Pangungkapon 19:1-21

  • Puji ma Debata alani panguhumanna (1-10)

    • Pesta parbogason Anak ni Biru-biru i (7-9)

  • Na hundul di hoda na bontar (11-16)

  • Pesta na balga na pinarade ni Debata (17, 18)

  • Ditaluhon ma binatang buas i (19-21)

19  Dung salpu i, hubege ma soara na gogo sian banua ginjang songon soara ni torop suru-suruan. Ninna ma, “Halleluya!* Debata nampuna haluaon, hamuliaon, dohot huaso.  Tigor jala sintong do panguhumanna. Ai nunga diuhum Debata boru-boru na so hasea i, na jorbut i, na manegai tano on marhite seks na so patut* na niulahonna. Jala nunga dibaloshon Debata mudar ni angka naposona na pinamate ni borua i.”  Satongkin i, didok nasida ma paduahalihon, “Halleluya!* Jala nangkok ma timus ni na manutung borua i saleleng ni lelengna.”  Dung i marsinggang ma 24 sintua dohot opat kerubim* i, disomba nasida ma Debata na hundul di habangsa i. Ninna ma, “Amen! Halleluya!”*  Tarbege do muse soara sian habangsa i mandok, “Puji ma Debatanta, hamu sude angka naposona, na lea nang na sangap na mangkabiari Ibana.”  Dung i hubege ma soara na songon soara ni torop suru-suruan dohot songon soara ni aek na godang dohot songon soara ni ronggur na gogo. Didok nasida ma, “Halleluya,* ai nunga gabe raja Jahowa Debatanta na Sun Hinagogo i!  Marlas ni roha ma hita jala tapuji ma Ibana. Ai nunga jumpang tingki pesta parbogason ni Anak ni Biru-biru i jala nunga mangarade na laho dongan saripena.  Ai nunga dilehon tu ibana abit linen na arga, na bontar, jala na ias. Abit linen na arga i manggombarhon ulaon na tigor na niulahon ni angka na badia i.”  Dung i didok suru-suruan i ma tu ahu, “Surathon ma on: Marlas ni roha ma angka na digokkon tu pesta parbogason ni Anak ni Biru-biru i.” Didok ma muse tu ahu, “On do angka hata na sintong na sian Debata.” 10  Marsinggang ma ahu tu patna laho manomba ibana. Alai didok ibana ma tu ahu, “Unang! Unang bahen songon i! Ai hatoban do ahu songon ho dohot angka donganmu na rap saulaon dohot ho paboahon taringot tu Jesus. Somba ma Debata! Ai taringot tu Jesus do na pinaboa ni angka panurirang.” 11  Dung i huida ma tarbungka langit jala adong ma sada hoda na bontar. Na hundul di hoda i, didok do Haposan jala na Sintong. Di bagasan hatigoran do ibana manguhumi dohot marporang. 12  Songon api na marnala-nala do matana jala godang do mahkota di uluna. Adong do tarsurat goarna, alai ndang adong na mamboto i, ia so holan ibana. 13  Dipangke ibana do abit na hona* mudar jala goarna i ma Hata ni Debata. 14  Mangihut do sian pudina angka tentara ni banua ginjang na hundul di hoda na bontar. Nasida marabit linen na arga, na bontar, jala na ias. 15  Kaluar ma sian pamanganna podang na ganjang jala na tajom laho mambunu angka bangso. Parmahanonna ma nasida dohot tungkot bosi. Asing ni i, dege-degeonna ma inganan pamoroan ni anggur na manggombarhon rimas ni Debata na Sun Hinagogo i. 16  Di abit luarna, di hae-haena tarsurat do sada goar, Raja ni angka raja dohot Tuan ni angka tuan. 17  Dung i huida ma muse sada suru-suruan jongjong di jolo ni mata ni ari. Gogo ma soarana manjou sude pidong na martonga-tonga langit, ninna ma, “Ro ma hamu marpungu tu pesta na balga na pinarade ni Debata. 18  Allang hamu ma daging ni angka raja, angka komandan militer, angka baoa na gogo, angka hoda dohot angka na hundul di ginjangna. Songon i nang daging ni sude jolma, halak na merdeka manang hatoban, na lea manang na sangap.” 19  Dung i huida ma binatang buas i, angka raja na di tano on, dohot angka tentara ni nasida marpungu laho marporang mangalo ibana na hundul di hoda i dohot mangalo tentarana. 20  Ditangkup ma binatang buas i dohot panurirang na mangkatahon na so tutu* na mambahen angka tanda halongangan* di jolona. Panurirang i ma na mangaliluhon angka halak na manjalo tanda ni binatang buas i dohot angka na manomba patungna. Mangolu do na dua i disampathon tu laut api barerang na marnala-nala. 21  Alai na asing, dibunu ma dohot podang na ganjang na kaluar sian pamangan ni ibana na hundul di hoda i. Sude ma pidong butong mangallang bangke ni nasida.

Surat na di toru

Manang “Puji ma Jahowa”.
Manang “parmainanon”. Di bahasa Junani porneia. Ida di Kamus.
Manang “Puji ma Jahowa”.
Kerubim, i ma suru-suruan na balga huasona.
Manang “Puji ma Jahowa”.
Manang “Puji ma Jahowa”.
Manang boi do “dipispishon”.
Manang “panurirang pargapgap”.
Manang “mukjizat”.