Pilippi 3:1-21

  • Unang marhaposan tu na tarida (1-11)

    • Gabe harugian alani Kristus (7-9)

  • Marlojong asa mandapot upa (12-21)

    • Angka halak na laho mangolu di surgo (20)

3  Alani i angka dongan, sai marlas ni roha ma hamu ala marsada dohot Tuhan i.* Ndang pola boha di ahu manurathon on muse tu hamu ai mambahen na denggan do on tu hamu.  Manat ma hamu tu angka na marpangalaho songon biang, manat ma hamu tu angka halak na mangulahon na jahat, jala manat ma hamu tu angka halak na mandok ingkon disunat do hamu.  Ai hita do na marsunat. Marhobas do hita tu Debata marhite panogu-noguon ni tondi parbadia, las do rohanta tu angka na niulahon ni Kristus Jesus, jala ndang tu angka na tarida i hita marpos ni roha,  nang pe boi ahu marpos ni roha tu angka na tarida i. Molo adong na mangasahon na tarida i, gumodang dope na boi hupangasahon:  Ai tarsunat do ahu di ari paualuhon, halak Israel do ahu sian marga Benjamin, jala halak Heber asli do ahu. Sahalak Parise na mangihuthon Patik i do ahu,  huulahon do sian nasa gogongku laho mambahen na hansit tu* huria i, jala ndang adong sian patik i na so huulahon.  Alai alani Kristus i, gabe harugian* do di ahu saonari angka paruntungan najolo i.  Gariada, molo martimbangkon parbinotoan na mansai arga, i ma parbinotoan taringot tu Kristus Jesus Tuan i, gabe harugian do i sude di ahu. Hutinggalhon jala gabe songon sampah do i di ahu alani Kristus, anggiat boi ahu marale-ale*  jala mangihuthon ibana. Ndang hudok nunga huulahon na sintong ala mangulahon Patik i, alai ala porsea do ahu tu Kristus i. Ai di Debata, halak na porsea tu Kristus i do na mangulahon na sintong. 10  On do na ringkot di ahu, i ma mananda ibana, mamboto huaso na pahehehon ibana, marsitaonon jala mate songon ibana, 11  asa boi ahu mandapot haheheon* na parjolo sian angka na mate. 12  Ndang hudok naung hujalo i manang nunga sun denggan ahu. Alai marsitutu do ahu asa boi dapothu i, ai nunga dipillit Kristus Jesus ahu. 13  Hamu angka dongan, ndang hudok naung dapothu i. Alai huulahon do on: Huhalupahon do angka naung salpu jala marsitutu do ahu mangadu angka na laho ro. 14  Marlojong do ahu asa mandapot upa, i ma panjouon ni Debata marhite Kristus Jesus tu hangoluan na di surgo. 15  I ma nian na dipingkiri jala dipatuduhon sian pangalaho ni angka na togu haporseaonna. Alai molo na asing do na dipingkiri hamu, patuduhonon ni Debata do songon dia marpangalaho na denggan. 16  Alai molo nunga togu haporseaonta, tongtong ma taulahon songon naung taulahon saleleng on. 17  Hamu angka dongan, tiru hamu ma ahu jala tiru hamu ma angka halak na marpangalaho hombar tu sitiruon naung hupatuduhon hami tu hamu. 18  Ai godang do na mangaleai hamatean ni Kristus di hau partinaonan* i. Jotjot do hupaboa taringot nasida tu hamu, alai saonari hupaboa ma muse taringot tu nasida mardongan ilu-ilu. 19  Hamatean do ujung ni nasida, butuha ni nasida do debata ni nasida, tihas ni nasida do dianggarhon, jala holan angka na di tano on do dipingkiri nasida. 20  Angka halak na laho mangolu di surgo do hita.* Jala tapaima do sipalua na sian surgo, i ma Tuan Jesus Kristus. 21  Mansai balga do huasona. Marhite huasona i, paubaonna ma pamatangta na gale on gabe songon pamatangna na sangap, jala bahenonna ma tunduk saluhutna tu ibana.

Surat na di toru

Di bahasa Junani Kyrios. Ida di Kamus.
Manang “laho paporsuk-porsukhon”.
Manang boi do “gabe hutinggalhon”.
As. “dapothu Kristus i”. Na nidokna dison, i ma manjalo pasu-pasu ala mangihuthon Kristus.
Manang “haheheon na mula-mula”.
Ida di Kamus.
Manang “Warga negara surgo do hita”.