso na asing, halak Jahudi dohot angka pamimpin ni nasida mambahen na hansit tu angka apostel i jala mandangguri nasida dohot batu.  Alai tarboto ma i tu angka apostel i. Lari ma nasida tu kota Likaonia, tu Listra, tu Derbe dohot tu angka huta na di humaliangna.  Jala tongtong do dibaritahon nasida barita na uli disi.  Di Listra adong ma sahalak baoa na lumpu mulai sian tubu. Ndang boi ibana mardalan jala hundul do ibana  manangihon si Paulus mangkatai. Dibereng si Paulus ma dompak ibana jala diida ma na porsea do ibana boi dipamalum. 10  Gogo ma didok si Paulus, “Jongjong ma ho.” Pintor jongjong ma baoa i jala mardalan. 11  Dung diida natorop i na binahen ni si Paulus, marsurak ma nasida di bahasa Likaonia, ninna ma, “Nunga ro angka debata tu hita songon rupa ni jolma!” 12  Dibahen nasida ma goar ni si Barnabas Zeus jala si Paulus Hermes ala ibana do na jotjot mangkatai. 13  Dung i ro ma malim ni debata Zeus tu harbangan ni kota i. Ai di jolo ni kota i do pamelean tu debata Zeus. Diboan ibana ma angka lombu jantan dohot angka mahkota na sian bulung-bulung, asa rap ibana dohot jolma natorop i mamelehon pelean tu si Paulus dohot tu si Barnabas. 14  Dung dibege apostel Barnabas dohot apostel Paulus sangkap ni nasida i, diribakkon nasida ma pangkean ni nasida jala marlojong tu tonga-tonga ni natorop i. Gogo ma didok nasida, 15  “Ale angka dongan, boasa bahenonmu songon on? Jolma na gale do hami songon hamu. Na laho paboahon barita na uli do hami tu hamu, asa ditadingkon hamu ulaon na so marguna sisongon on jala asa sombaonmu Debata na manompa langit, tano, laut dohot nasa isina. 16  Di tingki naung salpu, dipasombu Ibana do sude bangso mangulahon lomo ni roha ni nasida be. 17  Alai sai dipatuduhon Debata do ise Ibana marhite angka ulaonna na denggan. Dilehon do tu hamu udan sian langit dohot musim panen. Dilehon do tu hamu gok sipanganon dohot las ni roha.” 18  Nang pe naung didok songon i, ndang tarambatan ni si Paulus dohot si Barnabas natorop i asa unang mangalehon pelean tu nasida. 19  Alai ro ma halak Jahudi sian Antiokia dohot sian Ikonium. Dijujui nasida ma natorop i mandangguri si Paulus. Dung i disarat nasida ma ibana tu luar ni kota i, ai dirimpu nasida do naung mate ibana. 20  Dung ro angka sisean i jala jongjong di lambungna, hehe ma ibana dung i masuk ma muse tu kota i. Marsogot nai, borhat ma ibana dohot si Barnabas tu Derbe. 21  Dibaritahon nasida ma barita na uli di kota i jala torop ma na gabe sisean. Dung i mulak ma muse nasida tu Listra, tu Ikonium dohot tu Antiokia. 22  Dipatogu nasida ma roha ni angka sisean na di kota i asa tongtong marhaporseaon. Didok nasida ma, “Ingkon bolusonta do godang hasusaan laho masuk tu Harajaon ni Debata.” 23  Asing ni i, dipillit si Paulus dohot si Barnabas ma angka sintua di ganup huria. Martangiang ma nasida, marpuasa, jala dipasahat nasida ma angka sintua i tu Jahowa naung hinaporseaan ni nasida. 24  Dung i borhat ma si Paulus dohot si Barnabas, dibolus nasida ma Pisidia jala sahat ma nasida di Pampilia. 25  Dung dibaritahon nasida hata ni Debata di Perge, borhat ma nasida tu Atalia. 26  Sian i markapal ma nasida tu Antiokia. Di kota i do najolo angka dongan sahaporseaon manangiangkon nasida tu Debata asa dipasu-pasu* ulaon ni nasida, i ma ulaon naung sae diulahon nasida. 27  Dung sahat nasida di Antiokia, dijou nasida ma sude angka na di huria i marpungu. Dipaboa nasida ma godang na binahen ni Debata marhite nasida. Jala dipaboa nasida do muse naung dibungka Debata dalan tu angka bangso na asing asa porsea tu Ibana. 28  Dung i leleng do si Paulus dohot si Barnabas tading rap dohot angka sisean i.

Surat na di toru

Manang “tu parguruan”. Ida di Kamus.
Manang “mukjizat”.
As. “asi ni roha na mansai balga”. Ida di Kamus.