Pilemon 1:1-25

  • Hata pamungka (1-3)

  • Holong dohot haporseaon ni si Pilemon (4-7)

  • Elek-elek ni si Paulus taringot tu si Onesimus (8-22)

  • Hata panutup (23-25)

1  Sian si Paulus na tarhurung alani Kristus Jesus dohot sian donganta si Timoteus, mandapothon si Pilemon dongan saulaon na huhaholongi hami,  si Appia donganta borua, si Arkippus dongannami saparjuangan, dohot huria na adong di jabum:  Anggiat ma dilehon tu hamu asi ni roha na mansai balga i dohot hadameon na sian Debata, i ma Amangta dohot sian Tuan Jesus Kristus.  Tongtong do ahu mandok mauliate tu Debatangku tingki hudok goarmu di tangiangku.  Ai jotjot do hubege taringot tu haporseaon dohot holong na pinatudum tu Tuan Jesus dohot tu sude angka na badia i.  Hutangiangkon do asa haporseaonmu dohot haporseaon ni na asing, mangonjar rohamu laho mamboto angka na denggan naung tajalo marhite Kristus.  Ai las situtu do rohangku jala tarapul do ahu mambege holong ni roham, ai nunga dipatogu ho roha* ni angka na badia i.  Ala apostel ni Kristus ahu, marhak do ahu mamarenta ho mangulahon manang aha na ingkon sibahenonmu,  alai dumenggan ma ahu mangelek-elek tu ho marhite holong. Ai ahu si Paulus, nunga matua jala saonari dipenjarahon alani Kristus Jesus. 10  Mangelek-elek do ahu tu ho alani anakku si Onesimus. Nunga gabe songon amangna ahu saleleng di penjara ahu. 11  Ndang marguna ibana najolo di ho, alai saonari marguna do ibana di ho dohot di ahu. 12  Husuru do ibana mulak tu ho, i ma haholongan ni rohangki. 13  Lomo do nian rohangku dison ibana rap dohot ahu, manggantihon ho mangkobasi ahu saleleng di penjara ahu alani barita na uli. 14  Alai ndang olo ahu mangulahon manang aha pe anggo ndang sian pamotoanmu. Ndang lomo rohangku mamaksa ho mangulahon angka na denggan, ai naeng ma nian sian nionjar ni roham ulahononmu i. 15  Alani i do ra ditadingkon ibana ho satongkin, asa boi ibana di ho saleleng ni lelengna. 16  Saonari ndang holan songon hatoban be ibana, alai nunga gabe dongan sahaporseaon. Holong do rohangku tu ibana, alai umholong ma nian roham, ai hatobanmu do ibana jala dongan sahaporseaonmu. 17  Alani i molo donganmu do ahu didok roham, denggan ma jalo ibana songon na manjalo ahu. 18  Alai molo adong dibahen ibana na sala tu ho manang marutang ibana tu ho, ahu ma mananggung i. 19  Ahu si Paulus, ahu sandiri do na manurathon surat on jala marjanji do ahu manggarar utangna i tu ho. Alai ho pe marutang hosa do tu ahu. 20  Ale dongan, hirim do rohangku urupanmu ahu alani Tuan i. Patogu ma rohangku* di bagasan Kristus i. 21  Pos do rohangku oloanmu pangidoanki. Alani i ma hubahen surat on tu ho, ai huboto do bahenonmu lobi sian na hupangido i. 22  Asing ni i, parade ma inganan di ahu. Ai hirim do rohangku paluaonna ahu alani angka tangiangmuna. 23  Sahat ma tabe ni si Epapras tu ho, donganku na tarhurung alani Kristus Jesus, 24  dohot tabe ni si Markus, si Aristarkus, si Demas, dohot si Lukas, i ma angka donganku saulaon. 25  Anggiat ma dijalo hamu asi ni roha ni Tuan Jesus Kristus na mansai balga i, alani haburjuon na pinatudumuna.

Surat na di toru

Manang “holong”.
Manang “holongku”.