Rom 4:1-25

  • Didok Debata do si Abraham mangulahon na sintong alani haporseaon (1-12)

    • Si Abraham do ama ni saluhut halak na porsea (11)

  • Manjalo janji alani haporseaon (13-25)

4  Molo songon i, aha do dapot ni si Abraham ompunta i?  Molo marhite parniulaonna si Abraham didok sintong, boi ma ibana marbalga ni roha. Alai ndang adong na boi mambahen ibana marbalga ni roha di jolo ni Debata.  Ai didok na tarsurat i do, “Porsea do si Abraham tu Jahowa. Alani haporseaonna i, didok do ibana mangulahon na sintong.”  Dijalo parkarejo do gajina, ndang alani haburjuon ni tuanna i, alai ala marhak do ibana manjalo i.*  Alai molo porsea do sasahalak tu Debata jala ndang mangasahon ulaonna, boi do didok ibana mangulahon na sintong. Nang pe mardosa ibana, boi do didok ibana mangulahon na sintong alani haporseaonna.  Nang pe ndang sude ulaonna hombar tu patik i, alai didok Debata do ibana mangulahon na sintong. On mambahen ibana marlas ni roha. Hea do didok si Daud taringot tusi, tingki didok,  “Marlas ni roha ma halak na disalpuhon hasalaanna jala disesa dosana.*  Marlas ni roha ma halak na so dietong* Jahowa be angka dosana.”  Holan halak na marsunat i do na marlas ni roha? Manang dohot do halak na so marsunat i? Ai nunga didok, “Ala marhaporseaon do si Abraham umbahen na didok mangulahon na sintong.” 10  Sadihari do si Abraham didok mangulahon na sintong? Andorang so marsunat do ibana manang dung marsunat? Sasintongna, nunga didok ibana mangulahon na sintong andorang so marsunat dope. 11  Disuru Debata do si Abraham asa disunat. On ma na gabe tanda molo ibana didok Debata mangulahon na sintong. Ai nunga marhaporseaon ibana andorang so disunat. Alani i gabe ama ni saluhut halak na porsea ma ibana andorang so disunat, jala didok Debata ma nasida mangulahon na sintong. 12  Jala ndang holan ama ni sude na marsunat si Abraham, alai dohot do ama ni sude halak na mangihuthon haporseaonna, i ma haporseaonna andorang so marsunat dope ibana. 13  Ndang ala na mangulahon patik si Abraham umbahen dijanjihon Debata laho mangalehon portibi on tu ibana manang tu pinomparna. Alai alani haporseaonna do jala ala na didok do ibana mangulahon na sintong. 14  Molo halak na mangulahon patik i do na manjalo janji i, marisuang ma haporseaon i jala ndang marlapatan be janji i. 15  Sasintongna, parohon rimas ni Debata do Patik i. Alai autsugari ndang adong patik i, ndang adong na mangalanggar patik i. 16  Alani haporseaon do dijalo si Abraham janji i. Hombar do i tu asi ni roha ni Debata na mansai balga i asa boi sude pinomparna mandapot janji i. Ndang holan angka na mangulahon Patik ni si Musa na manjalo i, alai dohot do halak na mangihuthon haporseaon ni si Abraham, i ma ama ni hita saluhutna. 17  Songon na nidok ni na tarsurat i, “Hupillit do ho gabe ama ni torop bangso.” Sai na saut do janjina i. Porsea do si Abraham tu Debata. Ai Ibana do na mambahen halak na mate mulak mangolu jala Ibana do na mandok angka na so masa i dope songon naung tutu masa.* 18  Mangkirim jala porsea do si Abraham na boi ibana gabe ama ni torop bangso, nang pe songon na so boi be ibana marianakhon. Pos do rohana tu hata na mandok, “Songon i ma sogot torop ni pinomparmu.” 19  Jala ndang gabe gale haporseaonna, nang pe didok rohana ndang boi be ibana marianakhon. Ai nunga marumur ibana hira-hira 100 taon jala mandul* do si Sara tunggane boruna i. 20  Porsea do ibana tu janji ni Debata jala ndang ganggu rohana. Lam togu do ibana alani haporseaonna jala dipasangap ibana do Debata. 21  Jala pos situtu do rohana, na pasauton ni Debata do sude janjina i. 22  Alani i ma “didok do ibana mangulahon na sintong”. 23  Hata na mandok, “alani haporseaonna i didok do ibana mangulahon na sintong”, ndang holan tu ibana i disurat, 24  alai dohot do tu hita. Didok do hita sintong ala porsea do hita tu Debata na paheheon Jesus Tuanta i sian na mate. 25  Diloas Debata do Jesus dibunu asa disesa dosanta jala dipahehe Debata do ibana asa boi hita didok mangulahon na sintong.

Surat na di toru

Manang “alai utang ni tuanna i do i”.
As. “ditutup dosana”.
Manang “na so dipaingot-ingot”.
Manang boi do “na mambahen na so adong gabe adong”.
Manang “hol”.