Ulaon ni Apostel 12:1-25

  • Si Jakobus dibunu; si Petrus dipenjarahon (1-5)

  • Si Petrus dipalua marhite tanda halongangan (6-19)

  • Dibahen suru-suruan ma si Herodes marsahit (20-25)

12  Hira-hira di tingki i, mulai ma dibahen si Herodes angka na hansit tu manang na piga halak di huria i.  Dibunu ibana ma si Jakobus haha ni si Johannes dohot podang.  Dung diida si Herodes na las roha ni halak Jahudi mangida i, ditangkup ibana ma muse si Petrus. (On masa saleleng Perayaan Roti na So Marragi.)  Dung ditangkup si Petrus, dipamasuk ma ibana tu penjara. Disuru ma ibana jagaon ni opat punguan ni tentara. Opat halak tentara ma sapunguan. Marsangkap do si Herodes mamboan si Petrus tu* jolo ni natorop dung salpu Paska.  Saleleng dipenjarahon si Petrus, marsitutu do huria manangiangkon ibana.  Di borngin andorang so diboan si Petrus tu jolo ni natorop, modom do si Petrus di tonga-tonga ni dua tentara. Ditali do ibana dohot dua rante jala adong do angka panjaga di pintu ni penjara i.  Tompu ma jongjong suru-suruan ni Jahowa disi, jala adong ma sinondang di penjara i. Dihutur suru-suruan i ma si Petrus laho mandungoi ibana, ninna ma, “Hatop, hehe ma ho!” Dung i bungka ma rante i sian tanganna.  Didok suru-suruan i ma tu ibana, “Marhobas ma ho, pangke ma sipatumi.” Dibahen si Petrus ma songon i. Didok suru-suruan i ma muse, “Pangke ma baju luarmi jala ihuthon ma ahu.”  Diihuthon si Petrus ma suru-suruan i, alai ndang diboto ibana manang na tutu na binahen ni suru-suruan i tu ibana. Ai dirimpu ibana do na ro parnidaan tu ibana. 10  Dung dibolus nasida panjaga na parjolo dohot na paduahon, sahat ma nasida di harbangan bosi, dalan na laho tu kota. Bungka sandiri do harbangan i. Dung kaluar, rap mardalan ma nasida, alai tompu ma ditadingkon suru-suruan i si Petrus. 11  Gabe diboto si Petrus ma na masa tu ibana, ninna ma, “On pe asa huboto, nunga disuru Jahowa suru-suruanna paluahon ahu sian si Herodes dohot sian sude sangkap ni halak Jahudi na jahat.” 12  Dung tangkas diboto si Petrus na masa i, laho ma ibana tu jabu ni si Maria ina ni si Johannes na laos digoari si Markus. Godang do halak marpungu disi jala martangiang. 13  Tingki dituktuhi si Petrus pintu ni harbangan i, ro ma sahalak hatoban borua na margoar si Rode laho mangida ise na ro i. 14  Dung diboto ibana soara ni si Petrus do i, marlojong ma ibana muse tu bagasan jala ndang saut dibungka ibana pintu i alani las ni rohana. Dipaboa ibana ma naung jongjong si Petrus di harbangan. 15  Didok nasida ma tu ibana, “Na marnipi do huroha ho.” Alai sai dipartahanhon ibana do na tutu hatana i. Gabe ninna nasida ma, “Suru-suruanna do i.” 16  Alai sai dituktuhi si Petrus do pintu i. Dung dibungka nasida pintu i, gabe tarsonggot ma nasida mangida ibana. 17  Alai dibahen si Petrus ma tanda dohot tanganna asa hohom nasida. Dipatorang ibana ma songon dia Jahowa mamboan ibana kaluar sian penjara. Jala didok ibana ma, “Paboa hamu ma na masa on tu si Jakobus dohot tu angka dongan na asing.” Dung i kaluar ma ibana jala laho tu inganan na asing. 18  Marsogotna i, gaor ma angka tentara na manjaga i, ai ndang diboto nasida manang aha na masa tu si Petrus. 19  Sai dilului si Herodes ma si Petrus tu sude inganan. Ala ndang dapotna, disungkuni ibana ma angka panjaga i jala diparentahon ma asa diuhum nasida. Dung i laho ma si Herodes sian Judea tu Kaesarea, disi ma ibana maringanan manang na piga leleng. 20  Di sada tingki, muruk ma si Herodes tu halak Tirus dohot tu halak Sidon. Gabe ro ma nasida mandapothon ibana. Alai parjolo ma dielek-elek nasida si Blastus, i ma na mangaradoti istana* ni raja i laho mangido asa mardame. Ai sian luat ni si Herodes do haroroan ni sipanganon tu luat ni nasida. 21  Di tingki naung ditontuhon, dipangke si Herodes ma pangkean harajaonna, hundul ma ibana di kursi panguhuman, jala mangkatai ma ibana di jolo ni natorop i. 22  Dung i, marsurak ma natorop i didok nasida ma, “Soara ni debata do i ndang soara ni jolma.” 23  Laos satongkin i, dibahen suru-suruan ni Jahowa ma ibana marsahit, ai ndang dipasangap ibana Debata. Diallangi angka gilok-gilok ma ibana laos mate. 24  Alai lam tarsar ma hata ni Jahowa jala lam torop ma na gabe sisean. 25  Dung sidung ulaon ni si Barnabas dohot si Saulus pasahathon silehon-lehon tu angka dongan na di Jerusalem, mulak ma nasida tu Antiokia jala ditogihon ma si Johannes na laos digoari si Markus.

Surat na di toru

Manang “si Herodes manontuhon uhum tu si Petrus di”.
As. “kamar”.