Rom 6:1-23

  • Tardidi di bagasan Kristus mandapot ngolu na imbaru (1-11)

  • Unang pasombu dosa mangarajai dagingmuna (12-14)

  • Sian hatoban ni dosa gabe hatoban ni Debata (15-23)

    • Upa tinuhor ni dosa do hamatean. Silehon-lehon ni Debata do hangoluan (23)

6  Antong songon dia ma dohononta? Torus ma taulahon dosa asa lam tamba asi ni roha ni Debata na mansai balga i?  Ndang songon i! Nunga dipalua hita sian dosa, alani i ndang patut be hita sai mangulahon dosa.  Manang na so diboto hamu do, sude hita na tardidi di bagasan Kristus Jesus nunga tardidi di bagasan hamamatena?  Ala nunga tardidi hita di bagasan hamamatena, nunga dikubur hita rap dohot ibana. Alani i, ingkon mangolu ma hita di bagasan ngolu na imbaru, songon Kristus naung mangolu di bagasan ngolu na imbaru dung dipahehe sian na mate marhite huaso* ni Amana.  Molo nunga mate hita songon ibana, paheheonna do hita songon ibana, jala i ma na mambahen hita marsada dohot ibana.  Taboto do, nunga dipakkuhon parangenta najolo i rap dohot ibana di hau. Alani i, ndang marhuaso be dagingta na mardosa i jala ndang diparhatoban dosa i be hita.  Ai molo nunga mate sasahalak, nunga malua be ibana sian* dosana.  Asing ni i, molo mate hita rap dohot Kristus, pos ma rohanta mangolu do hita rap dohot ibana.  Taboto do, dung hehe Kristus sian na mate, ndang mate be ibana jala ndang marhuaso be hamatean i tu ibana. 10  Ai mate pe ibana, sahali do i ro di saleleng ni lelengna laho manesa dosa. Alai mangolu do ibana asa boi mangulahon lomo ni roha ni Debata. 11  Songon i ma nang hamu, etong hamu ma naung mate hamu di bagasan dosa. Alai mangolu laho mangulahon lomo ni roha ni Debata marhite Kristus Jesus. 12  Alani i, unang ma loas hamu dosa i marhuaso gabe raja di dagingmuna na boi mate. Asa unang dioloi hamu be hisap-hisap ni dagingmuna. 13  Unang ma pasahat hamu dagingmuna* tu dosa laho mamangke i mangulahon na sala. Alai pasahat hamu ma dirimuna tu Debata songon halak naung mate jala naung dipahehe sian na mate. Pasahat ma dagingmuna tu Debata jala mamangke i mangulahon na sintong. 14  Unang be loas dosa i mangarajai hamu.* Ai ndang di bagasan Patik ni si Musa hamu mangolu, alai mangolu do hamu di bagasan asi ni roha ni Debata na mansai balga i. 15  Antong aha ma dohononta? Ala ndang di bagasan Patik ni si Musa hita mangolu, alai mangolu di bagasan asi ni roha ni Debata na mansai balga i, gabe taulahon ma dosa? Ndang songon i! 16  Na so diboto hamu do? Gabe hatoban ni sasahalak do hamu molo dipasahat hamu dirimuna mangoloi ibana. Alani i, molo hatoban ni dosa do hamu, mate ma hamu. Alai molo hatoban ni Debata do hamu jala mangoloi Ibana, dohononna ma hamu mangulahon na sintong. 17  Mandok mauliate do ahu tu Debata, ai nang pe hatoban ni dosa hian hamu, alai saonari nunga diihuthon hamu sian nasa rohamuna angka na niajarhon ni Debata tu hamu. 18  Ala nunga dipalua hamu sian dosa, gabe hatoban ni Debata na mangulahon na sintong ma hamu. 19  Ai gale do hamu alani dosa. Alani i, hupangke do hata na mura antusan tingki mangkatai dohot hamu. Dipasahat hamu do najolo dirimuna gabe hatoban ni na ramun dohot na jahat, gabe diulahon hamu ma angka na jahat. Alai saonari, pasahat hamu ma dirimuna gabe hatoban ni hasintongan asa badia hamu. 20  Ai tingki hatoban ni dosa hamu, ndang ingkon ulahononmuna na sintong. 21  Aha do laba na dapotmuna tingki hatoban ni dosa hamu? Dapotmuna ma angka na mambahen hamu maila saonari jala parohon hamatean do ujung ni i sude. 22  Alai saonari, nunga dipalua hamu sian dosa jala gabe hatoban ni Debata. Dapotmuna ma hangoluan na badia na parohon hangoluan saleleng ni lelengna. 23  Ai upa tinuhor ni dosa do hamatean. Alai silehon-lehon ni Debata do hangoluan na saleleng ni lelengna marhite Kristus Jesus Tuanta.

Surat na di toru

As. “hasangapon”.
Manang “nunga disesa be”.
As. “ruas ni dagingmuna”.
Manang “mangarajai hamu songon tuan”.