Rom 15:1-33

  • Jalo hamu ma donganmuna songon Kristus naung manjalo hamu (1-13)

  • Si Paulus marhobas tu angka bangso (14-21)

  • Pardalanan ni si Paulus (22-33)

15  Hita na togu haporseaonna sabar ma hita mangadopi halak na gale haporseaonna. Jala unang ma hasonanganta sandiri na talului.  Alai ganup ma hita mambahen las roha ni donganta, jala mambahen na denggan laho patoguhon nasida.  Ai Kristus i pe ndang hasonanganna sandiri dilului. Songon na nidok ni na tarsurat i, “Nunga hutaon rehe-rehe ni halak na mangarehei Ho.”  Ai nasa na tarsurat hian, disurat do i laho mangajari hita. Marhite i tadapot ma apul-apul dohot pangkirimon. Ai diurupi na tarsurat i do hita asa margogo jala sabar.  Anggiat ma Debata na mangalehon apul-apul, dohot hasabaron mambahen hamu boi marpangalaho songon Kristus Jesus,  asa boi hamu sude rap saroha jala sasoara mamuji Debata, i ma Ama ni Tuanta Jesus Kristus.  Alani i, jalo hamu ma donganmuna na asing,* songon Kristus naung manjalo hamu bahen hasangapon ni Debata.  Hudok ma tu hamu, gabe parhobas do Kristus i tu halak Jahudi* laho patuduhon na sintong do hata ni Debata, patoguhon angka janji ni Debata tu angka ompu ni nasida,  jala mambahen angka bangso pasangaphon Debata alani asi ni rohana. Songon na nidok ni na tarsurat i, “Alani i do umbahen na hupuji Ho di jolo ni angka bangso, jala marende do ahu laho mamuji goarmu.” 10  Jala didok do muse, “Ale angka bangso, marlas ni roha ma hamu rap dohot bangso ni Debata.” 11  Tarsurat do muse, “Puji ma Jahowa, ale hamu sude bangso. Anggiat ma sude jolma mamuji Ibana.” 12  Didok si Jesaya do muse, “Ro do sasahalak sian pinompar ni si Isai* na laho mamarenta angka bangso jala tu ibana ma angka bangso i mangkirim.” 13  Anggiat ma Debata na mangalehon pangkirimon tu hamu, mambahen hamu marlas ni roha situtu jala mangkilala hadameon. Ai porsea do hamu tu Ibana. Alani i, marhite tondi parbadiana, mangkirim ma hamu tu Ibana sian nasa rohamuna. 14  Ale angka dongan, pos do rohangku, gok do angka na denggan di hamu, gok do parbinotoanmuna, jala boi do hamu masiajar-ajaran.* 15  Alai, tangkas do husurat angka na porlu hupaingot tu hamu. Hubahen pe songon i ala dipatuduhon Debata do asi ni rohana na mansai balga i tu ahu. 16  Dilehon do i asa boi ahu gabe naposo ni Kristus Jesus tu natorop laho pasahathon barita na uli na sian Debata tu angka bangso. Alani i, marsitutu do ahu mangulahon i asa boi angka bangso dijalo Debata songon pelean naung dipabadia marhite tondi parbadia. 17  Marlas ni roha do ahu ala siihuthon Kristus Jesus do ahu jala nunga huulahon ulaon na sian Debata. 18  Ndang huhatahon manang aha, asing ni na niulahon ni Kristus marhite ahu. Marhite hatangku dohot ulaonku, diurupi ibana do angka bangso asa mangoloi ibana. 19  Marhite tanda halongangan* dohot huaso ni tondi parbadia, hubaritahon do barita na uli taringot tu Kristus di sude inganan na hudalani. Marbarita do ahu mulai sian Jerusalem sahat tu luat na adong di humaliang ni Provinsi Ilirikum. 20  On do na tinuju ni rohangku, i ma mamaritahon barita na uli i di angka inganan na so mamboto goar ni Kristus, asa unang huuduti ulaon naung pinungka ni na asing. 21  Ai hombar do i tu na nidok ni na tarsurat i, “Angka halak na so hea mambege barita taringot tu ibana, tandaon ni nasida ma ibana, jala mangantusi ma halak na so hea mambege taringot tu ibana.” 22  Alani i do ahu jotjot sundat ro mandapothon hamu. 23  Alai saonari ndang adong be inganan na so hea hudalani di luat on. Jala nunga martaon-taon* ahu naeng ro mandapothon hamu. 24  Anggiat ma boi hita jumpang tingki di pardalananku tu Spanyol, asa boi dongananmuna ahu satongkin di pardalanan dung rap marsaor hita. 25  Alai saonari, naeng laho ma ahu tu Jerusalem laho marhobas tu angka na badia. 26  Ai las do roha ni angka donganta di Makedonia dohot di Akaya mangalehon sumbangan tu angka na badia, na pogos di Jerusalem. 27  Las do roha ni nasida mangulahon i. Jala sasintongna, didok roha ni nasida ingkon ulahononna do i.* Ai nunga dilehon angka na badia tu nasida angka na boi patoguhon parale-aleon ni nasida tu Debata. Alani i, ingkon lehonon ni nasida do na porlu tu angka na badia i. 28  Molo dung huboan sumbangan i, jala hupasahat tu angka na badia i, ro ma ahu mandapothon hamu di pardalananku tu Spanyol. 29  Pos do rohangku, molo ro ahu annon mandapothon hamu, gok do pasu-pasu boanonku sian Kristus. 30  Ale angka dongan, marhite Tuanta Jesus Kristus, jala marhite holong na tahilala alani tondi parbadia, hujujui ma hamu asa marsitutu martangiang songon ahu, laho mangido na ringkot di ahu. 31  Tangiangkon hamu ma ahu asa malua sian halak na so porsea na di Judea, jala asa las roha ni angka na badia na di Jerusalem manjalo ulaonku marhobas tu nasida. 32  Alani i, molo lomo roha ni Debata, ro do ahu mandapothon hamu di bagasan las ni roha, asa rap tarapul rohanta. 33  Sai anggiat ma dame na sian Debata mandongani hamu sude. Amen.

Surat na di toru

Manang “masijangkonan ma hamu”.
As. “tu halak na marsunat”.
As. “Ro do urat ni si Isai”.
Manang “masipaingotan”.
Manang “mukjizat”.
Manang “manang na piga taon”.
Manang “sasintongna songon utang do i di nasida”.