Rom 1:1-32

  • Hata pamungka (1-7)

  • Si Paulus naeng ro tu Rom (8-15)

  • Halak na mangulahon na sintong mangolu alani haporseaon (16, 17)

  • Ndang adong sidalian ni halak na so mangoloi Debata (18-32)

    • Tarida do pangalaho ni Debata sian angka na tinompana (20)

1  Sian si Paulus, naposo ni Kristus Jesus na tarjou gabe apostel, jala na tarpillit* laho mamaritahon barita na uli na sian Debata,  na manjanjihon barita na uli marhite angka panurirang di Surat na Badia,  i ma barita na uli taringot tu Anakna na tubu tu tano on sian pinompar ni si Daud.  Marhite tondi parbadia, nunga dipahehe Anak i sian na mate, na patuduhon ibana do Anak ni Debata. Jala ibana do Jesus Kristus Tuanta i.  Marhite ibana do hujalo hami asi ni roha ni Debata na mansai balga i, jala marhite ibana do hami dibahen gabe apostel. Asa sude bangso porsea jala mangoloi Kristus laho pasangaphon goarna.  Sian tonga-tonga ni bangso i ma hamu dijou gabe ampuna ni Jesus Kristus.  Hubahen do surat on tu sude halak na hinaholongan ni Debata na adong di Rom, na tarjou gabe angka halak na badia: Anggiat ma dipatuduhon tu hamu asi ni roha na mansai balga i dohot hadameon na sian Debata Ama i dohot sian Tuanta Jesus Kristus.  Parjolo sahali, mandok mauliate ma ahu tu Debatangku marhite Jesus Kristus alani hamu sude. Ai nunga tarbarita haporseaonmuna tu sude liat portibi on.  Hubahen do sian nasa gogongku laho marhobas tu Debata marhite mamaritahon barita na uli taringot tu Anakna i. Jala Ibana ma na gabe saksi, paboa na tongtong hutangiangkon hamu. 10  Hutangiangkon do anggiat marhite lomo ni roha ni Debata, boi saut ahu ro mandapothon hamu. 11  Mansai lomo do rohangku naeng pajumpang dohot hamu laho paboahon angka poda na boi patoguhon parale-aleonmuna tu Debata. 12  Manang, lomo do rohangku asa masipatoguan hita. Lam togu ma ahu alani haporseaonmuna, jala lam togu ma hamu alani haporseaonku. 13  Ale angka dongan, lomo do rohangku botoonmuna, naung jotjot ahu naeng ro tu ingananmuna laho mangajari halak asa gabe sisean, songon na huulahon tu bangso na asing. Alai sai adong do na mangambati. 14  Ai marutang do ahu tu halak Junani dohot tu halak na asing,* tu halak na marsingkola na timbo, dohot tu halak na so marsingkola. 15  Songon i do nang tu hamu na di kota Rom, naeng marbarita na uli do ahu tu hamu. 16  Ndang maila ahu pasahathon barita na uli i. Ai marhite barita na uli, dipatuduhon Debata ma huasona laho paluahon angka halak na porsea. Na parjolo halak Jahudi, dung i halak Junani. 17  Marhite barita na uli, idaon ni halak na porsea ma hatigoran ni Debata. Alani i, lam togu ma haporseaon ni nasida, songon na nidok ni na tarsurat i, “Tongtong do mangolu naposongku na mangulahon na sintong ala porsea ibana.” 18  Dipatudu Debata do rimasna sian banua ginjang tu angka halak na so mangoloi Ibana dohot tu halak na so mangulahon na sintong. Diulahon nasida do na so sintong laho mangambati angka halak mamboto hasintongan. 19  Ingkon tandaon ni nasida do nian Debata, ai godang do angka naung pinatuduhon ni Debata tu nasida. 20  Nang pe ndang boi diida jolma Debata, alai boi do diantusi nasida huasona dohot angka pangalahona sian mulai ditompa portibi on. Ai tarida do i sian angka na tinompana na tutu Ibana Debata. Alani i, ndang adong be na boi mambahen jolma marsidalian. 21  Nang pe diboto nasida taringot tu Debata, alai ndang mandok mauliate nasida jala ndang dipasangap nasida Ibana. Ai nunga maoto pingkiran nang roha ni nasida. 22  Dirimpu nasida do na bisuk nasida, hape na oto do nasida. 23  Ndang dipasangap nasida Debata na manongtong i, alai dipasangap nasida do gana-ganaan na songon jolma na marhamatean, na songon pidong, na songon binatang siopat pat, manang na songon binatang na manginsir. 24  Alani i, dipasombu Debata ma nasida mangulahon angka ulaon na ramun,* mangihuthon lomo ni roha ni nasida sandiri, asa gabe lea daging ni nasida. 25  Dipillit nasida do mangkaporseai gabus sian apala mangkaporseai hasintongan taringot tu Debata. Disomba jala dioloi nasida do na tinompa ni Debata. Hape holan Panompa i do na tama pujion saleleng ni lelengna. Amen. 26  Alani i ma dipasombu Debata nasida dirajai hisap-hisap ni daging na ramun laho mangulahon seks. Dipangke angka borua do daging ni nasida asing sian na sinangkap ni Debata tingki ditompa nasida. 27  Songon i ma nang angka baoa ndang lomo be roha ni nasida mangulahon seks dohot borua,* alai marsigorgor do hisap-hisap ni dagingna laho mangulahon seks sama nasida, baoa tu baoa. Ala diulahon nasida na ramun, gabe diuhum ma nasida hombar tu pambahenan ni nasida i. 28  Ai ndang ringkot dihilala nasida laho mananda Debata, gabe dipasombu Debata ma sega pingkiran ni nasida jala diulahon nasida ma angka ulaon na so patut. 29  Gok angka na roa do pingkiran ni nasida, hajahaton, dohot hahisapon. Marlate ni roha do nasida, mambunu, marbada, manipu, lomo rohana mangida halak susa, jala pahata-hatahon donganna, 30  paroa-roahon donganna, sogo rohana tu Debata, ndang maradat,* siginjang roha, parhata manggang, marsangkap na roa, ndang mangoloi natorasna, 31  ndang marroha, ndang mangingot janjina,* jala ndang marasi ni roha. 32  Diboto nasida do na ingkon diuhum mate halak na mangulahon sisongon i mangihuthon patik ni Debata na tigor i. Alai tongtong do diulahon nasida jala lomo do roha ni nasida mangida halak mangulahon i.

Surat na di toru

As. “na dipapulik”.
Manang “tu na so halak Junani”. As. “halak Barbar”.
Ida di Kamus.
Manang “mangulahon seks songon na sinangkap ni Debata tingki ditompa nasida”.
Manang “ndang pantun”.
Manang “siose padan”.