Pangungkapon 13:1-18

  • Ruar ma binatang buas na pitu uluna sian laut (1-10)

  • Ruar sian tano on binatang buas na dua tandukna (11-13)

  • Patung ni binatang buas na pitu uluna (14, 15)

  • Tanda dohot nomor ni binatang buas i (16-18)

13  Jongjong do naga i di topi ni laut. Dung i huida ma kaluar sada binatang buas sian laut, pitu uluna jala sampulu tandukna. Di ganup tandukna i, adong sada mahkota jala di ganup uluna i adong angka goar na mangaleai Debata.  Songon babiat do huida binatang buas i. Patna songon pat ni gompul* jala babana songon baba ni singa. Dilehon naga i do hagogoonna, habangsana dohot huasona na balga tu binatang buas i.  Huida ma sada sian uluna i songon naung hea luka parah, alai nunga malum lukana i. Gabe longang ma sude jolma na di tano on jala diihuthon ma ibana.  Disomba nasida ma naga i, ala dilehon naga i do huaso tu binatang buas i. Disomba nasida ma muse binatang buas i jala ninna ma, “Ise ma na songon binatang buas i? Jala ise ma na boi mangalo i?”  Dilehon do tu binatang buas i huaso laho marhata manggang dohot mangaleai Debata. Jala dilehon do huaso tu ibana mangulahon i saleleng 42 bulan.  Dileai binatang buas i ma Debata, goarna, ingananna tading, i ma surgo dohot angka na maringanan di banua ginjang.  Diloas do binatang buas i marporang mangalo angka na badia jala manaluhon nasida. Dilehon do muse huaso tu ibana laho mangarajai saluhut marga, bahasa dohot bangso.  Sude ma jolma na maringanan di tano on manomba ibana. Jala sian mulai ditompa portibi on,* ndang hea disurat goar ni nasida di buku hangoluan ni Anak ni Biru-biru naung hona bunu i.  Manang ise na marpinggol, dibege ma i. 10  Manang ise na ingkon dipenjarahon, ingkon dipenjarahon do ibana. Jala manang ise na mambunu dohot podang, ingkon dibunu do ibana dohot podang. Alani i, ingkon martahan jala marhaporseaon do angka na badia i. 11  Dung i huida ma binatang buas na asing kaluar sian tano on. Adong dua tandukna songon tanduk ni anak ni biru-biru, alai songon naga do ibana mangkatai. 12  Di jolo ni binatang buas na parjolo i, dipangke ibana do huaso ni binatang buas na parjolo i. Dibahen ibana ma tano on dohot sude pangisina manomba binatang buas na parjolo i, naung malum sian lukana na parah i. 13  Dibahen ibana do muse angka tanda halongangan,* jala dipaturun ibana do api sian langit tu tano on di jolo ni angka jolma. 14  Diloas do ibana mambahen angka tanda halongangan* di jolo ni binatang buas na parjolo i, laho mangaliluhon angka jolma na di tano on. Disuru ibana do angka jolma na di tano on mambahen patung ni binatang buas na parjolo i, na luka binahen ni podang jala naung malum i. 15  Diloas do ibana mangalehon hosa tu patung ni binatang buas i. Gabe mangkatai ma patung i jala disuru patung i ma asa dibunu angka jolma na so olo manomba ibana. 16  Dipaksa ibana ma sude halak, na lea dohot na sangap, na mora dohot na pogos, na merdeka dohot hatoban, asa mambahen tanda di tangan siamun ni nasida manang di pardompahan ni nasida. 17  Ndang adong halak na boi manggadis dohot manuhor situhoron, molo so adong tanda i di ibana, i ma goar ni binatang buas i manang nomor na patuduhon goarna i. 18  Manang ise na marbisuk dietong ma nomor ni binatang buas i, ai bilangan ni jolma do i, i ma 666. Holan halak na marbisuk do na mangantusi i.

Surat na di toru

Manang “beruang”.
Ida di surat na di toru na di 1 Petrus 1:20.
Manang “mukjizat”.
Manang “mukjizat”.