Pangungkapon 18:1-24

  • “Nunga rumpak Babel na Balga” (1-8)

    • “Kaluar ma hamu sian ibana, hamu naposongku” (4)

  • Marlungun ni roha ala nunga rumpak Babel i (9-19)

  • Marlas ni roha banua ginjang ala nunga rumpak Babel i (20)

  • Didabu ma tu laut Babel i songon batu (21-24)

18  Dung salpu i, huida ma suru-suruan na asing turun sian banua ginjang. Balga do huasona jala tiur do tano on dibahen hamuliaonna.  Gogo ma didok ibana, “Nunga rumpak, nunga rumpak Babel na Balga i! Nunga gabe inganan ni suru-suruan na jahat ibana, jala nunga gabe inganan partabunian ni angka suru-suruan na jahat,* inganan ni pidong na ramun dohot inganan ni angka na dihagigihon.  Ai nunga mabuk sude bangso binahen ni anggurna, i ma hisap-hisap ni dagingna laho mangulahon seks na so patut.* Diulahon ibana do seks na so patut* dohot angka raja na di tano on. Mamora do angka partiga-tiga na di tano on alani borua i, ai ndang maila ibana papunguhon angka barang na arga.”  Dung i hubege ma soara na asing sian banua ginjang mandok, “Kaluar ma hamu sian ibana, hamu naposongku! Asa unang parsidohot hamu tu angka dosana jala asa unang dohot hamu hona uhum.  Nunga martimbun dosana sahat tu langit jala diingot Debata do sude hajahatonna.  Baloshon ma tu ibana songon na binahenna tu na asing. Balos ma i dua hali lompit songon na binahenna i. Lehon ma dua hali lompit siinumon tu ibana di bagasan mangkuk na dipangke ibana paradehon siinumon.  Bahen ma tu ibana sitaonon dohot lungun ni roha songon godang ni hasangapon dohot hamoraonna. Ai sai didok ibana do di rohana, ‘Ratu do ahu, ndang sahalak na mabalu ahu jala ndang hilalaonku lungun ni roha.’  Alani i, masa ma bala tu ibana di bagasan sadari, i ma hamatean, lungun ni roha, dohot haraparon. Tutungon ma ibana di bagasan api, ai Debata Jahowa na gogo i do na manguhumi ibana.  “Tingki diida angka raja na di tano on timus ni api na manutung borua i, tangis ma nasida jala dipungkuli nasida ma diri ni nasida alani lungunna. Ai diulahon angka raja i do seks na so patut* tu borua i jala rap mamora dohot ibana. 10  Mandao-dao ma nasida jongjong ala mabiar do nasida diuhum songon borua i. Ninna ma, ‘Ago ngeri nai, ago ngeri nai kota Babel na balga jala na togu i. Ai di bagasan sajom do masa panguhuman i tu ho.’ 11  “Dohot do angka partiga-tiga na di tano on tangis jala marlungun ni roha alani ibana. Ai ndang adong be na manuhor sude tiga-tiga ni nasida, 12  i ma mas, perak, angka batu na arga, mutiara, abit linen na arga, abit na piolet, sutra, abit na rara songon api, dohot angka barang na sian hau na angur, gading, hau na arga, tombaga, bosi, dohot marmar. 13  Adong do muse kulit manis, parmasak, daupa, miak na angur, haminjon, anggur, miak jetun, topung, gandum, lombu, biru-biru, angka hoda, angka kareta, angka hatoban, dohot angka jolma. 14  Ndang adong be di ho angka parbue ni hau na malamun na dihalomohon ni roham. Ndang adong be di ho angka sipanganon na tabo dohot angka barang na arga jala ndang jumpangmu be i. 15  “Mandao-dao ma jongjong angka partiga-tiga na manggadis angka tiga-tigana i, na mamora sian borua i. Ai mabiar do nasida diuhum songon borua i. Gabe tangis ma nasida jala marlungun ni roha. 16  Ninna nasida ma, ‘Ago ngeri nai, ago ngeri nai kota na balga i, na marabit linen na arga, na piolet, na rara songon api, dohot na mamangke godang perhiasan na sian mas, angka batu na arga dohot mutiara. 17  Ai di bagasan sajom do mago hamoraonmu na godang i!’ “Mandao-dao do jongjong sude kapten ni kapal, angka panompang, anak buah ni kapal, dohot sude na mansari di laut. 18  Dung diida nasida timus ni api na manutung borua i, gogo ma didok nasida, ‘Adong ma kota na asing na songon kota na balga i?’ 19  Dibahen nasida ma orbuk tu ulu ni nasida. Huhut tumatangis jala marlungun ni roha, gogo ma didok nasida, ‘Ago ngeri nai, ago ngeri nai kota na balga i. Ai mamora do sude angka parkapal alani ibana, hape di bagasan sajom nunga mago ibana!’ 20  “Marlas ni roha ma ho banua ginjang dohot hamu angka na badia, angka apostel, dohot angka panurirang. Ai nunga didabu Debata panguhuman tu borua i humongkop hamu!” 21  Dung i diangkat sada suru-suruan na gogo ma sada batu na songon batu gilingan na balga jala didabuhon ma i tu laut. Ninna ma, “Songon i ma hatop ni Babel, kota na balga i disampathon. Jala ndang idaon be ibana. 22  Ndang tarbege be sian ho soara ni parende na marharpa, soara ni parmusik, parsuling, dohot partarompet. Ndang adong be di ho angka tukang jala ndang tarbege be sian ho soara ni gilingan batu. 23  Ndang adong be sinondang ni lampu di ho. Ndang tarbege be sian ho soara ni pangoli dohot na niolina. Ai angka na sangap di tano on do angka partiga-tigam jala marhite ulaon hadatuonmu dililuhon ho do sude bangso. 24  Ai jumpang do di ho mudar ni angka panurirang, angka na badia, dohot angka na tarbunu di tano on.”

Surat na di toru

Manang boi do “alogo na marrasun, hata surirang”.
Manang “parmainanon”. Di bahasa Junani porneia. Ida di Kamus.
Manang “parmainanon”. Di bahasa Junani porneia. Ida di Kamus.
Manang “parmainanon”. Di bahasa Junani porneia. Ida di Kamus.