Mateus 9:1-38

  • Dipamalum Jesus sahalak na lumpu (1-8)

  • Dipillit Jesus si Mateus (9-13)

  • Sungkun-sungkun taringot tu na marpuasa (14-17)

  • Boru ni si Jairus; sahalak borua manjama abit luar ni Jesus (18-26)

  • Dipamalum Jesus na mapitung dohot na ngungu (27-34)

  • Bidang sisabion alai otik panabi (35-38)

9  Masuk ma Jesus tu parau jala taripar ma ibana mulak tu hutana.  Diboan ma tu ibana sahalak baoa na lumpu na peak di tandu. Dung diida Jesus haporseaon ni nasida, didok ma tu na lumpu i, “Pos ma roham anaha! Nunga disesa be dosam.”  Alai deba sian siboto surat i mandok sama nasida, “Na mangaleai Debata do baoa on.”  Diboto Jesus do na di bagasan pingkiran ni nasida, ninna ma, “Boasa na jahat dipingkiri hamu di bagasan rohamuna?  Dia do ummura dohonon, ‘Nunga disesa dosam’ manang, ‘Hehe jala mardalan ma’?  Alai, asa diboto hamu na marhuaso do Anak ni jolma i di tano on laho manesa dosa.” Dung i didok ibana ma tu na lumpu i, “Hehe ma, boan ma tandumi jala mulak ma ho tu jabum.”  Dung i, jongjong ma ibana jala mulak tu jabuna.  Tingki diida natorop i na masa i, longang ma roha ni nasida. Dipuji nasida ma Debata na mangalehon huaso sisongon i tu jolma.  Dung i laho ma Jesus sian i, diida ibana ma sahalak baoa na hundul di kantor pajak, goarna si Mateus. Didok Jesus ma tu ibana, “Ihuthon ma ahu.” Hehe ma ibana jala diihuthon ma Jesus. 10  Di pudian ni ari, tingki mangan Jesus di jabu ni si Mateus, marroan ma angka sijalo pajak* dohot angka pardosa, mangan raphon Jesus dohot angka siseanna. 11  Marnida i, didok halak Parise ma tu angka sisean ni Jesus, “Boasa rap mangan gurumuna i rap dohot sijalo pajak* dohot angka pardosa?” 12  Mambege i, ninna Jesus ma, “Ndang porlu pangubati tu halak na sehat, tu na marsahit do. 13  Laho ma hamu, parsiajari ma lapatan ni hata on, ‘Asi ni roha do na huhalomohon ndang pelean.’ Ai ndang na laho manjou halak na mangulahon na sintong ahu umbahen na ro, alai manjou pardosa i do.” 14  Dung i, ro ma angka sisean ni si Johannes tu Jesus jala disungkun nasida ma, “Boasa ndang marpuasa angka siseanmu songon hami dohot halak Parise?” 15  Dung i didok Jesus ma tu nasida, “Ndang tagamon marsak angka ale-ale ni pangoli saleleng rap dope nasida dohot pangoli i, ndang i? Alai na ro ma tingkina buatonna ma pangoli i sian nasida, dung pe i asa marpuasa nasida. 16  Ndang adong halak na mandungkaphon abit na imbaru tu abit naung buruk, ai molo songon i lam ribakkonon ni pandungkap na baru i ma abit i, jala lam bidang ma na maribak i. 17  Dung i, ndang adong halak na mambahen anggur na baru tu inganan* naung buruk. Ai gabe ribak do ingananna i, use ma anggur i jala sega ma inganan ni anggur i. Alai, tu inganan na imbaru do disimpan anggur na baru jala rap denggan ma duansa.” 18  Tingki mangkatai dope Jesus tu nasida, ro ma sahalak panggomgomi* marsinggang tu ibana jala ninna ma, “Nunga mate be borungku saonari, alai ro ma ho jala jama ma ibana asa mangolu muse.” 19  Dung i, hehe ma Jesus dohot siseanna mangihuthon ibana. 20  Jala ro ma sahalak borua na marsahit naung 12 taon ndang hea so bulanna. Didapothon ma Jesus sian pudi jala dijama ma rambu ni abit luarna. 21  Ai sai didok ibana do di rohana, “Holan abitna i pe hujama, malum do ahu.” 22  Dung i, dibereng Jesus ma tu pudi jala diida ma borua i, ninna ma, “Pos ma roham borungku! Haporseaonmi do mambahen ho malum.” Jala satongkin i malum ma borua i. 23  Tingki masuk Jesus tu jabu ni panggomgomi i, diida ibana ma angka parsuling jala torop halak na mangandungi. 24  Dung i didok Jesus ma, “Kaluar ma hamu sian on, ndang na mate dakdanak i alai na modom do.” Jadi diparengkeli nasida ma Jesus. 25  Dung kaluar natorop i, masuk ma Jesus, ditiop ma tangan ni dakdanak i jala hehe ma ibana. 26  Gabe rarat ma barita taringot tu na masa i di sude luat i. 27  Tingki laho Jesus sian i, adong ma dua halak baoa na mapitung mangihuthon ibana huhut jou-jou, “Anak ni si Daud, asi ma roham tu hami.” 28  Dung masuk Jesus tu sada jabu, didapothon angka baoa na mapitung i ma ibana. Disungkun Jesus ma nasida, “Porsea do hamu na boi ahu pamalumhon hamu?” Dialusi nasida ma, “Porsea do hami Tuan.” 29  Dung i dijama Jesus ma mata ni nasida huhut ma didok, “Alani haporseaonmuna i, saut ma i tu hamu.” 30  Dung i marnida ma nasida. Alai tangkas do dipasingot Jesus nasida, ninna ma, “So tung adong manang ise na mamboto on.” 31  Alai disi kaluar nasida, dibaritahon nasida ma taringot tu Jesus di sude luat i. 32  Dung laho nasida, diboan halak ma tu Jesus sahalak baoa na ngungu* ala sinonggopan ni suru-suruan na jahat. 33  Alai dung dipalao suru-suruan na jahat i, mangkatai ma baoa na ngungu i. Alani i, longang ma natorop i jala ninna nasida ma, “Ndang hea dope masa na songon on di Israel.” 34  Alai didok halak Parise i ma, “Marhite huaso ni pangulu ni suru-suruan na jahat do ibana palaohon suru-suruan na jahat i.” 35  Didalani Jesus do sude kota dohot huta laho mangajari di angka sinagoga* ni nasida, mamaritahon barita na uli taringot tu Harajaon jala pamalumhon nasa sahit dohot nasa hagaleon. 36  Mangida natorop i asi ma rohana, ai disusai do nasida jala ndang disarihon,* dos songon biru-biru na so adong parmahanna. 37  Dung i ninna Jesus ma tu siseanna, “Bidang do nian sisabion, alai otik do angka panabi. 38  Alani i, pangido ma tu Nampuna sisabion i asa disuru angka panabi tu sisabionna i.”

Surat na di toru

Manang “sijalo beo”.
Manang “sijalo beo”.
Tas na sian kulit ni binatang.
Sahalak ketua ni sinagoga.
Manang “na bisu”.
Manang “parguruan”. Ida di Kamus.
As. “dilangkati do nasida jala dibolongkon”.