Pangungkapon 12:1-17

  • Sahalak borua, sada anak baoa dohot ulok naga (1-6)

  • Marporang si Mikhael mangalo naga i (7-12)

    • Didabuhon ma naga i tu tano on (9)

    • Diboto Sibolis do otik nama tingkina (12)

  • Dibahen naga i ma na hansit tu borua i (13-17)

12  Dung i huida ma sada tanda na balga di langit. Adong sahalak borua na maruloshon mata ni ari jala adong bulan di toru ni patna. Adong do muse sada mahkota na sian 12 bintang di atas ni uluna.  Mardenggan daging* do borua i. Mangangguhi ma ibana alani hansitna, ai nunga dapot tingkina laho tubu-tubuan.*  Huida ma muse tanda na asing di langit. Adong ma sada naga na balga na rara songon api. Pitu uluna jala sampulu tandukna. Di ganup uluna i, adong sada mahkota.  Disarat ihur ni naga i ma sapartolu bintang na di langit jala didabu ma i tu tano on. Sai jongjong do naga i paimahon di jolo ni borua na laho tubu-tubuan* i. Asa molo dung tubu-tubuan ibana, bondutonna ma poso-posona i.  Dung i ditubuhon borua i ma sada anak baoa na laho marmahani sude bangso marhite tungkot bosi. Alai pintor diboan ma anakna i tu Debata na hundul di habangsana.  Lari ma borua i tu padang pasir,* i ma inganan naung pinarade ni Debata tu ibana. Disi ma ibana dilehon mangan saleleng 1.260 ari.  Dung i masa ma porang di banua ginjang. Marporang ma si Mikhael* rap dohot suru-suruanna mangalo naga i. Jala naga i rap dohot suru-suruanna mangalo nasida.  Alai talu ma naga i dohot suru-suruanna jala ndang diloas be nasida maringanan di banua ginjang.  Didabuhon ma naga na balga i tu tano on. Ibana do ulok na parjolo i, na laos margoar Sibolis dohot Setan* na mangaliluhon saluhut portibi on. Didabuhon do ibana rap dohot angka suru-suruanna. 10  Hubege ma soara na gogo sian banua ginjang mandok, “Nunga ro haluaon sian Debata tu jolma. Nunga dipatuduhon huasona, nunga dipajongjong Harajaonna jala nunga marhuaso Kristusna. Ai nunga didabuhon tu toru na manudu angka donganta, arian nang borngin di jolo ni Debata! 11  Nunga ditaluhon nasida ibana marhite mudar ni Biru-biru i dohot marhite hata na pinaboa ni nasida. Rade do nasida mangalehon ngolu ni nasida sahat tu na mate. 12  Alani i marlas ni roha ma ho ale banua ginjang dohot sude hamu na maringanan disi! Alai marjea ma tano i dohot laut i! Ai nunga turun Sibolis i tu ho, jala muruk situtu do ibana, ai nunga diboto ibana otik nama tingkina.” 13  Dung diboto naga i naung didabu ibana tu tano on, dibahen ibana ma na hansit tu borua na manubuhon anak baoa i. 14  Alai dilehon ma tu borua i dua habong ni lali na balga, asa boi ibana habang tu ingananna di padang pasir,* dao sian ulok i. Disi ma ibana dilehon mangan saleleng sada masa, dua masa, dohot satonga masa.* 15  Dung i diutahon ulok i ma aek na songon sunge di pudi ni borua i, asa diauphon sunge i borua i. 16  Alai diurupi tano i ma borua i. Dibungka tano i ma babana jala dibondut ma sunge na niutahon ni naga i. 17  Tarrimas ma naga i tu borua i. Laho ma ibana mamorangi angka pinomparna na tading dope, i ma na mangoloi angka parenta ni Debata dohot na paboahon taringot tu Jesus.

Surat na di toru

Manang “Hamil”.
Manang “partus”.
Manang “partus”.
Manang “halongonan”.
Lapatanna “Ise na songon Debata?”
Ida di Kamus.
Manang “halongonan”.
I ma tolu satonga masa.