Rom 16:1-27

  • Si Paulus patandahon si Poibe na marhobas di huria (1, 2)

  • Tabe tu halak Kristen na di Rom (3-16)

  • Sipasingot taringot tu halak na mamola-mola (17-20)

  • Tabe sian angka dongan saulaon ni si Paulus (21-24)

  • Nunga dipapatar rahasia na badia (25-27)

16  Hupatandahon ma tu hamu donganta borua, si Poibe na marhobas* di huria na di Kenkrea.  Jalo hamu ma ibana songon na manjalo dongan sahaporseaon, songon na manjalo angka na badia. Jala lehon ma angka na ringkot di ibana. Ai nunga godang angka dongan diurupi ibana, dohot ma i ahu sandiri.  Pasahat ma tabengku tu si Priska dohot tu si Akuila donganku saulaon marhobas tu Kristus Jesus.  Rade do nasida mate alani ahu. Jala ndang holan ahu na mandok mauliate tu nasida alai dohot do sude huria na sian bangso na asing.  Sahat ma tabe tu huria na marpungu di jabu ni nasida. Sahat ma tabe tu si Epenetus dongan na huhaholongi. Ibana do sahalak sian angka na parjolo gabe sisean ni Kristus di Asia.  Sahat ma tabe tu si Maria naung marsitutu mangurupi hamu.  Sahat ma tabe tu si Andronikus dohot tu si Junias sisolhothu. Hea do nasida rap dipenjarahon dohot ahu. Dipuji angka apostel do nasida jala parjolo do nasida gabe siihuthon Kristus sian ahu.  Sahat ma tabengku tu si Ampliatus dongan na huhaholongi di bagasan Tuan i.  Sahat ma tabe tu si Urbanus donganta saulaon marhobas tu Kristus dohot tu si Stakis na huhaholongi. 10  Sahat ma tabe tu si Apelles na marsihohot tu Kristus. Sahat ma tabe tu keluarga ni si Aristobulus. 11  Sahat ma tabe tu si Herodion sisolhothu. Sahat ma tabe tu keluarga ni si Narkissus na mangihuthon Tuan i. 12  Sahat ma tabe tu si Tripena dohot tu si Triposa, i ma angka donganta borua na marhobas tu Tuan i. Sahat ma tabe tu si Persis donganta borua na tahaholongi, naung marsitutu marhobas tu Tuan i. 13  Sahat ma tabe tu si Rupus na pinillit ni Tuan i dohot tu inana na laos songon ina di ahu. 14  Sahat ma tabe tu si Asinkritus, tu si Plegon, tu si Hermes, tu si Patrobas, tu si Hermas, dohot tu angka dongan na rap dohot nasida. 15  Sahat ma tabe tu si Polologus dohot tu si Julia, tu si Nerius dohot tu ibotona, tu si Olimpas dohot tu sude angka na badia na rap dohot nasida. 16  Denggan* ma jalo hamu angka donganta sahaporseaon. Sude do angka dongan na di huria ni Kristus pasahathon tabe tu hamu. 17  Hupangido ma tu hamu ale angka dongan, manat ma hamu tu angka halak na mamola-mola dohot tu halak na mambahen tartuktuk. Ai maralo do i tu ajaran naung binegemuna. Alani i padao ma dirimuna sian nasida. 18  Ai hatoban ni hisap-hisap ni dagingna* do halak sisongon i, ndang hatoban ni Tuanta Kristus i. Dipangke nasida do hata na lambok begeon dohot pujian laho mangoto-otoi halak na tobok marroha.* 19  Diboto sude halak do na marsihohot hamu. Jala las do rohangku alani i. Alai lomo do rohangku asa marbisuk hamu tu na denggan jala ias sian na jahat. 20  Ndang sadia leleng nai, lehonon ni Debata Silehon dame i ma tu hamu huaso laho mangaripashon Sibolis.* Anggiat ma asi ni roha ni Tuanta Jesus na mansai balga i mandongani hamu. 21  Sahat ma tu hamu tabe ni si Timoteus donganku saulaon, tabe ni si Lucius, si Jason, dohot si Sosipater angka sisolhothu. 22  Sahat ma tabengku dohot tabe ni donganta sahaporseaon, si Tertius na manurat surat on. 23  Sahat ma tabe ni si Gayus tu hamu. Ibana do na mangalehon jabu ingananku dohot inganan parpunguan ni huria. Sahat ma tabe ni si Erastus bendahara* ni luat i dohot tabe ni si Kuartus anggina. 24  *—— 25  Marhite barita na uli na hubaritahon dohot marhite barita taringot tu Jesus Kristus, tangkas ma boi do Debata patoguhon hamu. Hombar do barita na uli i tu pangantusion taringot tu rahasia na badia naung patar dibahen Debata. Rahasia i nunga leleng buni. 26  Alai nunga dipapatar saonari rahasia i jala nunga dibaritahon tu sude bangso, marhite angka Surat na Badia na sinurat ni angka panurirang. Hombar do on tu parenta ni Debata na manongtong i, na mangkalomohon asa sude bangso porsea jala mangoloi Ibana. 27  Anggiat ma Debata na sasada i, na marbisuk i, dipasangap saleleng ni lelengna marhite Jesus Kristus. Amen.

Surat na di toru

Marhobas na nidokna dison, i ma dohot marbarita na uli.
As. “Marhite umma-umma na badia”.
Manang “hatoban ni butuha”.
Manang “angka na so umboto mangulahon na jahat”.
As. “Setan”. Ida di Kamus.
Manang “pangurus”.
Ida Mateus 17:21, surat na di toru.